Kala wa lenga onkandangala ndjoka to dhana megongalo
“Kalunga oye a tula iilyo yi ili noyi ili molutu pahalo lye mwene.”—1 KOR. 12:18.
1, 2. (a) Oshike tashi ulike kutya kehe gumwe ota vulu okukala e na onkandangala ndjoka ta dhana megongalo nokukala e yi lenga? (b) Omapulo geni taga ka kundathanwa moshitopolwa shika?
OKUZA pethimbo lyaIsraeli shonale, Jehova okwa kala nokupalutha oshigwana she pambepo noku shi wilika okupitila megongalo lye. Pashiholelwa, sho Aaisraeli ya li ya yugu ko Ai, Josua okwa “lesha mokule ompango ayihe mwa kwatelelwa omayambeko nomatulomutima, ngaashi naanaa sha nyolwa membo lyompango . . . pokugongala kwaayehe.”—Jos. 8:34, 35.
2 Methelemumvo lyotango E.N., omuyapostoli Paulus okwa li a lombwele omukuluntugongalo Timoteus kutya egongalo lyopaKriste olyo ‘egumbo lyaKalunga’ nosho wo “ongudhi nekankameno okukoleka oshili.” (1 Tim. 3:15) ‘Egumbo lyaKalunga’ kunena olyo uumwayinathana womuuyuni auhe wAakriste yashili. Montopolwa 12 yontumwafo ye yotango ya nwethwa mo ndjoka a nyolele Aakorinto, Paulus okwa li a yelekanitha egongalo nolutu lwomuntu. Okwa ti kutya nokuli nando oshilyo kehe ohashi longo oshilonga shasho, ayihe oya pumbiwa. Paulus okwa nyola a ti: “Kalunga oye a tula iilyo yi ili noyi ili molutu pahalo lye mwene.” Okwa li nokuli a popi kutya ‘mbyoka tatu yi tala ya fa yaa na esimano, ohatu yi sile oshimpwiyu.’ (1 Kor. 12:18, 23) Ano onkandangala ndjoka Omukriste omuyuuki ta dhana megumbo lyaKalunga kayi vule yOmukriste omukwawo omudhiginini. Oonkandangala ndhoka taya dhana odho owala dha yoolokathana. Ongiini nduno tatu vulu okumona onkandangala ndjoka tatu dhana melongekidho lyaKalunga nokukala twe yi lenga? Iinima yini tayi vulu okuguma onkandangala ndjoka tatu dhana megongalo? Nongiini tatu vulu okuninga ‘okuhuma komeho kwetu ku monike kwaayehe’?—1 Tim. 4:15.
Ongiini tatu vulu okukala twa lenga onkandangala ndjoka tatu dhana megongalo?
3. Omomukalo gumwe guni tatu vulu okumona kutya onkandangala yini tatu dhana megongalo nokuulika kutya otwe yi lenga?
3 Omukalo gumwe moka tatu vulu okumona kutya onkandangala yini tatu dhana megongalo nokuulika kutya otwe yi lenga ogwo okukala hatu longele kumwe pakuudha ‘nomupiya omudhiginini nomunandunge’ nosho wo omukalelipo gwe, Olutuwiliki. (Lesha Mateus 24:45-47.) Otwa pumbwa okwiikonakona ngele ohatu inyenge ngaa kewiliko ndyoka hatu pewa kongundu yomupiya. Pashiholelwa, momukokomoko gwoomvula, otwa li twa pewa omayele kombinga yankene tu na okuzala nokwiiyopaleka, yomainyanyudho nosho wo kombinga yokulongitha nayi o-Internet. Mbela ohatu tula nawa miilonga omayele ngaka omawanawa opo tu kale twa gamenwa pambepo? Ongiini kombinga yekumagidho li na ko nasha nokutula po elandulathano ihaali faula lyekonakono lyuukwanegumbo? Mbela omayele ngoka otwe ga tula ngaa momadhiladhilo nokutula po ongulohi yimwe moka tatu kala hatu li ningi? Ngele inatu hokana nenge inatu hokanwa, mbela otwi itulila po ngaa ethimbo lyekonakono lyopaumwene lyokukonakona Omanyolo? Jehova ote ke tu laleka nuuyamba pauhandimwe nosho wo tu li uukwanegumbo ngele otwa landula ewiliko lyongundu yomupiya.
4. Oshike tu na okukaleka momadhiladhilo ngele tatu ningi omatokolo gopaumwene?
4 Yamwe otashi vulika ya tye kutya Omukriste kehe ota vulu okuninga omatokolo kuye mwene miinima ngaashi omainyanyudho, okuzala nokwiiyopaleka. Ihe Omukriste i iyapulila Jehova ngoka a lenga onkandangala ndjoka ta dhana megongalo, ke na okukala ha ningi omatokolo shi ikolelela kwaashoka e hole. Oku na okugandja eitulomo unene tuu ketaloko lyaJehova ndyoka a gandja mOohapu dhe, Ombiimbeli. Etumwalaka lyOmbiimbeli oli na okukala ‘onyeka mokweenda kwetu nuuyelele mondjila yetu.’ (Eps. 119:105) Otatu ningi wo nawa ngele tatu tala nkene omatokolo ngoka hatu ningi paumwene taga gumu uukalele wetu nosho wo yalwe megongalo nopondje.—Lesha 2 Aakorinto 6:3, 4.
5. Omolwashike tu na okukala twa kotokela ombepo yemanguluko?
5 “Ombepo ndjoka tayi pangele ngashingeyi aantu mboka ihaa vulika kuKalunga” oyi li apuhe ngaashi ombepo ndjoka hatu fudhile mo. (Ef. 2:2) Ombepo ndjoka otayi vulu oku tu dhiladhilitha kutya inatu pumbwa ewiliko okuza kehangano lyaJehova. Inatu hala okukala twa fa Diotrefes, ngoka a li ‘inaa hala nando okupulakena shoka tashi popiwa komuyapostoli Johannes.’ (3 Joh. 9, 10) Otwa pumbwa okukala twa kotokela okukala nombepo yemanguluko. Inatu kala nando hatu popi nenge hatu longo shoka tashi ulike okwaanevuliko kwaamboka haya longithwa kuJehova okupopya natse kunena. (Num. 16:1-3) Mepingathano naashoka, otu na okukala twa lenga uuthembahenda wetu wokulongela kumwe nongundu yomupiya. Mbela katu na okulalakanena okukala hatu vulika kwaamboka taya kwatele komeho megongalo lyetu?—Lesha Aahebeli 13:7, 17.
6. Omolwashike tu na okukonakona oonkalo dhetu pauhandimwe?
6 Omukalo gulwe moka tatu ulike kutya otwa lenga onkandangala ndjoka tatu dhana megongalo omokukonakona oonkalo dhetu nokuninga ashihe shoka tatu vulu ‘mokusimaneka oshilonga shetu’ nokusimanekitha Jehova. (Rom. 11:13) Yamwe otaya vulu okukala aakokolindjila yondjigilile. Yalwe ohaya longo iilonga yi ikalekelwa yethimbo lyu udha ngaashi okukala aatumwa, aatonateli aaendi nosho wo okukala iilyo yuukwanegumbo waBetel muuyuni auhe. Aamwatate naamwameme oyendji ohaya kwathele mokutunga Iinyanga yUukwaniilwa. Oyendji yomoshigwana shaJehova otaya ningi ngaashi taya vulu opo ya sile oshimpwiyu oompumbwe dhopambepo dhomaukwanegumbo gawo nokukala ye na ombinga yu udha muukalele oshiwike kehe. (Lesha Aakolossa 3:23, 24.) Otatu vulu okukala neinekelo kutya ngele otatu iyamba nehalo ewanawa miilonga yaKalunga nokuninga ngaashi tatu vulu oku mu longela nomutima aguhe, otatu ka kala aluhe tu na onkandangala ndjoka tatu dhana melongekidho lyaKalunga.
Iinima mbyoka tayi vulu okuguma onkandangala ndjoka tatu dhana megongalo
7. Yelitha nkene oonkalo dhetu tadhi vulu okuguma onkandangala ndjoka tatu dhana megongalo.
7 Osha simana okukonakonununa oonkalo dhetu molwaashoka onkandangala ndjoka tatu dhana megongalo omathimbo gamwe oyi ikolelela kwaashoka tatu vulu okuninga megongalo. Pashiholelwa, onkandangala ndjoka tayi dhanwa komumwatate megongalo miinima yimwe inayi faathana naandjoka omumwameme ta dhana. Oomvula, uukolele niinima yilwe otayi vulu wo okuguma shoka tatu vulu okulonga miilonga yaJehova. Omayeletumbulo 20:29 otaga ti: “Uulenga waagundjukamati owo oshitima shawo, nuulenga waakulupe owo oomvi dhawo.” Aagundjuka megongalo otaya vulu okulonga iilonga yokomake oyindji megongalo molwaashoka oye na oonkondo odhindji natango, omanga aakulupe haya kwathele unene egongalo nuunongo mboka ye na nosho wo iimoniwa yawo. Otwa pumbwa wo okudhimbulukwa kutya kehe shimwe tatu vulu okuninga mehangano lyaJehova oshi ikolelela kesilohenda lyaJehova.—Iil. 14:26; Rom. 12:6-8.
8. Ehalo lyetu ohali gumu ngiini shoka hatu ningi megongalo?
8 Oshiholelwa shaakadhona yaali aagundjuka aamwayinathana otashi tsu omuthindo oshinima shilwe shoka tashi gumu onkandangala ndjoka tatu dhana megongalo. Ayehe yaali oya mana osikola noye na oonkalo dha faathana. Aavali yawo oya li ya ninga ngaashi taya vulu oku ya ladhipika ya ninge aakokolindjila yondjigilile ngele ya mana osikola. Konima yokumana osikola, gumwe okwa ningi omukokolindjila, omanga gulwe a tameke okulonga esiku alihe iilonga yokwiikongela omboloto. Mbela eyooloko olya li peni? Omahalo gawo oga li ga yoolokathana. Sho ya mana osikola kehe gumwe okwa li a ningi shoka a hala. Mbela shika hasho hashi ningwa koyendji yomutse? Otu na okudhiladhila twa mana mo kombinga yaashoka twa hala okuninga miilonga yaKalunga. Mbela otatu vulu okutamununa mo ombinga ndjoka tu na muko, nokuli nuuna tashi tu pula tu lundulule oonkalo dhetu?—2 Kor. 9:7.
9, 10. Otu na okuninga shike ngele katu na omainyengotompelo tage tu inyengitha tu ninge oshindji miilonga yaJehova?
9 Ongiini ngele katu na omainyengotompelo tage tu inyengitha tu ninge oshindji miilonga yaJehova nohatu ningi owala shoka twa pulwa tu ninge megongalo? Paulus montumwafo ye ndjoka a nyolele Aafilippi okwa ti: “Kalunga oye mwene ta longo aluhe mune oku mú pa ehalo noonkondo, opo a tsakanithe elalakano lye ewanawa.” Eeno, Jehova ota vulu okulonga mutse nokunwetha mo ehalo lyetu.—Fil. 2:13; 4:13.
10 Mbela katu na nduno okupula Jehova e tu ninge tu kale twa hala okulonga ehalo lye? Omukwaniilwa David gwaIsraeli shonale osho naanaa a li a ningi ngaaka. Okwa li a galikana a ti: “OMUWA, longa ndje oondjila dhoye; dhi yelithila ndje. Longa ndje okukala moshili yoye, oshoka ongoye Kalunga kandje, omuhupithi gwandje. Ngame onde ku inekela aluhe.” (Eps. 25:4, 5) Otatu vulu okuninga sha faathana mokugalikana opo Jehova e tu ninge tu kale twa hala oku mu nyanyudha. Ngele tatu dhiladhila nkene Jehova Kalunga nOmwana yu uvite kombinga yaashoka tatu ningi mokulonga shoka ya hokwa, omitima dhetu ohadhi kala dhu udha olupandu oku ya pandula. (Mat. 26:6-10; Luk. 21:1-4) Olupandu otalu vulu oku tu inyengitha tu indile Jehova e tu ninge tu kale twa hala okuninga ehumokomeho lyopambepo. Omupolofeti Jesaja okwa tula po oshiholelwa shi na ko nasha niikala mbyoka tu na okukala tu na. Sho Jesaja u uvu ewi lyaJehova tali pula tali ti: “Olye ngo tandi mu tumu? Olye ta ningi omutumwa gwetu?” Okwa yamukula a ti: “Otandi yi! Tuma ndje!”—Jes. 6:8.
Ongiini tatu vulu okuninga ehumokomeho?
11. (a) Omolwashike aamwatate ya pumbwa okulalakanena iinakugwanithwa megongalo? (b) Ongiini omumwatate ta vulu okukala a gwana okukala niinakugwanithwa megongalo?
11 Ngele tatu tala kaantu mboka ya ninginithwa muuyuni auhe ye li 289 678 momumvo gwiilonga 2008, osha yela kutya opu na ompumbwe onene yaamwatate yokukwatela komeho. Omumwatate oku na okwiinyenga ngiini kwaashika? Oku shi popya paunathangwa, oku na okulalakanena okugwanitha po iitegelelwa yuuyakuligongalo nuukuluntugongalo mbyoka ya popiwa mOmanyolo. (1 Tim. 3:1-10, 12, 13; Tit. 1:5-9) Ongiini omumwatate ta vulu okulalakanena okugwanitha po iitegelelwa yopamanyolo? Omokukutha ombinga muukalele, okusila oshimpwiyu nuulaadhi iinakugwanithwa ye megongalo, okulonga nuudhiginini opo a hwepopaleke omatyokosha ge pokugongala kwopaKriste nosho wo okukala e na ohokwe mooitaali ooyakwawo. Otu ulike kutya okwa lenga onkandangala ndjoka ta dhana megongalo.
12. Ongiini aagundjuka taya vulu okuulika uulaadhi wawo shi na ko nasha noshili?
12 Aamwatate aagundjuka, unene tuu mboka ye na oomvula omulongo nasha otaya vulu okuninga shike opo ya hume komeho megongalo? Otaya vulu okuninga oonkambadhala opo ya koke ‘muunongo nomoondunge’ mokumona ontseyo yokutseya Omanyolo. (Kol. 1:9) Okukala aakonakoni aalaadhi yOohapu dhaKalunga nokukala nombinga pokugongala kwegongalo otashi kwathele lela. Aalumentu aagundjuka otaya vulu wo okulalakanena okulonga nuudhiginini opo ya kale ya gwana okumona “ompito okulonga oshilonga shika oshinene” miilonga yethimbo lyu udha yi ili noyi ili. (1 Kor. 16:9) Okulalakanena iilonga yethimbo lyu udha oshi li lela onkalamwenyo yinyanyudha noshi li wo ondjila ndjoka tayi eta omalaleko nuuyamba ogendji.—Lesha Omuuvithi 12:1.
13, 14. Omomikalo dhini aamwameme taya vulu okuulika kutya oya lenga onkandangala ndjoka taya dhana megongalo?
13 Aamwameme otaya vulu wo okuulika kutya oya lenga uuthembahenda wawo wokukutha ombinga megwanitho lyEpisalomi 68:12 (KB) ndyoka tali ti: “Omuwa okwa gandja ohapu, ongundu onene yaakiintu tayi fala elaka lyesindano [onkundana ombwanawa, NW].” Gumwe gwomomikalo omindhindhilikwedhi moka aamwameme taya vulu okuulika olupandu lwawo okupandula onkandangala ndjoka taya dhana megongalo ogwo okukutha ombinga miilonga yokuninga aantu aalongwa. (Mat. 28:19, 20) Onkee ano, uuna aamwameme taya kutha ombinga pakuudha muukalele nokuninga omaiyambo nehalo ewanawa okulonga iilonga mbyoka, otayu ulike kutya oya lenga onkandangala ndjoka taya dhana megongalo.
14 Paulus okwa li a nyolele Titus a ti: “Lombwela oonekulu aakokele, ya kale nokukalamwenyo kwa yapuka. . . . Oye na okulonga elongo lyu uka, opo ya ulukile aakiintu aagundjuka, ya kale ye hole aalumentu yawo noyana, ya kale haa ikwata nawa, aayogoki, ya ninge oomeme ye shi kukala nawa nomagumbo, haa vulika kaalumentu yawo, opo kwaa kale nando omuntu ta sheke elaka lya za kuKalunga.” (Tit. 2:3-5) Aamwameme ya pyokoka pambepo ihaya nwetha mo tuu egongalo nawa! Aamwameme ya tya ngaaka mokusimaneka aamwatate mboka haya kwatele komeho nomokuninga omatokolo ge li pandunge miinima ngaashi okuzala nokwiiyopaleka nosho wo momainyanyudho, ohaya tulile po yalwe oshiholelwa oshiwanawa nohayu ulike kutya oya lenga onkandangala ndjoka taya dhana megongalo.
15. Omumwameme inaa hokanwa ota vulu okuungaunga ngiini nezaza?
15 Omathimbo gamwe, otashi vulika shi kale oshidhigu komumwameme ngoka inaa hokanwa okukala a lenga onkandangala ndjoka ta dhana megongalo. Omumwameme gumwe ngoka e shi ningilwa okwa ti: “Onkalamwenyo yokukala inoo hokanwa otayi vulu okukala omathimbo gamwe yi na ezaza.” Sho a li a pulwa kutya ohu ungaunga ngiini nonkalo ndjoka, okwa ti: “Egalikano nekonakono ohayi kwathele ndje ndi mone ishewe onkandangala ndjoka tandi dhana megongalo. Ohandi konakona kombinga yankene Jehova a tala ndje ko. Opo nduno ohandi kambadhala okukala ndi li ekwatho kuyalwe megongalo. Shika ohashi kwathele ndje ndi kale handi dhiladhila kombinga yayalwe.” Episalomi 32:8 otali ti kutya Jehova okwa li a lombwele David a ti: “Otandi ku wilike e tandi ku tonatele.” Eeno, Jehova oku na ohokwe maapiya ye ayehe, mwa kwatelwa aamwameme mboka inaaya hokanwa, noha kwathele ayehe ya mone onkandangala ndjoka taya dhana megongalo.
Dhiginina onkandangala ndjoka to dhana
16, 17. (a) Omolwashike okutaamba ko ehiyo lyaJehova tu kale tu li oshitopolwa shehangano lye ku li etokolo lya dhenga mbanda ndyoka tatu vulu okuninga? (b) Ongiini tatu vulu okukaleka po onkandangala ndjoka tatu dhana mehangano lyaJehova?
16 Jehova okwa hilila kuye nohole omupiya gwe kehe. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.” (Joh. 6:44) Jehova okwe tu hiya pauhandimwe okuza maantu omamiliyona omayovi kombanda yevi, opo tu ninge oshitopolwa shegongalo lye kunena. Otwa ninga etokolo lya dhenga mbanda sho twa taamba ko ehiyo ndika. Shika osha ninga onkalamwenyo yetu yi kale yi na elalakano nosho wo eityo. Katu uvite tuu enyanyu nembilipalelo molwaashoka tu na onkandangala ndjoka tatu dhana megongalo!
17 Omupisalomi okwa ti: “OMUWA, ondi hole egumbo lyoye.” Okwi imbi wo a ti: “Iiponga oyi li ndje kokule; OMUWA, otandi mu hambelele megongalo lyaantu ye.” (Eps. 26:8, 12) Kalunga kashili oku nine kehe gumwe gwomutse ehala mehangano lye. Ngele tatu tsikile okulandula ewiliko lyopauteokratika nokukala twi ipyakidhila niilonga yaKalunga, otatu vulu okukala twa dhiginina onkandangala ya simana ndjoka hatu dhana mehangano lyaJehova.
Oto dhimbulukwa?
• Omolwashike shi li pandunge okuthika pehulithodhiladhilo kutya Aakriste ayehe oye na onkandangala ndjoka taya dhana megongalo?
• Ongiini tatu ulike kutya otwa lenga onkandangala ndjoka tatu dhana mehangano lyaKalunga?
• Iinima yini tayi vulu okuguma onkandangala ndjoka hatu dhana megongalo?
• Ongiini Aakriste aagundjuka nosho wo mboka aakuluntu taya vulu okuulika kutya oya lenga onkandangala ndjoka taya dhana melongekidho lyaKalunga?
[Omathano pepandja 21]
Ongiini aamwatate taya vulu okukala ya gwana okukala niinakugwanithwa megongalo?
[Ethano pepandja 22]
Ongiini aamwameme taya vulu okuulika kutya oya lenga onkandangala ndjoka taya dhana megongalo?