Kala omudiinini opo u hafife omutima waJehova
“[Kala] u neendunge, omumwange, hafifa omutima wange, opo nee handi dulu okunyamukula ovalundili vange.” — OMAYEL. 27:11.
1, 2. (a) Ngaashi sha hokololwa muJob, Satana okwa li a lundila oolyelye? (b) Oshike tashi ulike kutya Satana okwa twikila okushonga ounamapangelo waJehova konima eshi Job a fya?
JEHOVA okwa li a efa Satana a yeleke oudiinini womupiya waye Job. Oshidjemo, oimuna yaJob oya li ya vakwa po, ounona vaye ova fya nokwa li a kwatwa komukifi. Pomhito opo Satana ka li ashike a shonga oudiinini waJob oye aeke. Okwa ti: “Oshipa omoshipa! Omunhu keshe osho e shi na, te shi yandjele omwenyo waye.” Kungaho, Satana okwa li a tula oudiinini wovanhu aveshe momalimbililo ndele hawa Job aeke, nokwa twikila okushonga oudiinini wovanhu aveshe nokuli nokonima eshi Job a fya. — Job 2:4.
2 Omido 600 lwaapo konima eshi Satana a li a yeleka Job, Salomo okwa li a nwefwa mo a shange ta ti: “[Kala] u neendunge, omumwange, hafifa omutima wange, opo nee handi dulu okunyamukula ovalundili vange.” (Omayel. 27:11) Nopehe na omalimbililo, Satana okwa li natango ta shongo ounamapangelo waJehova pefimbo opo. Kakele kaasho, omuyapostoli Johannes okwa li a pewa emoniko omo a li a mona Satana ta hokololifa ovapiya vaKalunga, nokonima yaasho okwa ka umbwa mo meulu okafimbo kanini okudja eshi Ouhamba waKalunga wa dikwa po meulu mo 1914. Satana onghee ngoo ta twikile okushonga oudiinini wovapiya vaKalunga kunena, nokuli naashi tu li momafiku axuuninwa onghalelo ei yoinima youkolokoshi. — Eh. 12:10.
3. Oilihongomwa ya fimana ilipi hatu dulu okulihonga membo laJob?
3 Natu ka taleni koilihongomwa itatu ya fimana oyo hatu lihongo membo laJob. Shotete oshosho kutya, omayeleko oo Job a li a shakeneka okwa holola kutya omutondi wovanhu wolela olyelye nonokutya oye ha pataneke oshiwana shaKalunga. Omutondi oo oSatana Ondiaboli. Oshitivali oshosho kutya, kashi na nee mbudi kutya otu shakeneke omayeleko e fike peni, ohatu ka dula okukanyatela oudiinini wetu ngeenge otu na ekwatafano lopofingo naKalunga. Oshititatu, ngeenge otwa shakeneke omayeleko onhumba ile ongadi, Kalunga ote ke tu kwafela ngaashi ashike a li a kwafela Job. Kunena, Jehova ohe tu kwafele okupitila mEendjovo daye, mehangano laye nosho yo momhepo yaye iyapuki.
Natu dimbuluke alushe kutya omutondi wetu wolela olyelye
4. Olyelye e na okupewa oushima omolweenghalo odo tu wete mounyuni?
4 Ovanhu vahapu inava itavela kutya Satana oko e li. Onghee hano, nonande ova kale tave lipula neenghono kombinga yeenghalo domounyuni, kave shii kutya Satana Ondiaboli oye e li konima yoinima aishe oyo. Ashike ovanhu ovo ve na okupewa oushima omolwomaupyakadi mahapu oo hae va hange. Ovadali vetu votete, Adam naEva, ova li va hoolola okukala va manguluka ko kOmushiti wavo. Okudja opo, omapupi oo a ka landula ko okwa kala taa ningi oinima ihe li pandunge. Ndele nande ongaho, Ondiaboli oyo ya li ya heka Eva a tukululile Kalunga oshibofa. Satana oye ta pangele ounyuni ou wovanhu inava wanenena. Molwaashi ovanhu vahapu mounyuni ova nwefwa mo kuSatana oo e li ‘kalunga kefimbo lounyuni ou,’ ove na oikala ya faafana noyaye ngaashi ounhwa, eenhamanana, efupa, olwisho, oukengeleledi nounashibofa. (2 Kor. 4:4; 1 Tim. 2:14; 3:6; lesha Jakob 3:14, 15.) Oikala ya tya ngaho oya etifa po oinima ngaashi omashilafano opapolotika noopamalongelokalunga, outondwe, oulingilingi nosho yo edundakano, noinima aishe oyo ohai etele ovanhu omaupyakadi mahapu.
5. Otwa hala okuninga po shike omolweshiivo li na ondilo olo tu na?
5 Ovapiya vaJehova ove na eshiivo li na ondilo, molwaashi ove shii kutya olyelye e na okupewa oushima omolweenghalo dounyuni odo tadi ende tadi naipala. Mbela katu udite tu na oshinakuwanifwa shokuya moukalele opo tu ka kwafele vamwe va shiive kutya olyelye lela ha etifa omaupyakadi? Mbela inatu hafa eshi hatu yambidida Kalunga kashili, Jehova, naashi hatu yelifile vamwe kutya ota ka ninga po shike opo a hanaune po Satana nokuxulifa po omaupyakadi ovanhu?
6, 7. (a) Olyelye ha etifa omapataneko oo haa shakenekwa kovalongelikalunga vashili? (b) Ongahelipi hatu dulu okuhopaenena oshihopaenenwa shaElihu?
6 Satana oye e na okupewa oushima omolwomaupyakadi mahapu oo e li mounyuni nomolwomapataneko oo haa shakenekwa koshiwana shaKalunga. Okwa tokola toko oku tu yeleka. Jesus Kristus okwa li a lombwela omuyapostoli Petrus a ti: “Simon, Simon, tala, Satana a indila a pewe oku mu fifa ngaashi oilya.” (Luk. 22:31) Aveshe ovo tava shikula oshikoti shaJesus otava ka shakeneka omaupyakadi monghedi yonhumba ile yongadi. Petrus okwa faafanifa Ondiaboli ‘nonghoshi tai kumbu, notai kongo ou tai mu xwake po.’ Paulus okwa ti: “Aveshe ovo va hala okukala metilokalunga muKristus Jesus, otava ka hepekwa.” — 1 Pet. 5:8; 2 Tim. 3:12.
7 Ongahelipi hatu dulu okuulika kutya otu shii kutya omutondi wetu wolela olyelye ngeenge omwiitaveli mukwetu a hangwa koupyakadi? Ponhele yokuhenuka omwiitaveli mukwetu oo, otu na okuhopaenena Elihu oo a li a popya naJob onga kaume kaye kashili. Otu na okuyambidida omumwatate oo mokukondjifa omutondi wetu, Satana. (Omayel. 3:27; 1 Tes. 5:25) Kashi na nee mbudi kutya otashi pula shike, otu na okukwafela omwiitaveli mukwetu oo a kanyatele oudiinini waye noku hafife omutima waJehova.
8. Omolwashike Satana a li a nyengwa okwiimba Job a fimaneke Jehova?
8 Oshinima shotete osho Satana a li a ningila Job osho okuvakifa po oimuna yaye. Oimuna oyo oya li oupuna waJob notashi dulika oyo ya li hai mu etele oyuuyemo. Job okwa li yo ha longifa oimuna yaye mokulongela Kalunga. Konima ngeenge Job a yapula ovana vaye, oha “fikama ongula inene ndee ta yambe omaxwikiloyambo akeshe umwe womuvo. Osheshi Job a diladila: Ovamwange kashiimba va nyona ndele va sheka Kalunga momitima davo! Osho Job a ninga alushe.” (Job 1:4, 5) Onghee hano, Job okwa li ha yambele Jehova omayambo oinamwenyo pandjikilile. Ndele eshi a ka hangwa komaupyakadi, ka li vali ta dulu okuyambela Jehova omayambo ngaashi a li ha ningi shito. Ka li vali e na ‘eliko’ olo ta dulu okufimanekifa nalo Jehova. (Omayel. 3:9) Ndele nande ongaho, okwa li a fimanekifa Jehova nomilungu daye.
Kala u na ekwatafano lopofingo naJehova
9. Oshinima shilipi tu na osho shi na ondilo neenghono?
9 Ovanhu aveshe otava dulu okukala ve na ekwatafano lopofingo naJehova kashi na nee mbudi kutya oipuna ile eehepele, ovanyasha ile ovanamido, ovovo ve na oukolele ile hasho. Ngeenge otu na ekwatafano lopofingo naKalunga ohatu ka dula okukanyatela oudiinini wetu nohatu ka hafifa omutima waye, kashi na nee mbudi kutya otu shakeneke omaupyakadi a tya ngahelipi. Nokuli novanhu vamwe ovo va li va mona ashike eshiivo loshili linini ova li ovaladi nova li va kanyatela oudiinini wavo.
10, 11. (a) Omumwameme umwe okwa li e linyenga ngahelipi eshi oudiinini waye wa li tau yelekwa? (b) Omumwameme oo okwa yandja enyamukulo la denga mbada lilipi komalundilo aSatana?
10 Diladila koshihopaenenwa shomumwameme Valentina Garnovskaya, oo a li umwe womEendombwedi daJehova dokuRusia odo da li da kanyatela oudiinini wado pefimbo lomayeleko manene ngaashi Job. Mo 1945, Valentina okwa li a udifilwa komumwatate umwe nokwa li e na omido 20 lwaapo pefimbo opo. Omumwatate oo okwa li e mu talela po ashike oikando ivali opo va kundafane kombinga yOmbibeli, ndele okudja opo inava monafana vali. Ndele nande ongaho, Valentina okwa li a hovela okuudifila ovashiinda shaye, naasho osha li she mu kwatifa po ndele ta pewa ehandukilo lomido hetatu mokamba yeenghwate. Mo 1953, okwa li a mangululwa nokwa li a hovela diva oilonga yokuudifa. Okwa ka kwatwa po natango, ndele ta idililwa modolongo oule womido omulongo. Konima eshi a kala mokamba imwe omido dihapu, okwa li a tuminwa kokamba vali imwe. Mokamba omo, okwa li a hanga mo ovamwameme vamwe ovo va li ve na Ombibeli. Efiku limwe, umwe womovamwameme ovo okwa li a ulikila Valentina Ombibeli oyo. Osho osha li sha tunhula Valentina neenghono, molwaashi onghee ngoo e lixulile okumona Ombibeli mo 1945 komumwatate oo a li e uya oku mu udifila.
11 Mo 1967, Valentina okwa li a mangululwa nohauxuuninwa okwa li a dula okuulika kutya okwe liyapulila Jehova mokuninginifwa momeva. Okwa kala ta longo noudiinini moukalele okudja pefimbo olo a li a mangululwa fiyo omo 1969. Ndele Valentina okwa li a mangwa po natango momudo oo tuu oo nokwa li a pewa ehandukilo lomido nhatu modolongo. Ndele eshi a mangululwa okwa ka twikila noilonga yaye yokuudifa. Valentina okwa ka fya mo 2001 nokwa li a kwafela ovanhu 44 ve lihonge oshili. Omido adishe kumwe odo a li a kala meedolongo nosho yo meekamba deenghwate oda li 21. Valentina okwa li a tokola okuyamba po keshe shimwe mwa kwatelwa emanguluko laye nelalakano lokukanyatela oudiinini waye. Valentina okwa popya eshi a li pokufya a ti: “Kanda li ndi na eumbo. Onda li ashike ndi na okofa imwe omo mwa li mu na oinima yange aishe, ndele nande ongaho, onda li nda hafa nonda wanenwa eshi handi longele Jehova.” Valentina okwa li a nyaneka filufilu pomutenya oipupulu yaSatana oo a lundila ovanhu a ti kutya itava dulu okukala ovadiinini kuKalunga ngeenge tava yelekwa. (Job 1:9-11) Ohatu dulu okukala noushili kutya Valentina okwa li a hafifa omutima waJehova. Jehova okwa teelela nodjuulufi efimbo olo ta ka nyumuna Valentina nosho yo ovapiya vaye vakwao ovo va li va kanyatela oudiinini wavo fiyo omefyo. — Job 14:15.
12. Ohole otai dana onghandangala ilipi mekwatafano letu naJehova?
12 Otu na ekwatafano liwa naJehova molwaashi otu mu hole. Otu hole omaukwatya aye nohatu ningi keshe osho hatu dulu opo tu kale metwokumwe nomalalakano aye. Mepingafano nomalundilo Ondiaboli, ohatu ulikile Jehova ohole filufilu tashi di komutima. Ohole ya tya ngaho ohai tu kwafele tu kanyatele oudiinini wetu ngeenge hatu yelekwa. Jehova okwa ti kutya ‘ota ka amena ondjila yovayuki vaye.’ — Omayel. 2:8; Eps. 97:10.
13. Jehova oha tale ko ngahelipi oilonga oyo hatu mu longele?
13 Ohole ohai tu linyengifa tu fimanekife edina laJehova, nokuli nonande otashi dulika tu na omangabeko onhumba. Jehova oha tale komalinyengotomheno etu mawa ndele ihe tu tokola molwaashi itatu dulu okuninga shihapu ngaashi twa hala. Osho sha fimana kuJehova hailonga ashike oyo hatu mu longele, ndele oha tale yo komalinyengotomheno etu. Nonande Job okwa li a nyika oluhodi nokwa li e lididimikila omaupyakadi mahapu, okwa li a lombwela ookaume kaye ovanaihelele kutya okuhole eendjila daJehova. (Lesha Job 10:12; 28:28.) Jehova okwa popya metukulwa laxuuninwa lembo laJob kutya okwa li a handukila Elifas, Bildad naSofar, molwaashi kava li va popya oshili. Ndele pomhito opo tuu opo, Jehova okwa li a ulika kutya okwa hokwa Job, molwaashi okwa ifana Job ‘omupiya waye’ lwoikando ine, naashi a li e mu lombwela a ilikanene ovahekeleki ovo ovanaihelele. (Job 42:7-9) Nafye natu kale hatu lihumbata monghedi omo Jehova ta hokwa.
Jehova oha yambidida ovapiya vaye ovadiinini
14. Jehova okwa li a kwafela ngahelipi Job a lundulule okudiladila kwaye?
14 Job okwa li a kanyatela oudiinini waye nonande ka li a wanenena. Omafimbo amwe eshi a li momahepeko manene, Job okwa li a fika pexulifodiladilo la puka. Pashihopaenenwa, okwa li a lombwela Jehova a ti: ‘Ame ohandi ku kuwile ekwafo, ndelenee Ove ito nyamukula nge. Omolweenghono deke loye Ove ho haula nge ngaashi omutondadi.’ Kakele kaasho, Job okwa li te liyukipalifa neenghono, ta ti: “Ame nghi nombedi. . . . Momake ange nande mu he noukolokoshi neilikano lange ola yela.” (Job 10:7; 16:17; 30:20, 21) Ndele nande ongaho, Jehova okwa li a kwafela Job pahole moku mu pula omapulo a shikulafana oo tae mu kwafele aha yukife unene elitulemo kuye mwene. Omapulo oo okwa li yo a kwafela Job a mone nawa kutya Kalunga omunene noita dulu nande okuyelekanifwa nomunhu. Job okwa li a tambula ko omapukululo nokwa li a lundulula etaleko laye. — Lesha Job 40:8; 42:2, 6.
15, 16. Jehova oha kwafele ngahelipi ovapiya vaye vokunena?
15 Jehova oha yandje yo omayele newiliko lopahole kovapiya vaye vokunena. Kakele kaasho, okwe tu pa natango omauwa mahapu. Pashihopaenenwa, Jesus Kristus okwe tu kulila opo tu dule okudiminwa po omatimba etu. Ekulilo olo ole shi ninga yo tashi shiiva opo tu dule okukala tu na ekwatafano lopofingo naKalunga nonande inatu wanenena. (Jak. 4:8; 1 Joh. 2:1) Ngeenge hatu yelekwa, ohatu ilikana kuJehova e tu kwafele noku tu pameke okupitila momhepo yaye iyapuki. Shikwao vali, otu na Ombibeli ye lixwa po nongeenge otwe i lesha nokudilonga kwaasho shi li mo, otashi ke tu kwafela tu kondjife omayeleko eitavelo. Okukonakona Ombibeli otaku tu kwafele tu shiive kombinga yomhata younamapangelo weshito alishe nosho yo kombinga youdiinini wetu pauhandimwe.
16 Ohatu mono yo ouwa muhapu eshi tu li oshitukulwa shoumwainafana wopaKriste womounyuni aushe, oo hau palulwa kuJehova neendja dopamhepo okupitila mongudu ‘yomupiya omudiinini nomunaendunge.’ (Mat. 24:45-47) Mounyuni aushe omu na omaongalo Eendombwedi daJehova e fike po 100 000 lwaapo, omo hatu ongala opo tu hongwe nokupamekwa tu dule okufinda omayeleko eitavelo oo tashi dulika tu shakeneke. Ouwa oo hatu mono pokwoongala otau dulu okulimonikila moshimoniwa shaSheila, Ondombwedi yokuNdowishi oyo ya li i na omido 15.
17. Yandja oshihopaenenwa osho tashi ulike kutya oshi li pandunge okudulika alushe komalombwelo oo hatu pewa kunena okupitila mehangano laJehova.
17 Efiku limwe, ongudu yoSheila kaya li mepashukilo lomuhongifikola oule wokafimbo konhumba. Opo nee, ovanafikola vomongudu yavo ova li va hetekela okulongifa oshinima shimwe shi na ekwatafano noumhulile hashi ifanwa Ouija board, osho hashi longifwa okushiiva kombinga yonakwiiwa yomunhu. Sheila okwa li a dja mo diva mongulu yavo, naashi a ka uda lwanima osho sha li sha ningwa po, okwa li a hafa eshi ina hangika mo mongulu. Fimbo ovanafikola vomongudu yavo va li tava longifa oshinima osho, vamwe vomuvo ova li va hangwa keendemoni ndele tava faduka po molwaashi ova li va tila. Ndele mbela oshike sha li sha kwafela Sheila a dje mo mongulu yavo meendelelo? Sheila okwa ti: “Otwa li twa hangwa opo ashike twa kundafana pokwoongala kwopaKriste shi na sha noiponga oyo hai dulu okuholoka po omolwokulongifa oshinima osho shoumhulile, ofimbo oshiningwanima osho sha li inashi ningwa. Nomolwaasho onda li ndi shii kutya oshike ndi na okuninga po. Onda li nda hala okuhafifa Jehova ngaashi ashike Ombibeli tai tu lombwele tu ninge mOmayeletumbulo 27:11.” Shalongo ngoo Sheila a li pokwoongala kwopaKriste naashi a li a pwilikina nawa kwaasho sha li tashi kundafanwa.
18. Owa tokola toko okuninga po shike?
18 Atusheni natu kale twa tokola toko okudulika filufilu komalombwelo oo hatu pewa kuKalunga okupitila mehangano laye. Ohatu mono ewiliko nekwafo olo twa pumbwa mokukala pokwoongala pandjikilile, mokukonakona Ombibeli nosho yo oileshomwa oyo ya kanghamena kOmbibeli, okupitila meilikano nosho yo mokweendafana nOvakriste ovo va pyokoka pamhepo. Jehova okwa hala tu kanyatele oudiinini wetu noku na elineekelo kutya ohatu ka twikila okukala ovadiinini kuye. Kashi li tuu oufembanghenda okufimanekifa edina laJehova, okukanyatela oudiinini wetu nosho yo okuhafifa omutima waye!
Oto dimbuluka?
• Satana oha etifa eenghalo nosho yo omaupyakadi elipi?
• Oshinima shilipi tu na osho shi na ondilo neenghono?
• Ekwatafano letu naJehova ola kanghamena kushike?
• Omeenghedi dilipi Jehova ha yambidida ovapiya vaye kunena?
[Efano pepandja 15]
Ohatu dulu okukwafela ovalongelikalunga vakwetu va kanyatele oudiinini wavo