Omolwashike tu na okukala twa simaneka aakokele?
KOMUNKULOFUTA gwefuta lyaKalifornia shaAmerika oku na omuti omukiperesi ngoka hagu thanekwa olundji muuyuni. Ogwa tseyika nedhina “Lone Cypress.” Omuti nguka ogu na oomvula dhi vulithe 250. Molwaashono ogwa tseyika nawa omolwuudhiginini wago, ogu holike momikalo dhontumba. Pashiholelwa, ogwa kolekwa noongodhi oonene dhoku gu ambidhidha nosho wo nomamanya pekota lyagwo.
Omukiperesi ngoka otagu vulu oku tu dhimbulukitha Aakriste aakokele mboka ye li mokati ketu, mboka ye na uudhiginini uundhindhilikwedhi. Okuuvitha onkundana ombwanawa ogwo omukalo gumwe gwa tongomana moka haye shi ningi. Omupolofeti Joel okwa li a hunganeke kutya “aasamane aakulupe” otaya ka “hunganeka” etumwalaka lyOmbiimbeli. (Joel 2:28-32; Iil. 2:16-21) Dhiladhila owala kombinga yoowili odhindji ndhoka aakokele mboka haya longitha nehalo mokukwathela yalwe yi ilonge kombinga ‘yonkundana ombwanawa yuukwaniilwa’! (Mat. 24:14, KB) Yamwe yomaauvithi yUukwaniilwa mbaka aakokele oyi idhidhimikila omahepeko nenge omaupyakadhi galwe uule woomvula. Ngele omukiperesi ogwa konekwa omolwuudhiginini wago nogwa kolekwa nomamanya nonoongodhi, mbela aakokele mboka ye li mokati ketu kaye na tuu okukala ya talika ko nawa nokuungaungwa nayo nesimaneko!
Jehova Kalunga okwa li a lombwele oshigwana she shonale a ti: “Simanekeni aakulupe, ne mu yele aakuluntu yoomvi.” (Lev. 19:32) Mokati kaapiya yaJehova kunena otatu adha mo iiholelwa iiwanawa yaamboka ya kala ‘nokweenda pamwe naKalunga’ uule woomvula omilongo. (Mika 6:8) Sho taya tsikile okutula miilonga omakotampango gopamanyolo, omitse dhawo dhoomvi odhi li “oshishani shuulenga.”—Omayel. 16:31.
Omuyapostoli Paulus okwa li a lombwele omugundjuka Timoteus a ti: “Ino ganda omusamane omukokele.” Ihe pehala lyaashono, okwa li e na ‘oku mu popitha ongahe naakiintu aagundjuka ongaamwayina.’ (1 Tim. 5:1, 2) Onkee ano, Timoteus okwa li e na “okuyela” aakuluntu yoomvi. Osha yela nduno kutya Jehova okwa tegelela okupopya kwetu ku kale taku ulike esimaneko lya tya ngaaka.
Aaroma 12:10 oya ti: ‘Lalakaneneni okusimanekathana.’ Aatonateli megongalo oye na okukala ya simaneka Aakriste aakokele. Ihe tse atuhe otu na okukala twa simanekathana.
Dhoshili, iilyo yuukwanegumbo oyi na iinakugwanithwa yi ikalelekelwa yokusila oshimpwiyu aavali yawo nosho wo ooyinakulu. Shi na ko nasha nomukiperesi ngoka, aantu oya konga omikalo opo ye dhi kwathele dhi kale nomwenyo notaya tsikile oku shi ninga. Dhoshili, otu na okuninga oonkambadhala opo tu ulike kutya otwa simaneka aavali yetu nookuku mboka taye ende taya koko. Pashiholelwa, okukala omupulakeni omwaanawa otashi ke tu ningitha kaatu kondjithe tu ninge iinima momukalo gwetu inaatu dhiladhila shi na ko nasha nomaiyuvo gawo.—Omayel. 23:22; 1 Tim. 5:4.
Aakokele mboka ye li mokati ketu oye na ondilo kaaku na we momeho gaJehova. Ihe ya etha. (Eps. 71:18) Kalunga kashili ohe ya koleke ya tsikile noku mu longela nuudhiginini. Natu tsikile ano okwaambidhidha nokusimaneka aakokele.
[Omathano pepandja 13]
Ngaashi naanaa omuti gwomukiperesi ngoka gwa pumbwa okwaambidhidhwa, aakokele oye na okuungaungwa nayo nesimaneko
[Edhina lyomuthaneki]
American Spirit Images/age fotostock