Okukala yaJehova oshi li uuthembahenda inaawu longelwa
“Otse oyOmuwa.”—ROM. 14:8.
1, 2. (a) Uuthembahenda wuni tu na? (b) Omapulo geni tatu ka kundathana?
JEHOVA okwa li a pe oshigwana shaIsraeli oshinakugwanithwa oshinene sho e ya lombwele a ti: “Otamu ningi aantu yandje mwene.” (Eks. 19:5) Mboka ye li wo iilyo yegongalo lyopaKriste kunena, oye na uuthembahenda wokukala yaJehova. (1 Pet. 2:9; Eh. 7:9, 14, 15) Uuthembahenda mboka otawu vulu oku tu etela uuwanawa waaluhe.
2 Nonando okukala yaJehova oshi li uuthembahenda, ohashi endele wo pamwe noshinakugwanithwa. Yamwe otashi vulika yi ipule: ‘Mbela oti ka vulu ngaa okulonga shoka Jehova a tegelela ndi ninge? Uuna nda yi mepuko, mbela ote ekelehi ndje? Mbela itandi ka kala ndi na emanguluko lyasha ngele ondi li omupiya gwe?’ Oshi li nawa okwiipula ngaaka. Ihe oshi li nawa okwiipula tango: Uuwanawa washike hawu zi mokukala yaJehova?
Okukala yaJehova otashi tu etele elago
3. Uuwanawa washike Rahab a li a mono sho a tokola okulongela Jehova?
3 Mbela aantu mboka yaJehova ohaya mono uuwanawa washa? Tala koshiholelwa shohonda Rahab ngoka a li ha kala muJeriko shonale. Nopwaahe na omalimbililo, mokuputuka kwe okwa li ha galikana iikalunga iinyanyalithi yaKaanana. Ihe okwa li e wete kutya Jehova oye Kalunga kashili konima sho u uvu nkene a kwathele oshigwana shaIsraeli shi sinde aatondi yasho. Rahab okwa li a tula omwenyo gwe moshiponga mokugamena oshigwana shaKalunga sho a hogolola okugama kombinga yasho. Ombiimbeli otayi ti: “Rahab okwa ningi omuyuuki koshipala shaKalunga omolwiilonga ye, sho e edhilile aatumwa Aajuda e te ya pititha nondjila yilwe.” (Jak. 2:25) Okwa li a mono uuwanawa mokukala oshitopolwa shaantu yaKalunga mboka ya yogoka noye shi Ompango ye yopahole nosho wo uuyuuki we. Okwa li a nyanyukwa sho e etha po onkalamwenyo ye yonale. Okwa li a hokanwa komulumentu Omuisraeli noya vala Boas omumati ngoka a li omutilikalunga.—Jos. 6:25; Rut 2:4-12; Mat. 1:5, 6.
4. Uuwanawa washike Rut a mono sho a tokola a longele Jehova?
4 Rut Omumoab okwa li wo a tokola okulongela Jehova. Otashi vulika a li ha longele Kemosh niikalunga yilwe yaMoab okuza kuunona we, ihe okwa li i ilongo kombinga yaKalunga kashili e ta hokanwa komulumentu Omuisraeli ngoka e ya kuMoab omolwuuhupilo. (Lesha Rut 1:1-6.) Ihe konima yethimbo, Rut naOrpa nayinamweno Naemi oya li yi idhenge ondjila ya shune kuBetlehem, ihe mondjila Naemi okwa li a lombwele iitenya ye yi shune koshilongo shawo. Kasha li oshipu kuyo oku ka kala muIsraeli. Eeno, Orpa okwa “yi koyaandjawo nokookalunga ke,” ihe Rut ina shuna. Okwa li u ulike eitaalo lye nokwa li e shi kutya okwa hala a game kombinga yalye. Okwa lombwele Naemi a ti: “Ino tya, nii ku thige po. Pitika ndje, ndi ye nangoye. Nonkoka to yi, oko te yi wo, naankoka to ka kala, oko nda hala okukala wo. Aangandjoye otaa ka ninga aangandjetu, ngaashika Kalunga koye ota ka kala Kalunga kandje wo.” (Rut 1:15, 16) Molwaashoka okwa li a hogolola okulongela Jehova, Rut okwa li a mono uuwanawa mOmpango yaKalunga ndjoka ya li ya tulilwa po aaselekadhi, oohepele naamboka kaaye na omapya. Okwa li e na ompolo, na Jehova okwa li e mu gamene noku mu shiga.
5. Oshike wa ndhindhilika kombinga yaantu mboka haya longele Jehova nuudhiginini?
5 Otashi vulika wu shi yamwe mboka ya longela Jehova nuudhiginini omimvo odhindji konima yoku mu iyapulila. Ya pula kutya uuwanawa washike ya mona mokulongela Jehova. Nonando nayo oye na omaupyakadhi, omupisalomi okwa popya oshili sho a ti: “Oshigwana shi na [Jehova, NW], oye Kalunga kasho, oshi na elago.”—Eps. 144:15.
Iitegelelwa yaJehova oyi li pandjele
6. Omolwashike katu na okukala nuumbanda kutya itatu ka gwanitha po iitegelelwa yaJehova?
6 Otashi vulika wu kale to ipula ngele oto ka gwanitha po ngaa iitegelelwa yaJehova. Oshipu okukala tu wete shi li omutenge omudhigu okukala omupiya gwaKalunga, okukala metsokumwe nomithikampango dhe nokupopya kombinga yedhina lye. Pashiholelwa, Moses okwa li e wete inaa gwana oku ka popya nAaisraeli nonomukwaniilwa gwaEgipiti. Ihe Kalunga okwa li e na ondjele naMoses. Jehova okwa li e mu ‘lombwele shoka e na okuninga.’ (Lesha Eksodus 3:11; 4:1, 10, 13-15.) Molwaashoka Moses okwa li a zimine ekwatho ndyoka a pewa, okwa mono enyanyu ndyoka hali zi mokulonga ehalo lyaKalunga. Jehova oku na ondjele noiha tegelele tu longe shoka itaatu vulu. Oku shi kutya inatu gwanenena nokwa hala oku tu kwathela. (Eps. 103:14) Okulongela Kalunga tu li aalanduli yaJesus kashi shi omutenge omudhigu, ihe otashi talaleke molwaashoka oku shi ninga otashi etele yalwe uuwanawa nohashi nyanyudha omutima gwaJehova. Jesus okwa ti: “Ileni kungame . . . ongame notandi mú pe [evululuko]. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka.”—Mat. 11:28, 29.
7. Omolwashike to vulu okukala neinekelo kutya Jehova ote ke ku kwathela wu longe shoka a hala wu ninge?
7 Jehova ote ke tu tsa omukumo aluhe ngele otwi inekela moonkondo dhe. Jeremia ka li omupopi a pyokoka. Sho Jehova e mu hogolola a ninge omuhunganeki gwe, Jeremia okwa yamukula a ti: “OMUWA Omupangeliawike, kandi shi okupopya, oshoka ngame omunona.” Konima okwa popi nokuli a ti: “Ite popiwe medhina lye.” (Jer. 1:6; 20:9) Ihe Jeremia okwa li a pondola okuuvitha etumwalaka ndyoka li tondike kaantu uule womimvo 40, molwaashoka Jehova e mu tsu omukumo. Jehova okwa li e mu shilipaleke lwiikando, a ti: “Otandi ka kala pamwe nangoye. Otandi ku gamene notandi ku hupitha.”—Jer. 1:8, 19; 15:20.
8. Otatu ku ulika ngiini kutya otwi inekela muJehova?
8 Jehova ote ke tu kwathela tu gwanithe po shoka Aakriste ya tegelelwa ya longe kunena, ngaashi owala a li e shi ningile Moses naJeremia. Otu na okukala twe mu inekela thiluthilu. Ombiimbeli otayi ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayel. 3:5, 6) Otatu ku ulika kutya otwi inekela Jehova uuna tatu vulika komakwatho ngoka ha gandja okupitila mOohapu dhe nosho wo megongalo. Ngele otwe etha Jehova a wilike oonkatu dhetu monkalamwenyo, otatu ka kala aadhiginini muye.
Jehova oku na ko nasha naapiya ye pauhandimwe
9, 10. Egameno lyoludhi luni tali popiwa mEpisalomi 91?
9 Omanga tayi ipula kombinga yokwiiyapulila Jehova, yamwe ohaya kala tayi ipula shi na ko nasha nokugwila meyono, okukala inaaya gwana we nokweekelwahi kuJehova. Okwe tu pa iikwa niipangitho ayihe mbyoka twa pumbwa opo tu kaleke po ekwatathano lyetu naye ndyoka li na ondilo. Natu ka tale nkene omunyoli gwEpisalomi 91 te shi popi.
10 Episalomi ndyoka olya tameke noohapu tadhi ti: ‘Onakukala megameno lyaanguka gwOpombandambanda nonakwiilangela momuzile gwOmunankondo awike, oye ta ti: Omuwa einekelo lyandje nepopilongulu lyandje, oye Kalunga kandje, nde mu inekela. Oshoka oye te ku hupitha momwigo gwomuyuli gwoondhila.’ (Eps. 91:1-3, OB-1954) Ndhindhilika kutya Kalunga oku uvaneka okugamena mboka ye mu hole noye mu inekela. (Lesha Episalomi 91:9, 14.) Omupisalomi ota popi mbela egameno lini? Okwa li ta popi nkene Jehova a li a gamene aapiya ye yamwe yonale, shoka sha li sha kwatela mo okugamena ezimo moka mwa li tamu ka za Mesiasa omuuvanekwa. Ihe aantu oyendji mboka ya li ya kakatela uudhiginini wawo oya li ya tulwa moondjedhililo, ya hepekwa nOndiaboli oye ya dhipagitha nonyanya opo ye ethe po uudhiginini wawo muKalunga. (Heb. 11:34-39) Oya li ye na uulaadhi mboka ya pumbwa, molwaashoka Jehova okwa li e ya gamene pambepo kiiponga mbyoka ya li tayi vulu okuyona po uudhiginini wawo. Kungeyi, Episalomi 91 otali gandja uuyelele nkene Jehova ha gamene aapiya ye pambepo.
11. ‘Egameno lyaanguka gwOpombandambanda’ oshike, nongiini Kalunga ha gamene mboka ye li mo?
11 ‘Egameno lyaanguka gwOpombandambanda,’ ndyoka tali popiwa komupisalomi olyopathaneko notali ulike kehala lyegameno lyopambepo. Episalomi ndyoka otali popi kutya Kalunga ota ka gamena aapiya ye koshiponga kehe shoka tashi yono po eitaalo lyawo nosho wo ohole yawo yoku mu hola. (Eps. 15:1, 2; 121:5) Aapiya ye oyo owala taya mono egameno ndyoka, ihe mboka kaye shi ooitaali itaye li mono. Eeno, Jehova oha gamene owala aantu mboka taya ti: ‘Ongoye Kalunga kandje, nde ku inekela.’ Ngele otu li mehala lyegameno, katu na okukala tatu ipula unene kombinga yokuya momwigo “gwomuyuli gwoondhila,” Satana, nokukanitha einekelo muKalunga.
12. Iiponga yini hayi yono po ekwatathano lyetu naKalunga?
12 Mbela iiponga yini hayi yono po ekwatathano lyetu li na ondilo naKalunga? Omupisalomi okwa popi iiponga yimwe ngaashi: “Elega itali ku akele uusiku, nuuvu itau ku kwata omutenya.” (Eps. 91:5, 6) Aantu oyendji oya ya momwigo “gwomuyuli gwoondhila,” ngoka gu li ombepo yokwiihola mwene noyemanguluko. (2 Kor. 11:3) Yamwe okwe ya kwata ko omboko opo ya kale ye na olwiho, uuntsa nohole yokuhola omaliko. Yalwe natango okwe ya pukitha mokukala ya lenga unene omaufilosofi gokukala ye hole iilongo yawo, oevolusi nomalongelokalunga giifundja. (Kol. 2:8) Oyendji oya gwila momwigo gwomilalo ndhoka kaadhi li pampango. Omalega ngoka oga yona po uupambepo waantu omamiliyona ya kanithe ohole yawo yokuhola Kalunga.—Lesha Episalomi 91:7-10; Mat. 24:12.
Gamena ohole yoye yokuhola Kalunga
13. Jehova ohe tu gamene ngiini kiiponga mbyoka hayi yono po uupambepo wetu?
13 Jehova oha gamene ngiini aapiya ye kiiponga mbyoka yopambepo? Episalomi 91:11 otali ti: “Kalunga ote ku tumine aayengeli ye, ye ku gamene; otaye ku shigi shaa mpoka to yi.” Aayengeli megulu ohaye tu wilike noku tu gamena opo tu vule okuuvitha onkundana ombwanawa. (Eh. 14:6) Kakele owala kaayengeli, aakuluntugongalo Aakriste ohaye tu gamene twaa pukithwe komapopyo gaa fele moku tu longa ya kankamena thiluthilu kOmanyolo. Ohaya vulu okukwathela kehe ngoka ta kondjo a sinde iikala yuuyuni. (Tit. 1:9; 1 Pet. 5:2) “Omupiya omudhiginini nomunandunge” ohe tu pe wo iikulya yopambepo yi tu gamene kelongo lyoevolusi, komahalo ga nyata, okulalakanena omaliko nesimano nokomahalo ogendji galwe omawinayi nosho wo omanwethomo ga nika oshiponga. (Mat. 24:45, KB) Oshike she ku kwathela opo wu sinde iiponga yimwe yoludhi ndoka?
14. Ongiini tatu vulu okumona uuwanawa megameno ndyoka Kalunga he tu pe?
14 Oshike tu na okuninga opo tu kale “megameno” lyaKalunga? Ngaashi owala hatu kambadhala okwiigamena aluhe opo katu monithwe iiponga palutu, kaalongi yiikulumuna nohatu igamene wo opo twaaha kwatwe komikithi, otu na wo okutsikila nokwiigamena kiiponga yopambepo. Otu na okukala hatu tula miilonga ewiliko ndyoka Jehova he tu pe okupitila miileshomwa yetu, pokugongala kwegongalo nopiigongi. Otu na okukala hatu pula omayele kaakuluntugongalo. Ohatu mono wo uuwanawa momaukwatya gi ili nogi ili ngoka haga ulikwa kaamwatate naamwameme. Odhoshili kutya okweendathana negongalo ohashi tu kwathele tu kale nowino.—Omayel. 13:20; lesha 1 Petrus 4:10.
15. Omolwashike to vulu okukala neinekelo kutya Jehova ote ke ku gamena kiiponga mbyoka tayi vulu okuyona po ekwatathano lyoye naye?
15 Nopwaahe na omalimbililo Jehova ote ke tu gamena kiiponga ayihe mbyoka hayi yono po ekwatathano lyetu naye. (Rom. 8:38, 39) Okwa kala nokugamena egongalo lye kaatondi aanankondo yopalongelokalunga noyopapolitika. Aatondi mboka elalakano lyawo kali shi naanaa oku tu dhipaga, ihe oku tu topola ko kuKalunga ketu omuyapuki. Jehova okwa gwanitha po euvaneko lye ndyoka tali ti: “Oshikondjitho kehe tashi hambulwa shi ku kondjithe, itashi tompola sha.”—Jes. 54:17.
Olye he tu pe emanguluko?
16. Omolwashike uuyuni itaawu vulu oku tu pa emanguluko?
16 Ngele tse oyaJehova mbela otashi tu yugu emanguluko? Aawe, mepingathano naashoka, okukala oshitopolwa shuuyuni ohashi tu yugu emanguluko. Uuyuni mbuka owi iteka ko kuJehova notawu pangelwa kukalunga omukwanyanya ngoka ha piki aantu. (Joh. 14:30) Pashiholelwa, uuyuni mbuka waSatana ohawu kutha aantu emanguluko omolwuuhupilo mboka tawu ende tawu shongola. (Yelekanitha Ehololo 13:16, 17.) Uulunde nawo ohawu piki aantu. (Joh. 8:34; Heb. 3:13) Nonando mboka kaaye shi ooitaali ohayu uvaneke emanguluko uuna taya humitha komeho onkalamwenyo ndjoka yi li ompinge nomalongo gaJehova, kehe ngoka te ya pulakene ota ka pikwa nziya konkalamwenyo ndjoka ya yonuka yokulonga uulunde.—Rom. 1:24-32.
17. Jehova ohe tu pe emanguluko lini?
17 Kombinga onkwawo, ngele tatu igandja miikaha yaJehova, ote ke tu mangulula mukehe shimwe shoka tashi vulu oku tu etela oshiponga. Onkalamwenyo yetu otatu vulu oku yi yelekanitha nomuvu ngoka i inekela omutandi ngoka omunekeka opo e mu mangulule monkalo ndjoka tayi pula omwenyo gwe. Atuheni otwa thigulula onkalo ndjoka tayi pula oomwenyo dhetu. Onkalo ndjoka oyo uulunde. Otatu ka vula owala okuhenuka iilanduliko yuulunde noku ka kala nomwenyo gwaaluhe ngele tatu igandja miikaha yaJehova pakankameno lyekuliloyambo lyaKristus. (Joh. 3:36) Ngaashi owala hatu kala twi inekela omutandi ngoka ha popilwa muuwanawa, neinekelo lyetu muJehova otali ka koka sho tatu tsikile okwiilonga kombinga ye. Onkee ano, natu tsikileni nokukonakona Oohapu dhaKalunga nuukeka molwaashoka otashi ke tu kwathela opo tu kale tu mu hole mokuulika etilosimaneko.—1 Joh. 4:18.
18. Uuwanawa washike mboka yaJehova taya ka mona?
18 Jehova okwa pa aantu ayehe emanguluko lyokuninga omatokolo. Oohapu dhe otadhi ti: ‘Hogolola omwenyo. Hola OMUWA Kalunga koye . . . , nena ngoye mwene noluvalo lwoye otamu ka kala olule.’ (Deut. 30:19, 20) Okwa hala tu ulike ohole yetu yoku mu hola mokutokola tse yene tu mu longele. Pehala lyoku tu kutha emanguluko okukala yaKalunga ngoka tu hole, otashi ke tu etela lela enyanyu.
19. Omolwashike okukala yaJehova shi li uuthembahenda inaawu longelwa?
19 Tse inatu gwana tu kale yaKalunga molwaashoka otu li aalunde. Ihe ohole yaKalunga ndjoka inaayi longelwa oye shi ningi tashi vulika. (2 Tim. 1:9) Onkee ano, Paulus okwa nyola a ti: “Nongele tatu si, otatu sile koshipala shOmuwa. Onkee ano, ngele otu na omwenyo nenge otatu si, otse oyOmuwa.” (Rom. 14:8) Katu na siku tu ki ipe uusama ngele otwa hogolola okukala yaJehova.
Oto yamukula ngiini?
• Uuwanawa washike hawu zi mokukala yaJehova?
• Omolwashike tatu vulu okugwanitha po iitegelelwa yaKalunga?
• Jehova oha gamene aapiya ye ngiini?
[Omathano pepandja 15]
Pula yalwe ye ku lombwele uuwanawa mboka ya mona sho ye li yaJehova
[Ethano pepandja 16]
Omomikalo dhilwe dhini Jehova he tu gamene?