Elongo eti-5: Maria oye yina yaKalunga

Mbela elongo ndika olya tamekela peni? “Okugalikana yina yaKalunga okwa humu komeho sho . . . aapagani oyendji noonkondo ya mbombolokele mongeleka. . . . Etilokalunga [lyaapagani mboka] neitulomo lyawo olya kala lya kankamena unene keitaalo lyawo moshikalungakiintu ‘oshivalakadhi oshinene’ nosho wo ‘moshikalungakadhona uule woomvula omayuvi ogendji.’”—Embo eti-16 lyo-The New Encyclopædia Britannica (1988), epandja 326 no 327.

Ombiimbeli otayi ti ngiini? ‘Oto ka ninga omusimba e to vala okanona okamati nou na oku ka luka Jesus. Oye ta ningi omunene e ti ithanwa Omuna gwaKalunga gwokombandambanda. . . . Onkee ano omunona nguka ota ka lukwa Omuna gwaKalunga.’—Lukas 1:31-35.

Enyolo ndyoka otali popi sha yela kutya Maria okwa li yina ‘yOmuna gwaKalunga,’ ihe ke shi yina yaKalunga ye mwene. Mbela Maria ota vulu ngaa okuhumbata Gumwe ngoka ‘nomagulu inage mu gwanena’? (1 Aakwaniilwa 8:27) Maria ina popya nando oshinima sha tya ngaaka. Elongo lyUukwatatu olyo owala lye etitha engwangwano kombinga ye. Olaata muEfeso mo 431 E.N., oyo ya li ya toto po okugalikana Maria moku mu ithana Theotokos (oshitya shOshigreka shoka tashi ti “omuhumbati gwaKalunga”) nenge “Yina yaKalunga.” Oshilando shaEfeso moka olaata yongeleka ndjoka ya li ya gongala osha kala ondingandinga yokugalikana oshikalungakiintu sholuvalo Artemis omathelemimvo ogendji.

Kungeyi, omilandu odhindji dhokugalikana oshikalunga Artemis shoka aniwa ‘sha gwa megulu,’ odho dha li dha hengumukile mokugalikana Maria. (Iilonga 19:35) Okulongitha omathano gaMaria nosho wo gayalwe megalikano oshinima shoka she endele ko tashi longwa aantu kUukwakriste.

Yelekanitha oovelise dhOmbiimbeli ndhika: Mateus 13:53-56; Markus 3:31-35; Lukas 11:27, 28

OSHILI OYO:

Maria okwa li yina yOmwana gwaKalunga, ihe hayaKalunga mwene. Elongo lyUukwatatu olyo lya ningitha aantu ya galikane Maria ongo Yina yaKalunga

[Ethano pepandja 8]