Natu kale tu na omikalo omiwanawa tu li aakalele yaKalunga
“Kambadhaleni ano okuholela Kalunga.”—EF. 5:1.
1, 2. (a) Omolwashike sha simana okukala tu na omikalo omiwanawa? (b) Oshike tashi ka kundathanwa moshitopolwa shika?
OMUNYOLI gumwe Sue Fox okwa nyola shi na ko nasha nokwiihumbata nawa a ti: “Otu na aluhe okukala tu na omikalo omiwanawa, oshoka osho oshinima tashi longo kehe pamwe ethimbo kehe.” Ngele aantu ohayu ulike aluhe omikalo omiwanawa, itaya ka kala ye na omaupyakadhi nayalwe, nohaye ga kandula po thiluthilu. Ihe okuungaunga nayalwe nayi, ohashi eta oontamanana, onkone nosho wo eyeme.
2 Egongalo lyopaKriste lyashili olya thikama po unene tuu maantu mboka ye na omikalo omiwanawa noonkondo. Ihe nonando ongawo, otu na okukala twa kotoka kaatu kale tu na omikalo omiwinayi ndhoka dhi li apuhe muuyuni kunena. Natu tale nkene okutula miilonga omakotampango gOmbiimbeli ge na ko nasha nomikalo taku vulu oku tu gamena nonkene taku vulu okweeta aantu kelongelokalunga lyashili. Opo tu uve ko kutya okuulika omikalo omiwanawa okwa kwatela mo shike, natu tale oshiholelwa shaJehova Kalunga nOmwana.
Jehova nOmwana oye li oshiholelwa oshiwanawa
3. Jehova Kalunga okwa tula po oshiholelwa shini shi na ko nasha nomikalo?
3 Jehova okwa tula po oshiholelwa sha gwanenena shokukala nomikalo omiwanawa. Kakele kokukala e na ondondo yopombanda e li Omupangeli gweshito alihe, ohu ungaunga naantu nombili nonesimaneko. Melaka lyopetameko, sho Jehova a li a popi naAbraham naMoses, okwa li a longitha uutumbulilo wOshihebeli mboka tawu gandja edhiladhilo lyokulombwela gumwe a ninge sha, to popi nesimaneko. (Gen. 13:14; Eks. 4:6). Jehova oha dhimine po aapiya ye ngele ya yono, molwaashoka “omunesilohenda nomunahole, omwiidhidhimiki, omunalukeno nomwiinekelwa.” (Eps. 86:15) Jehova ina fa nando aantu mboka haya geye mbala ngele aantu ooyakwawo inaya gwanitha po shoka ya li ya tegelelwa ya ninge.
4. Ongiini tatu vulu okuholela Jehova ngele yalwe taya popi natse?
4 Otatu vulu okwiilonga kombinga yomikalo omiwanawa momukalo ngoka Kalunga ha pulakene kaantu. Sho Abraham a li a pula omapulo shi na ko nasha naantu yomuSodom, Jehova okwa li a yamukula nengungumano epulo kehe. (Gen. 18:23-32) Jehova ka li a tala ko nkene Abraham a li u uvite shi li ehepitho lyethimbo. Jehova oha pulakene komagalikano gaapiya ye nosho wo komakemo gaalunde mboka yi iyela ombedhi. (Lesha Episalomi 51:11, 17.) Mbela katu na okuholela Jehova mokupulakena kuyalwe ngele taya popi natse?
5. Ongiini okuholela omikalo dhaJesus taku hwepopaleke ekwatathano lyetu nayalwe?
5 Shimwe shomiinima oyindji mbyoka Jesus a li i ilongo kuHe, osha li omikalo omiwanawa. Nonando uukalele we owa li hawu mu pula ethimbo noonkondo odhindji, Jesus okwa kala aluhe e na eidhidhimiko nombili. Aanuulepela naaposi mboka ya li haya hehela omolwomahupilo nayalwe mboka ya li ya pumbwa ekwatho, oya li ya mono kutya Jesus oku na ehalo oku ya kwathela. Ka li he yi ipwililike nonando oya li haye ya kuye inaaya ninga oshilage naye. Olundji okwa li ha thigi po shoka a li ta ningi opo a vule oku ya kwathela pauhandimwe. Jesus okwa li e na ko nasha naamboka yi itaala muye. (Mark. 5:30-34; Luk. 18:35-41) Tu li Aakriste ohatu landula oshiholelwa shaJesus mokukala nohenda nokukwathela yalwe. Eihumbato lya tya ngaaka ohali ndhindhilikwa kaakwanezimo yetu, aashiinda nayalwe. Kakele kaashono, eihumbato lya tya ngaaka ohali simanekitha Jehova nohali tu etele enyanyu.
6. Oshiholelwa shini shombili nuukuume Jesus a tula po?
6 Jesus okwa li wo ha simaneka aantu mokulongitha omadhina gawo. Mbela aawiliki yelongelokalunga lyOshijuda oya li haya simaneke yalwe momukalo gwa tya ngawo? Aawe. Oya li ya tala ko mboka kaaye shi Ompango ye li “kohi yethingo lyaKalunga” noya li hayu ungaunga nayo ngaaka. (Joh. 7:49) Omwana gwaKalunga hasho a li ngaaka. Marta, Maria, Sakeus nosho wo yalwe oyendji okwa li he yi ithana komadhina. (Luk. 10:41, 42; 19:5) Nonando omaputuko noonkalo odho tadhi pangele kutya aantu oye na okupopithwa ngiini kunena, aapiya yaJehova ohaya ningi oonkambadhala okukala ye na uukuume nayalwe.a Ihaye etha eyooloko lyopaondondo lyi yi imbe okusimaneka ooitaali ooyakwawo.—Lesha Jakob 2:1-4.
7. Ongiini omakotampango gOmbiimbeli hage tu kwathele mokukala tu na omikalo omiwanawa naantu ooyakwetu kehe pamwe?
7 Momukalo gwohenda moka Kalunga nOmwana hayu ungaunga naantu yomiigwana ayihe noyomomihoko adhihe ohagu ulike kutya oya simaneka aantu mboka nohagu hilile mboka ye na iikala iiwanawa koshili. Dhoshili, okukala nomikalo omiwanawa oshi ikolelela kehala nehala. Onkee ano, ihatu landula oompango dha tulwa po dhokondandalunde dhi na ko nasha nomikalo. Pehala lyaashono, ohatu etha omakotampango gOmbiimbeli ge tu kwathele tu kale hatu simaneke aantu kehe pamwe. Natu konakoneni kutya ongiini okuungaunga naantu momukalo omwaanawa taku vulu okuninga iilonga yetu yuukalele wopaKriste yi kale tayi pondola.
Kala ho popitha aantu nokukundathana nayo
8, 9. (a) Omukalondjigilile guni tagu vulu okutiwa kutya ogu li omikalo omiwinayi? (b) Omolwashike tu na okweetha oohapu dhaJesus ndhoka dha nyolwa muMateus 5:47 dhi nwethe mo omukalo moka hatu ungaunga naantu?
8 Molwaashoka onkalamwenyo kunena pomahala ogendji oye endelela, aantu ngele taya pingathana olundji ohashi vulika ya kale inaayi ipopitha. Odhoshili kutya kapu na omuntu a tegelelwa a popithe kehe gumwe ta piti po e li mongundu yaantu. Ihe nonando ongawo, poompito odhindji, oshi li nawa nosha pumbiwa okupopitha aantu. Mbela owe shi ninga omukalondjigilile okupopitha aantu? Nenge olundji oho piti owala paantu itoo imemeha nenge inoo popya nayo? Nopwaahe na etompelo ewinayi, omuntu otashi vulika a kale e na omikalo omiwinayi.
9 Jesus okwe tu dhimbulukitha sho a ti: ‘Ngele hamu popitha ookuume keni ayeke, mu shi ohamu ningi oshinima oshinene? Naapagani wo osho haa ningi.’ (Mat. 5:47) Omugandjimayele Donald Weiss okwa nyola kombinga yaashika a ti: “Aantu ohaya kala ya geya ngele yalwe ya piti puyo inaaye ya popitha. Ihe kapu na lela eipopilo lyokuhenuka yalwe. Ekandulopo lyuupyakadhi mbuka olyo okukala ho popitha aantu.” Ngele otwa kala tu na omikalo omiwanawa nayalwe, otashi tu etele iizemo iiwanawa.
10. Ongiini omikalo omiwanawa tadhi vulu oku tu kwathela tu kale hatu pondola muukalele? (Tala oshimpungu “Tameka oonkundathana neimemeho.”)
10 Tala koshinima shaaihokani Aakriste Tom naCarol, mboka ya kala mondoolopa onene muAmerika lyokUumbangalantu. Ohaya ningi oonkundathana ombwanawa naashiinda shawo dhi li oshitopolwa shuukalele wawo. Mbela ohaye shi ningi ngiini? Tom okwa popi i ikolelela kuJakob 3:18 a ti: “Ohatu kambadhala okukala naantu nombili. Ohatu popi naamboka tu wete ye li pondje yomagumbo gawo naamboka haya longo momudhingoloko. Ohatu yi imemehele noku ya popitha. Ohatu popi kombinga yaashoka tashi ya hokitha, aanona yawo, oombwa dhawo, omagumbo gawo niilonga yawo. Konima yethimbo ohaya kala ye tu tala ko tu li ookuume kawo.” Carol okwa gwedha ko a ti: “Petalelopo lyetu lya landula ko, ohatu ya lombwele omadhina getu noku ya pula gawo. Ohatu ya lombwele shoka tatu ningi puushiinda, ihe oonkundathana dhetu nayo ohatu dhi ningi paufupi. Nolwahugunina ohatu ya pe uunzapo.” Tom naCarol oya kala yi inekelwa koyendji yomaashiinda shawo. Oyendji yomuyo oya li ya taamba ko iileshomwa ya kankamena kOmbiimbeli, naashona yomuyo oya li yu ulike ohokwe onene noonkondo mokwiilonga oshili.
Kala ho ulike omikalo omiwanawa moonkalo oondhigu
11, 12. Omolwashike tu na okukala twa tegelela okuningwa nayi manga tatu uvitha onkundana ombwanawa, nongiini tu na okwiinyenga?
11 Omathimbo gamwe ohatu ningwa nayi sho tatu uvitha onkundana ombwanawa. Ohatu kala twa tegelela okuningwa ngeyi molwaashoka Jesus Kristus okwa li a londodha aalongwa ye a ti: “Ngele aantu oya tidhagana ndje, nena otaa ke mú tidhagana wo.” (Joh. 15:20) Ihe ngele otwa kala nokwiihumbata ngaashi yo itashi ke eta iiyimati iiwanawa. Mbela otu na okwiinyenga ngiini? Omuyapostoli Petrus okwa nyola a ti: “Simanekeni Kristus momitima dheni ne mu mu ninge Omuwa gweni. Kaleni mwi ilongekidha aluhe okuyamukula kehe ngoka te mú pula okufatulula etegameno ndyoka li li mune.” (1 Pet. 3:15) Ngele tatu kala tu na omikalo omiwanawa, sha hala okutya, hatu yamukula nengungumano nosho wo nesimaneko, otashi vulu okuningitha mboka taye tu ula nayi ya taambe ko etumwalaka lyetu.—Tit. 2:7,8.
12 Mbela tu li Aakriste otatu vulu ngaa okukala twi ilongekidha okuninga shoka sha hokiwa kuKalunga ngele tatu ningwa nayi? Eeno. Paulus okwa popi a ti: “Oohapu dheni nadhi kale aluhe oombwanawa notadhi hokitha omuntu oku mú pulakena. Kambadhaleni, mu kale aluhe mu shi, nkene mu na okuyamukula aantu.” (Kol. 4:6) Ngele otwe shi ningi omukalondjigilile okwiihumbatela nawa iilyo yuukwanegumbo, aalongwa ooyakwetu, aaniilonga ooyakwetu, aakwanegongalo ooyakwetu naashiinda, nena otatu ka kala twi ilongekidha nawa okuungaunga naantu mboka taye tu sheke nenge taye tu tuku.—Lesha Aaroma 12:17-21.
13. Gandja oshiholelwa shankene okukala nomikalo omiwanawa taku vulu okuhwepopaleka iikala yaapataneki.
13 Okukala nomikalo omiwanawa moonkalo oondhigu ohaku eta iizemo iiwanawa. Pashiholelwa, Onzapo yimwe muJapani oya li ya shekwa komunegumbo gumwe nokomuyenda gwe. Omumwatate okwa zi po pegumbo mpoka momukalo omwaanawa. Sho a tsikile nokuuvitha moshitopolwa moka okwa li a mono kutya omuyenda okwa kala te mu tala e li kokule kashona. Sho omumwatate e ya puye, omulumentu okwa ti: “Ombili kwaashoka sha ningwa po. Nonando otwe ku ula nayi, onda mono kutya owa kala owala to imemeha. Oshike ndi na okuninga ndi kale nde ku fa?” Omulumentu nguka ka li a nyanyukwa, molwaashoka okwa li a kanitha iilonga ye nameme gwe okwa adhika opo a si. Onzapo oye mu lombwele shi na ko nasha nekonakonombiimbeli nokwe li taamba ko. Mbala konima yethimbo okwa tameke okukonakona iikando iyali moshiwike.
Omukalo gwa dhenga mbanda ngoka tagu vulu oku ku kwathela wu kale nomikalo omiwanawa
14, 15. Ongiini aapiya yaKalunga yopethimbo lyOmbiimbeli ya li ya putudha aanona yawo?
14 Aavali aatilikalunga yopethimbo lyOmbiimbeli oya kala haya shilipaleke kutya oya longa aanona yawo omikalo omiwanawa megumbo. Tala nkene Abraham nomwana Isak ya kala haya kundathana momukalo gwesimaneko muGenesis 22:7. Osha li shi iwetikile kutya Josef naye wo okwa li a putudhwa nawa kaavali ye. Nokuli naashono a li mondholongo okwa li e na omikalo omiwanawa nokaanandholongo ooyakwawo. (Gen. 40:8, 14) Momukalo moka a li a popi naFarao ogwa li tagu ulike kutya okwa longwa omikalo omiwanawa nkene e na okupopya nomuntu e na ondondo yopombanda.—Gen. 41:16, 33, 34.
15 Iipango Omulongo mbyoka ya li ya pewa oyana yaIsraeli oya kwatela mo oshipango shika tashi ti: “Simaneka ho nanyoko, opo u kale u na omwenyo omule mevi ndyoka tandi ke li ku pa.” (Eks. 20:12) Omukalo gumwe moka aanona taya vulu okusimaneka aavali yawo ogwo okukala ye na omikalo omiwanawa kegumbo. Omwanakadhona gwaJefta okwa li a simaneke he momukalo gwa dhenga mbanda mokugwanitha po euvaneko lyahe nonando olya li emakelo edhigu noonkondo kuye.—Aatok. 11:35-40.
16-18. (a) Mbela oshike tatu vulu okuninga opo tu longe aanona omikalo omiwanawa? (b) Mbela uuwanawa wuni hawu zi mokulonga aanona omikalo omiwanawa?
16 Okuputudhila aanona omikalo omiwanawa okwa simana noonkondo. Opo aagundjuka ya ka kale ye na onkalamwenyo yi li nawa ngele ya ningi aakuluntu, oya pumbwa okwiilonga omikalo omiwanawa dhokupopitha aayenda, okuyamukula ongodhi nokulya pamwe nayalwe. Oye na okukwathelwa yu uve ko kutya omolwashike ye na okweegululila aantu yalwe omiyelo, okukala ye na ohenda naakulupe nosho wo mboka taye ehama, nokukwathela wo mboka ya humbata iinima iidhigu. Oya pumbwa okuuva ko kutya omolwashike sha simana okulongitha omautumbulilo ngaashi “alikana,” “tangi,” “oshi li nawa,” “nandi ku kwathele?” nosho wo “ombili.”
17 Okuputudha aanona ya kale nomikalo kashi na okukala oshidhigu. Omukalo omwaanawa oku shi ninga ogwo oku ya tulila po oshiholelwa. Kurt ngoka e na oomvula 25 okwa popi kombinga yankene ye nosho wo aamwayinamati yatatu ya li yi ilongo okukala ye na omikalo omiwanawa a ti: “Otwa kala hatu tala nohatu pulakene sho meme natate taya popi nombili nonkene hayu ungaunga naantu yalwe neidhidhimiko nonondjaalela. Ngele tu li pOshinyanga shUukwaniilwa, tate okwa li ha kutha ndje tu ka popithe aamwatate naamwameme aakuluntu manga okugongala inaaku tameka nongele kwa piti mo. Onda li handi pulakene nkene ta popitha aantu nesimaneko nonda li nda mono nkene te shi ningi.” Kurt okwa tsikile ko ta ti: “Konima yethimbo onda kala ndi na omikalo dha fa dhe. Okuungaunga naantu pamukalo omwaanawa ohashi ya po kusho shene. Ihashi ningwa molwaashoka wu na oku shi ninga, ihe omolwaashoka wu na ehalo oku shi ninga.”
18 Mbela oshike tashi vulu okuningwa po ngele aavali oya longo aanona yawo omikalo omiwanawa? Aanona otaya ka kala ye na ookuume nosho wo ombili nooyakwawo. Otaya ka kala haya vulu okulonga pamwe naagandji yiilonga nosho wo naalongi pamwe nayo. Kakele kaashono, aanona mboka ye na omikalo noye hole uuyuuki otaya nyanyudha aavali yawo.—Lesha Omayeletumbulo 23:24, 25.
Omikalo omiwanawa ohadhi tu ningi tu kale twa yooloka ko kuuyuni
19, 20. Omolwashike tu na okukala twa tokola toko okuholela Kalunga ketu omunahenda nosho wo Omwana?
19 Paulus okwa nyola a ti: “Kambadhaleni ano okuholela Kalunga, oshoka one oyana aaholike.” (Ef. 5:1) Okuholela Jehova Kalunga nosho wo Omwana osha kwatela mo okutula omakotampango gOmbiimbeli miilonga, ngaashi ngoka twa kundathana moshitopolwa shika. Mokuninga ngaaka, otatu ka yanda okwiimonikitha twa fa tu na omikalo molwaashoka owala twa hala okupandika kugumwe ngoka e li pondondo yopombanda nenge twa hala tu mone uuwanawa wopamaliko.—Jud. 16.
20 Momasiku ngaka gahugunina gonkalelo yuukolokoshi, Satana okwa tokola toko okuhulitha po omithikampango dhi na ko nasha neihumbato ewanawa ndhoka Jehova a tula po. Ihe Ondiaboli itayi ke shi pondola okuyona po omikalo omiwanawa dhAakriste yashili. Atuheni natu kaleni twa tokola toko okulandula oshiholelwa shohenda shaKalunga nOmwana. Opo nduno okupopya nosho wo eihumbato lyetu otali ka kala aluhe tali kondjithathana niilonga yaamboka ya hala okukala ye na omikalo omiwinayi. Otatu ka simanekitha edhina lyaKalunga, Jehova, ngoka e tu tulila po oshiholelwa sha gwanenena shomikalo omiwanawa, notatu ka nanena aantu yomitima omiwanawa kelongelokalunga lye lyashili.
[Enyolo lyopevi]
a Momaputuko gamwe, osha talika ko okwaahe na omikalo ngele to popitha omukuluntu to mu tumbula kedhina, kakele owala ngele oye e ku lombwele wu shi ninge. Aakriste ohaya ningi nawa sho haya simaneke omukalondjigilile ngoka.
Oto dhimbulukwa?
• Oshike tatu ilongo kuJehova nOmwana kombinga yokukala nomikalo omiwanawa?
• Omolwashike okupopitha aantu nombili haku tu petha edhina ewanawa tu li Aakriste?
• Ongiini okukala wu na omikalo omiwanawa haku kwathele wu kale ho shi pondola muukalele?
• Onkandangala yini aavali haya dhana mokulonga aanona yawo omikalo omiwanawa?
[Oshimpungu pepandja 30]
Tameka oonkundathana neimemeho
Aantu oyendji ohaya kakadhala okutameka oonkundathana nagumwe ngoka kaaye shi. Ihe nonando ongawo, molwohole yokuhola Kalunga naantu ooyakwawo, Oonzapo dhaJehova ohadhi ningi oonkambadhala dha mana mo, opo dhi tseyithile aantu oshili yOmbiimbeli. Oshike tashi vulu oku ku kwathela wu hwepopale moshinima shika?
Ekotampango Ii na oshilonga ndyoka li li mAafilippi 2:4 otali ti: “Lalakaneneni uuwanawa wooyakweni wo, haamboka ashike weni yene.” Dhiladhila kombinga yoohapu ndhika momukalo nguka: Ngele owa tsakanene nomuntu gwontumba ngoka inoo tsakaneka nale, oho mu tala ko e li omukwiilongo. Ongiini to vulu oku mu ninga a kale e ku mangulukila? Okwiimemeha nosho wo oku mu popitha nombili otaku vulu okukwathela. Ihe opu na oshindji okukundathanwa.
Ngele to kambadhala okutameka oonkundathana nagumwe, otashi vulika wu piyaganeke omadhiladhilo ge. Ngele owa kambadhala okukundathana naye kombinga yaashoka shi li momadhiladhilo goye inoo ipula kutya okwa li ta dhiladhila shike, otashi vulika kee ku yamukule nawa. Onkee ano, ngele oto vulu okumona shoka omuntu ngoka tashi vulika a li ta dhiladhila, omolwashike osho itoo longitha opo wu tameke oonkundathana naye? Shoka osho Jesus a li a ningi sho a tsakanene nomukiintu pomuthima muSamaria. (Joh. 4:7-26) Omadhiladhilo gomukiintu nguka oga li owala kokuteka omeya. Jesus okwa li a tameke oonkundathana dhe nomukiintu nguka dha kankamena kwaashoka, nokwe dhi lundululile nziya moonkundathana dhopambepo tadhi hokitha.
[Omathano pepandja 29]
Okukala nombili naantu yalwe otaku vulu okukwathela omuntu a gandje uunzapo uuwanawa
[Ethano pepandja 31]
Omikalo omiwanawa odha pumbiwa aluhe