Kala ho kutha ombinga pakuudha miilonga yeteyo enene lyopambepo

“Kaleni mwi ipyakidhila aluhe niilonga yOmuwa.”—1 KOR. 15:58.

1. Jesus okwa li a hiya aalongwa ye ya ninge shike?

MANGA Jesus a li ta taakana moshitopolwa shaSamaria lwokuuka pehulilo lyomumvo 30 E.N., okwa li a fudha po pomuthima ngoka gwa li popepi noshilando Sikar. Mpoka okwa li a lombwele aalongwa ye a ti: “Yelutheni omeho geni, mu tale kutya omapya oga thika okuteywa.” (Joh. 4:35) Jesus ka li ta popi kombinga yeteyo lyo lyene, ihe okwa li ta popi kombinga yokugongelwa kwopambepo kwaamboka ye na omitima omiwanawa mboka taya ka ninga aalanduli ye. Noohapu ndhika okwa li ta hiya aalongwa ye ya kuthe ombinga meteyo ndika. Opwa li pu na iilonga oyindji, ihe opwa li owala pu na ethimbo ehupi oku yi gwanitha po.

2, 3. (a) Oshike tashi ulike kutya otu li methimbo lyeteyo? (b) Oshike tashi ka kundathanwa moshitopolwa shika?

² Oohapu dhaJesus kombinga yeteyo odhi na eityo lyi ikalekelwa methimbo lyetu. Otu li methimbo ndyoka epya lyuuyuni ndyoka lya thikama po maantu, lya “thika okuteywa.” Omumvo kehe aantu omamiliyona ohaya mono ehiyo ya mone oshili ndjoka tayi gandja omwenyo, naauvithi aape omayuvi ogendji ohaya ninginithwa. Tse otu na uuthembahenda wokukutha ombinga meteyo enene ndyoka inaali kala ko nale li li mewiliko lyaMwene gweteyo, Jehova Kalunga. Mbela owi “ipyakidhila” miilonga mbika yeteyo?—1 Kor. 15:58.

³ Pethimbo lyuukalele we woomvula ndatu netata kombanda yevi, Jesus okwa li a longekidhile aalongwa ye iilonga yeteyo. Oshitopolwa shika otashi ka kundathana iiyilongomwa itatu yomiiyilongomwa ya simana mbyoka Jesus a li a longo aalongwa ye. Oshiilongomwa kehe otashi tsu omuthindo uukwatya wumwe mboka wa simanenena kutse sho tatu kambadhala okuninga shi thike pwaashoka tatu vulu miilonga yokunena yokugongela aalongwa. Natu ka kundathaneni uukwatya mboka koowumwe noowumwe.

Owa pumbwa okukala wi ifupipika

4. Jesus okwa li a gandja ethaneko lini okuulika kutya eifupipiko olya simana?

⁴ Dhiladhila ando wu wete sho aalongwa ya li taya nyenyeta kutya olye omukuluntu e vule ooyakwawo. Otashi vulika wu wete nkene iipala yawo tayi ulike okwaainekelathana nuutondwe. Onkee ano, Jesus okwi ithana okanona okashona e te ka thikameke mokati kawo. Mokuukitha eitulomo kokanona okashona okwa ti: “Ngoka ti ifupipike ngokanona nkaka, oye omukuluntu e vule ooyakwawo mOshilongo shegulu.” (Lesha Mateus 18:1-4.) Pehala lyokudhiladhila ngaashi uuyuni, mboka hawu tala omuntu shi ikolelela koonkondopangelo dhe, eliko nosho wo ondondo ye, aalongwa oya li ya pumbwa okuuva ko kutya uunene wawo owi ikolelela ‘kokwiifupipika’ kwawo momeho gayalwe. Jehova okwa li te ke ya laleka nuuyamba noku ya longitha ngele owala yi ifupipika shili.

5, 6. Omolwashike wu na okukala wi ifupipika opo wu vule okukutha ombinga pakuudha miilonga yeteyo? Gandja oshiholelwa.

⁵ Sigo okunena aantu oyendji muuyuni oya tula oonkalamwenyo dhawo mokulalakanena okukala ye na oonkondopangelo, eliko nosho wo ondondo yopombanda. Naashoka oshe ya ningitha ya kale kaaye na ethimbo lyiinima yopambepo. (Mat. 13:22) Mepingathano naamboka, oshigwana shaJehova ohashi kala sha nyanyukwa ngele tashi “ifupipike” momeho gayalwe opo shi vule okumona omalaleko nuuyamba nokukala sha hokiwa kuMwene gweteyo.—Mat. 6:24; 2 Kor. 11:7; Fil. 3:8.

⁶ Tala koshiholelwa shaFrancisco, ngoka e li omukuluntugongalo kuAmerika lyokUumbugantu. Manga a li omugundjuka, okwa li e etha po eilongo lyopombanda opo a ka ninge omukokolindjila. Okwa ti: “Sho nda li nda zaleke omukadhona gwandje olinga, onda li te vulu okumona iilonga mbyoka ya li tayi ke tu etela egameno lyopashimaliwa. Ihe pehala lyaashono, otwa tokola tu kaleke onkalamwenyo yetu yanathangwa nokutsikila atuhe miilonga yethimbo lyu udha. Konima otwa li twa mono aanona, nomashongo oga li ga ningi ogendji. Ihe Jehova okwa li e tu kwathele tu kaleke onkalamwenyo yetu yanathangwa.” Francisco okwa hulitha ta ti: “Onda kala tandi nyanyukilwa uuthembahenda wokulonga ndi li omukuluntugongalo uule woomvula dhi vulithe 30 nosho wo iinakugwanithwa yilwe yi ikalekelwa. Katu na nando esiku limwe twi ipele uusama sho twa lalakanena onkalamwenyo yanathangwa.”

7. Owa kambadhala ngiini okutula miilonga omayele ngoka ge li mAaroma 12:16?

⁷ Ngele owa kala inoo taamba ko “iinima iinene” yuuyuni mbuka nokukala wa “gwana naambyoka iihupi,” nangoye oto ka nyanyukilwa omalaleko nuuyumba nosho wo uuthembahenda wulwe wa gwedhwa po miilonga yeteyo.—Rom. 12:16, KB; Mat. 4:19, 20; Luk. 18:28-30.

Okulonga nuudhiginini ohaku eta iizemo iiwanawa

8, 9. (a) Ngonga eyele lyaJesus lyiitalenti. (b) Oolye taya vulu okuladhipikwa unene keyele ndika?

⁸ Uukwatya wulwe mboka twa pumbwa opo tu kale tu na ombinga pakuudha miilonga yeteyo owo okulonga nuudhiginini. Jesus okwa li a gandja ethaneko lyaashika meyele lyiitalenti.a Ethaneko ndyoka oli li kombinga yomulumentu ngoka manga inaaya kondje yiilongo i inekelele aamati yatatu eliko lye. Gwotango okwa pewa iitalenti itano, omukwawo iitalenti iyali nomutitatu oshitalenti shimwe. Sho omuwa gwawo a yi, aamati yaali yotango oya li ya longo nuudhiginini, mbala iitalenti yawo oye ‘yi likolitha iitalenti iikwawo.’ Mepingathano naambeyaka yaali, omumati omutitatu okwa li ‘omunanyalo.’ Okwa fumvike oshitalenti she. Sho omuwa gwawo a galuka, okwa li a pe aamati mboka yaali yotango ondjambi ya ‘pangele oyindji.’ Okwa kutha omumati ngwiyaka omutitatu oshitalenti shoka e mu pele e te mu tidha mo megumbo lye.—Mat. 25:14-30, yelekanitha KB.

⁹ Nopwaahe na omalimbililo, owa hala okuholela aamati aadhiginini yomeyele lyaJesus nokukala wu na ombinga pakuudha ngaashi tashi vulika miilonga yokuninga aantu aalongwa. Ihe mbela ongiini ngele oonkalo dhoye odha ngambeka noonkondo shoka to vulu okuninga ngashingeyi? Tashi vulika omolwonkalo yopamahupilo ndjoka kaayi li nawa owu na okulonga oowili odhindji opo wu sile oshimpwiyu uukwanegumbo woye. Nenge tashi vulika kuu na we oonkondo dhuugundjuka nosho wo uukolele. Ngele osho shi li ngaaka, eyele lyiitalenti oli na etumwalaka lyoku ku ladhipika.

10. Omuwa gwomeyele lyiitalenti okwa li u ulike ngiini kutya oku na ondjele, nomolwashike eyele ndika tali ku ladhipike?

¹⁰ Ndhindhilika kutya omuwa meyele lyaJesus okwa li e shi kutya aamati ye ayehe kaya li taya vulu okulonga shi thike pamwe. Shika okwa li e shi ulike sho a li a gandja iitalenti ‘kukehe gumwe sha yeleka uupenda we.’ (Mat. 25:15) Ngaashi sha li sha tegelelwa, omumati gwotango okwa likola iitalenti yi vule yaangoka omutiyali. Ihe omuwa okwa li u ulike kutya okwa nyanyukilwa oonkambadhala dhuudhiginini dhawo ayehe mokupopya kutya yo ayehe oyo ‘aawanawa naainekelwa’ noku ya pa ondjambi yi thike pamwe. (Mat. 25:21, 23) Sha faathana, Mwene gweteyo, Jehova Kalunga oku shi shi kutya shoka to vulu okulonga miilonga ye oshi ikolelela koonkalo dhoye. Ita ka kala inaa mona oonkambadhala dhoye dhoku mu longela nomwenyo aguhe noku ku pa ondjambi shi ikolelela kwaashoka wa longa.—Mark. 14:3-9; lesha Lukas 21:1-4.

11. Gandja oshiholelwa shankene okulonga nuudhiginini moonkalo oondhigu haku eta omalaleko nuuyamba.

¹¹ Oshiholelwa shaSelmira, omumwameme Omukriste ngoka a kala muBrasilia, otashi ulike kutya okukala omudhiginini miilonga yaKalunga ihashi ikolelele kokukala wu na oonkalo dhi li nawa monkalamwenyo. Oomvula 20 dha pita, omusamane gwaSelmira okwa li a dhipagwa nondjembo koombudhi nokwa li a thigwa naanona yatatu aashona mboka a li e na okutekula. Iilonga ye e li omuniilonga gwomomagumbo oya li ya kwatela mo okulonga oowili odhindji nokweenda oondjila tadhi lolodha miiyenditho yu udha yokomikandi. Nonando okwa li e na omaupyakadhi ngaka, okwa li u unganeke onkalamwenyo ye opo a vule okuninga omukokolindjila gwondjigilile. Konima, yaali yomaanona ye yatatu nayo oya li ya ningi aakokolindjila. Okwa ti : “Momukokomoko gwoomvula onda konakona Ombiimbeli naantu ye vulithe 20 noya ninga ya fa oshitopolwa shuukwanegumbo wandje. Sigo okunena ohandi nyanyukilwa ohole yawo nosho wo uukuume nayo. Oli li eliko ndyoka itaali vulu okulandwa niimaliwa.” Osha yela kutya Mwene gweteyo okwa pa Selmira ondjambi omolwiilonga ye yuudhiginini!

12. Ongiini tatu vulu okuulika kutya otatu longo nuudhiginini miilonga yokuuvitha?

¹² Ngele oonkalo dhoye ngashingeyi odha ngambeka ethimbo ndyoka wu na lyokulonga muukalele, oto vulu natango okuhwepopaleka okukutha ombinga kwoye miilonga yeteyo mokuninga uukalele woye tawu pondola. Ngele owa tula nawa miilonga omayele ngoka taga ti sha ngoka haga monika pOkugongala kwoPailonga kwokoshiwike kehe, oto ka hwepopaleka uunongo woye wokuuvitha nokumona oompito oompe dhokugandja uunzapo. (2 Tim. 2:15) Natango, ngele otashi wapa oto vulu okuunganekulula iinima mbyoka inaayi simana nenge wu yi ethe po opo wu kale ho ambidhidha omalongekidho giilonga yomomapya pandjigilile.—Kol. 4:5.

13. Oshike tashi vulu okuningitha omuntu a longe nuudhiginini nokutsikila oku shi ninga?

¹³ Kaleka momadhiladhilo kutya oshinima shoka tashi ke tu inyengitha tu longe nuudhiginini osho okukala tu na olupandu. (Eps. 40:8) Omumati omutitatu gwomeyele lyaJesus okwa li a tila omuwa gwe nokwe mu tala ko kutya oha kala a hala ya ninge shi vulithe pwaashoka taya vulu noke na ondjele. Shoka osha li she mu ningitha a fumvike oshitalenti she pehala lyoku shi longitha opo a likolithe oshitalenti shomuwa gwe. Opo tu keelele iikala yokwaahe na ko nasha ya tya ngaaka, otwa pumbwa okukokeka nokukaleka po ekwatathano lya kola naMwene gweteyo, Jehova. Itulila po ethimbo lyokukonakona nokutedhatedha komaukwatya gopahole ngaashi ohole ye, ontalanteni ye nosho wo ohenda ye. Momukalo ngoka, omutima gwoye otagu ke ku inyengitha wu longe nuudhiginini miilonga ye.—Luk. 6:45; Fil. 1:9-11.

‘Kaleni aayapuki’

14. Oshitegelelwa shini sha simana shoka shi na okugwanithwa po kwaamboka ya hala okukala aaniilonga meteyo?

¹⁴ Omuyapostoli Petrus okwa totha mOmanyolo gOshihebeli noku ulike shoka Kalunga a lalakanena okuningila aapiya ye yokombanda yevi, a ti: “Kaleni aayapuki mwaayihe mbyoka tamu yi ningi, ngaashi Kalunga ngoka e mú ithana, omuyapuki. Oshoka enyolo otali ti: ‘Omu na okukala aayapuki, oshoka ongame omuyapuki.’ ” (1 Pet. 1:15, 16; Lev. 19:2; Deut. 18:13) Oohapu ndhika otadhi tsu omuthindo kutya aaniilonga meteyo oya pumbwa okukala ya yogoka pamikalo nopambepo. Otatu vulu okugwanitha po oshitegelelwa shoka sha simana mokukatuka oonkatu tu yogwe, moku shi popya pathaneko. Ongiini shoka tashi vulu okuningwa? Okekwatho lyoohapu dhaKalunga dhoshili.

15. Oshili yoohapu dhaKalunga oyi na oonkondo dhoku tu ningila shike?

¹⁵ Oohapu dhaKalunga dhoshili otadhi yelekanithwa nomeya ngoka taga yelitha. Pashiholelwa, omuyapostoli Paulus okwa li a nyola kutya egongalo lyAakriste aagwayekwa olya yogoka koshipala shaKalunga ngaashi omufuko gwaKristus ngoka e li yelitha ‘moku li yoga momeya, li kale lyo opala nolya yogoka.’ (Ef. 5:25-27) Metetekelo, Jesus okwa li a popi wo kombinga yankene oohapu dhaKalunga ndhoka a li u uvitha dhi na oonkondo dhokuyelitha. Sho Jesus a li ta popi naalongwa ye, okwa ti: “One omwa yelithwa nokuli koohapu ndhoka nde dhi mú lombwele.” (Joh. 15:3) Onkee ano, oshili yoohapu dhaKalunga oyi na oonkondo dhokuyelitha pamikalo nopambepo. Ongele owala twa pitike oshili yoohapu dhaKalunga yi tu yelithe momukalo nguka, elongelokalunga lyetu tali ka kala lya yogoka.

16. Ongiini tatu vulu okwiikaleka twa yogoka pambepo nopamikalo?

¹⁶ Opo tu kale twa taambiwa ko tu li aaniilonga meteyo, otwa li twe etha po iilonga ayihe ya kaka pamikalo nopambepo. Ihe opo tu tsikile okukala twa gwana okukala nuuthembahenda mbuka, otu na okukala tu shi okuholelwa mokudhiginina omithikampango dhaJehova dhopamikalo nodhopambepo. (Lesha 1 Petrus 1:14-16.) Ngaashi naanaa aluhe hatu gandja eitulomo kuuyogoki wetu wopalutu, otu na wo okweetha tu yogwe aluhe koohapu dhaKalunga dhoshili. Shika osha kwatela mo okulesha Ombiimbeli nokukala pokugongala kwopaKriste. Osha hala wo okutya otu na okuninga oonkambadhala tashi zi komutima tu tule miilonga oompango dhaKalunga monkalamwenyo yetu. Okuninga ngawo otaku ke tu pitika tu sinde egamo lyetu lyokuyona nokutinda enwethomo lya nyata lyuuyuni mbuka. (Eps. 119:9; Jak. 1:21-25) Eeno, itashi hekeleke tuu okutseya kutya pakwatho lyoohapu dhaKalunga dhoshili, otatu vulu ‘okuyogwa’ nokuli nomayono ga kwata miiti!—1 Kor. 6:9-11.

17. Otu na okutula omayele geni gOmbiimbeli miilonga opo tu kale twa yogoka?

¹⁷ Mbela oho pandula ngaa sho to yogwa koohapu dhaKalunga dhoshili? Pashiholelwa, oho inyenge ngiini ngele owa londodhwa shi na ko nasha noshiponga shoka shi li momainyanyudho guuyuni mbuka ga yonuka? (Eps. 101:3) Mbela oho kala kokule neendathano inaali pumbiwa naanasikola ooyakweni nosho wo naaniilonga pamwe nangoye mboka kaaye li meitaalo lyoye? (1 Kor. 15:33) Mbela oto ningi ngaa oonkambadhala dha mana mo wu sinde uunkundi wopaumwene mboka tawu vulu wu ku ninge wu kale inoo yogoka koshipala shaJehova? (Kol. 3:5) Mbela oho kala wa yooloka ko koontamanana dhopapolotika dhuuyuni mbuka nombepo yuukwashigwana mboka wu li uunene momaudhano?—Jak. 4:4.

18. Ongiini okukala twa yogoka pamikalo nopambepo haku tu kwathele tu kale aaniilonga meteyo taya pondola?

¹⁸ Okukala omudhiginini miinima mbyoka otaku ke ku etela iizemo ya dhenga mbanda. Jesus okwa li a yelekanitha aalongwa ye aagwayekwa niitayi yomuviinu, a ti: ‘Kehe oshitayi shoka tashi imi, [Tate] ote shi opaleke, shi ime iiyimati oyindji.’ (Joh. 15:2) Sho to igandja kokuyogwa komeya goshili yOmbiimbeli, oto ka imika nokuli iiyimati oyindji.

Omalalekonuuyamba ngashingeyi nomonakuyiwa

19. Ongiini aalongwa yaJesus ya li ya lalekwa nuuyamba moonkambadhala dhawo ye li aaniilonga meteyo?

¹⁹ Aalongwa yaJesus aadhiginini mboka ya li ya taamba ko edheulo lyaJesus, konima oya li ya pewa oonkondo kombepo ondjapuki pOpentekoste 33 E.N. ya ninge oonzapo “sigo omiilongo ayihe yokombanda yevi.” (Iil. 1:8) Oya humu komeho sigo omokulonga ye li iilyo yolutuwiliki, aatumwa, aakuluntugongalo aayendi noya dhana onkandangala ya simana mokuuvithila “aantu ayehe yomuuyuni” onkundana ombwanawa. (Kol. 1:23) Inaya mona tuu omalalekonuuyamba nokweetela yalwe enyanyu!

20. (a) Omalalekonuuyamba geni wa mona mokukala wu na ombinga pakuudha miilonga yeteyo lyopambepo? (b) Owa tokola toko okuninga shike?

²⁰ Eeno, mokuulika eifupipiko, okulonga nuudhiginini nosho wo okudhiginina omithikampango dha dhenga mbanda dhOohapu dhaKalunga, otatu ka tsikila okunyanyukilwa okukutha ombinga pakuudha meteyo enene lyopambepo ndyoka tali ningwa ngashingeyi. Nonando aantu oyendji otaya mono iihuna nokuuva nayi hoka haku etithwa kokukalamwenyo kwokukala nohole yopamaliko nomainyanyudho hoka ku li po kunena, tse ohatu mono enyanyu lyashili negwaneno. (Eps. 126:6) Shoka sha simanenena osho kutya ‘oshilonga shetu kashi shi shosima mOmuwa.’ (1 Kor. 15:58, KB) Mwene gweteyo, Jehova Kalunga ote ke tu pa ondjambi yaaluhe ‘omolwiilonga nohole yetu mokusimanekitha edhina lye.’—Heb. 6:10-12.

[Enyolo lyopevi]

Oto dhimbulukwa?

Sho to kambadhala okukala wu na ombinga pakuudha miilonga yeteyo . . . 

• omolwashike wa pumbwa okukala wu na eifupipiko?

• oshike tashi vulu oku ku ningitha wu longe nuudhiginini nokutsikila oku shi ninga?

• omolwashike sha simana wu kale wa yogoka pamikalo nopambepo?

[Ethano pepandja 25]

Eifupipiko otali vulu oku tu kwathela tu kale nonkalamwenyo yanathangwa ndjoka ya kankamena kiinima yUukwaniilwa