Simaneka ondjokana yi li omagano ga za kuKalunga
“Omolwashika omulumentu oku na okuthiga po he nayina e ta kwatathana nomukadhi, oyo notaa ningi onyama yimwe.”—GEN. 2:24.
1. Omolwashike Jehova oye a gwana okusimanekwa?
JEHOVA KALUNGA, Omutoti gwondjokana, oye a gwana shili okusimanekwa. Omushiti gwetu, Omunamapangeloagehe noku li Tate yetu gwomegulu, ota popiwa shi li mondjila kutya oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jak. 1:17; Eh. 4:11) Shika osha li euliko lyohole ye onenenene. (1 Joh. 4:8) Kehe shimwe e tu longa, kehe shimwe a tegelela tu ninge naashoka e tu pa, oya nuninwa oku tu kwathela noku tu etela uuwanawa.—Jes. 48:17.
2. Omalombwelo geni ngoka Jehova a li a gandja kaaihokani yotango?
2 Ombiimbeli otayi popi kutya ondjokana oyi li gamwe gomomagano ‘omawanawa’ngoka ga za kuKalunga. (Rut 1:9; 2:12) Sho Jehova a hokanitha aaihokani yotango, Adam naEva, okwa li e ya pe omalombwelo gokondandalunde ge na ko nasha nankene taya vulu oku shi pondola mondjokana yawo. (Lesha Mateus 19:4-6.) Ando oya landulile ewiliko lyaKalunga, ando oya kala ye na enyanyu tali kalelele. Ihe kaya li ya pulakene oshipango shaKalunga noya li ya mono iilanduliko iiwinayi.—Gen. 3:6-13, 16-19, 23.
3, 4. (a) Ongiini aantu oyendji kunena ihaaya simaneke ondjokana nosho wo Jehova Kalunga? (b) Iiholelwa yini tatu ka kundathana moshitopolwa shika?
3 Ngaashi aaihokani mboka yotango, aantu oyendji kunena ohaya landula owala kashona ewiliko lyaJehova ngele taya ningi omatokolo mondjokana nenge ihaaye li landula nandonando. Aantu yamwe ohaye ekelehi edhiladhilo kutya elalakano lyondjokana olyashike, omanga yalwe haya kambadhala okulundulula elalakano lyayo opo yi opalele omahalo gawo. (Rom. 1:24-32; 2 Tim. 3:1-5) Ohayi ipwililikile uushili mboka kutya ondjokana oyi li omagano ga za kuKalunga, nomokwaahasimaneka omagano ngoka, ohayu ulike wo kutya inaya simaneka Omugandji gwago, Jehova Kalunga.
4 Omathimbo gamwe, nokuli yamwe yomoshigwana shaJehova ohaya kala inaaya tala ko we ondjokana ngaashi Jehova e yi tala ko. Aaihokani yamwe Aakriste ohaya tokola ya topoke nenge yi ihenge kaapu na etompelo lyopamanyolo. Ongiini shika tashi vulu okukeelelwa? Ongiini ewiliko lyaKalunga ndyoka tali adhika muGenesis 2:24 tali vulu okukwathela Aakriste ya hokana ya koleke ondjokana yawo? Ongiini ano mboka taya dhiladhila okuhokana taya vulu oku yi ilongekidhila? Natu taleni oondjokana ndatu ndhoka dha li dhe shi pondola pethimbo lyOmbiimbeli ndhoka tadhi ulike nkene okusimaneka Jehova ku li oshinima sha simanenena opo ondjokana yi kalelele.
Dhiginina ondjokana yoye
5, 6. Sakaria naElisabet oya li ya makelwa konkalo yini, nuudhiginini wawo owa li wa yambekwa ngiini?
5 Sakaria naElisabet oya li haya longo shoka shu uka. Kehe gumwe gwomuyo okwa li a hogolola kuume kopandjokana ngoka e na uupambepo uuwanawa. Sakaria okwa li a longo iilonga ye yuusaaseri nuudhiginini naayehe yaali oya li ya dhiginine Ompango yaKalunga ngaashi taya vulu. Dhoshili, oya li ye na olupandu lwiinima oyindji. Nonando ongawo, ando owa li we ke ya talela po kaandjawo muJuda, ando otashi vulika wa dhimbulula kutya opu na oshinima shimwe kaaye na. Kaya li ye na aanona. Elisabet okwa li ihaa vala noyali ya kulupa.—Luk. 1:5-7.
6 MuIsraeli shonale, aantu oya li ya simaneka okumona aanona, nomaukwanegumbo olundji oga li omanenenene. (1 Sam. 1:2, 6, 10; Eps. 128:3, 4) Nale omulumentu Omwiisraeli okwa li hashi vulika a henge po omukulukadhi gwe miineya ngele iha vala. Ihe nonando ongaaka, Sakaria ina henga po nando Elisabet. Ina konga nando etompelo lyasha okuthiga po ondjokana ye, nomukalukadhi gwe ine shi ninga. Nonando oya li ya yemata sho kaaye na aanona, oya li ya tsikile okulongela Jehova nuudhiginini ye li aaihokani. Mokweendela ko kwethimbo, Jehova okwa li e ya yambeke pashikumithalonga sho ya mono okanona okamati muukulupe wawo.—Luk. 1:8-14.
7. Omomukalo guni ishewe Elisabet a li u ulike kutya omudhiginini komusamane gwe?
7 Elisabet okwa li u ulike ishewe uudhiginini wu shi okupandulwa momukalo gulwe. Sho okamwanamati Johannes ka valwa, Sakaria ka li ta vulu okupopya oshoka okwa li a kuthwa ewi lye molwaashoka a li ini itaala oohapu dhomuyengeli gwaKalunga. Ihe nonando ongaaka, Sakaria okwa li a lombwele omukulukadhi gwe momukalo gwontumba kutya omuyengeli gwaJehova okwe mu lombwele okanona ka lukwe “Johannes.” Aashiinda naakwanezimo oya li ya hala ye ka lukile he ya ko. Ihe Elisabet okwa li a dhiginine elombwelo lyomusamane gwe. Okwa ti: “Itashi vulika. Edhina lyako otali lukwa Johannes.”—Luk. 1:59-63.
8, 9. (a) Uudhiginini ohawu koleke ngiini ondjokana? (b) Omomikalo dhimwe dhini dhokondandalunde omusamane nomukulukadhi taya vulu okuulika uudhiginini?
8 Kunena, aaihokani oya taalelwa kokuuvithwa nayi nosho wo komashongo galwe ngaashi Sakaria naElisabet. Ngele aaihokani inayi inekelathana, nena ondjokana yawo itayi ke enda nawa. Okudhana nomaiyuvo gomuntu gwuukakwashike ko okantu wa yoolokathana, omathano giipala, eyonondjokana nosho wo iinima yilwe mbyoka tayi yono po ondjokana otayi vulu okuhanagula po thiluthilu einekelathano mondjokana. Ngele mondjokana kamu na we einekelathano, ohole ohayi ende tayi kana mo. Momikalo dhimwe, uudhiginini owa fa olugumbo lwokugamena uukwanegumbo kaakolokoshi nokiiponga. Onkee ano, ngele omusamane nomukulukadhi oyi inekelathana, otaya vulu okukala pamwe nombili nohaya popi ya mangulukilathana, nohole yawo otayi kolo. Eeno, einekelathano olya simanenena.
9 Jehova okwa lombwela Adam a ti: ‘Omulumentu oku na okuthiga po he nayina e ta kwatathana nomukadhi.’ (Gen. 2:24) Shoka mbela osha hala okutya shike? Ekwatathano ndyoka lya li pokati kookuume naakwanezimo oli na okulunduluka. Kuume kopandjokana oku na okugandja tango ethimbo neitulomo lye kukuume ke kopandjokana. Aaihokani kaye na we okupititha komeho ookuume kawo nenge aakwanezimo yawo, pehala lyaashono, oye na okupititha komeho uukwanegumbo wawo uupe, nokaye na okweetha aavali yawo yi idhope momatokolo nenge mokwaauvathana kuukwanegumbo wawo. Oye na okukala haya longele kumwe, naashoka osho Kalunga a hala.
10. Oshike tashi kwathele ookuume kopandjokana ya kokeke uudhiginini?
10 Nokuli nomomagumbo moka aaihokani kaaye li melongelokalunga limwe alike, uudhiginini ohawu eta omayambeko. Omumwameme gumwe ngoka e na kuume kopandjokana kee shi omwiitaali ota ti: “Onda pandula Jehova sho a longo ndje nkene ndi na okukala handi vulika komusamane gwandje nokukala nde mu simaneka. Okukala omudhiginini okwa kwathela ndje ndi kale ndi mu hole nonde mu simaneka uule woomvula 47.” (1 Kor. 7:10, 11; 1 Pet. 3:1, 2) Onkee ano, kala ho longo nuudhiginini opo kuume koye kopandjokana a kale u uvite a gamenwa. Konga oompito opo wu shilipaleke kuume koye kopandjokana kutya owe mu tala ko e li omuntu a simanenena kungoye kombanda yevi, to shi ulike noohapu nosho wo noonkatu ndhoka to katuka. Shi ikolelela kwaashoka to vulu okuninga, ino etha nando osha shi mu topole, kutya nduno otashi pula shike. (Lesha Omayeletumbulo 5:15-20.) Ron naJeannette mboka ya kala ya nyunyukilwa ondjokana yawo uule woomvula dhi vulithe po 35, oya ti: “Otu na ondjokana yi na enyanyu nomupondo molwaashoka otwa kala aadhiginini kwaashoka Kalunga a tegelela tu ninge.”
Uukumwe ohawu koleke ondjokana
11, 12. Ongiini Akula naPriskila ya li haya longele kumwe (a) megumbo, (b) miilonga yokwiikongela omboloto nosho wo (c) muukalele?
11 Sho omuyapostoli Paulus a li a popi kombinga yookuume ke kopothingo, Akula naPriskila, ka li owala a tumbula gumwe, ihe okwa li a tumbula ayehe yaali. Aaihokani mbaka ya hangana oye li oshiholelwa oshiwanawa shoka Kalunga a li a popi sho a ti kutya omusamane nomukulukadhi oye na okuninga “onyama yimwe.” (Gen. 2:24) Olundji oya kala nokulonga pamwe megumbo lyawo, miilonga yokwiikongela omboloto nosho wo muukalele. Pashiholelwa, sho Paulus a li a thiki muKorinto oshikando shotango, Akula naPriskila oya li ye mu hiya e ye a kale maandjawo, moka sha yela kutya konima yethimbo omo a ka kala ha zi unene sho te ku uvitha. Konima yethimbo, sho ya li muEfeso, oya li ya gandja egumbo lyawo mu kale hamu ningilwa okugongala noya li ya longo pamwe okukwathela mboka aape, ngaashi Apollos, opo a koke pambepo. (Iil. 18:2, 18-26) Aaihokani mbaka aalaadhi oya li ya yi kuRoma hoka ya li ishewe ya gandja egumbo lyawo mu kale hamu ningilwa okugongala. Konima yethimbo, oya galukile kuEfeso opo ya tse omukumo aamwatate.—Rom. 16:3-5.
12 Akula naPriskila oya kala wo uule wethimbo taya longo pamwe naPaulus mokulanditha ootenda. Ohatu mono wo nkene aaihokani taya longele kumwe kaapu na omahilathano nenge ethigathanopo. (Iil. 18:3) Dhoshili, ethimbo ndyono ya longitha momaipyakidhilo gopaKriste olyo lya li lye ya kwathele ya kaleke ondjokana yawo ya kola pambepo noyi na enyanyu. Kutya nduno omuKorinto, muEfeso nenge omuRoma, oya li ye shiwike kehe pamwe ye li “aayakuli ooyakwetu moshilonga shaJesus Kristus.” (Rom. 16:3) Oya li ya longo pamwe okuhumitha komeho iilonga yokuuvitha Uukwaniilwa shaampoka ya li ya yakula.
13, 14. (a) Oonkalo dhini tadhi vulu okukaleka ondjokana kaayi na uukumwe? (b) Iinima yimwe yini aaihokani taya vulu okuninga opo ya koleke ekwatathano lyondjokana yawo ye li “onyama yimwe”?
13 Dhoshili, okukala mu na omalalakano nomaipyakidhilo ga faathana ohaku koleke ondjokana. (Omuuv. 4:9, 10) Shinikitha oluhodhi, aaihokani oyendji kunena ohaya kala pamwe ethimbo eshona. Nohaya longo oowili odhindji miilonga yokwiikongela omboloto. Yalwe ohaye ende oondjila oonde okuya kiilonga nenge haya tembukile kiitopolwa yokokule oko ya ka longe yo ya vule okutumina iimaliwa komagumbo. Nokuli komagumbo, aaihokani yamwe ohaya kala yi ilile molwaashoka ohaya longitha ethimbo lyawo okutala o-TV, okuninga iinima mbyoka ye hole, momaudhano, momaudhano goovideo nenge mokulongitha o-Internet. Mbela shoka osho hashi ningwa maandjeni? Ngele osho, mbela itamu vulu okulundula oonkalo dheni opo mu vule okukala pamwe ethimbo olindji? Ongiini kombinga yiilonga yakwalukehe ngaashi okulongekidha iikulya pamwe, okuyoga iiyaha nenge okulonga moshikunino? Mbela itamu vulu okulonga pamwe okusila oshimpwiyu aanona nenge okukwathela aavali yeni mboka ya kulupa?
14 Shoka sha simanenena osho okukala hamu longo pamwe aluhe miilonga yi ko nasha nokulongela Jehova. Okukonakona omushangwa gwesiku pamwe nokuniga pamwe ekonakono lyuukwanegumbo ohaku gandja oompito oombwanawa kuukwanegumbo wu kale hawu dhiladhila nowu kale wu na omalalakano ga faathana. Kaleni hamu longo pamwe muukalele. Ngele otashi vulika, kambadhaleni okukokola ondjila pamwe, nokuli nonando oonkalo dheni otadhi pitika mu shi ninge owala omwedhi gumwe nenge omvula yimwe. (Lesha 1 Aakorinto 15:58.) Omumwameme gumwe ngoka a kokola ondjila pamwe nomusamane gwe ota ti: “Uukalele owa li omukalo gumwe moka twa li tatu vulu okukala pamwe nokukundathana twa mana mo. Molwaashoka atuhe otwa li tu na elalakano limwe alike lyokukwathela aantu pambepo, onda li ndi uvite kutya otu na lela uukumwe. Onda li ndi na ekwatathano lyopothingo naye kee shi owala omusamane gwandje, ihe oku li wo kuume kandje kopothingo.” Ngele omwa kala hamu longo pamwe iilonga mbyoka ya simana, otamu ka kala mwa hokwa nomwa pititha komeho iinima ya faathana, mokweendela ko kwethimbo omikalo dheni otadhi ka kala wo dha faathana, sigo oosho tamu ka kala mu na omaiyuvo nomadhiladhilo ga faathana nohamu katuka oonkatu dha faathana mu li “onyama yimwe,” ngaashi Akula naPriskila.
Pititheni komeho iinima yopambepo mondjokana yeni
15. Oshike sha simanenena shoka tashi vulu okuningitha ondjokana yi kale tayi pondola? Shi yelitha.
15 Jesus okwa kala e shi kutya osha simana okupititha komeho Kalunga mondjokana. Okwa li a mono nkene Jehova a li a hokanitha aaihokani yotango. Okwa li a mono nkene Adam naEva ya li ya nyanyukwa sho ya li ya landula elombwelo lyaKalunga nokwa li a mono uupyakadhi mboka wa holoka po sho ye li ipwililikile. Ano sho Jesus a li ta longo yalwe, okwa li e endulula elombwelo lyaHe ndyoka tali adhika muGenesis 2:24. Okwa li wo a gwedha ko edhiladhilo ndika tali ti: “Shono Kalunga e shi tula kumwe, inashi kuthwa kumwe komuntu.” (Mat. 19:6) Onkee ano, okusimaneka Jehova oku li natango oshinima sha simanenena opo mondjokana mu kale mu na enyanyu noyi kale tayi pondola. Shi na ko nasha naashika, aavali yaJesus yopanyama, Josef naMaria, oya tula po oshiholelwa sha dhenga mbanda.
16. Ongiini Josef naMaria ya li yu ulike kutya oya lenga iinima yopambepo muukwanegumbo wawo?
16 Josef okwa li e na ohenda nokwa li ha simaneke Maria. Sho a tseya kutya Maria oku li metegelelo, okwa li a hala okuungaunga naye nolukeno, nokuli nomanga omuyengeli gwaKalunga inee mu yelithila shoka tashi ka ningilwa Maria. (Mat. 1:18-20) Ye li aaihokani, oya li ya vulika kompango yOmukesari noya li wo ya dhiginine Ompango yaMoses. (Luk. 2:1-5, 21, 22) Nonando aalumentu owala ya li ya pumbwa okukala piituthi yopalongelokalunga iinene muJerusalem, Josef naMaria nuukwanegumbo wawo, oya li opo haya kala kehe omvula. (Deut. 16:16; Luk. 2:41) Momukalo gwa tya ngawo nosho wo momikalo dhilwe, aaihokani mbaka aatilikalunga oya li ya kambadhala okulonga shoka sha hokiwa kuJehova noya li ya simaneka noonkondo iinima yopambepo. Itashi kumitha sho Jehova a li e ya hogolola opo ya sile oshimpwiyu Omwana petameko lyonkalamwenyo ye yokombanda yevi.
17, 18. (a) Ongiini aaihokani taya vulu okupititha komeho iinima yopambepo muukwanegumbo wawo? (b) Otaya ka mona uuwanawa wuni ngele oye shi ningi?
17 Mbela nane omwa pititha komeho iinima yopambepo muukwanegumbo weni? Pashiholelwa, uuna tamu ningi omatokolo ga simana, mbela ohamu tala ngaa tango kutya omakotampango gOmbiimbeli otaga ti shike, ohamu galikana ngaa kombinga yaashoka nokukonga omayele kAakriste mboka ya pyokoka? Nenge ohamu kambadhala okukandula po uupyakadhi weni tamu landula omaiyuvo geni nenge gookuume keni nosho wo guukwanegumbo weni? Mbela ohamu kambadhala okutula miilonga omaetopo ogendji taga longo ngoka haga nyanyangidhwa komupiya omudhiginini ge na ko nasha nondjokana nosho wo nonkalamwenyo yuukwanegumbo? Nenge ohamu landula owala omikalondjigilile dhopomudhingoloko nenge omayele ngoka ga taambiwa ko apuhe? Mbela ohamu galikana ngaa pandjigilile nokukonakona pamwe, ohamu itulile po ngaa omalalakano giinima yopambepo nohamu kundathana kombinga yiinima mbyoka ya simanenena muukwanegumbo?
18 Ray okwa popya shi na ko nasha nondjokana yawo ndjoka ya kala nokunyanyukilwa uule woomvula 50 a ti: “Katwa li nando esiku limwe twa tsakanekelwe kuupyakadhi mboka itaatu vulu okukandula po, molwaashoka otwa li twa ninga Jehova e li oshitopolwa ‘shongodhi yetu ndjoka ya yogohwa oondali ndatu.’” (Lesha Omuuvithi 4:12.) Danny naTrina otaya tsu kumwe noohapu ndhoka, ya ti: “Molwaashoka otwa li hatu longo pamwe, ondjokana yetu oya li ya kola.” Oya kala nenyanyu mondjokana yawo uule woomvula dhi vulithe 34. Ngele omwa kala aluhe hamu pititha Jehova komeho mondjokana yeni, ote ke mu kwathela mu pondole note ke mu yambeka.—Eps. 127:1.
Tsikileni okusimaneka omagano gaKalunga
19. Omolwashike Kalunga a pa aantu omagano gondjokana?
19 Kaantu oyendji kunena, enyanyu lyopaumwene olyo owala oshinima sha simana kuyo. Ihe omupiya gwaKalunga ohe shi tala ko shi ili. Oku shi kutya Kalunga okwa gandja ondjokana yi li omagano gokuhumitha komeho elalakano Lye. (Gen. 1:26-28) Ando Adam naEva oya simanekele omagano ngoka, ando evi alihe olya ningi oparadisa mu na aapiya yaKalunga ya nyanyukwa naayuuki.
20, 21. (a) Omolwashike tu na okutala ko ondjokana yi li ondjapuki? (b) Otatu ka kundathana kombinga yomagano geni oshiwike tashi ya?
20 Komeho gaayihe, aapiya yaKalunga oya tala ko ondjokana yi li ompito yokusimanekitha Jehova. (Lesha 1 Aakorinto 10:31.) Ngaashi twe shi mona, uudhiginini, uukumwe nosho wo uupambepo oyo omaukwatya gopakalunga ngoka taga koleke ondjokana. Onkee ano, kutya nduno otatu ilongekidhile ondjokana, tatu yi koleke nenge tatu kambadhala oku yi hupitha, tango otu na oku yi tala ko yi li oshinima oshiyapuki noyi li elongekidho lyaKalunga. Okukaleka oshili ndjoka momadhiladhilo otaku ke tu inyengitha tu ninge ngaashi tatu vulu mokuninga omatokolo getu ge na ko nasha nondjokana gi ikolelela kOohapu dhaKalunga. Momukalo nguka, itatu ku ulika owala kutya otwa simaneka ondjokana yi li omagano, ihe otatu ku ulika wo kutya otwa simaneka Omugandji gwomagano ngoka, Jehova Kalunga.
21 Dhoshili, ondjokana hayo ayike omagano twa pewa kuJehova nohayo owala tayi vulu okweetela omuntu enyanyu monkalamwenyo. Moshitopolwa tashi landula, otatu ka konakona wo omagano galwe ge na ondilo ga za kuKalunga, sha hala okutya, omagano gokukala inoo hokana nenge inoo hokwanwa.
Oto yamukula ngiini?
• Ongiini uudhiginini wu na okunwetha mo aaihokani Aakriste?
• Omolwashike okulongela kumwe taku vulu okukoleka ondjokana?
• Omomikalo dhimwe dhini moka aaihokani taya vulu okupititha komeho iinima yopambepo?
• Ongiini tatu vulu okuulika kutya otwa simaneka Jehova ngoka e li Omutotipo gwondjokana?
[Omathano pepandja 18]
Okulongela kumwe otaku kwathele aaihokani ya kale muukumwe