Shoka tatu ilongo kuJesus

kombinga yonkalamwenyo yuukwanegumbo

Oshike tashi kwathele ondjokana yi kale nombili?

Ondjokana oyi li ehanganitho eyapuki. Jesus sho a pulwa kombinga yokuhengana, okwa yamukula a ti: “Inamu lesha nani kutya petameko Omushiti okwe ya shiti omulumentu nomukiintu? Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe. Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu. . . . Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele. Naangoka ta hokana omuhengwa, oye ota hondele.” (Mateus 19:4-6, 9) Uuna aaihokani taya landula omayele gaJesus nokapu na ngoka ta yi momilalo pondje yondjokana, uukwanegumbo auhe otawu ka kala wa gamenwa nowu na ombili.

Omolwashike ohole yokuhola Kalunga hayi eta ombili muukwanegumbo?

Jesus okwa ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango.” Oshitiyali oshini mbela? Jesus okwa ti: “Hola mukweni [mwa kwatelwa uukwanegumbo woye mboka wu li nawo] ngaashi ngoye wi ihole mwene.” (Mateus 22:37-39) Opo uukwanegumbo wu kale wu na ombili owu na okukala nekwatathano ewanawa naKalunga, molwaashoka ngele owu mu hole, otashi ke wu ningitha wu kale wu holathane.

Ongiini aaihokani taya vulu okukala ya nyanyukilwathana?

Aasamane otaya ka nyanyudha aakulukadhi yawo uuna taya landula oshiholelwa shaJesus. Okwa li e na ohole yokwiiyambela egongalo lye ndyoka li li omukulukadhi gwe gwopathaneko. (Aaefeso 5:25) Jesus okwa ti: “Oshoka nOmuna gwOmuntu ine ya okuyakulwa, ihe okuyakula.” (Mateus 20:28) Jesus ka li kayamukulwa nenge ha takateke mboka ta wilike, ihe okwa li he ya talaleke. (Mateus 11:28) Onkee ano, aasamane naya longithe oonkondopangelo dhawo momukalo ngoka tagu etele ayehe uuwanawa muukwanegumbo.

Aakulukadhi nayo otaya vulu wo okuholela Jesus. Ombiimbeli otayi ti: ‘Kalunga oye omutse gwaKristus.’ Otayi ti wo: “Omulumentu oye omutse gwomukulukadhi.” (1 Aakorinto 11:3) Jesus ka li e wete shi li omutenge kuye okukala ha vulika kuKalunga. Okwa li a simaneka He tagu pu mo. Jesus okwa ti: “Otandi longo aluhe shoka she mu opalela.” (Johannes 8:29) Uukwanegumbo otawu ka kala wa nyanyukwa shili ngele omukulukadhi oha vulika kuukwamutse womusamane gwe noha simaneke Kalunga.

Aavali otayi ilongo shike ketaloko lyaJesus okutala ko aanona?

Jesus okwa li ha kala naanona nokwa li e na ohokwe yokuuva omadhiladhilo gawo nonkene yu uvite. Ombiimbeli otayi ti kutya “Jesus okwi ithana uunona, u ye kuye, a ti: ‘Etheni uunona, u ye kungame.’” (Lukas 18:15, 16) Oshikando shimwe, aantu oya li taya pe uusama aanona aamati, mboka ya li ya popi eitaalo lyawo kombinga yaJesus. Ihe Jesus okwa li a pandula uumati mboka, e ta lombwele mboka taye wu pe uusama a ti: “Inamu lesha nani nando lumwe, sho taku tiwa: ‘Momakana guunona noguuhanona owa longekidhile mo ehambelelo.’”—Mateus 21:15, 16.

Aanona otayi ilongo shike kuJesus?

Jesus okwa tulila po aanona oshiholelwa oshiwanawa shokukala ye hole iinima yopambepo. Sho e na oomvula 12, okwa li a adhika “motempeli, a kuutumba mokati kaalongi Aajuda, te ya pulakene ye te ya pula.” Oshizemo osha li shike? “Ayehe mboka ye mu pulakene, oya kuminwa oondunge dhe nomayamukulo ge.” (Lukas 2:42, 46, 47) Ontseyo ndjoka a li nayo inaayi mu ningitha i inenepeke. Pehala lyaashono, oya li ye mu ningitha a simaneke aavali ye. Ombiimbeli otayi ti: ‘Okwa kala ha vulika kuyo.’—Lukas 2:51.

Opo wu mone uuyelele owundji, tala ontopolwa 14 membo Omalongo gashili gOmbiimbeli ogeni naanaa?a

[Enyolo lyopevi]