Mona egameno mokati koshigwana shaKalunga
‘Otandi ke ku pandula megongalo lyaantu yoye.’—EPS. 35:18.
1-3. (a) Oshike tashi vulu okufala Aakriste yamwe monkalo yopambepo ya nika oshiponga? (b) Openi oshigwana shaKalunga tashi vulu okumona egameno?
SHO Joe nomukulukadhi gwe ya li mefudho, oya li taya mbwindi ye na uupaipi komayulu wokufudhila ombepo ye li mokati koohi dhomaludhi gi ili nogi ili. Oya li ya mbwindi kokule kashona opo ya vule okumona oshindji. Sho ya li ya mbwindi sigo oompoka pwa fa puule kashona, omukulukadhi gwaJoe okwa ti: “Ondi wete kutya otwa fa tu uka kokule unene.” Joe okwe mu yamukula a ti: “Gundjila, mukwetu. Ondi shi shi shoka te ningi.” Joe ota dhimbulukwa kutya konima yokathimbo okwa li i ipula kutya: ‘Oohi adhihe odha yi peni?’ Nehaluko, okwa mono kutya omolwashike. Osharka oya anduka momeya omale noya li naanaa yu uka kuye. Okwa li naanaa oshihakanwa shayo. Sho osharka ya li owala kokule naye uule woonkatu dhontumba, oya piluka noya kana po.
2 Omukriste ota vulu okukala i ipyakidhilithwa kiinima iihokitha yonkalelo yiinima yaSatana, ngaashi omainyanyudho, iilonga nokomaliko, nokonima yethimbo ke wete we kutya oku uka momeya omale ga nika oshiponga. Joe ngoka e li Omukriste omukuluntugongalo okwa ti: “Oshimoniwa shandje osha li sha ningitha ndje ndi dhiladhile kutya oolye hatu endathana nayo. Mbwinda mpoka pu na egameno noto nyanyukilwa po, sha hala okutya, megongalo!” Ino mbwinda wu uka momeya omale, moka tashi vulika wu ki iyadhe wi ikalela pambepo notashi ke ku tula moshiponga. Ngele owu na esiku limwe we ki iyadha wu li momeya omale noga nika oshiponga, shuna hoka ku na egameno. Ngele hasho, oto ka tula ekwatathano lyoye naJehova moshiponga.
3 Kunena uuyuni owu li ehala lya nika oshiponga kAakriste. (2 Tim. 3:1-5) Satana oku shi shi kutya omasiku ge omashona noonkondo, noku li ta kongo mboka inaaya kotoka opo e ya hwake po. (1 Pet. 5:8; Eh. 12:12, 17) Ihe otu na egameno. Jehova okwa pa oshigwana she ehala moka tatu gamenwa pambepo, sha hala kutya, egongalo lyopaKriste.
4, 5. Aantu oyendji oyu uvite ngiini shi na ko nasha nonakuyiwa yawo, nomolwashike?
4 Uulikumwe wuuyuni otawu gandja owala egameno eshona, kutya nduno olyopalutu nenge olyopamadhiladhilo. Aantu oyendji ohaya kala yu uvite kutya egameno lyawo lyopalutu olya tulwa moshiponga komuyonena, kelongithonkondo, kuudhigu wopamahupilo nosho wo komaupyakadhi ge na ko nasha nomudhingoloko. Aantu ayehe oya taalelwa kuupyakadhi wu na ko nasha nuukulupe nosho wo nokwaahe na uukolele. Aantu yalwe mboka ye na iilonga, omagumbo, oshimaliwa sha gwana nosho wo uukolele wu li nawa otashi vulika yi ipule kutya iinima mbika otayi kala po sigo uunake.
5 Aantu oyendji inaya mona nokuli egameno lyopamadhiladhilo. Shinikitha oluhodhi, aantu omamiliyona mboka ya li yi inekela okumona ombili negwaneno mondjokana nosho wo nomaukwanegumbo gawo oya mona kutya shoka ya li ya hala inashi gwanithwa. Shi na ko nasha nokumona egameno lyopambepo, aantu oyendji mboka haya yi kongeleka oya thigwa mengwangwano tayi ipula ngele ewiliko ndyoka ya mona oli na ongushu. Osho shi li ngaaka unene tuu ngele ye wete eihumbato ewinayi lyaawiliki yomalongelokalunga nosho wo omalongo kaage li pamanyolo ngoka haya longo aantu. Ihe aantu oyendji oyu uvite kutya kaye na sha shilwe okuninga shaahe shi owala okukala ye na etegameno muunongononi nenge okwiinekela kutya aantu ooyakwawo oye na ehalo okuninga shoka shi li nawa. Itashi kumitha nduno sho aantu mboka ye tu dhingilila yu uvite inaaya gamenwa nenge kutya inaya hala ya dhiladhile muule shi na ko nasha nonakuyiwa yawo.
6, 7. (a) Oshike sha ningitha pu kale pu na eyooloko pokati kaamboka haya longele Kalunga naamboka ihaaye mu longele? (b) Oshike tatu ka kundathana ngashingeyi?
6 Kapu na tuu ekondjithathano enene pokati kaamboka ye li oshitopolwa shegongalo lyopaKriste naamboka kaaye shi oshitopolwa shegongalo lyopaKriste! Nonando tse tu li oshigwana shaJehova otu na okutaalela oonkalo nomaupyakadhi ogendji ga faathana naangoka ga taalela ooyakwetu, einyengo lyetu olya yooloka ko lela kulyawo. (Lesha Jesaja 65:13, 14; Maleaki 3:18.) Omolwashike? Omolwaashoka ohatu mono mOmbiimbeli eyelitho lya yela shi na ko nasha noonkalo ndhoka aantu hayi iyadha mudho notwa dheulwa nkene tu na okuungaunga nomashongo nosho wo nomaupyakadhi gonkalamwenyo. Shoka oshe tu ningitha tu kale kaatu na oshimpwiyu sha pitilila shi na ko nasha nonakuyiwa. Okukala tu li aalongeli yaJehova ohashi tu gamene komatompathano kaage na ekankameno nokaage li pamanyolo, komikalo dha nyata nosho wo kiilanduliko yiinima mbyoka. Iilyo yegongalo lyopaKriste ohayi nyanyukilwa ombili kaayi shiwike kuyalwe.—Jes. 48:17, 18; Fil. 4:6, 7.
7 Iiholelwa yimwe otayi vulu oku tu kwathela tu dhiladhile kombinga yegameno ndyoka hali nyanyukilwa kwaamboka haya longele Jehova mepingathano naamboka ihaaye mu longele. Iiholelwa mbika otashi vulika yi tu inyengithe tu konakone okutompathana kwetu niilonga yetu nokutala ngele inatu pumbwa okutula miilonga omayele gaKalunga pakuudha, ngoka ge li po nelalakano lyoku tu gamena.—Jes. 30:21.
“Ngame ando nda kanitha einekelo”
8. Aalongeli yaJehova aluhe oya li ye na okuninga shike?
8 Nale mondjokonona yaantu, mboka ya hogolola okulongela nokuvulika kuJehova oya li ya kambadhala ya kale kaaye na eendathano naamboka ya li ihaaya longele Jehova nokuvulika kuye. Dhoshili, Jehova okwa li u ulike kutya otapu ka kala uutondwe pokati kaalongeli ye naamboka ya landula Satana. (Gen. 3:15) Omolwuudhiginini wawo komakotampango gopakalunga ga nwethwa mo, oshigwana shaKalunga oshi inyenge shi ili kwaamboka ye ya kundukidha. (Joh. 17:15, 16; 1 Joh. 2:15-17) Inashi kala aluhe oshipu okukala aadhiginini moshinima shika. Dhoshili, yamwe yomaalongeli yaJehova omathimbo gamwe oya tula momalimbililo uunongo wokukala ye na onkalamwenyo yokwiiyamba.
9. Popya uupyakadhi mboka wa li wa taalela omunyoli gwEpisalomi 73.
9 Omunyoli gwEpisalomi 73 ngoka tashi vulika gwomoluvalo lwaAsaf oye omulongeli gwaJehova gumwe ngoka a li i iyadha ti ipula ngele okwa ninga ngaa omatokolo gomondjila. Omupisalomi okwa li a pula kutya omolwashike aakolokoshi haya monika ya fa taye shi pondola, ya nyanyukwa notaya yambapala, omanga mboka haya kondjo ya longele Kalunga haya mono iihuna komayeleko nosho wo uupyakadhi.—Lesha Episalomi 73:1-13.
10. Omolwashike omapulo ngoka ga li ga pulwa komupisalomi ga simana kungoye?
10 Mbela owu na esiku wi iyadhele to pula omapulo ngaashi ngoka ga li ga pulwa komupisalomi? Ngele osho, ino pumbwa okukala wu uvite wu na unene ondjo nenge wu dhiladhile kutya oto kanitha eitaalo lyoye. Dhoshili, aalongeli yaJehova yontumba, mwa kwatelwa yamwe mboka Jehova a li a longitha mokunyola Ombiimbeli, nayo oya li wo haya dhiladhila ngaaka. (Job 21:7-13; Eps. 37:1; Jer. 12:1; Hab. 1:1-4, 13) Dhoshili, ayehe mboka ya hala okulongela Jehova oye na okudhiladhila nawa nokutaamba ko eyamukulo lyepulo ndika: Mbela okulongela Jehova nokuvulika kuye oku li oshinima sha simanenena okuninga? Shika osha kwatela mo ompata ndjoka ya li ya tukulwa kuSatana moshikunino shaEden. Oshi li sha simanenena opo ompata yi na ko nasha nuunamapangelo waKalunga yi kandulwe po. (Gen. 3:4, 5) Onkee ano, atuheni otatu ningi nawa ngele tatu dhiladhila koshinima shoka sha li she etwa po komupisalomi. Mbela otu na okusila efupa aainenepeki aakolokoshi mboka haya monika ya fa taye shi enditha nawa? Mbela otu na okweetha okulongela Jehova nokutameka oku ya holela? Shoka osho naanaa Satana a hala tu ninge.
11, 12. (a) Ongiini omupisalomi a li a sindi okukala a limbililwa, naashika otashi tu longo shike? (b) Oshike sha li she ku kwathele wu thike pehulithodhiladhilo lya fa lyomupisalomi?
11 Oshike sha li sha kwathele omupisalomi kaa kale we e li momalimbililo? Nonando okwa li i itaale kutya okonyala a kanithe einekelo, etaloko lye olya li lya lunduluka sho a yi “mongulu yaKalunga,” sha hala okutya, sho a tameke okweendathana naantu mboka ya li ya pititha komeho okulongela Kalunga metsalihangano nenge motempeli ye. Osha li wo sha yelele omupisalomi kutya ina hala okukutha ombinga mwaashoka aakolokoshi haya ningi. Okwa li e wete kutya ondjila yawo nomahogololo gawo monkalamwenyo oge ya tula “pehala tali pundukitha.” Omupisalomi okwa li e wete kutya ayehe mboka taya thigi po Jehova omolwoonkalo dhawo dha nyata, ‘mbala otaa kulukile mehanagulo,’ omanga mboka haya longele Jehova taya ka ambidhidhwa kuye. (Lesha Episalomi 73:16-19, 27, 28.) Nopwaahe na omalimbililo, owa mona uushili woohapu ndhoka. Okukala wi ihole mwene kuu na ko nasha noompango dhopakalunga otaku vulu okukala kuhokitha koyendji, ihe iilanduliko iiwinayi yoonkatu dha tya ngaaka ihayi ka vula okuhenukwa.—Gal. 6:7-9.
12 Oshike ishewe tatu ilongo koshimoniwa shomupisalomi? Okwa li a mono egameno nuunongo mokati koshigwana shaKalunga. Okwa li a tameke okudhiladhila momukalo gwa yela nogu li mondjila sho a yi mpoka Jehova a li ha longelelwa. Sha faathana kunena, otatu vulu okwaadha mo aagandjimayele ya kotoka nokunyanyukilwa iikulya yopambepo iiwanawa pokugongala. Onkee ano, Jehova oku na omatompelo omawanawa okulombwela aalongeli ye ya kale haya kala pokugongala kwopaKriste. Moka ohaya ladhipikwa notaye ki inyengithwa ya katuke pandunge.—Jes. 32:1, 2; Heb. 10:24, 25.
Hogolola ookuume koye nawa
13-15. (a) Dina okwa li e na oshimoniwa shashike, notashi thaneke shike? (b) Omolwashike okweendathana nAakriste ooyakwetu ku li egameno?
13 Opu na oshiholelwa shimwe shomwanakadhona gwaJakob Dina ngoka a li a yi muupyakadhi wa kwata miiti molwaashoka a li he endathana naantu yomuuyuni. Ehokololo lyaGenesis kombinga ye otali tu lombwele kutya okwa li e na omukalondjigilile gwokeendathana naagundjuka aakiintu yokuKaanana moshitopolwa moka uukwanegumbo wawo wa li wa kala. Aakaanana kaya li ye na omithikampango omiwanawa dha fa ndhoka dhaalongeli yaJehova. Mepingathano naashoka, shoka aalafululi yiikulunima ya mona otashi ulike kutya okukalamwenyo kwAakaanana okwa li kwa ningitha oshilando shi kale shu udha elongelo lyiikalunga, oluhondelo, egalikano lya yonuka ndyoka lya li lye endele pamwe nomilalo nosho wo elongitho lyoonkondo. (Eks. 23:23; Lev. 18:2-25; Deut. 18:9-12) Dhimbulukwa shoka eendathano ndyoka lya li lye etele Dina.
14 Sikem omulumentu gwomoshitopolwa ngoka a popiwa e li “omunenentu mezimo lyawo” okwa mono Dina, “okwe mu kwata koonkondo e ta lala naye.” (Gen. 34:1, 2, 19) Kashi shi tuu shinikitha oluhodhi! Mbela oto dhiladhila kutya Dina oku na esiku a dhiladhilile kutya oshinima sha tya ngaaka oshi na esiku shi mu ningilwe? Otashi vulika a li owala ta kongo uukuume naagundjuka yomoshitopolwa mboka e ya tala ko kutya inaya nika oshiponga. Ihe Dina okwa li i ifundjaleke.
15 Ehokololo ndika otali tu longo shike? Otali tu longo kutya itatu vulu okweendathana naantu mboka kaaye shi ooitaali nokukala neinekelo kutya katu na esiku tu mone iilanduliko iiwinayi. Omanyolo otage tu lombwele kutya “ookuume aawinayi otaya yono po omikalo omiwanawa.” (1 Kor. 15:33, KB) Mepingathano naashoka, okweendathana naantu mboka mu li meitaalo limwe, ye na omithikampango dha dhenga mbanda dhopamikalo dha fa dhoye noye hole wo Jehova, otaku ke ku gamena. Eendathano lya tya ngaaka ewanawa otali ke ku ladhipika wu katuke pandunge.—Omayel. 13:20.
“Omwa yogwa oondjo”
16. Omuyapostoli Paulus okwa li a popi shike kombinga yayamwe yomegongalo lyaKorinto?
16 Egongalo lyopaKriste olya kwathela oohandimwe oyendji opo yi iyoge iinima mbyoka ya nyata. Sho omuyapostoli Paulus a li a nyolele ontumwafo ye yotango kegongalo lyaKorinto, okwa li a popya kombinga yomalunduluko ngoka Aakriste yaahoka ya li ya ningi opo ya kale metsokumwe nomithikampango dhaKalunga. Yamwe oya li aahondeli, aasimaneki yiimenka, aayoni yondjokana, omashenge, aafuthi, oonkolwe nosho tuu. Paulus okwe ya lombwele a ti: “Ihe omwa yogwa oondjo.”—Lesha 1 Aakorinto 6:9-11.
17. Ongiini okukala metsokumwe nomakotampango gOmbiimbeli kwa lundulula oonkalamwenyo dhaantu oyendji?
17 Aantu mboka kaaye na eitaalo kaye na omakotampango gomondjila goku ya wilika. Ohaya katuka ngaashi ya hala, nenge otashi vulika ya tameke okukala nomikalo omiwinayi ngaashi mboka ye ya kundukidha, ngaashi naanaa yamwe yomuKorinto ya li ya ningi manga inaaya ninga ooitaali. (Ef. 4:14) Ihe ontseyo yashili yOohapu dhaKalunga nomalalakano ge oyi na oonkondo dhokulundulula oonkalamwenyo dhaantu ayehe mboka haye dhi tula miilonga. (Kol. 3:5-10; Heb. 4:12) Aantu oyendji mboka kunena ye li oshitopolwa shegongalo lyopaKriste otaya vulu oku ku lombwela kutya manga inaayi ilonga omithikampango dhuuyuuki dhaJehova noku dhi tula miilonga moonkalamwenyo dhawo, oya li ye na onkalamwenyo kaayi li pamikalo. Ihe natango kaya li ya gwanenwa yo inaya nyanyukwa. Oya mona owala ombili sho ya tameke okweendathana noshigwana shaKalunga nokukala metsokumwe nomakotampango gOmbiimbeli.
18. Omugundjuka gumwe oku na oshimoniwa shashike, notashi ulike shike?
18 Mepingathano naashoka, yamwe mboka monakuziwa ya li ya tokola ya ze mo ‘momeya moka mu na egameno,’ sha hala okutya, megongalo lyopaKriste, ngashingeyi oye li tayi ipe uusama omolwetokolo ndyoka. Omumwameme gumwe, ngoka tatu mu luku Tanya, okwa popi kutya okwa li a “putudhilwa moshili,” ihe sho a li e na oomvula 16, okwa thigi po egongalo a ka “lalakanene iinima yomuuyuni.” Shimwe shomiizemo mbyoka a li a mono osho etegelelo inaali tegelelwa nokwa li e li kutha mo. Ngashingeyi okwa popi ta ti: “Oomvula ndatu ndhoka nda kala pondje yegongalo odha thiga ndje ndi na iiyadhi iiwinayi momadhiladhilo gandje mbyoka itaayi zi po we. Oshinima shoka tashi tsikile nokunyenyetela ndje ooshono kutya onda li nda dhipaga okanona kandje hoka ka li inaaka valwa. Onda hala okulombwela aagundjuka ayehe mboka taya dhiladhila kutya ando oya ‘lole’ uuyuni nando okashona kutya: ‘Inamu shi ninga!’ Otashi vulika wu kale tawu monika wa fa uutoye, ihe ohawu thigile omuntu uululu owundji konima woku wu lola. Uuyuni kawu na sha shilwe okugandja kaashi shi owala omwenyo omwiinayi. Ondi wu shi. Onde wu lola. Kaleni mehangano lyaJehova! Oyo owala onkalamwenyo ndjoka tayi eta enyanyu.”
19, 20. Egameno lini hali adhika megongalo lyopaKriste, nongiini?
19 Dhiladhila owala ando shoka she ku ningilwa ando owe ethele po okukala mehala lyegameno ndyoka li li egongalo lyopaKriste. Oyendji oye uvite nayi lela ngele taya dhimbulukwa okukalamwenyo kwawo kwonale kaaku na ekwatho lyasha manga inaaye ya moshili. (Joh. 6:68, 69) Oto vulu okutsikila okugamenwa komaupyakadhi noluhodhi mbyoka ya ha muuyuni waSatana mokukala popepi naamwaho naamwanyoko Aakriste. Okweendathana nayo nokukala pokugongala kwopaKriste pandjigilile otaku ka kala noku ku dhimbulukitha uunongo womithikampango dhaJehova dhuuyuuki notaku ke ku ladhipika wu kale metsokumwe nadho. Owu na omatompelo lela ‘gokupandula Jehova megongalo,’ ngaashi naanaa omupisalomi a li a ningi.—Eps. 35:18.
20 Dhoshili, omolwomatompelo gontumba Aakriste ayehe ohaya piti momathimbo uuna hashi kala sha fa oshidhigu kuyo okukala Aakriste aadhiginini. Otashi vulika ya kale ya pumbwa owala okuulukilwa ondjila ndjoka yu uka okuya nayo. Oshike ngoye nosho wo egongalo alihe mu na okuninga opo mu ambidhidhe ooitaali ooyakweni pomathimbo ga tya ngaaka? Oshitopolwa tashi landula otashi ka kundathana nkene to vulu ‘okuhekeleka nokutunga’ aamwaho.—1 Tes. 5:11, KB.
Oto yamukula ngiini?
• Oshike tatu ilongo moshimoniwa shomunyoli gwEpisalomi 73?
• Oshimoniwa shaDina otashi tu longo shike?
• Omolwashike to vulu okumona egameno megongalo lyopaKriste?
[Omathano pepandja 9]
Mbwinda mpoka pu na egameno noto nyanyukilwa po, sha hala okutya: Kala megongalo!