Epya olya thika okuteywa
1. Iilonga ya simana yini yi li metifa?
1 Konima sho Jesus u uvithile omukiintu Omusamaria, okwa lombwele aalongwa ye a ti: “Yelutheni omeho geni, mu tale kutya omapya oga thika okuteywa.” (Joh. 4:35, 36) Eteyo lyopambepo olya li metifa, na Jesus okwa li e wete kutya iilonga mbyoka otayi ka andjakana nuuyuni auhe. Nonando Jesus oku li megulu, ota ambidhidha natango iilonga yeteyo. (Mat. 28:19, 20) Oshike tashi ulike kutya aateyi otaya longo iilonga mbika ya mana mo sho shu uka lwopehulilo?
2. Oshike tashi ulike kutya aantu otaya longo ya mana mo miilonga yeteyo muuyuni auhe?
2 Iilonga yeteyo muuyuni: Aauvithi muuyuni auhe oyi indjipala noopelesenda 3,2 momumvo gwiilonga 2009. Iilongo moka iilonga yokuuvitha ya ngambekwa oya lopota eindjipalo lyoopelesenda 14. Omakonakonombiimbeli ngoka ga lopotwa omwedhi kehe oga konda 7 619 000, omwaalu ngoka ogu vule aauvithi ayehe kumwe nogu vulithe konyala netata lyomiliyona omwaalu gwaakonakoni mboka ya lopotwa momumvo gwa zi ko. Sho iilonga mbika tayi humu komeho neendelelo miitopolwa oyindji, opu na ompumbwe onene yaatumwa mboka ya dheulwa kosikola yaGilead. Miilongo oyindji, aantu mboka kaaye shi oomvalele dhamo otaya taamba ko oshili nuupu. Osha yela kutya Jehova ote endelelitha iilonga sho eteyo li li pokupwa. (Jes. 60:22) Mbela iilonga ‘yeteyo’ owe yi tala ko ngiini?
3. Yamwe otashi vulika ya thike pehulithodhiladhilo lini kombinga yeteyo moshitopolwa shawo?
3 Iilonga yeteyo moshitopolwa shetu: Otashi vulika tu tye: “Aantu moshitopolwa shetu kaye hole okupulakena.” Oshoshili kutya aantu miitopolwa yimwe inaya hala we okupulakena ngaashi miitopolwa yilwe. Oonzapo dhimwe otashi vulika dhi dhiladhile kutya miitopolwa mbyoka eteyo olya pwa nale nodha pumbwa owala okupupula mo iilya iishona mbyoka ya hupa mo. Mbela shoka osho ngaa?
4. Otu na okutala ko ngiini uukalele wetu, nomolwashike?
4 Pethimbo lyeteyo, aantu ohaya kala taya longo nuudhiginini okuza petameko sigo ya mana. Jesus okwe shi popi kutya iilonga yeteyo oye endelela, sho a ti: “Iilya oyi li po oyindji, ihe aalongi oyo aashona. Galikaneni ano mwene gwiilya, a tume aalongi keteyo lye.” (Mat. 9:37, 38) Jehova oye Mwene gweteyo noye tu utha kutya uunake nopeni tapu tu zile eteyo ewanawa. (Joh. 6:44; 1 Kor. 3:6-8) Oshilonga shetu oshashike? Ombiimbeli otayi ti: “Kuna oombuto dhoye ongula, ngoye ino vululukitha wo iikaha yoye komatango.” (Omuuv. 11:4-6) Ngashingeyi ka li shi ethimbo lyokuvululukwa po molwaashoka iilonga yeteyo oyi li metifa.
5. Omolwashike tu na okutsikila okuuvitha nuulaadhi miitopolwa moka aantu ya fa kaaye na ehalo lyokupulakena?
5 Tsikila niilonga yeteyo: Nonando oshitopolwa shetu ohashi longwa iikando niikando naantu oya fa kaaye na ehalo okupulakena, otu na owala okutsikila okuuvitha nuudhiginini nonuulaadhi. (2 Tim. 4:2) Omakuyunguto muuyuni ohaga ningitha aantu ya lundulule iikala yawo nokukala tayi ipula muule kombinga yonakuyiwa. Sho aagundjuka taye ende taya koko, otashi vulika ya kale yu uvite ya pumbwa ombili yopamadhiladhilo negameno. Uulaadhi wetu wokuuvitha otashi vulika wi inyengithe yalwe. Mboka ya li kaaye hole okupulakena ketumwalaka lyetu, otashi vulika siku limwe ya kale ya hala okupulakena. Aantu ayehe oya pumbwa okulondodhwa, nokuli naamboka kaaye hole okupulakena ketumwalaka lyetu. — Hes. 2:4, 5; 3:19.
6. Ngele moshitopolwa shetu omu na aantu ye na omitse omikukutu, oshike tashi ke tu kwathela tu tsikile okuuvitha nuulaadhi?
6 Ngele moshitopolwa shetu omu na aantu ye na omitse omikukutu, oshike tashi ke tu kwathela tu tsikile okuuvitha nuulaadhi? Okukala hatu uvithile pomahala gomalandithilo nenge tu gandje uunzapo okupitila mongodhi, pehala lyokukala owala tatu longo egumbo negumbo. Nenge tu lundulule omukalo gwetu gwokupopya. Otatu vulu wo okulundulula ethimbo lyetu lyokuya muukalele tu kale hatu yi mo kongulohi nenge ethimbo ndyoka aantu haya kala unene momagumbo. Otashi vulika wo tu ilonge elaka lilwe opo tu popye naantu oyendji kombinga yonkundana ombwaanawa. Otatu vulu natango okuninga aakokolindjila yondjigilile opo tu tamunune mo uukalele wetu. Nenge tu ye koshitopolwa hoka kaa ku na aauvithi oyendji. Ngele otu na iikala iiwanawa yi na ko nasha neteyo, otatu ka ninga oonkambadhala dha mana mo tu kuthe ombinga pakuudha moshilonga shika sha simana.
7. Osigo uunake tu na okutsikila niilonga yeteyo?
7 Molwaashoka ethimbo lyeteyo ohali kala lya ngambekwa, omunepya kehe ohi idhipagele po opo a mane pethimbo. Otu na wo okuninga sha faathana neteyo lyopambepo. Osigo uunake tu na okutsikila niilonga mbyoka? Otu na oku shi ninga “omasiku agehe sigo ehulilo lyuuyuni.” (Mat. 24:14; 28:20) Ngaashi Jesus, natse otwa hala okugwanitha po iilonga mbyoka twi inekelelwa. (Joh. 4:34; 17:4) Onkee ano, natu tsikileni niilonga yetu yuukalele tu na uulaadhi, enyanyu niikala iiwanawa sigo ehulilo. (Mat. 24:13) Eteyo inali pwa natango.
[Oohapu dha simana pepandja 2]
Aantu ohaya kala taya longo nuudhiginini, okuza petameko lyeteyo sigo ya mana