Aagundjuka, kolekeni ehalo lyeni lyokulongela Jehova

“Dhimbulukwa Omushiti gwoye momasiku guugundjuka woye.”—OMUUV. 12:1.

1. Ehiyo lini lya li lya hiywa aanona yomuIsraeli?

OOMVULA 3 500 lwaampono dha piti, Moses omupolofeti gwaJehova okwa li a lombwele aasaaseri naalumentu aakuluntu yomuIsraeli a ti: “Gongalekeni oshigwana ashihe, aalumentu, aakiintu naanona . . . , opo shaa ngoka te yi uvu, oti ilongo okutila OMUWA Kalunga keni nokudhiginina oohapu adhihe dhompango ndjika.” (Deut. 31:12) Ndhindhilika kutya oolye ya li ya lombwelwa ya gongale omolwelongelokalunga: aalumentu, aakiintu naanona. Eeno, nokuli naamboka aashona oya li yamwe yomwaamboka ya li ya lombwelwa ya pulakene, yi ilonge nokulandula ewiliko lyaJehova.

2. Ongiini Jehova a li u ulike kutya oku na ko nasha naagundjuka megongalo lyopaKriste lyopetameko?

² Methelemumvo lyotango, Jehova okwa li a tsikile okukala e na ko nasha naagundjuka aatilikalunga. Pashiholelwa, okwa li a nwetha mo omuyapostoli Paulus a kwatele mo mudhimwe dhomoontumwafo dhe ndhoka a li a nyolele komagongalo omalombwelo gu ukilila kaagundjuka. (Lesha Aaefeso 6:1; Aakolossa 3:20.) Aagundjuka Aakriste mboka ya tula miilonga omayele ngoka oya huma komeho mokukala ye na olupandu lwokupandula He yawo gwomegulu noya mona omalaleko nuuyamba ge.

3. Aagundjuka kunena ohayu ulike ngiini ehalo lyawo lyokulongela Kalunga?

³ Mbela aagundjuka kunena otaya hiywa ya gongale opo ya longele Jehova? Eeno! Onkee ano otashi nyanyudha oshigwana shaKalunga ashihe okumona kutya aapiya aagundjuka oyendji yaKalunga muuyuni auhe ohaya pulakene kekumagidho lyaPaulus tali ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” (Heb. 10:24, 25) Natango, aanona oyendji ohaya kutha ombinga miilonga yokuuvitha onkundana yUukwaniilwa waKalunga pamwe naavali yawo. (Mat. 24:14) Okuulika ohole yawo yokuhola Jehova nomutima aguhe, aagundjuka omayovi ohaya ninginithwa omvula kehe nohaya nyanyukilwa omalaleko nuuyamba ngoka haga zi mokukala aalongwa yaKristus.—Mat. 16:24; Mark. 10:29, 30.

Taamba ko ehiyo ngashingeyi

4. Aagundjuka oye na okutaamba ko ehiyo lyokulongela Kalunga ngele ye na oomvula ngapi?

⁴ Omuuvithi 12:1 ota ti: “Dhimbulukwa Omushiti gwoye momasiku guugundjuka woye.” Ne aagundjuka omwa pumbwa okukala mu na oomvula ngapi opo mu taambe ko ehiyo ndyoka lyopahole lyokulongela Jehova? MOmanyolo inamu popiwa oomvula dhokondandalunde. Onkee ano, ino kala inoo katuka oonkatu molwaashoka to dhiladhila kutya ngoye omushona natango nokupulakena kuJehova noku mu longela. Kashi na nduno mbudhi kutya owu na oomvula ngapi, oto ladhipikwa wu yamukule kehiyo ndika nopwaahe na okukakadhala.

5. Ongiini aavali taya vulu okukwathela oyana ya ninge ehumokomeho lyopambepo?

⁵ Oyendji yomune otamu kwathelwa mu ninge ehumokomeho lyopambepo komuvali gumwe awike nenge kwaayehe yaali. Momukalo gwa tya ngeyi owa fa Timoteus gwopethimbo lyOmbiimbeli. Sho owala a li okanona, okwa li a longwa omanyolo omayapuki kumeme gwe Eunike nayinakulu Loide. (2 Tim. 3:14, 15) Otashi vulika aavali yoye taye ku dheula momukalo gwa faathana mokukonakona nangoye Ombiimbeli, mokugalikana nangoye nokuya pamwe nangoye kokugongala nokiigongi nosho wo okuya pamwe nangoye muukalele womomapya. Dhoshili, oku ku longa oondjila dhaKalunga oku li oshinakugwanithwa sha simanenena shoka aavali yoye ya pewa kuJehova mwene. Mbela owu na ngaa olupandu lwohole yawo nokunakonasha kwawo nangoye?—Omayel. 23:22.

6. (a) Shi ikolelela kEpisalomi 110:3, okulongela Jehova kwoludhi luni haku mu nyanyudha? (b) Oshike tatu ka kundathana ngashingeyi?

⁶ Natango, sho ne mu li aagundjuka tamu koko, Jehova okwa hala mu ‘tseye ehalo lyaKalunga naashoka oshiwanawa, she mu opalela nosha gwana,’ ngaashi naanaa Timoteus a li a ningi. (Rom. 12:2) Ngele owe shi ningi, oto ka kala ho kutha ombinga momaipyakidhilo gomegongalo, ihe hamolwaashoka aavali yoye ya hala wu shi ninge, ihe omolwaashoka ngoye owa hala okulonga ehalo lyaKalunga. Ngele owa longele Jehova nehalo, otashi ke mu nyanyudha. (Eps. 110:3) Ongiini nduno to vulu okuulika kutya owa hala okukoleka ehalo lyoye lyokupulakena kuJehova nokulandula ewiliko lye? Otatu ka konakona omikalo ndatu dha simana ndhoka mudho to vulu oku shi ninga. Odhi ikolelela kokukonakona, kegalikano nokeihumbato. Natu ke dhi kundathane koogumwe noogumwe.

Kala wu shi Jehova e li omuntu gwolela gwopambepo

7. Ongiini Jesus a li a tula po oshiholelwa e li omwiilongi gwOmanyolo, noshike sha li she mu kwathele e shi ninge?

⁷ Omukalo gwotango ngoka to ku ulika kutya owa hala okukoleka ehalo lyoye lyokulongela Jehova, omokulesha Ombiimbeli kehe esiku. Oto vulu okugwanitha po ompumbwe yoye yopambepo nokukala wu na ontseyo yOmbiimbeli yi na ondilo mokulesha Oohapu dhaKalunga pandjigilile. (Mat. 5:3) Jesus okwe tu tulila po oshiholelwa. Pompito yimwe sho a li e na oomvula 12, aavali ye oya li ye mu adha motempeli “a kuutumba mokati kaalongi Aajuda, te ya pulakene ye te ya pula.” (Luk. 2:44-46) Manga a li okanona, Jesus okwa kala e na ohokwe yokuuva ko Omanyolo. Oshike sha li she mu kwathele e gu uve ko? Nopwaahe na omalimbililo, yina Maria nahe ngoka e mu tekula, Josef, oya li ya dhana onkandangala ya simana. Oya li aapiya yaKalunga mboka ya li ya longo Jesus kombinga yaKalunga okuza kuunona we.—Mat. 1:18-20; Luk. 2:41, 51.

8. (a) Uunake aavali ye na okutameka okuthindila ohole yokuhola Oohapu dhaKalunga moyana? (b) Hokolola oshimoniwa shoka tashi ulike nkene shi li sha simana okudheula aanona okuza sho aashuushuuka.

⁸ Sha faathana, kunena aavali aatilikalunga oye shi nkene shi li sha simana okuthindila momitima dhoyana ehalo lyokukala ya yuulukwa oshili yOmbiimbeli okuza kuunona wawo. (Deut. 6:6-9) Shoka osho omumwameme Omukriste gwedhina Rubi a li a ningi nziya sho okanona ke kokamati Joseph ka valwa. Esiku kehe okwa li he mu leshele mEmbo Lyandje lyOmahokololo gOmbiimbeli. Sho e ende ta koko, okwe mu kwathele i ilonge omanyolo gontumba momutse. Mbela Joseph okwa li a mono uuwanawa medheulo lya tya ngawo? Nziya konima sho i ilongo okupopya, okwa li ha vulu okuhokolola omahokololo gOmbiimbeli niitya ye mwene. Sho a li e na oomvula ntano, okwa li a gandja oshipopiwa she shotango mOsikola yUukalele woPauteokratika.

9. Omolwashike okulesha Ombiimbeli nokutedhatedha kwaashoka wa lesha kwa simana?

⁹ Ne aagundjuka, opo mu humithe komeho uupambepo weni, omu na okukala mu na omukalondjigilile gwokulesha Ombiimbeli kehe esiku ngashingeyi sho mu li aagundjuka nosigo omuukuluntu weni. (Eps. 71:17) Omolwashike okulesha Ombiimbeli taku ke ku kwathela wu hume komeho? Ndhindhilika sho Jesus a li a popi sho a galikana kuHe a ti: “Mboka ye ku tseya, Kalunga awike kashili . . . oyo mboka ye na omwenyo gwaaluhe.” (Joh. 17:3) Dhoshili, sho to tsikile okwiilonga kombinga yaJehova, oto ka mona sha yela kutya oye omuntu gwolela gwopambepo noto ka kokeka ohole yoye yoku mu hola. (Heb. 11:27) Onkee ano, kehe ethimbo sho to lesha Ombiimbeli, longitha ompito ndjoka wu ilonge oshindji kombinga yaJehova. Ipula to ti: ‘Ehokololo ndika otali longo ndje shike kombinga yaJehova e li omuntu gwopambepo? Ongiini oovelise ndhika dhOmbiimbeli tadhi ulike kutya Kalunga oku hole ndje noku na ko nasha nangame?’ Okutedhatedha komapulo ngoka otaku ke ku kwathela wu ilonge nkene Jehova ha dhiladhila nankene ha kala u uvite nosho wo shoka ta pula kungoye. (Lesha Omayeletumbulo 2:1-5.) Ngaashi naanaa omugundjuka Timoteus, oto ka kala wa “tompwa wu itaale” shoka wi ilonga mOmanyolo noto ki inyengithwa wu longele Jehova nehalo.—2 Tim. 3:14, NW.

Ongiini egalikano hali koleke ohole yoye yokuhola Jehova?

10, 11. Ongiini egalikano hali ku kwathele wu koleke ehalo lyoye lyokulongela Kalunga?

¹⁰ Omukalo omutiyali moka to vulu okukoleka ehalo lyoye lyokulongela Jehova nomutima aguhe, omokugalikana. MEpisalomi 65:2, otatu lesha taku ti: “Eeno, ongoye nguka ho uvu omagalikano. Aantu ayehe otaye ya kungoye.” Nokuli nopethimbo sho Israeli sha li oshigwana sha ninga ehangano naKalunga, aakwiilongo mboka ya li ye ya kotempeli ye oya li taya vulu okupopya naye megalikano. (1 Aak. 8:41, 42) Kalunga aantu ayehe ohe ya tala ko ye thike pamwe. Mboka haya vulika kiipango ye, oye na uushili kutya ota ka pulakena kuyo. (Omayel. 15:8) Eeno, “aantu ayehe,” mwa kwatelwa nane mboka aagundjuka.

¹¹ Owu shi shi kutya opo aantu ya kale ye na uukuume uuwanawa, oya pumbwa okukala haya kundathana. Osha yela kutya oho nyanyukilwa okulombwela kuume koye kopothingo omadhiladhilo goye nankene wu uvite. Sha faathana, mokugalikana tashi zi komutima, oho popi nOmushiti gwoye Omunenenene. (Fil. 4:6, 7) Popya naJehova wa fa naanaa to lombwele omuvali omunahole nenge kuume kopothingo ashihe shoka shi li momutima gwoye. Dhoshili, opu na ekwatathano enene pokati kankene ho galikana nankene wu uvite shi na ko nasha naJehova. Oto ka mona kutya shi thike ngaa mpoka pu thike ekwatathano lyoye naJehova, opo ngaa tapu ka kala pu thike okukala omagalikano goye taga ti sha.

12. (a) Omolwashike okugalikana tashi zi komutima kwa kwatela mo oshindji kaashi shi owala oohapu? (b) Oshike tashi ke ku kwathela wu mone kutya Jehova oku li popepi nangoye?

¹² Nonando ongawo, owu na okukaleka momadhiladhilo kutya egalikano tali ti sha olya kwatela mo oshindji kaashi shi owala oohapu. Olya kwatela mo omaiyuvo goye gomeni. Ngele to galikana, kala tu ulike kutya owu na ohole ya hwama, esimaneko nosho wo einekelo muJehova thiluthilu. Sho to mono nkene Jehova ta yamukula omagalikano goye, oto ka mona shi vulithe nale kutya “OMUWA oku li popepi naayehe mboka taye mu ithana.” (Eps. 145:18) Eeno, Jehova ota ka hedha popepi nangoye, note ke ku pa oonkondo opo wu kondjithe Ondiaboli nowu ninge omatokolo gomondjila monkalamwenyo.—Lesha Jakob 4:7, 8.

13. (a) Ongiini okukala kuume kaKalunga kwa li kwa kwathele omumwameme gumwe? (b) Ongiini okukala kuume kaKalunga haku ku kwathele wu ungaunge nomathininiko gookuume?

¹³ Tala nkene Cherie a li a mono oonkondo mokukala e na ekwatathano lyopothingo naJehova. Sho a li mosikola yopombanda, okwa li a sindana epapa molwaashoka okwa li a piti nawa nokwe shi enditha nawa muudhano. Sho a mana osikola, okwa li e na ompito yokupewa iimaliwa yoku mu futila eilongo lyopombanda. Cherie okwa ti: “Osha li tashi hokitha, naawiliki yuudhano naanasikola ooyakwetu oya li taya thiminike ndje ndi shi taambe ko.” Nonando ongawo, okwa li a mono kutya eilongo lyopombanda olya li tali ke mu pula ethimbo lye olindji mokwiilonga nokwiilongekidhila uudhano, ye ta ka kala owala e na ethimbo eshona lyokulongela Jehova. Mbela Cherie okwa li a ningi po shike? Okwa ti: “Sho nda galikana kuJehova, onda tindi iimaliwa yokufutila ndje osikola nonda tameke okukokola ondjila ndi li omukokolindjila gwondjigilile.” Sigo ongashingeyi, oku li ta kokola ondjila uule woomvula ntano. Okwa ti: “Inandi ipa nando uusama. Okukala ndi shi kutya onda ninga etokolo ndyoka tali nyanyudha Jehova ohashi nyanyudha ndje. Dhoshili, ngele owa pititha komeho Uukwaniilwa waKalunga, ayihe yilwe oto ke yi gwedhelwa ko.”—Mat. 6:33.

Eihumbato ewanawa ohali ulike kutya owu na ‘omadhiladhilo ga yela’

14. Omolwashike eihumbato lyoye ewanawa lya simana momeho gaJehova?

¹⁴ Omukalo omutitatu moka to vulu okuulika kutya oto longele Jehova nomutima aguhe ogwo eihumbato lyoye. Jehova oha laleke nuuyamba aagundjuka mboka haya kala ya yogoka pamikalo. (Lesha Episalomi 24:3-5.) Omugundjuka Samuel okwa li a tindi okuholela eihumbato lyomikalo dha nyata lyoyanamati yOmusaaseri Omukuluntu Eli. Eihumbato ewanawa lyaSamuel olya li lyi iwetikile. Ombiimbeli oya ti: “Omumati Samuel okwa koko nokwa li a hokiwa kOMUWA nokaantu.”—1 Sam. 2:26.

15. Omolwomatompelo gamwe geni wu na okukala wu na eihumbato ewanawa?

¹⁵ Otu li muuyuni mbuka wu udha aantu yi ihole, ye hole uuntsa, ihaaya vulika kaakuluntu yawo, ihaaya pandula, ya pota, haya tuwalala noye hole olundundu. Ngaka ogo owala omaukwatya gamwe ngoka ga tumbulwa kuPaulus. (2 Tim. 3:1-5) Onkee ano, otashi vulu okukala eshongo enene okukala neihumbato ewanawa molwaashoka otwa dhingililwa konkalelo ndjika ya kolokosha. Ihe kehe ethimbo to longo shoka shi li mondjila nokwaahakutha ombinga meihumbato ewinayi, oto ku ulika kutya owu li kombinga yaJehova shi na ko nasha nompata yuunamapangelo weshito alihe. (Job 2:3, 4) Oto ka kala wo wa nyanyukwa okutseya kutya oto yamukula keindilo lyaJehova lyopahole, ndyoka tali ti: “Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.” (Omayel. 27:11) Natango, okukala wu shi kutya Jehova okwe ku hokwa otashi ka koleka ehalo lyoye lyoku mu longela.

16. Ongiini omumwameme gumwe a li a nyanyudha omwenyo gwaJehova?

¹⁶ Omumwameme Omukriste gwedhina Carol okwa li a dhiginine omakotampango gOmbiimbeli manga a li omugundjuka sho ha yi kosikola, neihumbato lye ewanawa olya li lyi imonikila. Oshike sha li sha ningwa po? Carol okwa li a shekwa kaanasikola ooyakwawo omolweiyuvo lye lya dheulwa kOmbiimbeli ndyoka lya li ihaali mu pitike a kuthe ombinga mokudhana omasiku gomafudho niituthi yopashigwana. Poompito dha tya ngaaka, omathimbo gamwe okwa li a mono ompito yokuyelithila yalwe kombinga yeitaalo lye. Konima yoomvula odhindji, Carol okwa li a mono okakalata ka za kugumwe ngoka ya li mongundu yimwe naye ngoka a nyola ta ti: “Onda kala aluhe nda hala okukwatathana nangoye nondi ku pandule. Eihumbato lyoye ewanawa noshiholelwa shoye oshiwanawa wu li omugundjuka Omukriste, pamwe nuulaadhi woye shi na ko nasha nomasiku gomafudho owa li wu iwetikile. Ongoye Onzapo yaJehova ndjoka nda li nda mono tango.” Oshiholelwa shaCarol osha li sha gumu noonkondo omunasikola ngoka omukwawo nokonima okwa li a tameke okukonakona Ombiimbeli. Mokakalata hoka a nyolele Carol okwa ti kutya ngashingeyi oku li Onzapo uule woomvula dhi vulithe po 40. Ngaashi Carol, ne aagundjuka kunena mboka mwa dhiginina omakotampango gOmbiimbeli otashi vulika tamu ki inyengitha mboka ye na omitima dhu uka ya tseye Jehova.

Aagundjuka mboka taya hambelele Jehova

17, 18. (a) Owu uvite ngiini shi na ko nasha naagundjuka yomegongalo lyeni? (b) Onakuyiwa ya tya ngiini ya tegelela aagundjuka aatilikalunga?

¹⁷ Atuheni mehangano lyaJehova muuyuni auhe otwa nyanyukwa okumona aagundjuka oyendji omayuvi mboka taya kutha ombinga melongelokalunga lyashili. Aagundjuka mbaka ohaya koleke ehalo lyawo lyokulongela Jehova mokulesha Ombiimbeli kehe esiku, mokugalikana nomokwiihumbata metsokumwe nehalo lyaKalunga. Aagundjuka mboka ye shi okuholelwa otaya nyanyudha aavali yawo noshigwana shaJehova ashihe.—Omayel. 23:24, 25.

¹⁸ Monakuyiwa, aagundjuka aadhiginini otaya ka kala yamwe yomongundu onene ndjoka tayi ka hupa nokuya muuyuni uupe waKalunga mboka e tu uvanekela. (Eh. 7:9, 14) Moka otaya ka nyanyukilwa omalaleko nuuyamba ogendji itaaga vulu okuyalulwa nokutsikila okukokeka olupandu lwawo lwokupandula Jehova, notaya ka vula oku mu hambelela sigo aluhe.—Eps. 148:12, 13.

Oto vulu okuyelitha?

• Ongiini aagundjuka taya vulu okukutha ombinga melongelokalunga lyashili kunena?

• Opo wu mone uuwanawa mokulesha Ombiimbeli, omolwashike okutedhatedha kwa simanenena?

• Ongiini egalikano hali ku kwathele wu hedhe popepi naJehova?

• Eihumbato ewanawa lyAakriste ohali eta iizemo yini?

[Ethano pepandja 17]

Mbela owu na omukalondjigilile gwokulesha Ombiimbeli kehe esiku?