Ovanyasha, dimbulukeni Omushiti weni Munenenene paife!

“Dimbulukwa Omushiti woye momafiku ounyasha woye.” — OMUUD. 12:1.

1. Jehova okwa popya shike osho tashi ulike kutya okwe lineekela ovanyasha ovo tave mu longele?

JEHOVA oha tale ko ovanyasha Ovakriste ve na ondilo notava tulumukifa ngaashi omume. Okwa li nokuli a xunganeka kutya mefiku “lehomono” lOmona waye, ovalumenhu novakainhu ovanyasha otava ka kala ve ‘lilongekida nehalo liwa’ okulonga oilonga yOmona. (Eps. 110:3) Exunganeko olo otali wanifwa pefimbo letu, eshi ovanhu vahapu ihava dulika kuJehova nove litula ashike moinima yavo vene nove hole oimaliwa. Ndele Jehova okwa li e shii kutya ovanyasha ovo tave ke mu longela otava ka kala va yooloka ko kovanhu va tya ngaho. Ovamwatate novamwameme ovanyasha, Jehova okwe mu lineekela.

2. Okudimbuluka Jehova okwa kwatela mo shike?

² Diladila ashike nghee Kalunga ha kala e udite ngeenge e wete ovanyasha tave mu dimbuluka e li Omushiti wavo Munenenene. (Omuud. 12:1) Ndele okudimbuluka Jehova okwa kwatela mo shihapu shihe fi ashike oku mu diladila. Okwa kwatela mo okukatuka eenghatu, sha hala okutya, okulonga osho tashi mu hafifa nokweefa eemhango nomafinamhango aye e tu wilike monghalamwenyo yetu yakeshe efiku. Osha kwatela mo yo okukala twe lineekela Jehova, tu shii kutya oku na ko nasha nonghalonawa yetu. (Eps. 37:3; Jes. 48:17, 18) Mbela osho u udite ngaho shi na sha nOmushiti woye Munenenene?

“Nomutima woye aushe lineekela Omwene”

3, 4. Jesus okwa li a ulika ngahelipi kutya okwe lineekela Jehova, nomolwashike sha fimana kufye okulineekela Jehova kunena?

³ Jesus Kristus oku li oshihopaenenwa sha denga mbada shokukala e lineekela Kalunga. Okwa kala metwokumwe neendjovo dOmayeletumbulo 3:5, 6, odo tadi ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” Okafimbo kaxupi konima eshi Jesus a ninginifwa, okwa li a holokelwa kuSatana, oo a li a kendabala oku mu hekela omauhamba nosho yo efimano lounyuni. (Luk. 4:3-13) Ndele Jesus ka li a pukifwa kuSatana, molwaashi okwa li e shii kutya ‘oupuna washili nefimano nomwenyo, oyo ondjabi yelininipiko noyokutila Omwene.’ — Omayel. 22:4.

⁴ Ovanhu vahapu kunena ovanalwisho nove lihole vovene. Molwaashi otwa dingililwa kovanhu va tya ngaho, oshi li pandunge okulandula oshihopaenenwa shaJesus. Otu na yo okukaleka momadiladilo kutya Satana ota ka ninga keshe osho ta dulu opo a kufe mo ovapiya vaJehova mondjila ya finana oyo tai twala komwenyo. Okwa hala ovanhu aveshe va ende mondjila ya mbwalangadja oyo tai twala kehanauno. Ovanyasha, inamu efa nandenande Satana e mu pukife! Ponhele yaasho, kaleni mwa tokola toko okudimbuluka Omushiti weni Munenenene. Kaleni mwe mu lineekela filufilu, nokulalakanena “okukalamwenyo kwashili” oko ku li pokuuya. — 1 Tim. 6:19, OB-1986.

Ovanyasha, kaleni ovanaendunge!

5. Ou udite ngahelipi shi na sha nonakwiiwa younyuni ou?

⁵ Ovanyasha ovo hava dimbuluka Omushiti wavo Munenenene ohava kala ve na eendunge ve dule ovanyasha ovo ihave mu dimbuluka. (Lesha Epsalme 119:99, 100.) Molwaashi ohava tale ko oinima ngaashi Kalunga he i tale ko, ove shii nawa kutya ounyuni ou li pokuxula po. Nonande inamu kala monghalamwenyo efimbo lile, nopehe na omalimbililo, omwa didilika kutya ovanhu vahapu ove na oumbada shi na sha nonakwiiwa nohave lipula shi na sha nayo. Ngeenge ou li natango mofikola, otashi dulika wa hongwa shi na sha nokunyatekwa kwomudingonoko, epupyalo lomhepo mounyuni aushe, embuwaleko nosho yo omaupyakadi amwe a yukila oko. Ovanhu ohave lipula neenghono shi na sha noiningwanima oyo, ndele Eendombwedi daJehova odo adike di udite ko nawa kutya oiningwanima oyo oi li oshitukulwa shedidiliko olo tali ulike kutya ounyuni waSatana ou li pokuxula po. — Eh. 11:18.

6. Ovanyasha vamwe ova pukifwa ngahelipi?

⁶ Shi nyikifa oluhodi, ovapiya vaKalunga vamwe ovanyasha kave li vali oupafi noihava diladila vali kutya ounyuni ou ou li pokuxula po. (2 Pet. 3:3, 4) Ovanyasha vamwe ova kokelwa momanyono a kwata moiti kookaume vai nomolwokutala omafano oipala. (Omayel. 13:20) Itashi ka kala tuu shi nyikifa oluhodi okukala inatu hokiwa vali kuKalunga, naunene tuu eshi tu li popepi nexulilo! Ponhele yaasho, lihonga kwaasho sha li sha ningilwa Ovaisrael mo 1473 K.O.P. eshi va li va onga onhanda pOluhaela laMoab ofimbo va li popepi elela nokuya mEdu lEudaneko. Mbela oshike sha li she va ningilwa?

Ovaisrael ova li va findwa kuSatana eshi va li pokuya mEdu lEudaneko

7, 8. (a) Satana okwa li a longifa onghedi yekonda ilipi pOluhaela laMoab? (b) Satana oha longifa onghedi yekonda ilipi kunena?

⁷ Nale, Satana okwa li a hala okuningifa Ovaisrael vaha mone efyuululo olo va li va udanekelwa. Molwaashi Satana ka li a pondola eshi a li ta longifa omuprofeti Bileam a finge Ovaisrael, okwa li a longifa onghedi yekonda, a kendabala oku va ningifa va kale inava hokiwa kuJehova. Okwa li a longifa ovakainhu Ovamoab ve na ekonda va koke Ovaisrael, nokwa li a pondola Ovaisrael vamwe. Ovaisrael ova li va hovela okuhaela novakainhu Ovamoab nova li tava longele Baal-Peor. Nonande efyuululo lavo li na ondilo, sha hala okutya, Edu lEudaneko, ola li popepi elela, Ovaisrael ve li 24 000 lwaapo ova fya. Kasha li tuu shi nyikifa oluhodi! — Num. 25:1-3, 9.

⁸ Kunena, otu li popepi elela nedu leudaneko olo la denga mbada elela, onghalelo ipe yoinima. Ngaashi ashike nale, Satana ota longifa natango oluhaelo opo a pukife oshiwana shaKalunga. Omifikamhango dopaenghedi oda xutuka neenghono noluhaelo oli li oshinima sha tambulwa ko, noushenge owa talwa ko u li ehoololo lopaumwene. Omukainhu umwe Omukriste okwa ti: “Ounona vange ohave lihongo ashike kutya Kalunga ina hokwa oushenge nokuya momilele ngeenge omunhu ina hombola ile ina hombolwa peumbo nosho yo kOlupale lOuhamba.”

9. Oshike tashi dulu okuningwa po pefimbo ‘lonhemo younyasha,’ nongahelipi ovanyasha tava dulu okuungaunga nonghalo ya tya ngaho?

⁹ Ovanyasha ovo hava dimbuluka Omushiti wavo Munenenene ove shii kutya omilele odi li oshali iyapuki nohadi dulifa ovanhu va dale ounona. Onghee hano, ove shii kutya omunhu oku na ashike okuya momilele monghedi oyo ya ufwa kuKalunga, sha hala okutya, mohombo. (Heb. 13:4) Ndelenee pefimbo ‘lonhemo younyasha,’ pefimbo opo omahalo omilele haa kala e na eenghono notaa dulu okupukifa okudiladila kwomunhu, kashipu okudiinina oukoshoki wopaenghedi. (1 Kor. 7:36, NW) Ou na okuninga po shike ngeenge owa kwatwa komadiladilo mai? Ilikana kuJehova wa mana mo opo e ku kwafele u diladile oinima oyo ya yuka. Jehova oha pwilikine alushe kwaavo have mu ilikana va mana mo. (Lesha Lukas 11:9-13.) Okupopya kombinga yoinima oyo ya yuka nosho yo oyo tai pameke eitavelo otashi dulu okukwafela omunhu a kale ta diladila oinima oyo ya koshoka.

Lalakaneneni omalalakano e li pandunge!

10. Okudiladila kuhe li pandunge kulipi tu na okuhenuka, notu na okulipula omapulo elipi?

¹⁰ Etomheno limwe molwaashi ovanyasha vahapu mounyuni ve li moukakombolilifa nohava lalakanene ashike omalihafifo omolwaashi kave na ‘ehololo,’ sha hala okutya, ihava wilikwa kuKalunga nokave na eteelelo la twa li na sha nonakwiiwa. (Omayel. 29:18) Ova fa Ovaisrael vopefimbo laJesaja ovo va li ihava landula vali ewiliko laJehova, va li ashike tava lalakanene ‘ehafo nenyakuko, tava li ombelela nokunwa omaviinyu.’ (Jes. 22:13) Ponhele yokukala wa hala okukala nonghalamwenyo ya tya ngaho, omolwashike ito diladila shi na sha neteelelo likumwifi olo Jehova a udanekela ovapiya vaye ovadiinini? Ngeenge ou li omunyasha to longele Kalunga, mbela owa teelela nodjuulufi ounyuni mupe? Mbela oho ningi eenghendabala da mana mo opo u ‘kale neendunge fimbo, wa teelela ewanifo leteelelo lelao’ olo Jehova e ku udanekela? (Tit. 2:12, 13) Enyamukulo loye komapulo oo otali ka nwefa mo omalalakano oo to ke litulila po.

11. Omolwashike Ovakriste ovanyasha ovo ve li natango mofikola ve na okulihonga noudiinini?

¹¹ Ounyuni owa hala ovanyasha va longife eenghono davo momalalakano e na sha noinima yomounyuni. Ovanyasha ovo mu li natango mofikola omu na okulihonga noudiinini opo mu mone ehongo liwa lopetameko. Omu na okudimbuluka kutya, elalakano lokulihonga kali fi ashike okumona oilonga iwa ndele okukala yo tamu longifwa meongalo nokutunga eongalo nokukala ovaudifi vOuhamba hava pondola. Opo mu hange elalakano olo, omu na okulihonga nghee mu na okukala hamu popi nawa, hamu diladila pandunge nokukala hamu tomhafana navamwe nengungumano nonefimaneko. Ndelenee ovanyasha ovo hava konakona Ombibeli nohava kendabala okutula moilonga omafinamhango ayo mokukalamwenyo kwavo ohava mono ehongo la denga mbada kuhe na vali notave litulile po ekanghameno liwa opo va pondole monghalamwenyo nova ka mone omwenyo waalushe. — Lesha Epsalme 1:1-3.a

12. Omaukwaneumbo opaKriste oku na okuhopaenena oshihopaenenwa shilipi?

¹² MuIsrael shonale, ovadali ova li ve na oshinakuwanifwa sha kwata moiti shokuhonga ounona. Ehongo olo ola li la kwatela mo oinima aishe yomonghalamwenyo, unene tuu oinima yopamhepo. (Deut. 6:6, 7) Onghee hano, ovanyasha Ovaisrael ovo va li va dulika kovadali vavo nosho yo kovakulunhu vamwe ovatilikalunga ova li va mona eshiivo, ounongo, omayele, eudeko nova li ve na eenghono dokudiladila, omaukwatya a pumba oo haa kala ashike e niwe kwaavo have lihongo kombinga yaKalunga nosho yo oipango yaye. (Omayel. 1:2-4; 2:1-5, 11-15) Kunena, omaukwaneumbo opaKriste nao oku na okuyandja elitulemo la faafana kehongo la tya ngaho.

Ovanyasha pwilikineni komayele aavo ve mu hole

13. Ovanyasha vamwe ohava pewa omayele elipi, nomolwashike ve na okukala va lungama?

¹³ Ovanyasha ohava pewa omayele kovanhu ve lili noku lili, mwa kwatelwa ovo hava yandje omayele e na sha nomaifano, ovo luhapu have va pe ashike omayele e na sha nanghee tava dulu okupondola mounyuni. Ovanyasha, ilikaneni kuKalunga e mu wilike eshi tamu diladila shi na sha nomayele a tya ngaho, tamu longifa Eendjovo daye nosho yo oishangomwa oyo hai yandjwa kongudu yomupiya omudiinini nomunaendunge. Eshi mwa konakona Ombibeli, omwa shiiva nawa kutya ovanyasha nosho yo ovo vehe na owino ovo unene ve li oishonekwa yaSatana. Pashihopaenenwa, moshikunino shaEden, Eva oo a li ehe na owino okwa li a pwilikina kondaka yaumwe e lili, Satana, oo a li ine mu ulikila nande ohole. Onghalo ngeno inai ka kala tuu i lili ngeno Eva okwa pwilikinine kuJehova oo a li e mu ulikila ohole meenghedi di lili noku lili! — Gen. 3:1-6.

14. Omolwashike tu na okupwilikina kuJehova nokovadali vetu Ovakriste?

¹⁴ Ovanyasha, Omushiti weni Munenenene oku mu hole shili, nohole yaye ohe i ulike nelinyengotomheno la yuka. Jehova okwa hala mu kale mwa hafa fiyo alushe, onghee hano, ngaashi omudali omunahole, ota ti: “Apa ondjila, ei mu nokweenda nayo.” (Jes. 30:21) Ngeenge ou na ovadali Ovakriste ovo ve hole Jehova shili, ou na ekwafo la wedwa po. Pwilikina nefimaneko komayele avo ngeenge to litulile po omalalakano. (Omayel. 1:8, 9) Kakele kaasho, ova hala yo u mone omwenyo, oo u dule kokule oupuna ile etumbalo lomounyuni ou. — Mat. 16:26.

15, 16. (a) Ohatu dulu okukala nelineekelo lilipi muJehova? (b) Oshilihongomwa sha fimana shilipi hatu lihongo moshimoniwa shaBaruk?

¹⁵ Ovanyasha ovo hava dimbuluka Omushiti wavo Munenenene ove na onghalamwenyo i li paunafangwa, ve na elineekelo kutya Jehova ‘i te ke va efa noite ke va fiya po nande.’ (Lesha Ovaheberi 13:5.) Molwaashi oikala iwa ya tya ngaho otai kondjifafana naayo younyuni, otu na okukala twa lungama tuha nwefwe mo komhepo younyuni. (Ef. 2:2) Shi na sha naasho, tala koshihopaenenwa shahamushanga waJeremia, Baruk, oo a li ko pefimbo lidjuu lomafiku axuuninwa aJerusalem, oo a li a twala fiyo opehanauno loshilando osho mo 607 K.O.P.

¹⁶ Otashi dulika Baruk a li a hala oinima yopamaliko. Ndele Jehova okwa li e shi didilika nokwa li e mu londwela pahole ehe likongele “oinima inene.” Baruk okwa li a ulika kutya omulininipiki nomunaendunge molwaashi okwa li a pwilikina kuJehova nokwa li a xupa eshi Jerusalem sha li sha hanaunwa po. (Jer. 45:2-5) Mepingafano naasho, ovanhu ovo va li ko pefimbo limwe naBaruk, ovo va li ve likongela “oinima inene” nova li inava pitifa komesho okulongela Jehova, ova li va kanifa oinima yavo aishe eshi Ovakaldi (Ovababilon) va li va kwata ko Jerusalem. Ovanhu vahapu ova li yo va fya. (2 Omaf. 36:15-18) Oshimoniwa shaBaruk otashi tu kwafele tu mone kutya okukala tu na ekwatafano liwa naKalunga okwa fimanenena ku dule oupuna nosho yo etumbalo lounyuni ou.

Hopaenena ovanhu ovo ve li oihopaenenwa iwa

17. Omolwashike Jesus, Paulus naTimoteus ve li oihopaenenwa iwa kovapiya vaJehova vokunena?

¹⁷ Eendjovo daKalunga odi na oihopaenenwa ihapu iwa yavamwe oyo tai tu kwafele opo tu dule okweenda mondjila oyo tai twala komwenyo. Pashihopaenenwa, Jesus okwa li e na ounghulungu wa denga mbada e dule ovanhu aveshe, ndele nande ongaho, okwa li a yandja elitulemo koshinima osho tashi dulu okweetela ovanhu ouwa tau kalelele, “evangeli louhamba.” (Luk. 4:43) Omuyapostoli Paulus okwa li a efa po eifano li holike opo a dule okulongela Jehova pauyadi, nokwa li a longifa efimbo laye nosho yo eenghono daye mokuudifa onghundana iwa. Timoteus, ‘omona shili meitavelo,’ okwa li a hopaenena oshihopaenenwa shiwa shaPaulus. (1 Tim. 1:2) Mbela Jesus, Paulus naTimoteus ova li ve lipa oushima omolwonghedi yokukalamwenyo oyo va li va hoolola okulalakanena? Hasho nandenande! Paulus okwa ti nokuli kutya oinima oyo i li mounyuni “oimbodi yongaho” moku i yelekanifa noufembanghenda wokulongela Kalunga. — Fil. 3:8-11.

18. Omumwatate umwe omunyasha okwa ninga elunduluko linene lilipi, nomolwashike ine lipa oushima?

¹⁸ Ovanyasha vahapu Ovakriste kunena ohava hopaenene eitavelo laJesus, laPaulus nosho yo laTimoteus. Pashihopaenenwa, omumwatate umwe omunyasha oo a li e na oilonga hai futu nawa okwa hokolola a ti: “Molwaashi ohandi dulika komafinamhango Ombibeli, onda kala handi yelwa luhapu koilonga. Ndele nande onda li handi mono oimaliwa ihapu, onda li ndi udite nda fa handi shikula omhepo. Eshi nda li nda ya kovahona vofeema yetu ndele handi va lombwele kutya onda hala okuya moukalele wefimbo li yadi, ova li va udanekela nge meendelelo okufuta nge oimaliwa ihapu i dulife oyo nda li handi mono nale, tava diladila kutya ohandi ka twikila oku va longela. Ndele onda li nda tokola toko okuya. Ovanhu vahapu kava li ve udite ko kutya omolwashike nda efa po eifano olo li holike opo ndi ye moilonga yefimbo li yadi, ndelenee onde shi ninga molwaashi onda hala okukala filufilu metwokumwe nokuliyapulila kwange Kalunga. Molwaashi paife ohandi yandje elitulemo kokulongela Kalunga, onda hafa neenghono nondi udite nda wanenwa, oinima oyo itai dulu okweetifwa koimaliwa ile ketumbalo.”

19. Ovanyasha otava ladipikwa va ninge ehoololo li li pandunge lilipi?

¹⁹ Ovanyasha omayovi mounyuni aushe, ova ninga omatokolo opandunge ngaashi omunyasha oo a popiwa mokatendo ka tetekela. Onghee hano, ovanyasha ngeenge tamu diladila shi na sha nonakwiiwa, kalekeni efiku laJehova momadiladilo. (2 Pet. 3:11, 12, NW) Inamu kala mwa hala okukala ngaashi ovo tava longifa ounyuni pauyadi, ndele ponhele yaasho, pwilikineni kwaavo ve mu hole shili. Okuliongelela “omamona meulu” oko onghedi ya denga mbada oyo tai ke ku etela omauwa taa kalelele. (Mat. 6:19, 20; lesha 1 Johannes 2:15-17.) Heeno, ovanyasha dimbulukeni shili Omushiti weni Munenenene. Mokuninga ngaho, Jehova ote ke mu nangeka noupuna.

[Eshangelo lopedu]

Oto dimbuluka?

• Ongahelipi hatu dulu okuulika kutya otwe lineekela Kalunga?

• Ehongo la denga mbada olilipi?

• Oilihongomwa ilipi hatu dulu okulihonga kuBaruk?

• Oolyelye ve li oihopaenenwa iwa, nomolwashike?

[Efano pepandja 21]

Jehova oha yandje ehongo la denga mbada kuhe na vali