Omolwashike wu na okwiiyapulila Jehova?

“Uusiku wonena pungame pwa thikama omuyengeli gwaKalunga nguka e na ndje.”—IIL. 27:23, OB-1954.

1. Mboka ya hala okuninginithwa ohaya ningi omalunduluko geni komeho yethimbo, naashika otashi pendutha omapulo geni?

“PAKANKAMENO lyeyambo lyaJesus Kristus, mbela owi iyela ombedhi omolwomayono goye nowi iyapulila Jehova wu longe ehalo lye?” Ndika oli li limwe lyomomapulo gaali ngoka haga yamukulwa kaaninginithwa pehulilo lyoshipopiwa sheninginitho. Omolwashike Aakriste ya pumbwa okwiiyapulila Jehova? Oku mu iyapulila ohaku tu etele ngiini uuwanawa? Omolwashike omuntu itaa vulu okulongela Kalunga momukalo ngoka a hokwa ngele ine mu iyapulila? Opo tu mone omayamukulo, tango otu na okutala kutya eiyapulo oshike.

2. Okwiiyapulila Jehova otashi ti shike?

² Okwiiyapulila Kalunga otashi ti shike? Tala nkene omuyapostoli Paulus a popi ekwatathano lye pokati ke naKalunga. Sho a li e li naantu yalwe oyendji mosikepa omanga inaaya ya moshiponga, okwa li a popi Jehova e li ‘Kalunga ngoka e mu na.’ (Lesha Iilonga 27:22-24, OB-1954.) Aakriste ayehe yashili oyaJehova. Mepingathano naashoka, uuyuni auhe “ou li mepangelo lyomuhindadhi.” (1 Joh. 5:19) Aakriste ohaya ningi yaJehova uuna ya zimine kutya oye mu iyapulila megalikano ndyoka ya ninga. Eiyapulo lya tya ngaaka oli li euvaneko ndyoka omuntu ha ningi paumwene. Ohali landulwa kokuninginithwa momeya.

3. Eninginitho lyaJesus otali ulike shike, nongiini aalanduli ye taya vulu okulandula oshiholelwa she?

³ Jesus okwe tu tulila po oshiholelwa, sho a hogolola paumwene a longe ehalo lyaKalunga. Molwaashoka okwa li a valelwa moshigwana shaIsraeli shoka sha yapulilwa Kalunga, okwa li nale e mu iyapulila. Ihe peninginitho lye okwa ningi oshindji shi vulithe pwaashoka Ompango ya li tayi pula. Oohapu dhaKalunga otadhi ulike kutya okwa li a ti: “Ongame nguka, otandi ya okulonga ehalo lyoye, Kalunga.” (Heb. 10:7; Luk. 3:21, NW) Onkee ano, eninginitho lyaJesus olya li endhindhiliko kutya okwi igandja ye mwene a longe ehalo lyaHe. Aalanduli ye ohaya landula oshiholelwa she uuna tayi igandjele Jehova okupitila meninginitho. Onkee ano, okuninginithwa momeya oshi li euliko lyomontaneho kutya owi iyapulila Kalunga megalikano.

Nkene eiyapulo tali tu etele uuwanawa

4. Uukuume mboka wa li pokati kaDavid naJonatan otawu tu longo shike ngele tashi ya pokupanga uukuume?

⁴ Eiyapulo lyopaKriste oshinima sha kwata miiti. Kali shi owala euvathano ndyoka lya ningwa. Ihe eiyapulo ohali tu etelele ngiini uuwanawa? Moku shi faathanitha, natu tale nkene omauvathano ngoka haga ningwa kaantu monkalamwenyo hage ya etele uuwanawa. Oshiholelwa shimwe, okupanga uukuume. Owu na okukala kuume kashili opo wu nyanyukilwe uuwanawa mboka hawu monika kwaamboka ya panga uukuume. Osha kwatela mo okukala wu uvite wu na oshinakugwanithwa shokukala wu na ko nasha nakuume koye. Uukuume wa dhenga mbanda mboka wa popiwa mOmbiimbeli owa li pokati kaDavid naJonatan. Oya li ya panga nokuli uukuume waaluhe. (Lesha 1 Samuel 17:57; 18:1, 3.) Nonando uukuume woludhi ndoka owa pumba, uukuume woyendji ohawu kala wa kola uuna mboka ye wu panga ye na oshinakugwanithwa shokukala aadhiginini.—Omayel. 17:17; 18:24.

5. Osha li hashi ende ngiini ngele omupika okwa hala okulongela mwene gwe sigo aluhe?

⁵ Ompango ndjoka Kalunga a pe Aaisraeli otayi popi ekwatathano lilwe ndyoka lya li lye etele aantu uuwanawa ngele ya ningi euvathano. Uuna omupika a li a hala okukala a gamenwa nokulongela mwene gwe sigo aluhe, okwa li ha ningi naye euvathano tali kalelele. Ompango otayi ti: “Ngele omupika ota ti, ye oku hole mwene gwe, omukadhi noyana noina hala okumanguluka, nena mwene gwe ne mu fale kehala lyelongelokalunga e te mu tula pomweelo nenge piikulo yomweelo e tu ulula okutsi kwe noniho. Nena ota kala omupika gwe sigo aluhe.”—Eks. 21:5, 6.

6, 7. (a) Uuwanawa wuni aantu haya mono mokuninga omauvathano? (b) Shika otashi ulike shike kombinga yekwatathano lyetu naJehova?

⁶ Euvathano ndyoka aaihokani haya ningi oli li shili oshinima sha kwata miiti. Euvathano ndyoka ohali ningwa pokati kaantu yaali, ihe kali shi lyopakathimbo. Aantu mboka yo oteka olundji ihaya nyanyukilwa nando egameno lyashili, noyana nayo ihaye li mono. Ihe aaihokani mboka aadhiginini kegano lyondjokana yawo ohayi inyengithwa kOmanyolo opo ya kale haya kandula po pahole omaupyakadhi ngoka taga holoka po.—Mat. 19:5, 6; 1 Kor. 13:7, 8; Heb. 13:4.

⁷ Pethimbo lyOmbiimbeli, aantu oya li ya mono uuwanawa mokuninga omauvathano miinima yopangeshefa nosho wo yokukutwa miilonga. (Mat. 20:1, 2, 8) Nokunena ohashi ningwa wo. Pashiholelwa, oshi li nawa okushaina euvathano nenge okondalaka omanga inaamu tameka ongeshefa yomuhanga nenge manga inoo tameka okulonga miilonga yontumba. Ngele euvathano lyokupanga uukuume, lyondjokana nolyokukutwa miilonga yontumba oli na okukolekwa, itashi ka koleka tuu ekwatathano lyetu naJehova ngele tatu mu iyapulile thiluthilu! Ngashingeyi natu taleni nkene aantu methimbo lyonale ya li ya mono uuwanawa mokwiiyapulila Jehova Kalunga nonkene sha li sha li kwatela mo oshindji shi vulithe owala euvathano.

Nkene Aaisraeli ya li ya mono uuwanawa mokwiiyapulila Kalunga

8. Osha li tashi ti shike kAaisraeli okwiiyapulila Kalunga?

⁸ Oshigwana ashihe shaIsraeli osha li shi iyapulila Jehova Kalunga sho sha ningi ehangano naye. Sho ya li ya yungu ontanda popepi nondundu yaSinai, Jehova okwe ya lombwele a ti: “Ngele otamu vulika kungame e tamu dhiginine ehangano lyandje, otamu ningi aantu yandje mwene.” Nena aantu ayehe oya yamukula kumwe oshita ya ti: “Otatu gwanitha ashihe shoka OMUWA a popi.” (Eks. 19:4-8) Eiyapulo lyAaisraeli olya li lya kwatela mo oshindji kashi shi owala euvathano okuninga oshinima shontumba. Olya li tali ti kutya yo aantu yaJehova, nokonima yaashoka Jehova okwa li u ungaunga nayo ongo ‘aantu ye.’

9. Uuwanawa washike oshigwana shaIsraeli sha li sha mono mokukala shi iyapulila Kalunga?

⁹ Aaisraeli oya li ya mono uuwanawa mokukala oshigwana shaJehova. Okwa li he shi sile oshimpwiyu ngaashi omuvali omunahole ta sile omwana oshimpwiyu. Kalunga okwa li a lombwele Aaisraeli a ti: “Ope na tuu omwali ta dhimbwa okahanona ke, a kale kee hole ando omunona e mu vala? Nonando nee yina a dhimbwe omwana, ngame itandi ku dhimbwa.” (Jes. 49:15) Jehova okwa li e ya pa ompango yi ya wilike, okwa li he ya tsu omukumo okupitila maapolofeti nokwa li ha tumu aayengeli ye ya gamene. Omupisalomi okwa nyola a ti: “Ota tseyithile Jakob oohapu dhe nota hololele Israeli iipango nomautho ge. Shika ine shi ningila iigwana yilwe.” (Eps. 147:19, 20; lesha Episalomi 34:7, 19; 48:14.) Ngaashi owala Jehova a li ha sile oshimpwiyu oshigwana she, ota ka sila wo oshimpwiyu mboka ye mu iyapulila kunena.

Omolwashike tu na okwiiyapulila Kalunga?

10, 11. Mbela otwa valwa tu li oshitopolwa shuukwanegumbo waKalunga meshito alihe? Shi yelitha.

¹⁰ Omanga yamwe taya dhiladhila kombinga yokwiiyapulila Kalunga nokuninginithwa, otashi vulika yi ipule taya ti: ‘Omolwashike itandi vulu oku mu longela nonando inandi mu iyapulila?’ Otatu ke shi uva ko owala nawa uuna tatu ipula nkene Kalunga he tu tala ko kunena. Natu kale tu shi kutya atuheni otwa valelwa kondje yuukwanegumbo waJehova omolwuulunde waAdam. (Rom. 3:23; 5:12) Osha simanenena opo twi iyapulile Kalunga opo tu kale oshitopolwa shuukwanegumbo we muuyuni auhe. Natu taleni kutya omolwashike.

¹¹ Kapu na he omuvali ngoka ta vulu okugandja omwenyo gwaaluhe komwana, ngaashi sha li elalakano lyaKalunga. (1 Tim. 6:19) Tse inatu valwa tu li oyana yaKalunga, molwaashoka aaihokani yotango oya yono, shoka sha ningitha opo aantu ayehe ya topoke ko kOmushiti gwetu ngoka e li Tate yetu omunahole. (Yelekanitha Deuteronomium 32:5.) Okuza mpoka sigo okunena aantu ayehe oya topoka ko kuukwanegumbo waJehova meshito alihe nokaye na ekwatathano naye.

12. (a) Aantu inaaya gwanenena otaya vulu ngiini okukala iilyo yuukwanegumbo waKalunga? (b) Oonkatu dhini tu na okukatuka omanga inaatu ninginithwa?

¹² Ihe nonando ongaaka, otatu vulu okwiindila pauhandimwe opo Kalunga e tu taambe muukwanegumbo we tu li aapiya ye mboka a hokwa.a Shono otashi wapa ngiini ngele tse aalunde nale? Omuyapostoli Paulus okwa nyola a ti: “Manga twa li aatondi yaKalunga, Kalunga okwe tu hanganitha naye mwene meso lyOmwana.” (Rom. 5:10) Sho tatu ninginithwa ohatu indile Kalunga e tu pe eiyuvo lya yela opo tu kale twa hokiwa kuye. (1 Pet. 3:21, NW) Ihe omanga inaatu ninginithwa, otu na okukatuka oonkatu dhontumba. Otu na okutseya Kalunga, oku mu inekela, okwiitedhulula nokulundulula oondjila dhetu dhonale. (Joh. 17:3; Iil. 3:19; Heb. 11:6) Otu na okuninga ishewe oshinima shimwe omanga inaatu ninga iilyo yuukwanegumbo waKalunga. Oshike mbela shono?

13. Omolwashike she eleka omuntu i iyapulile Kalunga opo a kale oshitopolwa shuukwanegumbo we mboka a hokwa?

¹³ Omuntu ngoka a topoka ko kuukwanegumbo waKalunga oku na tango okuninga euvaneko lya mana mo naKalunga, opo a ninge oshilyo shuukwanegumbo we mboka a hokwa. Opo tu shi uve ko nawa, natu tye nduno omusamane ngoka a simanekwa oku na ohokwe nokwa hala okuputudha okanona kokamati okathigwa ka kale ngaashi omwana. Omusamane ngoka okwa tseyika nawa e li omunambili. Ihe omanga okamati hoka inaaka ninga oshilyo shuukwanegumbo we, omusamane ngoka ota ka kala a hala ka ninge euvaneko lyontumba. Omusamane ote ka lombwele ta ti: “Omanga inoo ninga omumwandje, onda hala okutseya ngele oto ka kala wu hole ndje nokusimaneka ndje ndi li onga ho.” Omusamane ngoka ota ka pitika owala okamati hoka ka ninge oshilyo shuukwanegumbo we ngele otaka tsu kumwe naashoka te ka pula. Mbela kashi li pandjele okuninga ngaaka? Sha faathana, Jehova oha pitike owala mboka ya hala oku mu iyapulila oyo ya ninge iilyo yuukwanegumbo we. Ombiimbeli otayi ti: “Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela.”—Rom. 12:1.

Eiyapulo euliko kutya owu hole Kalunga nowe mu itaala

14. Ongiini eiyapulo li li euliko kutya otu hole Kalunga?

¹⁴ Okwiiyapulila Jehova Kalunga oshi li euliko kutya otu mu hole nomutima aguhe. Momikalo dhimwe osha faathana negano lyondjokana. Esiku omulumentu Omukriste ta hokana oha gana kutya ota ka kala omudhiginini kutya nduno otashi pula shike. Mokugana ngawo ohu uvanekele omufuko gwe kutya osho ta ka ninga. Omulumentu Omukriste ngoka ta hokana oha kala e shi kutya ita ka pewa uuthembahenda wokuhokana omufuko gwe ngele ita ningi egano lyondjokana. Sha faathana, natse itatu ka nyanyukilwa thiluthilu uuwanawa wokukala iilyo yuukwanegumbo waJehova ngele inatu ninga egano oku mu iyapulila. Onkee ano, nonando inaatu gwanenena, ohatu iyapulile Kalunga molwaashoka otwa hala tu kale aantu ye nokukala aadhiginini kuye kutya nduno otashi pula shike.—Mat. 22:37.

15. Ongiini eiyapulo li li euliko kutya otu na eitaalo?

¹⁵ Okwiiyapulila Kalunga oshi li euliko kutya otu na eitaalo muye. Omolwashike shi li ngawo? Ngele otu na eitaalo muJehova, otatu ka kala nuushili kutya oshe tu opalela okukala popepi naye. (Eps. 73:28) Otu shi kutya itashi ka kala aluhe oshipu okweenda pamwe naKalunga molwaashoka otu li muuyuni mu na “aantu ya pilaala noya goyoka,” ihe otwi inekela momauvaneko gaKalunga kutya ota ka ambidhidha oonkambadhala dhetu. (Fil. 2:15; 4:13, OB-1954) Otu shi kutya inatu gwanenena, ihe otu na einekelo kutya Jehova ota ka ungaunga natse nohenda uuna twa yi pomunkulo. (Lesha Episalomi 103:13, 14; Aaroma 7:21-25.) Otu na eitaalo kutya Jehova ote ke tu pa ondjambi omolwetokolo lyetu okukala aadhiginini.—Job 27:5.

Okwiiyapulila Kalunga ohaku eta elago

16, 17. Omolwashike okwiiyapulila Jehova haku eta elago?

¹⁶ Okwiiyapulila Jehova ohaku eta elago molwaashoka okwa kwatela mo eiyambo ndyoka hatu ningi. Jesus okwa popya oshili ya simana sho a ti: “Okugandja oku na elago ku vule okutaamba.” (Iil. 20:35) Pethimbo lyuukalele we kombanda yevi Jesus okwa li a nyanyukilwa okugandja hoka. Mpoka sha pumbiwa, okwa li ha kwathele yalwe ya mone ondjila ndjoka tayi fala komwenyo, nonando okwa li a vulwa, a sa ondjala noku li monkalo ondhigu. (Joh. 4:34) Jesus okwa li ha kala a hokwa okunyanyudha omutima gwaHe. Jesus okwa ti: “Ngame otandi longo aluhe shoka she mu opalela.”—Joh. 8:29; Omayel. 27:11.

¹⁷ Onkee ano, Jesus okwa li a lombwele aalanduli ye shi na ko nasha nonkalamwenyo tayi nyanyudha sho a ti: “Ngele ku na ngoka, a hala okulandula ndje, oye ni idhimbwe ye mwene.” (Mat. 16:24) Ngele tatu shi ningi, otashi ke tu hedhitha popepi naJehova. Mbela opu na ngaa gumwe ishewe ngoka ta vulu oku tu sila oshimpwiyu pahole ngaashi ye?

18. Omolwashike okwiiyapulila Jehova haku eta elago shi vulithe okwiiyapulila oshinima shilwe nenge omuntu gwontumba?

¹⁸ Okwiiyapulila Jehova nokukala metsokumwe neiyapulo lyetu mokulonga ehalo lye otashi ke tu etela elago shi vulithe okwiiyapulila oshinima shilwe nenge omuntu gwontumba. Pashiholelwa, aantu oyendji ohaya lalakanene omaliko ngoka hage ya etele omaupyakadhi nomayemato. Ihe mboka yi iyapulila Jehova ohaya mono elago tali kalelele. (Mat. 6:24) Esimano okukala ye li “aalongi pamwe naKalunga” ohali ya nyanyudha, ihe inayi iyapulila iilonga, ihe oKalunga ketu ngoka ha pandula. (1 Kor. 3:9) Kapu na gumwe ngoka ha pandula iilonga yawo yeiyambo e vule Kalunga. Mboka aadhiginini muye ote ke ya ninga aagundjuka ishewe opo ya ka mone uuwanawa mesiloshimpwiyu lye lyaaluhe.—Job 33:25; lesha Aahebeli 6:10.

19. Uuthembahenda wuni hawu nyanyukilwa kwaamboka yi iyapulila Jehova?

¹⁹ Ngele owi iyapulila Jehova monkalamwenyo yoye, nena oho kala wu na ekwatathano ewanawa naye. Ombiimbeli otayi ti: “Hedheni kuKalunga, oye nota hedha kune.” (Jak. 4:8; Eps. 25:14) Moshitopolwa tashi landula otatu ka kundathana kutya omolwashike tu na okukala neinekelo lyokuhogolola kutya tse oyaJehova.

[Enyolo lyopevi]

Oto yamukula ngiini?

• Okwiiyapulila Kalunga otashi ti shike?

• Ongiini okwiiyapulila Kalunga haku tu etele uuwanawa?

• Omolwashike Aakriste ye na okwiiyapulila Jehova?

[Ethano pepandja 12]

Okukala metsokumwe neiyapulo lyetu otaku tu etele elago lyaaluhe