Omikalo omiwanawa — uukwatya waatilikalunga
1 Omikalo omiwanawa odha pumba nena. Omolwashike? Aantu oye li ye endelela opo ihe otashi vulika haya dhiladhila owala oolumwe iityasimaneko ya simana ngaashi, “Alikana,” “Tangi,” nenge “Ombili ngaa.” Oohapu dhaKalunga odha hunganeka eshunduko lyomikalo momasiku gahugunina sho dha ti kutya aantu otaya ka kala ‘nokwiihola, oonakwiitanga, aaholuuntsa, kaaye shi okupandula, aakaanohole yopaunshitwe, aakaaneidhiliko, aatondi yuuwanawa naadhudhu.’ (2 Tim. 3:1-4, yelekanitha NW.) Omaukwatya agehe ga tya ngaaka otaga ningi omikalo dhi kale omiwinayi. Ye li aatilikalunga, Aakriste oye na okukala ya kotoka opo kaaya taambe ko okwaahasimaneka yalwe kwuuyuni mbuka.
2 Omikalo odho shike? Omikalo omiwanawa otadhi vulu okuhokololwa dhi li okuyaalela omaiyuvo gayalwe, uunkulungu okukala nayalwe nombili. Iinima yi na ko nasha nomikalo omiwanawa oyo omaengweno, uunamikalo, uunambili nosho wo eyawalo. Omaukwatya ngaka ohaga mene omidhi dhago mohole yomuntu yokuhola Kalunga naantu ooyakwawo. (Luk. 10:27) Ihaga kotha sha, ihe oge na ongushu onene mokuhwepopaleka ekwatathano lyetu nayalwe.
3 Jesus Kristus okwa tula po oshiholelwa sha gwanenena. Okwa li aluhe a tula miilonga Ompango Ombwanawalela: “[Ngaashi] mwa hala, aantu ye mu ningile, osho ya ningileni wo.” (Luk. 6:31) Inatu kuminwa mbela omukalo gwaJesus gwomaengweno nogwohole mokukala naalongwa ye? (Mat. 11:28-30) Omikalo dhe omiwanawa inadhi za moompango dha nyolwa momambo ge na ko nasha nomikalo. Odha za momutima gu uka nogu hole okugandja. Otu na okukambadhala okuholela oshiholelwa she oshiwanawa.
4 Uunake mbela Aakriste ya pumbwa omikalo omiwanawa? Opoompito owala mbela dhi ikalekelwa, uuna ya hala aantu ye ya dhiladhile nawa? Odha pumbiwa owala mbela uuna taku kambadhalwa okunwetha mo yalwe? Aawe! Otu na okuulika omikalo omiwanawa ethimbo kehe. Omomikalo dhini unene tuu tu na okukala tu na ko nasha naashika mokweendathana kwetu megongalo?
5 POshinyanga shUukwaniilwa: Oshinyanga shUukwaniilwa osho ehala lyetu lyelongelokalunga. Ohatu kala po twa hiwa kuJehova Kalunga. Momukalo nguka, tse otu li aayenda. (Eps. 15:1) Ohatu kala mbela tu li aayenda ye shi okuholelwa ngele twe ya kOshinyanga shUukwaniilwa? Ohatu tala nawa mbela kutya otatu zala shike nonkene tatu iyopaleke? Dhoshili, otu na okukala twa hala okuyanda eiyopaleko ndyoka inaali shewa nenge lya pitilila. Kutya nduno otu li piigongi nenge opokugongala kwetu kokoshiwike kwegongalo, oshigwana shaJehova osha ndhindhilikwa omolwokumonika kwasho shi na omikalo kwe eleka kwaamboka taya ti ohaya simaneke Kalunga. (1 Tim. 2:9, 10) Onkee ano hatu ulike eyaalelo nesimaneko kOmuhiyi gwetu gwomegulu nosho wo kaayenda yalwe mboka ya hiwa.
6 Omukalo gulwe hatu ulike omikalo omiwanawa shi na ko nasha nokugongala ogwo okuya pethimbo. Dhoshili, shika kashi shi aluhe oshipu. Otashi vulika yamwe ye li kokule noonkondo nenge tashi vulika ye na omaukwanegumbo omanene okulongekidha. Osha ndhindhilikwa momagongalo gamwe kutya aashona yomaauvithi oye na omukalondjigilile okuthika konima yeimbilo negalikano lyopetameko. Shika oshi li oshinima sha kwata miiti. Oshi li nawa okudhimbulukwa kutya omikalo odhi na ko nasha nokukala hatu yaalele omaiyuvo gayalwe. Jehova, Omuhiyi gwetu omunahenda, okwa longekidha iituthi mbika yopambepo omolwuuwanawa wetu. Ohatu ulike olupandu lwetu neyaalelo lyetu komaiyuvo ge mokukala hatu ya pethimbo. Kakele kaashono, okuthika wa lata pokugongala ohaku piyaganeke nohashi ulike okwaahe na esimaneko naamboka ye li taya pulakene nale.
7 Uuna twa gongala, mbela ohatu mono ngaa aape mboka ye ya kokugongala? Oku ya hambelela oko oshitopolwa shokukala nomikalo. (Mat. 5:47; Rom. 15:7) Okupopitha kwohenda, okuminika kwohole, okwiimemeha kwombili—iinima ayihe iishona, ihe otayi tu ndhindhilikitha tu li Aakriste yashili. (Joh. 13:35) Konima yokuya kOshinyanga shUukwaniilwa oshikando shotango, omulumentu gumwe okwa ti: “Onda mona aantu oyendji aanahole yashili mesiku limwe, ye vule mboka nda mona uule wethimbo alihe nda kala mongeleka moka nda putukila, aantu mboka nda li kaandi ya shi nale. Osha li sha yela kutya onda mona oshili.” Oshilanduliko, okwa lundulula onkalamwenyo ye, nokonima yoomwedhi heyali okwa li a ninginithwa. Eeno, omikalo omiwanawa ihadhi vulu tuu okukala dhi na iizemo yi na oshilonga!
8 Ngele otu na omikalo shi na ko nasha naayendanandjila mboka tatu tsakaneke, hasho mbela tu na okukala ngawo, ‘unene tuu naamboka ooyakwetu meitaalo’? (Gal. 6:10) Ekotampango lye eleka olyo: “[Omukuluntu gwoomvi] mu simaneka.” (Lev. 19:32) Aantu ya tya ngaaka kaye na nando okukala kaaye niwe ko nasha nayo pokugongala kwetu.
9 Gandja eitulomo lyolela: Pethimbo lyokugongala kwegongalo, aakalele yaKalunga yopaKriste ohaya popi opo ya gandje omagano gamwe gopambepo oku tu tunga. (Rom. 1:11) Otashi ku ulika shili kutya katu na nando omikalo ngele tatu kotha, tatu kudhile nokutaasina osiingamu, tatu nongonene gulwe mbali lwaali ngoka a kuutumba popepi natse, tatu yi kokandjugo inaashi pumbiwa, tatu lesha sha kaashi na ekwatathano nokugongala, nenge tatu ningi iinima yilwe pethimbo lyokugongala. Aakuluntugongalo oye na okukala ye na okutula po oshiholelwa moshinima shino. Omikalo omiwanawa dhopaKriste otadhi ke tu inyengitha tu ulike esimano lye eleka komupopi nosho wo ketumwalaka lye lya kankamena kOmbimbeli moku mu pa eitulomo lyetu alihe.
10 Kakele kaashono, opo tu yaalele omupopi nosho wo aapulakeni, otu na okudhima iipopi yokolusheno yokweendiwa nayo, ngaashi pagers noongodhi dhopeke opo kaayi piyaganeke okugongala kwetu.
11 Omikalo naanona: Aavali oye na okukala aluhe ya tonatela eihumbato lyaanona yawo. Ngele okanona taka tameke okulila nenge okukala itaaka gundjile pethimbo lyokugongala naashika otashi piyaganeke yalwe, oshi li nawa okufala okanona pondje nziya ngaashi tashi vulika opo u ke ka mweneke. Shika otashi vulika shi li oshidhigu omathimbo gamwe, ihe dhimbulukwa, shika otashi ulike kutya ngoye ou na ko nasha nomaiyuvo gayalwe. Aavali ye na aanona aashona mboka tashi vulika haya nyulukuta olundji ohaya hogolola okukuutumba konima opo yaaha piyaganeke aantu oyendji ngele sha pumbiwa ya pite mo pethimbo lyokugongala. Dhoshili, oshihupe shaapulakeni otashi vulu okuulika eyaalelo lya gwana komaukwanegumbo moku ga thigila po omahala gokonima ye ga longithe, ngele ya hala.
12 Aavali oye na wo okukala ya tonatela eihumbato lyaanona yawo komeho nokonima yokugongala. Aanona kaye na okukala taya matuka meni lyetungo, oshoka shika otashi vulu okweeta iiponga. Okumatukamatuka pondje yOshinyanga shUukwaniilwa otashi vulu wo okukala sha nika oshiponga, unene tuu uusiku uuna itaaya vulu okumona ko nawa. Okupopya pombanda pondje otaku vulu okupiyaganeka aashiinda notaku talitha ko nayi elongelokalunga lyetu. Aavali mboka haya ningi oonkambadhala dholela okutonatela aanona yawo meni nopondje yOshinyanga shUukwaniilwa otaya pandulwa molwashoka shika otashi indjipaleke enyanyu lyokugongala kwetu muukumwe. — Eps. 133:1.
13 Pekonakono lyembo: Otwa pandula aamwatate mboka haya gandja omagumbo gawo ga ningilwe okugongala kwegongalo. Uuna tu li mo, otu na okuulika esimaneko neyaalelo kiiniwe yawo. Manga inaatu ya meni, otu na okupupula nawa oongaku dhetu opo kaatu nyateke nevi polupanda nenge pomamate. Aavali oye na okutonatela aanona yawo, ya shilipaleke kutya oye li mehala lyegumbo hamu ningilwa ekonakono lyembo. Nonando ongundu otashi vulika onshona nombepo yamo oyombili, katu na okukala twa manguluka okuninga ngaashi twa hala momagumbo gayalwe. Aavali yokanona okashona oye na oku ka fala kokandjugo ngele ka hala ko. Niishewe, molwashoka ekonakono lyembo olyo okugongala kwegongalo, otu na okuzala ngaashi hatu zala uuna tatu yi kOshinyanga shUukwaniilwa.
14 Omikalo omiwanawa odha simana: Okutula miilonga omikalo dhopaKriste kaku shi owala okuhila aantu okuwanawa muukalele wetu ihe otaku humitha wo komeho omakwatathano omawanawa nayalwe. (2 Kor. 6:3, 4, 6) Tu li aalongeli yaKalunga omunelago, otu na okukala hatu imemeha nuupu, tu li aanahenda nokuninga nokuli nando iinima iishona yuunambili mbyoka tayi etele yalwe enyanyu. Omaukwatya ngaka gopamikalo otago opaleke onkalamwenyo yetu tu li aatilikalunga.