Olye ta vulu okukwathela mboka taya lili ya pumbwa ekwatho?

“Kalunga, longa omukwaniilwa, a tokole oohapu pauyuuki woye . . . [Oshoka] ota hupitha ohepele ngo te mu lilile.”—EPS. 72:1, 12, yelekanitha KB.

1. Shi na ko nasha naDavid, oshike tatu ilongo kombinga yohenda yaKalunga?

OOHAPU ndhoka dha li dha nyolwa komukwaniilwa David gwaIsraeli shonale itadhi nyanyudha tuu omutima! Oomvula dha ka pita manga inee dhi nyola, okwa li u uvu nayi sho a li a yi moluhondelo naBatseba. Pethimbo mpoka, David okwa li i indile Kalunga a ti: “Dhima po oondjo dhandje omolwesilohenda lyoye enene. . . . Oondjo dhandje odhi li aluhe momeho gandje. . . . Ngame omulunde okuza kevalo, okuza kesiku ndyoka nda valelwa muuyuni.” (Eps. 51:1-5) Jehova oha dhimbulukwa nohenda onkalo yetu yuuthigululwalunde.

2. Ongiini Episalomi 72 tali vulu oku tu kwathela?

² Jehova oku uvite ko onkalo yetu yinikitha oluhodhi. Ngaashi sha li sha hunganekwa, omukwaniilwa gwaKalunga omuhogololwa “ota hupitha ohepele ngo te mu lilile, omuthiminikwa ngo kee na ngo te mu kwatha. Ota sile oshimbembe nohepele olukeno note ya hupitha meso.” (Eps. 72:12, 13) Epepelelo otali ka gandjwa ngiini? Episalomi 72 otali shi tu lombwele. Eimbilo ndika lya totwa shi na ko nasha nokupangela kwaSalomo, omwana gwaDavid, otali gandja ethano lyankene elelo lyOmwana gwaKalunga, Jesus Kristus tali ka pa aantu mboka ya lindimana epepelelo.

Nkene elelo lyaKristus tali ka kala

3. Salomo okwa li a pula shike, na Kalunga okwa li e mu pe shike?

³ Konima sho Jehova a li a gandja elombwelo kutya Salomo na ninge omukwaniilwa, omukulupe David okwa li e mu pe omalombwelo gokondandalunde ngoka a li a vulika kugo nuudhiginini. (1 Aak. 1:32-35; 2:1-3) Konima, Jehova okwa li i ihololele Salomo mondjodhi e te mu pula a ti: “Owa hala, ndi ku pe shike?” Salomo okwa li a pula oshinima shimwe owala a ti: “Pe ndje owino tandi u pumbwa mokulela aantu nuuyuuki nokutseya eyooloko pokati kuuwanawa nuuwinayi.” Molwaashoka Salomo okwa li a pula neifupipiko, Kalunga okwa li e mu pe shoka a li a pula nokwa li e mu gwedhele po.—1 Aak. 3:5, 9-13.

4. Ongiini okupangela kwaSalomo kwa li kwa popiwa komupangeli omukwawo?

⁴ Jehova okwa li a laleke nuuyamba elelo lyaSalomo naashoka osha li she etitha ombili yindhindhilikwedhi negwaneno ndyoka inaali monika nando onale kohi yepangelo limwe kombanda yevi. (1 Aak. 4:25) Mokati kaamboka ya li ye ya okutala elelo lyaSalomo omwa li mwa kwatelwa omukwaniilwakiintu gwaSaba pamwe naayendi pamwe naye oyendji. Okwa li a lombwele Salomo a ti: “Shoka nde ku kundanene ngoye mwene nuunongo woye moshilongo shandje, owoshili! . . . Ihe nani netatatata olyo ngaa inaandi uva; uunongo woye nuuyamba woye uunene u vule shoka nda lombwelwa.” (1 Aak. 10:1, 6, 7) Natango, uunongo uunene wu vule mpoka owa li wu ulikwa kuJesus ngoka a li a vulu okupopya shi li mondjila ta ti: “Nguka e li mpaka oku vule Salomo.”—Mat. 12:42.

Epepelelo kohi yepangelo lyaSalomo Omunene

5. Episalomi 72 olya holola shike, notali ulike shike shoka tashi ka ningwa monakuyiwa?

⁵ Ngashingeyi natu konakoneni oovelise dhEpisalomi 72 nelalakano lyokwiilonga kombiinga yomalalekonuuyamba kohi yelelo lyaJesus Kristus e li Salomo Omunene. (Lesha Episalomi 72:1-4.) Episalomi ndika otali holola nkene Jehova u uvitile “epangelo” lyOmwana gwe, “Omukwaniilwa gwombili,” Jesus Kristus. (Jes. 9:6, 7, yelekanitha KB.) Mewiliko lyaKalunga, Salomo Omunene ota ka ‘popila aathiminikwa nokukwatha oohepele.’ Elelo lye otali ka kala li na ombili nuuyuuki. Manga a li kombanda yevi, Jesus okwa li u ulike shoka Elelo lye lyOomvula Eyuvi tali ka gwanitha po.—Eh. 20:4.

6. Jesus okwa li a gandja ethano kombinga yomalalekonuuyamba geni ngoka taga ka nyanyukilwa kohi yUukwaniilwa we?

⁶ Tala kiilonga yimwe yaJesus Kristus mbyoka tayi ulike momukalo omushona shoka ta ka ningila aantu mokugwanithwa kwEpisalomi 72. Otu na omatompelo lela gokukala twa tuntukwa kunkene a li u uvitile olukeno mboka ya li taya mono iihuna. (Mat. 9:35, 36; 15:29-31) Pashiholelwa, omulumentu ngoka a li e na uuvu woshilundu okwa li e ya puJesus e te mu indile ta ti: “Ngele owa hala okwaaludha ndje, oto shi vulu.” Jesus okwe mu yamukula a ti: “Onda hala, yela!” Nomulumentu okwa li a aludhwa. (Mark. 1:40-42) Konima, Jesus okwa li a tsakaneke omuselekadhi ngoka a li a silwa omwana ngoka oye owala a li e na. Jesus “okwe mu uvitile olukeno” e ta lombwele omugundjuka ngoka a li a sa ta ti: “Penduka po!” nokwa penduka. Okwa kala ishewe e na omwenyo!—Luk. 7:11-15.

7, 8. Omauliko gamwe geni moka Jesus a li u ulike oonkondo dhe dhokwaaludha?

⁷ Jehova okwa li a pe Jesus oonkondo a longe iikumithalonga. Shika osha li shu ulikwa shi na ko nasha ‘nomukiintu ngoka a li e na uuvu wetiko lyombinzi oomvula omulongo nambali.’ Nonando okwa li a “mono iihuna noonkondo mokuya koonganga odhindji noku dhi futa ashihe shoka a li e shi na,” uuvu we owa li owala wa geye. Omukiintu okwa li a yi mokati kongundu e ta kwata Jesus, shoka tashi ulike kutya okwa li a teya ompango kombinga yaangoka “ta ziya ombinzi.” (Lev. 15:19, 25) Jesus okwa li a mono kutya muye omwa za oonkondo nokwa li a pula kutya olye e mu gumu. Omukiintu “okwa tsu oongolo koshipala shaJesus, a tila ta kakama nokwe mu lombwele oshili ayihe.” Mokumona kutya Jehova okwa aludha omukiintu, Jesus okwa li u ungaunga naye nohenda e ta ti: “Mumwandje, eitaalo lyoye lye ku aludha. Inda nombili, ngu u kale wa aluka kuuvu woye.”—Mark. 5:25-27, 30, 33, 34.

⁸ Oonkondo dhaJesus dhokwaaludha ndhoka a pewa kuKalunga odha li dha aludha aavu ihe odha li wo dhi na enwethomo enene kaatali. Pashiholelwa, aantu oyendji nopwaahe na omalimbililo oya li ya kumwa sho ya mono Jesus a aludha aantu manga inaa ninga Euvitho lye lyokOndundu lya tseyika apuhe. (Luk. 6:17-19) Sho Johannes Omuninginithi a li a tumu aatumwa yaali ya ka tale ngele Jesus okwa li Mesiasa shili, oye mu adha ta “aludha aantu oyendji ya li ye na omauvu, omauwehame noompwidhuli nokwa tonatitha aaposi.” Jesus okwa lombwele aatumwa mboka ta ti: “Indeni, mu ka hokololele Johannes mbyoka mwe yi mono nomwe yi uvu: Aaposi otaa mono ko, iilema otayi ende, aanashilundu otaa yele, oombolo otaa uvu ko, aasi otaa yumudhwa noohepele otaa uvithilwa elaka etoye.” (Luk. 7:19-22) Etumwalaka ndyoka kalya li tuu lya ladhipike Johannes!

9. Iikumithalonga yaJesus oya li owala ethano lyashike?

⁹ Dhoshili, epepelelo kokumona iihuna ndyoka Jesus a li a gandja pethimbo lyuukalele we kombanda yevi olya li owala lyopakathimbo. Mboka a li a aludha nenge a yumudha, konima oya ka sa. Nonando ongawo, iikumithalonga mbyoka Jesus a li a longo manga a li kombanda yevi oya li owala ethano ndyoka tali ulike epepelelo tali kalelele ndyoka tali ka nyanyukilwa kaantu pethimbo lyelelo lyaMesiasa.

Evi alihe otali ka ninga oparadisa!

10, 11. (a) Omalalekonuuyamba gUukwaniilwa otaga ka kala po ethimbo li thike peni, nelelo lyaJesus otali ka kala lya fa peni? (b) Olye ta ka kala pamwe naKristus mOparadisa, nongiini ta ka vula okukala nomwenyo sigo aluhe?

¹⁰ Dhiladhila ando kutya onkalamwenyo otayi ka kala ya fa peni mOparadisa kombanda yevi. (Lesha Episalomi 72:5-9.) Aalongeli yaKalunga awike kashili otaya ka vula okunyanyukilwa onkalamwenyo mOparadisa shi thike pokukala po kwetango nomwedhi, sha hala okutya, sigo aluhe! Omukwaniilwa Jesus Kristus ota ka ulika kutya ota pe aantu epepelelo ‘ngaashi omvula niimeno, ngaashi omvula yomuzimbi tayi tutike evi.’

¹¹ Ngaashi wa fa wu wete episalomi ndika tali gwanithwa, mbela omutima gwoye inagu kumithwa ketegameno lyokukala nomwenyo sigo aluhe moparadisa kombanda yevi? Dhoshili, omukolokoshi ngoka a li a alelwa komuti okwa li a nyanyukwa sho Jesus e mu lombwele a ti: “Oto ka kala pamwe nangame mOparadisa.” (Luk. 23:43) Pethimbo lyElelo lyOomvula Eyuvi lyaJesus, omulumentu ngoka ota ka galulilwa momwenyo. Ngele okwa vulika kepangelo lyaKristus, ota ka vula okukala nomwenyo sigo aluhe nuukolele wa gwanenena nosho wo nenyanyu.

12. Pethimbo lyElelo lyOomvula Eyuvi lyaKristus, ompito yini tayi ka kala ye egulukila aawinayi mboka taya ka yumudhwa?

¹² Kohi yelelo lyaSalomo Omunene, Jesus Kristus ‘omuyuuki ota ka temuna,’ sha hala okutya, ta ka yambapala. (Eps. 72:7, KB) Pethimbo ndyoka ohole yaKristus nolukeno lwe otayi ka kala yi li apuhe, ngaashi owala ya li sho a li kombanda yevi. Muuyuni uupe waKalunga wu uvanekwa, nokuli ‘naawinayi’ mboka ya yumudhwa otaya ka pewa ompito yopahole opo yi ilonge omithikampango dhaJehova nokukala nomwenyo. (Iil. 24:15) Dhoshili, mboka taya tindi okukatuka metsokumwe niitegelelwa yopakalunga itaya ka pitikilwa ya tsikile okukala ko opo kaaya kuthe po ombili negundjilo lyuuyuni uupe.

13. Epangelo lyUukwaniilwa otali ka pangela sigo openi, nomolwashike ombili yalyo itaayi ka yonwa po nando?

¹³ Okupangela kwaSalomo Omunene ongonga yevi ayihe otaku ulikwa koohapu ndhika tadhi ti: “Na pangele okuza kefuta sigo okefuta ekwawo, okuza kuEufrat sigo okooha dhuuyuni. Aakali mombuga otaa ke mu tsila oongolo, naatondi ye otaa [ka latha ontsi koshipala she, KB].” (Eps. 72:8, 9) Eeno, Jesus Kristus ota ka pangela evi alihe. (Sak. 9:9, 10) Mboka ye na olupandu lwepangelo lye nosho wo omalalekonuuyamba galyo otaya ka ‘tsa oongolo’ mokuulika kutya otaya vulika kepangelo lye. Mepingathano naashoka, aalunde mboka inaayi iyela ombedhi otaya ka hanagulwa po nonando oye na “omimvo ethele.” (Jes. 65:20) Otaya ka “latha ontsi.”

Jesus oku na ko nasha natse

14, 15. Otu shi shi ngiini kutya Jesus oku uvite ko omaiyuvo gaantu nota ka “hupitha ohepele ngo te mu lilile”?

¹⁴ Aantu aalunde oye li monkalo tayi etitha ohenda noya pumbwa ekwatho meendelelo. Ihe tse otu na etegameno ewanawa. (Lesha Episalomi 72:12-14.) Jesus, Salomo Omunene, oku tu nine olukeno molwaashoka oku uvite ko onkalo yokwaahagwanenena ndjoka tu li muyo. Nokuli, Jesus okwa li a mono iihuna omolwuuyuuki, na Kalunga okwa li a pitika a taalele omamakelo oye awike. Dhoshili, Jesus okwa li a mono unene iihuna pamaiyuvo shoka sha ningitha nokuli ‘omazigudhe ngoka ga zi muye ga kale ga fa omata gombinzi noga ndondele pevi.’ (Luk. 22:44) Konima yethimbo, manga a li komuti gwomahepeko, okwa li i igidha a ti: “Kalunga kandje, Kalunga kandje, omolwashike we ekelehi ndje?” (Mat. 27:45, 46) Kakele kiinima ayihe mbyoka a li a mono iihuna kuyo, nosho wo nonando Satana a li a ningi oonkambadhala opo e mu galule mondjila yaJehova, Jesus okwa li a kala omudhiginini kuJehova Kalunga.

¹⁵ Otatu vulu okukala nuushili kutya Jesus oha mono okumona iihuna kwetu nota ka “hupitha ohepele ngo te mu lilile, omuthiminikwa ngo kee na ngoka te mu kwatha.” Jesus ota ka kala e na ko nasha naantu pahole ngaashi He note ku ‘uva omaindilo goohepele’ nota ka ‘aludha mboka ye ehamekwa koomwenyo nokumanga iilalo yawo.’ (Eps. 69:33; 147:3) Jesus ‘oku uvitile uunkundi wetu olukeno’ molwaashoka naye ‘okwa makelwa miinima ayihe ngaashi tse.’ (Heb. 4:15) Kashi li tuu oshiwanawa okutseya kutya omukwaniilwa Jesus Kristus ngoka ngashingeyi ta pangele megulu okwa halelela okweetela aantu mboka taya mono iihuna epepelelo!

16. Omolwashike Salomo a li a vulu okukala u uvitile aapangelwa ye olukeno?

¹⁶ Molwaashoka okwa li e na uunongo nontseyo, nopwaahe na omalimbililo Salomo okwa li u uvitile “oshimbembe nohepele olukeno.” Kakele kaashono, monkalamwenyo ye okwa li a tsakanekwa kiiningwanima yinikitha oluhodhi. Omumwayinamati Amnon okwa li a kwata koonkondo omumwayinakadhona Tamar, nomolwaashoka omumwayinamati gwaSalomo Absalom okwa li a dhipagithitha Amnon. (2 Sam. 13:1, 14, 28, 29) Absalom okwa li a kambadhala a kuthe ko epangelo lyaDavid koshipundi, ihe onkambadhala ye oya li ya ponyo nokwa li a dhipagwa kuJoab. (2 Sam. 15:10, 14; 18:9, 14) Konima, omumwayinamati gwaSalomo Adonija okwa li a kambadhala i ininge ye mwene omukwaniilwa. Osha yela kutya ando okwa pondolele, ando Salomo okwa dhipagwa. (1 Aak. 1:5) Oshi iwetikile kutya Salomo ngoka okwa li u uvite ko okumona iihuna kwopantu omolwoohapu ndhoka a li a popi megalikano lye pelangeko lyotempeli yaJehova. Okwa li a galikana shi na ko nasha naapangelwa ye a ti: “Omuisraeli kehe ta adhika kuudhigu momwenyo gwe . . . [Jehova] ya dhimina po ngoye u ya kwathe . . . shaa ngoka mu ningila, ngaashi i ilongela.”—2 Ondjal. 6:29, 30.

17, 18. Aapiya yamwe yaKalunga oye na okwiidhidhimikila shike, noshike she ya kwathela ya ninge ngaaka?

¹⁷ ‘Uudhigu momwenyo gwetu’ otawu vulu wo okweetwa kiimoniwa yonale yomonkalamwenyo yetu. Mary,a Onzapo yaJehova yimwe ndjoka yi na oomvula 30 nasha oya nyola ya ti: “Ondi na omatompelo lela gokukala nda nyanyukwa, ihe olundji onkalamwenyo yandje yonale ohayi ningitha ndje ndi kale nda sa ohoni nokukala ndi itonda. Ohandi kala ndi uvite nayi noonkondo, nolundji ohandi kala te lili sha fa owala iinima ayihe mbika opo ya ningwa ohela. Iinima mbyoka he dhimbulukwa ohayi ningitha ndje natango ndi kale nda gwilililwa po komadhiladhilo gokukala ndi wete kaandi na ongushu nondi na ondjo.”

¹⁸ Aalongeli yaKalunga oyendji ohaya kala ye na omadhiladhilo ga fa ngaka, ihe mbela oshike tashi vulu oku ya kwathela ya kale noonkondo dha pumbiwa opo ya vule yi idhidhimike? Mary okwa ti: “Ookuume kashili naamwatate naamwameme megongalo ohaye etele ndje enyanyu. Ohandi kambadhala wo ndi kaleke omadhiladhilo gandje kwaashoka Jehova u uvanekela onakuyiwa, nondi na einekelo kutya okulila kwandje molwokwiindila ekwatho otaku ka shituka okulila kwenyanyu.” (Eps. 126:5) Otwa pumbwa okwiinekela mOmwana ngoka Kalunga a langeka po e li Omupangeli. Okwa li kwa hunganekwa shi na ko nasha naye taku ti: “Ota sile oshimbembe nohepele olukeno note ya hupitha meso. Ote ya hupitha methiminiko nomepiyagano, oshoka oomwenyo dhawo odhi na ondilo momeho ge.” (Eps. 72:13, 14) Oohapu ndhoka kadhi li tuu eshilipaleko kutse!

Uuyuni uupe mboka wu na oshindji owe tu tegelela

19, 20. (a) Ngaashi shu ulikwa mEpisalomi 72, uupyakadhi wuni tawu ka kandulwa po kelelo lyUukwaniilwa? (b) Olye e na okupandulwa omolwelelo lyaKristus, nowu uvitile ngiini shoka tali ka gwanitha po?

¹⁹ Kambadhala ishewe wu kale wa fa wu wete onakuyiwa yaantu aayuuki muuyuni waKalunga uupe kohi yelelo lyaSalomo Omunene. Otu uvanekelwa kutya ‘moshilongo otamu ka kala eloolo lyiilya; kiikulundundu otaku ka kala omapya.’ (Eps. 72:16) Molwaashoka iilya yo yene ihayi longwa kiikulundundu, oohapu ndhika otadhi tsu omuthindo nkene evi tali ka menitha iilya oyindji. Iimeno yalyo ‘otayi ka monika ngaashi yokuLibanon,’ oshitopolwa shoka sha li sha menitha iilya oyindji pethimbo lyelelo lyaSalomo. Dhiladhila owala kwaashika! Itapu ka kala we pu na ompumbwe yiikulya, kapu na ngu ta ka kala inaa gwanenwa nokapu na ngoka ta ka sa ondjala! Aantu ayehe otaya ka nyanyukilwa “oshituthi shoontumba dhomagadhi.”—Jes. 25:6-8; 35:1, 2.

²⁰ Olye ta ka pandulwa omolwomalalekonuuyamba agehe ngano? Unene tuu Omukwaniilwa Gwaaluhe nOmunamapangelo agehe Jehova Kalunga. Nomukumo aantu atuhe otatu ka imba nenyanyu eimbilo ndika ewanawa notali nyanyudha omutima tatu ti: “Edhina lyomukwaniilwa nali simane sigo aluhe; nali kale ko ngaashi etango li li kegulu. Iigwana ayihe otayi ka yambekwa omolwe notayi ke mu ithana ‘Omulalekwa nuuyamba.’ Esimano nali ninge lyOMUWA, Kalunga kaIsraeli! Oye awike ha longo iikumitha ya tya ngeyi. Esimano nali ninge lyedhina lye sigo aluhe! Eadhimo lye nali udhithe uuyuni auhe. Amen! Amen!”—Eps. 72:17-19.

[Enyolo lyopevi]

Oto yamukula ngiini?

• Pahunganeko, Episalomi 72 olya gandja euliko lyashike tashi ka ningwa?

• Salomo Omunene olye, nepangelo lye otali ke eta omauwanawa ge thike peni?

• Kungoye mwene oshike wu wete oshihokitha kombinga yomalalekonuuyamba ngoka ga hunganekwa mEpisalomi 72?

[Ethano pepandja 28]

Oshike sha li tashi thanekwa kehepuluko ndyoka lya li lya nyanyukilwa pethimbo lyelelo lyaSalomo?

[Ethano pepandja 31]

Osha simanenena tu ninge oonkambadhala kehe opo tu ka mone omwenyo mOparadisa ndjoka tayi ka kala kohi yelelo lyaSalomo Omunene