Jehova ohe tu konakona omolwouwa wetu

“Omesho Omwene taa tale edu alishe, opo a kwafe neenghono ovo have liameke kuye nomutima aushe.” — 2 OMAF. 16:9.

1. Jehova ohe tu konakona nelalakano lashike?

JEHOVA Tate yetu a wanenena oku tu shii nawa, noku shii nokuli ‘omadiladilo omwenyo’ wetu. (1 Omaf. 28:9) Ndele nande ongaho, ihe tu konakona ashike opo e tu mone omapuko. (Eps. 11:4; 130:3) Ponhele yaasho, okwa hala oku tu amena pahole kukeshe osho tashi dulu okunyona po ekwatafano letu naye ile shi tu kanifife etimaumbwile letu loku ka mona omwenyo waalushe. — Eps. 25:8-10, 12, 13.

2. Jehova oha longifa eenghono daye okukwafela oolyelye?

² Jehova omunaenghono adishe noha mono oinima aishe, nomolwaasho oha dulu okukwafela ovapiya vaye ovadiinini ngeenge tave mu indile ngeenge tava yelekwa. Omafimbo omativali 16:9 otaa ti: “Omesho Omwene taa tale edu alishe, opo a kwafe neenghono ovo have liameke kuye nomutima aushe.” Didilika kutya Jehova oha longifa eenghono daye okukwafela ovo have mu longele nomutima aushe, sha hala okutya, nomutima wa yela nou na omalinyengotomheno a yuka. Ndele iha kwafele ovakengeleledi nosho yo ovanaihelele. — Jos. 7:1, 20, 21, 25; Omayel. 1:23-33.

Natu kaleni hatu ende pamwe naKalunga

3, 4. Otashi ti ngahelipi ‘okweenda pamwe naKalunga,’ noihopaenenwa yOmbibeli ilipi tai dulu oku tu kwafela tu ude ko oshinima sha tya ngaho?

³ Ovanhu vahapu inava itavela kutya Omushiti wevalelwa letu linenenene oha pitike ovanhu va ende pamwe naye meityo lopamhepo. Ndele Jehova okwa hala lela tu ende pamwe naye. Mefimbo lOmbibeli, Henok naNoa ova li va “enda pamwe naKalunga.” (Gen. 5:24; 6:9) Moses okwa li e “likolelela, osheshi a kala a fa e wete ou e he wetike.” (Heb. 11:27) Ohamba David oya li ya enda pamwe naXe womeulu nelininipiko. Oya popya ya ti: ‘[Omwene] eshi e li kolulyo lange, ihandi tengauka.’ — Eps. 16:8.

⁴ Itatu dulu okweenda pamwe naJehova odikilila tu mu kwete momaoko, ndele ohatu dulu okweenda pamwe naye pafaneko. Ngahelipi mbela? Omupsalme Asaf okwa ti: “Handi anyene puove: Ove u kwete nge nawa kolulyo lange. Oto endifa nge pamhangela yoye mwene.” (Eps. 73:23, 24) Oku shi popya paunafangwa, ohatu ende pamwe naJehova ngeenge hatu dulika filufilu komayele aye oo he tu pe okupitila mEendjovo daye nosho yo okupitila ‘momupiya omudiinini nomunaendunge.’ — Mat. 24:45; 2 Tim. 3:16.

5. Jehova oha konakona ngahelipi ovapiya vaye ovadiinini ngaashi xe omunahole, notu na okukala tu udite ngahelipi shi na sha naye?

⁵ Molwaashi Jehova oku hole ovo hava ende pamwe naye, ohe va konakona ngaashi xe omunahole, he va file oshisho, he va amene nohe va hongo. Jehova okwa ti: “Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.” (Eps. 32:8) Lipula kutya: ‘Mbela ohandi kala ngoo ndi liwete handi ende ndi kwete Jehova meke meityo lopafaneko, handi pwilikine keendjovo daye dounongo nondi shii kutya ota pashukile nge pahole? Mbela okushiiva kutya Jehova oko e li ohaku nwefa mo omadiladilo, eendjovo nosho yo oilonga yange? Ngeenge nda nyona, mbela ondi shii ngoo kutya Jehova ke fi Kalunga omukwanyanya, ndele oku li Tate omunahole nomunanghenda oo a hala okukwafela ovanyoni ovo ve livela ombedi va kale vali ve na ekwatafano liwa naye?’ — Eps. 51:19.

6. Oshike osho Jehova ta dulu okuninga e dule ovadali vopanhu?

⁶ Omafimbo amwe, Jehova ota dulu nokuli oku tu kwafela fimbo inatu nyona. Pashihopaenenwa, molwaashi omitima dovanhu odi na omakoto, ota dulu okudidilika mo omauko mai omitima detu. (Jer. 17:9) Monghalo ya tya ngaho, Jehova ota dulu okukatuka eenghatu meendelelo e dule ovadali vopanhu molwaashi “omesho” aye ohaa dulu okumona moule womitima detu, opo a konakone omadiladilo etu. (Eps. 11:4; 139:4; Jer. 17:10) Natu tale kunghee Jehova a li a ungaunga nonghalo oyo ya li ya holoka po monghalamwenyo yaBaruk, oo a li hamushanga nakaume kopofingo komuprofeti Jeremia.

Jehova okwa li a ungaunga naBaruk ngaashi xe omunahole

7, 8. (a) Baruk okwa li lyelye, notashi dulika a li a kulika omahalo mai elipi momutima waye? (b) Ongahelipi Jehova a li a ulikila Baruk okunakonasha kwa fa kwaxe omudali?

⁷ Baruk okwa li hamushanga a pyokoka oo a li a longa noudiinini pamwe naJeremia moshilonga shidjuu shokuudifila Juda omatokolo aJehova. (Jer. 1:18, 19) Pomhito imwe, Baruk oo tashi dulika a li a dja moukwaneumbo wa tumbala okwa li e lihalela “oinima inene.” Baruk otashi dulika a li a kulika omahalo okulihola mwene nosho yo ehalo lokukala a punapala. Kashi na nee mbudi kutya oshike sha li sha lalakanenwa kuBaruk, Jehova okwa li a mona kutya Baruk okwa li a kulika omahalo mai momutima waye. Jehova okwa li a popya diva naBaruk okupitila muJeremia a ti: “Ove owa tya: Woo ame, osheshi Omwene okwa wedela nge oudjuu kouyahame wange. Ame onda loloka kokukema kwange, ndele ihandi mono nande etulumuko.” Opo nee Kalunga okwa weda ko a ti: “Ove oto lihalele oinima inene? Ino i lihalela.” — Jer. 45:1-5.

⁸ Nonande Jehova okwa li a popya naBaruk sha kwata moiti, ka li a popya naye a handuka, ndele okwa li a popya naye monghedi oyo tai ulike kutya oku na ko nasha naye shili ngaashi xe omudali. Osha yela kutya Jehova okwa li a didilika kutya Baruk ke na omutima mwii ile u na oinheya. Jehova okwa li yo e shii kutya Jerusalem naJuda oya li momafiku ayo axuuninwa noka li a hala Baruk a ka punduke pefimbo olo lidjuu. Onghee hano, opo Kalunga a kwafele omupiya waye Baruk a kale e na etaleko la yuka, okwa li e mu dimbulukifa kutya ota ka etela ‘ombelela aishe omupya’ nokwa li a weda ko kutya ngeenge Baruk okwa katuka pandunge ota ka xupa. (Jer. 45:5) Paulelalela, Kalunga okwa li ta lombwele Baruk kutya: ‘Diladila kwaasho tashi ka ningilwa mafiku ovakalimo ovalunde vomuJerusalem naJuda. Kala omudiinini opo u ka xupe, ame ohandi ke ku amena.’ Osha yela kutya Eendjovo daJehova oda li da kuma omutima waBaruk, molwaashi okwa li a lundulula okudiladila kwaye nokwa li a xupa eshi Jerusalem sha ka hanaunwa po omido 17 konima yaasho.

9. Oto nyamukula ngahelipi omapulo oo e li mokatendo?

⁹ Eshi to dilonga kehokololo laBaruk, diladila komapulo nosho yo komishangwa tadi landula: Onghedi omo Kalunga a li a ungaunga naBaruk otai tu hololele shike kombinga yaYe nosho yo shi na sha nanghee ha kala e uditile ovapiya vaye? (Lesha Ovaheberi 12:9.) Okutala komafimbo madjuu oo tu li muo, oshike hatu dulu okulihonga kombinga yomayele oo Kalunga a li a pa Baruk nonghee Baruk a li e linyenga kuo? (Lesha Lukas 21:34-36.) Ongahelipi ovakulunhuongalo Ovakriste tava dulu okuhopaenena Jehova mokukala ve na ko nasha novapiya vaye, ngaashi Jeremia a li a ninga? — Lesha Ovagalati 6:1.

Jesus okwa li ha hopaenene Xe mokuulikila ovanhu ohole

10. Oshike sha ningifa Jesus a kale a wana okukala Omutwe weongalo lopaKriste?

¹⁰ Pefimbo olo la tetekela Oukriste, Jehova okwa li a ulikila oshiwana shaye ohole okupitila movaprofeti nosho yo okupitila movapiya vaye vamwe ovadiinini. Kunena, ohole ya tya ngaho oi liwetikile unene mOmutwe weongalo lopaKriste, Jesus Kristus. (Ef. 1:22, 23) Onghee hano, Jesus okwa popiwa pafaneko membo lEhololo e li odjona i “nomesho a-7, oo eemhepo odo 7 daKalunga, da tumwa medu alishe.” (Eh. 5:6) Jesus oha dulu okumona oinima aishe nawanawa, molwaashi okwa pewa omhepo iyapuki yaKalunga. Naye oha mono osho tu li momitima noha mono keshe osho tashi ningwa po.

11. Kristus ota dana onghandangala ilipi, nongahelipi onghedi omo ha ungaunga nafye tai ulike kutya oha hopaenene omaukwatya aXe?

¹¹ Ngaashi Jehova, Jesus naye ke fi omupolifi oo ha kala te tu tale okudja meulu. Ohe tu konakona pahole. Edinafimaneko limwe laJesus “Tate yaalushe,” otali tu dimbulukifa onghandangala oyo Jesus ta ka dana monakwiiwa mokupa aveshe ovo ve na eitavelo tali longo muye omwenyo waalushe. (Jes. 9:5) Kakele kaasho, e li Omutwe weongalo lopaKriste, Kristus oha dulu okulinyengifa Ovakriste va pyokoka pamhepo ovo ve na ehalo liwa, naunene tuu ovakulunhuongalo va hekeleke nova yandje omayele kwaavo ve a pumbwa. — 1 Tes. 5:14; 2 Tim. 4:1, 2.

12. (a) Eenhumwafo odo da li da shangelwa omaongalo aheyali okuAsia Linini otadi holola shike kombinga yaJesus? (b) Ovakulunhuongalo ohava hopaenene ngahelipi oikala yaKristus ngeenge tava ungaunga noshiunda shaKalunga?

¹² Eenhumwafo odo da li da shangelwa ovakulunhuongalo vomomaongalo aheyali okuAsia Linini otadi ulike kutya Kristus oku na ko nasha neenghono noshiunda. (Eh. 2:1–3:22) Meenhumwafo odo, Jesus okwa li a ulika kutya oku wete osho sha li tashi ningwa po meongalo keshe, noku na ko nasha neenghono novashikuli vaye. Osho osho shi li yo ngaho kunena, unene tuu eshi emoniko lEhololo tali wanifwa “mefiku lOmwene.”a (Eh. 1:10) Kristus ohe tu ulikile ohole okupitila movakulunhuongalo, ovo ve li ovafita veongalo. Ota dulu okulinyengifa ‘eeshali odo di li ovanhu’ di tu hekeleke, di tu twe omukumo, ile di tu pe omayele oo twa pumbwa. (Ef. 4:8, NW; Oil. 20:28; lesha Jesaja 32:1, 2.) Mbela oho tale ko eenghendabala odo ovakulunhuongalo hava ningi di li euliko kutya Kristus oku na ko nasha naave pauhandimwe?

Jehova ohe tu kwafele pefimbo la wapala

13-15. Kalunga oha dulu okunyamukula omailikano etu meenghedi dilipi? Yandja oihopaenenwa.

¹³ Mbela opa li ngoo efimbo limwe wa li wa ilikana kuJehova wa mana mo to mu pula ekwafo, ndele eilikano loye tali nyamukulwa eshi wa li wa talelwa po kOmukriste umwe a pyokoka pamhepo nokwe ku twa omukumo? (Jak. 5:14-16) Ile tashi dulika wa mona ekwafo olo okupitila moshipopiwa osho sha li sha yandjwa pokwoongala kwopaKriste ile okupitila moishangomwa yetu. Jehova oha nyamukula luhapu omailikano etu meenghedi da tya ngaho. Pashihopaenenwa, konima eshi omukulunhuongalo wonhumba a li a yandja oshipopiwa, omumwameme umwe oo a li a longelwa oilonga youhenouyuki oivike inini fimbo omukulunhuongalo oo ina yandja oshipopiwa osho, okwa li a ya kuye, ndele haku ka nyenyeta shi na sha noupyakadi waye, ndele ponhele yaasho okwa li e ke mu pandula omolwoitwa yonhumba oyo a longifa moshipopiwa. Oitwa oyo omukulunhuongalo a li a longifa moshipopiwa oya li ya kuma onghalo yomumwameme oo, noya li ye mu hekeleka neenghono. Omumwameme oo ka li tuu a hafa eshi a li pokwoongala efiku olo!

¹⁴ Shi na sha nekwafo olo omunhu ha dulu okumona ngeenge okwa ilikana kuJehova, natu tale koshihopaenenwa shovanadolongo vatatu ovo va li ve lihonga oshili yOmbibeli ofimbo ve li modolongo ndele tava ningi ovaudifi inava ninginifwa. Omolwoshiningwanima shimwe sha kwatela mo elongifo leenghono, ovanadolongo aveshe ova li va kufwa omaufembanghenda onhumba. Osho osha li sha ningifa ovanadolongo va tukule oshibofa. Ova li va tokola kutya konima yoshuumbululwa efiku la landula ko itava ka shunifa ouyasha vavo, opo va ulike kutya ove li omhinge neendjidikila odo va li va tulilwa po. Ovanadolongo vatatu ovo va li ovaudifi inava ninginifwa ova li pokati kamumhaka namumhaka. Ngeenge ova kufa ombinga mounashibofa oo, itava ka dulika komayele aJehova oo e li mOvaroma 13:1. Ndele ngeenge ova kala inava kufa ombinga mounashibofa oo, ovanadolongo vakwao ovo va li va handuka ova li tave ke va kwatela onghone.

¹⁵ Molwaashi ovanadolongo ovo vatatu kava li tava dulu okushakena va popye, ova li va ilikana kuJehova e va pe ounongo. Aveshe vatatu ova li va ninga etokolo la faafana, keshe umwe okwa li a tokola kutya ota ka anya okulya oshuumbululwa mefiku la landula ko. Eshi ovakeleli vodolongo va li va ila ko ouyasha, ovaudifi ovo vatatu kava li va hangwa ve na ouyasha. Kava li tuu va hafa eshi “Omuudi womailikano” a li popepi navo! — Eps. 65:3.

Natu taalele onakwiiwa tu na omukumo

16. Ongahelipi oilonga yokuudifa tai ulike kutya Jehova oku na ko nasha novanhu ovo va fa eedi?

¹⁶ Oilonga yokuudifa oyo tai longwa mounyuni aushe oi li yo onghedi imwe omo Jehova ha ulike kutya oku na ko nasha novanamitimadiwa, kashi na nee mbudi kutya ove li peni. (Gen. 18:25) Luhapu Jehova oha longifa ovaengeli va wilike ovapiya vaye va ye kovanhu ovo va fa eedi, nokuli nonande ovanhu ovo ohava kala moitukulwa omo inamu udifilwa natango onghundana iwa. (Eh. 14:6, 7) Pashihopaenenwa, Kalunga okwa li a longifa omweengeli a wilike Filippus, omuudifi wevangeli womefelemudo lotete a ka popye nelenga lokuEtiopia noku li yelifile Omishangwa. Mbela oshidjemo osha li shike? Omulumenhu oo wokuEtiopia okwa li a tambula ko onghundana iwa ndele ta ningi omushikuli waJesus a ninginifwa.b — Joh. 10:14; Oil. 8:26-39.

17. Omolwashike tuhe na okukala tu na oshisho sha pitilila shi na sha nonakwiiwa?

¹⁷ ‘Efeto lokudala’ ile tu tye eewoo doudjuu odo da xunganekwa otadi ka twikila eshi onghalelo ei yoinima i li pokuxula po. (Mat. 24:8) Pashihopaenenwa, eendado doikulya otadi dulu okulonda neenghono omolwomatomheno e lili noku lili, ngaashi okuhapupala kwovanhu kombada yedu, onghalo yomhepo ile omolweenghalo dopamaxupilo. Otashi dulika shi kale shidjuu okumona oilonga, novanailonga otashi dulika va pulwe va longe eevili dihapu. Kashi na nee mbudi kutya oshike tashi ningwa po, ovo hava pitifa komesho oinima yopamhepo nove na ‘eisho li li nawa’ kave na okukala ve na oisho ya pitilila. Ove shii kutya Kalunga oku va hole note ke va fila oshisho. (Mat. 6:22-34) Pashihopaenenwa, natu tale kunghee Jehova a li a fila oshisho Jeremia pefimbo lidjuu lexulilo laJerusalem mo 607 K.O.P.

18. Jehova okwa li a ulika ngahelipi kutya oku hole Jeremia eshi Jerusalem sha li sha kondekwa?

¹⁸ Lwopexulilo lefimbo lokukondekwa kwaJerusalem kOvababilon, Jeremia okwa li a idililwa moluumbo lodolongo e li onghwate. Mbela okwa li ta ka hanga oikulya peni? Ngeno okwa li ehe li modolongo, ngeno otashi dulika e ke likongela oikulya, ndele okwa li e likolelela filufilu kovanhu ovo va li ve mu dingilila, novanhu vahapu ovo ova li ve mu tonde. Ndele nande ongaho, Jeremia okwa li e lineekela muKalunga, oo a li e mu udanekela kutya ote ke mu fila oshisho ndele hamovanhu. Mbela Jehova okwa li ngoo a wanifa po eendjovo daye? Heeno, okwa li e di wanifa po. Okwa li a shilipaleka kutya Jeremia okwa mona ‘omungome umwe efiku keshe fiyo omingome domoshilando da pwa po.’ (Jer. 37:21) Jeremia, Baruk, Ebed-Melek nosho yo vamwe ova li va xupa pefimbo olo londjala, lomikifi nolefyo. — Jer. 38:2; 39:15-18.

19. Otu na okukala twa tokola toko okuninga shike eshi twa taalela onakwiiwa?

¹⁹ “Omesho Omwene ohaa pashukile ovayuki nomatwi aye ohaa endekele komailikano avo.” (1 Pet. 3:12) Mbela oho kala wa hafa eshi Xo womeulu he ku konakona? Mbela oho kala u udite wa amenwa mokushiiva kutya omesho aye otae ku konakona omolwouwa woye? Ngeenge osho, kala wa tokola toko okutwikila okweenda pamwe naye, kashi na nee mbudi kutya onakwiiwa otai ka kala ya tya ngahelipi. Ohatu dulu okukala noushili kutya Jehova ota ka twikila alushe okukonakona ovapiya vaye aveshe ovadiinini ngaashi xe omunahole. — Eps. 32:8; lesha Jesaja 41:13.

[Omashangelo opedu]

Oto dulu okuyelifa?

• Ongahelipi hatu dulu okuulika kutya ohatu ‘ende pamwe naKalunga’?

• Jehova okwa li a ulika ngahelipi kutya oku hole Baruk?

• E li Omutwe weongalo lopaKriste, Jesus oha hopaenene ngahelipi omaukwatya aXe?

• Omeenghedi dilipi hatu dulu okuulika kutya otwe lineekela Kalunga momafimbo aa madjuu?

[Omafano pepandja 13]

Ngaashi Jeremia a li a ungaunga naBaruk, ovakulunhuongalo Ovakriste ohava hopaenene Jehova mokuulika kutya ove na ko nasha noshiwana shaye

[Efano pepandja 15]

Jehova ota dulu ngahelipi oku tu kwafela pefimbo la wapala?