Mbela opu na ngaa ngoka e na ko nasha nangoye?

Mbela opu na esiku wa li wu uvite wa teka omukumo nowa fa wu wete pwaahe na ngoka e na ko nasha nuupyakadhi woye? Nonando aantu oye shi uupyakadhi woye, owa fa wu wete kutya kaye na ko nasha naanaa nangoye.

OMAUPYAKADHI gamwe monkalamwenyo ohaga kala ga fa iikungulu mbyoka itayi loto. Ethimbo limwe ohashi vulika nokuli tu thike pehulithodhiladhilo kutya uupyakadhi wetu uunene noonkondo nokawu li pauyuuki noitatu vulu oku wu idhidhimikila nando. Olundji ohatu dhiladhila ngaaka uuna omaiyuvo getu ga gwililwa po, twa polimana, twa li moshiponga sha kwata miiti, twa kwatwa kuuvu woshinamenena nosho tuu. Otashi vulika tu kale twa teka omukumo nokwiipula kutya olye te ke tu hekeleka. Mbela opu na ngoka e na ko nasha natse shili?

‘Kalunga ketalaleko alihe’ oku na ko nasha nangoye

Kalunga ota popiwa mOmbiimbeli e li “[He] yesilohenda naKalunga ketalaleko alihe.” (2 Aakorinto 1:3, OB-1954) Kalunga ngoka edhina lye Jehova, oku shi shi nokutya otwa pumbwa etalaleko. Ombiimbeli otayi longitha ‘etalaleko’ lwiikando omathele momikalo dha yoolokathana notayi tu shilipaleke kutya Kalunga ohu uvu omaudhigu getu noku na wo ehalo oku tu talaleka. Nonando otashi monika sha fa yamwe kaye na ko nasha nokayu uvite ko uudhigu wetu, otu na uushili kutya Jehova Kalunga oku wu wete.

Omanyolo otage shi popi sha yela kutya Jehova oku na ko nasha naantu pauhandimwe. Ombiimbeli otayi ti: “Omeho gOMUWA oga tala akuhe, ohaga tongolola aawinayi naawanawa.” (Omayeletumbulo 15:3) Job 34:21 ota ti: “Omeho ge oga tonatela oondjenda dhaantu, notaga tala oonkatu dhawo adhihe.” Jehova oha mono ashihe shoka tatu ningi kutya nee oshiwanawa nenge oshiwinayi noku shi oonkalo moka tu li noha katuka onkatu ndjoka e wete tayi opalele. Uushili waashika owu ulikwa moohapu dhomupolofeti Hanani ndhoka a lombwele omukwaniilwa gwaJuda Asa a ti: “Omeho gOmuwa haga lengalenga ko evi alihe, opo a holole oonkondo dhe mokupopila oomboka, oomwenyo dhawo inaadhi mu itopoka po.”—2 Ondjalulo 16:7, 9, OB-1954.

Jehova oha kala noku tu tala omolwetompelo lilwe ishewe. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Johannes 6:44) Jehova oku na ko nasha naantu lela, molwaashoka oha panapana momitima dhawo a tale ngele oya hala yi ilonge kombinga ye. Mboka ya hala okwiilonga kombinga ye ohe ya kwathele momikalo omikumithi. Pashiholelwa, omukulukadhi gumwe gwomOlepablika yaDominika okwa li mombete opo a tandwe omolwokankela. Omukulukadhi ngoka okwa li a galikana kuKalunga e mu kwathele a mone elongelokalunga lyashili. Konima owala yokathimbo omulumentu gwe okwe mu etele okabroshure Kalunga Ota Pula Shike kuTse? a hoka a li a pewa ongula oyo tuu ndjoka kugumwe gomOonzapo dhaJehova pegumbo lye. Omukulukadhi okwa lesha okabroshure hoka nokwe shi dhimbulula kutya Kalunga okwa yamukula egalikano lye. Okwa zimine a kale ta konakono Ombiimbeli nOonzapo nokonima yomwedhi ntano lwaampono okwa li i iyapulile Kalunga onkalamwenyo ye nokwa ninginithwa.

Membo lyOmbiimbeli lyOmapisalomi otatu adha mo omautumbulilo ogendji taga nyanyudha ngoka ga nyolwa kaanyoli yomapisalomi Aahebeli mboka ya li ko nale, ngaashi omukwaniilwa David ngoka a hokolola ohole yaJehova yokuhola aapiya ye. MEpisalomi 56:8, omu na oohapu dhaDavid ti indile Kalunga ta ti: “Omahodhi gandje owe ga pungula. Inaga nyolelwa nani membo lyoye?” David okwa li e shi kutya Jehova oku wete okumona iihuna kwe nosho wo omaiyuvo ge, ngaashi tashi ulikwa menyolo. Jehova okwa li a tseya uuwehame waDavid nokudhimbulukwa kutya David okwa li a lili molwaashoka a gwililwa po pamaiyuvo. Omushiti oha tala shili ayehe mboka taya kambadhala okulonga ehalo lye, “mboka ye na omitima dhe mu inekela.”

Episalomi 23 ndyoka li shiwike nawa otali hokolola nkene Kalunga e na ko nasha natse. Ovelise yotango otayi faathanitha Kalunga nomusita omunahole tayi ti: “OMUWA oye omusita gwandje; inandi pumbwa sha.” MuIsraeli niilongo mbyoka ye shi kundukidha omusita oku na okusila onzi kehe oshimpwiyu noku yi luka edhina. Kehe siku oku na okwiithana onzi kehe kuye e te yi thengathenga nokutala ngele oye ehamekwa kusha. Ngele oye ehamekwa, ohe yi gwayeke omagadhi opo yi aluke mbala. Ngele onzi otayi ehama, omusita ohe yi nwetha omuti noku yi kwathela yi kale ya thikama opo kaayi lale yo yi se. Ethaneko ndika otali opalele shili nankene Jehova ha sile oshimpwiyu mboka taye ya kuye.

Kalunga oku na ko nasha natse molwaashoka oha pulakene omagalikano getu note ke tu yumudha

Episalomi ndika nosho wo omapisalomi galwe omawanawa inaga nyolwa owala mOmbiimbeli opo tu ga leshe nokukala twa panda. Otage tu ulukile nkene aapiya yaKalunga yonale ya li ye mu mbumbulile omitima dhawo opo yu ulike kutya oya pumbwa ekwatho lye nosho wo okuulika olupandu sho te ya wilike nomayambeko ngoka he ya pe. Shika otashi ulike kutya aapiya yaKalunga yonale oya li yi itaala lela kutya oku na ko nasha nayo. Otatu ka kala wo tu uvite sha faathana kombinga yaKalunga ngele ohatu lesha nokutedhatedha oohapu ndhoka. Molwaashoka Kalunga okwe tu pitika tu mu galikane oshi li euliko lya kola kutya oku na ko nasha natse.

Ihe omathimbo gamwe ohatu iyadha twa gwililwa po kuupyakadhi mboka katu shi kutya otu na okugalikana ngiini kombinga yawo. Mbela shoka otashi imbi Jehova a tseye uupyakadhi wetu? Aaroma 8:26 otaya yamukula taya ti: “Osho wo Ombepo ote tu kwatha muunkundi wetu. Oshoka katu shi nkene tu na okwiindila, ihe Ombepo oye mwene te tu galikanene nomifudho kaadhi shi kutumbulwa.” Enyolo ndika otali tu lombwele kutya omagalikano gaapiya yaKalunga yonale otashi vulika ga holole omaiyuvo getu, naJehova ngoka hu “uvu omagalikano” ote ke ga taamba ko.—Episalomi 65:2.

Etegameno lyeyumuko oli li shili euliko lya kola kutya Kalunga oku na ko nasha nakehe gumwe gwomutse. Jesus Kristus okwa ti: “Ethimbo otali ya, uuna oonakusa ayehe mboka ye li moombila, taa ka uva ewi [lyaJesus]. Oyo notaa ka za mo.” (Johannes 5:28, 29) Oshitya shOshigreka shoka sha tolokwa ‘oombila’ otashi ti lela “oombiladhimbuluko.” (Yelekanitha NW.) Uutumbulilo mboka otawu gandja edhiladhilo kutya Kalunga ota ka dhimbulukwa onkalamwenyo yomuntu ngoka a sa.

Dhiladhila owala kwaashoka: Opo Kalunga a yumudhe omuntu oku na okukala a tseya ashihe kombinga yomuntu ngoka, mwa kwatelwa olupe lwe, uukwatya we, onkalo ye nosho wo okukala kwe kwonale. (Markus 10:27) Kalunga ita ka dhimbwa omuntu ngoka, nonando opu pite omimvo omayovi. (Job 14:13-15; Lukas 20:38) Ano aantu omabiliyona mboka ya sa, Jehova Kalunga ote ke ya dhimbulukwa naanaa ngaashi ya li sho ye na omwenyo. Shika otashi ulike shili kutya Kalunga oku na ko nasha natse pauhandimwe.

Jehova ote ke tu futa

Oshike tu na okuninga opo tu mone esiloshimpwiyu lyopahole okuza kuKalunga? Shotango, otu na okuulika kutya otwe mu inekela nohatu vulika kuye notu na okukala tu na eitaalo muye. Omuyapostoli Paulus okwe shi ulike kutya opu na ekwatathano pokati kokukala wu na eitaalo nokunyanyukilwa esiloshimpwiyu lyaKalunga. Okwa nyola a ti: “Kape na ngoka ta hokiwa kuKalunga, ngele ke na eitaalo. Oshoka ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.”—Aahebeli 11:6.

Ndhindhilika kutya eitaalo ndyoka tali nyanyudha Kalunga olya kwatela mo iinima iyali. Shotango, otu na ‘okwiitaala kutya Kalunga oko e li,’ nonokutya ye Omupangeli Omunenenene ngoka twa pumbwa okuvulika kuye noku mu longela. Oshitiyali, otu na okwiitaala kutya ‘ota futu ayehe mboka taye mu kongo.’ Eitaalo lyashili olya kwatela mo okwiitaala kutya Kalunga oku na ko nasha naantu ayehe mboka taye mu kongo notaya longo ehalo lye nosho wo kutya ote ke ya pa ondjambi. Mokukonakona Oohapu dhe nokweendathana pamwe naamboka haya vulika kuye, nangoye oto vulu okukala wu na eitaalo lya tya ngaaka ndyoka tali ke ku petha ondjambi kuye nosho wo esiloshimpwiyu lye lyopahole.

Aantu oyendji kunena oyi itaala kutya Kalunga ke na ko nasha nonkalo yaantu. Ihe ngaashi twe shi mono, Ombiimbeli oye shi ulika sha yela kutya Kalunga oku na ko nasha unene naamboka ye mu itaala shili. Nonando olundji kunena onkalamwenyo oyu udha oothina, omaipulo, omayeme nokuuvithwa nayi katu na okuteka omukumo. Jehova Kalunga oku na ko nasha natse. Ote tu hiya nokuli tu kongo ekwatho kuye. Omupisalomi okwa ti: “Uudhigu woye u fala kOMUWA, oye te ku popile; ihe etha aayuuki ya sindike.”—Episalomi 55:22.

[Enyolo lyopevi]

[Oshimpungu/Ethano pepandja 27]

Omanyolo ngoka taga koleke eitaalo lyoye kutya Kalunga oku na ko nasha nangoye

‘Omeho gOmuwa haga lengalenga ko evi alihe, opo a holole oonkondo dhe mokupopila oomboka, oomwenyo dhawo inaadhi mu itopoka.’—2 ONDJALULO 16:9, OB-1954

‘Omahodhi gandje owe ga pungula. Inaga nyolelwa nani membo lyoye?’—EPISALOMI 56:8

‘OMUWA oye omusita gwandje, inandi pumbwa sha.’—EPISALOMI 23:1

‘Ongoye nguka ho uvu omagalikano. Aantu ayehe otaye ya kungoye.’—EPISALOMI 65:2

‘Oto ka ithana ndje notandi ku itaale; oto ka yuulukwa omushitwa gwoye.’—JOB 14:15

‘Ngoka te ya kuKalunga, oku na okukala i itaala kutya Kalunga oko e li nota futu ayehe mboka taye mu kongo.’—AAHEBELI 11:6

‘Uudhigu woye u fala kOMUWA, oye te ku popile; ihe etha aayuuki ya sindike.’—EPISALOMI 55:22