Okukala wa hokiwa kuKalunga otaku ke ku petha omwenyo gwaaluhe

“OMUWA, ongoye ho yambeke mboka haa vulika kungoye; ohole yoye oyo oshikandekitho tashi ya gamene.”—EPS. 5:12.

1, 2. Elia okwa li i indile omuselekadhi gwokuSarepta e mu ningile shike, nokwa li e mu shilipalekele shike?

OMUSELEKADHI nomwanamati oya li ya sa ondjala, ihe nomupolofeti gwaKalunga okwa li wo a sa ondjala. Sho omuselekadhi nguka gwokuSarepta a li pokutema omulilo a teleke, omupolofeti Elia okwa li e mu pula omeya noshikwiila. Okwa li e na ehalo lyoku mu pa a nwe, ihe okwa li owala e na “uusila weshambekela limwe moluyo nuugadhi mokayiga.” Okwa li e wete kutya ka li e na iikulya ya gwana okupa omupolofeti nokwa li e mu lombwele kutya ita vulu oku mu pa.—1 Aak. 17:8-12.

² Elia okwa kala nokwiindila ta ti: “Tango ningila ndje ko okakwiila, u ka ete kungame. Oshihupe otamu itelekele ne nomumwoyemati. Oshoka OMUWA, Kalunga kaIsraeli, ota ti: ‘Uusila itau ka pwa mo moluyo, nuugadhi itau ka manuka mo mokayiga.’”—1 Aak. 17:13, 14.

3. Etokolo lini lya simana tu na okuninga?

³ Omuselekadhi okwa li e na okuninga etokolo lya kwata miiti, kaashi shi owala okutokola ngele ota ka pa omupolofeti a lye. Mbela okwa li te ki inekela muJehova e ya hupithe nomwana nenge okwa li ta ka pititha komeho oompumbwe dhe dhopalutu pehala lyokukala a hokiwa kuKalunga nokukala kuume ke? Otwa taalelwa wo kepulo lya faathana. Mbela otatu ku ulika twa mana mo kutya otu na ko nasha nokukala twa hokiwa kuJehova pehala lyokwiikongela egameno lyopamaliko? Otu na omatompelo lela gokukala twi inekela muKalunga noku mu longela. Opu na oonkatu ndhoka tatu vulu okukatuka opo a kale e tu hokwa.

‘Ongoye wa gwana okulongelwa’

4. Omolwashike Jehova oye a gwana okulongelwa kutse?

⁴ Jehova oku na uuthemba wokukala a tegelela aantu ye mu longele momukalo ngoka a hokwa. Aapiya ye yomegulu oya li ye shi koleke sho ya popi muukumwe ya ti: “Omuwa, Kalunga ketu! Owa gwana okusimanekwa omolweadhimo, esimano noonkondo, oshoka ongoye wa shiti iinima ayihe, nokehalo lyoye oyi li po noyi na omwenyo!” (Eh. 4:11) Molwaashoka Jehova oye Omushiti, okwa gwana okulongelwa kutse.

5. Omolwashike ohole ndjoka Kalunga e tu ulukila yi na oku tu inyengitha tu mu longele?

⁵ Etompelo lilwe kutya omolwashike tu na okulongela Jehova olyo kutya kaku na gulwe ngoka e tu hole kee shi ye. Ombiimbeli otayi ti: “Kalunga okwa shiti omuntu oshifetha she, e ya shiti omulumentu nomukiintu.” (Gen. 1:27) Omuntu okwa shitwa e na emanguluko lyokudhiladhila nokuninga omatokolo. Jehova okwa ningi He yaantu molwaashoka oye e tu shita. (Luk. 3:38) Ngaashi omuvali kehe omunahole ha ningi, Jehova okwa ninga kehe shimwe opo a pe oyanamati naakadhona shoka ya pumbwa opo ya nyanyukilwe onkalamwenyo. ‘Etango lye ohe li pititha’ nosho wo ‘omvula ye ohe yi lokitha’ opo evi li menithe iikulya ya gwana momudhingoloko omwaanawa.—Mat. 5:45.

6, 7. (a) Adam okwa li e etele oluvalo lwe iilanduliko iiwinayi yini? (b) Eyambo lyaKristus otali ka ningila shike aantu mboka ya hokiwa kuKalunga?

⁶ Jehova okwe tu hupitha wo kiilanduliko yi nikitha oluhodhi mbyoka ye etithwa po kuulunde. Okuyona kwaAdam otaku yelekanithwa nomuntu ngoka ha yaka opo a ka ndombole. Sho a tukulile Jehova oshipotha okwa kutha po etegameno ndyoka aanona ye ya li ye na, lyokukala nomwenyo gwaaluhe. Okwiihola mwene kwe okwa ningitha aantu ya kale aapika yokwaaha gwanenena. Osho molwaashoka aantu ayehe haye ehama, hayu uvu nayi nohugunina ohaya si. Opo omuntu a ze mo muupika okwa li e na okukulilwa mo, naashoka osho Jehova a li a ningi opo e tu hupithe kaatu mone iilanduliko iiwinayi. (Lesha Aaroma 5:21.) Jesus Kristus okwa li a katuka metsokumwe nehalo lyaHe mokugandja “omwenyo gwe, a hupithe oyendji.” (Mat. 20:28) Ayehe mboka ya hokiwa kuKalunga masiku otaya ka mona uuwanawa auhe mboka tawu vulu okumonika omolwekulilo.

⁷ Omushiti gwetu, Jehova, okwa ninga oshindji shoka itaashi vulu okuningwa komuntu gulwe opo e tu pe onkalamwenyo yi na ombili nelalakano. Ngele otwa kala twa hokiwa kuye otatu ka mona nkene ta ka kutha po uuwinayi auhe mboka wa ningilwa aantu. Jehova ota ka tsikila oku tu ulukila tu li oohandimwe nkene ta “futu ayehe mboka taye mu kongo.”—Heb. 11:6.

‘Oshigwana shoye oshi ilongekidha nehalo ewanawa’

8. Oshimoniwa shaJesaja otashi tu longo shike shi na ko nasha nokulongela Kalunga?

⁸ Opo tu kale twa hokiwa kuKalunga otu na okukala hatu longitha nawa emanguluko lyetu lyokuninga omatokolo. Shika oshi li ngaaka molwaashoka Jehova iha kondjitha nando ogumwe e mu longele. Pethimbo lyaJesaja Kalunga okwa li a pula a ti: “Olye ngo tandi mu tumu? Olye ta ningi omutumwa gwetu?” Jehova okwa li u ulike kutya okwa simaneka omupolofeti mokukala e shi kutya oku na okutokola ye mwene shoka a hala okuninga. Dhiladhila shi na ko nasha nankene Jesaja a yamukula nehalo ewanawa a ti: “Otandi yi! Tuma ndje!”—Jes. 6:8

9, 10. (a) Otu na okulongela Kalunga tu na iikala yini? (b) Omolwashike shu uka tu longele Jehova nomutima aguhe?

⁹ Aantu oye na emanguluko lyokutokola kutya otaya longele Kalunga nenge itaye shi ningi. Jehova okwa hala tu mu longele tashi zi komutima. (Lesha Josua 24:15.) Kehe ngoka itaa longele Kalunga nomutima aguhe ita vulu oku mu nyanyudha noita taamba ko wo eigandjo lyaangoka te mu longele owala nelalakano lyokunyanyudha aantu ooyakwawo. (Kol. 3:22) Ngele otatu longo iilonga iiyapuki tatu ‘kakadhala’ mokweetha iinima yuuyuni yi ye moshipala elongelokalunga lyetu, Kalunga ita ka kala e tu hokwa. (Eks. 22:29, KB) Jehova oku shi shi kutya ngele otatu mu longele nomwenyo aguhe otashi ke tu etela uuwanawa. Moses okwa li a ladhipike Aaisraeli ya hogolole omwenyo ‘mokuhola OMUWA Kalunga kawo, mokuvulika kuye nomoku mu dhama.’—Deut. 30:19, 20.

¹⁰ Omukwaniilwa David gwaIsraeli shonale okwa li i imbile Jehova a ti: “Mesiku to homona aatondi yoye, aalelwa yoye otaye ku kwatha molugodhi. Ngaashi omume gwongula onene, osho aamati yoye taa ka adhima notaye ya kungoye kondundu ondjapuki.” (Eps. 110:3) Aantu oyendji kunena oya pititha komeho egameno lyopashimaliwa nokwiinyanyudha. Ihe mboka ye hole Jehova shili oye na okupititha komeho oku mu longela iilonga iiyapuki. Ngele tayu uvitha nuulaadhi onkundana ombwanawa otayu ulike kutya oya pititha shike komeho. Oyi inekela kutya Jehova ota ka sila oshimpwiyu oompumbwe dhawo dhesiku kehe.—Mat. 6:33, 34.

Omayambo ngoka ga hokiwa kuKalunga

11. Aaisraeli oya li ye na etegameno lyokumona uuwanawa washike ngele ya yambele Jehova omafikiloyambo?

¹¹ Pahangano lyOmpango, oshigwana shaKalunga osha li hashi gandja omayambo opo shi kale sha hokiwa kuye. Levetikus 19:5 ota ti: “Ngele tamu yamba ekwatathanondjambo, dhiginineni omautho ngoka nde mú pa, ongame notandi li taamba.” Membo lyOmbiimbeli olyo tuu ndyoka otatu lesha mo taku ti: “Uuna tamu yamba epandulondjambo kOmuwa, landuleni omautho, opo li taambwe.” (Lev. 22:29) Uuna Aaisraeli ya li ya yamba omayambo giinamwenyo koshiyambelo shaJehova, okwa li haku zi olwithi lu na “ezimba lya nika nawa notali opalele” Kalunga kashili. (Lev. 1:9, 13) Jehova okwa li ha talalekwa komayambo ngoka ga li hagu ulike kutya oshigwana she oshi mu hole. (Gen. 8:21) Miinima mbyoka ya li hayi ningwa nale shi na ko nasha nOmpango otatu adha mo omakotampango ngoka taga longo wo nokunena. Mboka haya gandja omayambo ngoka ga taambiwa ko kuJehova okwa li ha kala e ya hokwa. Oha hokwa omayambo geni? Natu ka kundathaneni iinima iyali yi na ko nasha nonkalamwenyo yetu: eihumbato lyetu nokupopya kwetu.

12. Iilonga yini tayi ka ningitha ‘okwiigandja kuKalunga tu li eyambo’ ku kale itaaku taambiwa ko kuye?

¹² Montumwafo ye ndjoka a li a nyolele Aaroma, omuyapostoli Paulus okwa nyola a ti: “Igandjeni ne yene kuKalunga eyambo li na omwenyo, mu kale mwe mu iyapulila, ne mu kale mwe mu opalela. Ndika olyo elongelokalunga lyeni lyashili.” (Rom. 12:1) Opo omuntu a kale a hokiwa kuKalunga oku na okukaleka olutu lwe lwa yogoka opo lu taambiwe ko kuye. Ngele omuntu okwi inyateke nokuhila omakaya, nokutaasina ehuku lyabetel, nokulongitha iingangamithi nonokulongitha iikolitha sha pitilila, eyambo lye itali ka kala li na ongushu. (2 Kor. 7:1) Kakele kaashono, molwaashoka omuntu ngoka ta “hondele, ota yono kolutu lwe mwene,” eihumbato inaali yogoka momukalo kehe otali ka ningitha omayambo ge ga kale inaaga hokiwa kuJehova. (1 Kor. 6:18) Opo omuntu a nyanyudhe Kalunga oku na ‘okukala omuyapuki mwaayihe mbyoka te yi ningi.’—1 Pet. 1:14-16.

13. Omolwashike shi li mondjila tu kale hatu tanga Jehova?

¹³ Eyambo lilwe ndyoka Jehova ha nyanyukilwa oli na ko nasha nokupopya kwetu. Mboka ye hole Jehova ohaye mu popile aluhe muuwanawa montaneho nongele kaaye li montaneho momagumbo gawo. (Lesha Episalomi 34: 1-3.) Lesha Episalomi 148-150 e to tala nkene omapisalomi ngaka gatatu tage tu ladhipike tu tange Jehova. Dhoshili, ‘ayehe mboka haya vulika kuye naye mu hambelele.’ (Eps. 33:1) Jesus Kristus okwe tu tulila po oshiholelwa shokuulika kutya osha simana okutanga Kalunga mokuuvitha onkundana ombwanawa.—Luk. 4:18, 43, 44.

14, 15. Hosea okwa li a kumagidha Aaisraeli ya yambe omayambo ga tya ngiini, na Jehova okwa li a yamukula ngiini?

¹⁴ Ngele tatu uvitha nuulaadhi, ohatu gandja uunzapo kutya otu hole Jehova nonokutya otwa hala okukala twa hokiwa kuye. Pashiholelwa, tala kunkene omupolofeti Hosea a li a kumagidha Aaisraeli mboka ya li ya yi melongelokalunga lyiifundja e taya kala inaaya hokiwa we kuKalunga. (Hos. 13:1-3) Hosea okwa li e ya lombwele yi indile taya ti: “[Jehova] dhima po omayono getu agehe, taamba omagalikano getu notatu ke ku [yambela eyambo lyomilungu pehala lyoongombe, KB].”—Hos. 14:1, 2.

¹⁵ Ongombe oyo ya li oshinamwenyo shi na ondilo shoka Aaisraeli ya li haya vulu okuyambela Jehova. Onkee ano, “eyambo lyomilungu pehala lyoongombe” ndyoka tali popiwa, osha hala okutya, oohapu dha dhiladhilwa nawa notadhi zi komutima ndhoka tadhi tanga Kalunga kashili. Jehova okwa li a yamukula ngiini mboka ya li ya yamba omayambo ga tya ngaaka? Okwa ti: “Otandi ka kala ndi ya hole nomwenyo gwandje aguhe.” (Hos. 14:4) Mboka haya yamba omayambo ga tya ngaaka, Jehova ohe ya dhimine po, oha kala e ya hokwa noha ningi kuume kawo.

16, 17. Uuna eitaalo muKalunga li inyengitha omuntu u uvithe onkundana ombwanawa, ongiini Jehova ha taamba ko omayambo gomuntu ngoka?

¹⁶ Okutanga Jehova montaneho yaantu okwa li aluhe oshinima sha simanenena shoka hashi ningwa mokulongela Kalunga kashili. Omupisalomi okwa li a tala ko okusimaneka Kalunga kashili kwa simana osho molwaashoka a li a galikana Kalunga a ti: “OMUWA, taamba egalikano nepandulo lyandje, ngoye u longe ndje ompango yoye.” (Eps. 119:108) Ongiini mbela kunena? Jesaja okwa hunganeke kombinga yongundu onene yaantu yomethimbo lyetu a ti: ‘Aantu otaa ka holola esimano lyOMUWA. Otaya ka ninga omafikilondjambo go opalela OMUWA gwandje.’ (Jes. 60:6, 7) Mokugwanithwa kwehunganeko ndyoka aantu omamiliyona otaya yambele Kalunga ‘eyambo nokupandula edhina lye.’—Heb. 13:15.

¹⁷ Ongiini kombinga yoye? Oho yambele ngaa Kalunga omayambo ngoka a hokwa? Ngele hasho, mbela oto ka ninga omalunduluko ga pumbiwa opo wu tameke okutanga Jehova montaneho yaantu? Uuna eitaalo lye ku inyengitha wu tameke okuuvitha onkundana ombwanawa, omayambo goye otaga ka kala ga ‘hokiwa kOmuwa ge vule gondumetana.’ (Lesha Episalomi 69:30, 31.) Kala wa shilipalekwa kutya “ezimba ewanawa” lyeyambo lyokutanga Jehova otali ka thika kuye nota ka kala e ku hokwa. (Hes. 20:41) Enyanyu ndyoka to ka kala wu na itali ka vula okuyelekwa nasha.

‘OMUWA oha yambeke mboka haa vulika kuye’

18, 19. (a) Aantu oyendji kunena ohaya longele Kalunga ye na etaloko lini? (b) Ngele omuntu okwa kala inaa hokiwa we kuKalunga ohashi eta iilanduliko yini?

¹⁸ Kunena, aantu oyendji ohaya thiki pehulithodhiladhilo ngaashi yamwe ya li ya ningi pethimbo lyaMaleaki ya ti: “Okulongela Kalunga itaku kwatha sha. Otashi kwatha shike okuvulika kuye nenge okuulukila OMUWA Omunankondoawike kutya otwa sa oluhodhi molwiilonga yetu?” (Mal. 3:14) Mokulandula okahalu kiinima yopamaliko, oya li ya tala ko elalakano lyaKalunga li li oshinima shoka itaashi vulu okumonika nosho wo kutya oompango dhe kadhi na we oshilonga. Okuuvitha onkundana ombwanawa oye ku tala ko ku li emanepo lyethimbo noshinima shoka hashi ningile aantu nayi.

¹⁹ Iikala ya tya ngaaka oya li ya tameke moshikunino shaEden. Satana oye a li a ningitha Eva a kale a dhina onkalamwenyo yashili ndjoka Jehova a li e mu pa nokwa li inaa hokiwa we kuJehova. Kunena, Satana oha kambadhala okuningitha aantu yi itaale kutya omuntu ita ka mona uuwanawa washa nando oku longe ehalo lyaKalunga. Ihe Eva nomusamane gwe oya li ya mono kutya okukala inaaya hokiwa kuKalunga okwa li kwe ya etele eso. Aantu mboka haya landula oshiholelwa shawo masiku otaya ka tseya kutya okukala inaaya hokiwa kuKalunga otaku ke ya etela eso.—Gen. 3:1-7, 17-19.

20, 21. (a) Omuselekadhi gwokuSarepta okwa li a ningi po shike, noshizemo osha li shike? (b) Ongiini nomolwashike tu na okuholela omuselekadhi gwokuSarepta?

²⁰ Dhiladhila owala kefaathano ndyoka li li pokati kiilanduliko iiwinayi yooAdam naEva noshizemo shoka sha popiwa metetekelo shi na ko nasha naElia nomuselekadhi gwokuSarepta. Konima sho omukiintu a li a ladhipikwa kuElia, okwa li a ka ningila tango omupolofeti oshikwiila. Opo nduno Jehova okwa li a gwanitha po euvaneko ndyoka a li u uvaneke okupitila muElia. Ehokololo otali ti: “Oya li ye na iikulya ya gwana omasiku ogendji. Ngaashi OMUWA u uvanekitha Elia, uusila inau pwa mo moluyo, nomagadhi inaga pwa mo mokayiga.”—1 Aak. 17:15, 16.

²¹ Omuselekadhi gwokuSarepta okwa li a ningi oshinima shoka aantu aashona yomaantu omabiliyona ye na ehalo okuninga. Okwa li i inekele muKalunga thiluthilu kutya oye te mu hupitha noka li a kala inee mu kwathela. Ehokololo ndika nomahokololo galwe gOmbiimbeli otagu ulike kutya Jehova oye twa gwana okukala twi inekela. (Lesha Josua 21:43-45; 23:14.) Okukalamwenyo kwOonzapo dhaJehova dhokunena otaku gandja uunzapo wa gwedhwa po kutya ke na nando esiku e ethe okukwathela mboka a hokwa.—Eps. 34:6, 7, 17-19.a

22. Omolwashike she endelela tu lalakanene okukala twa hokiwa kuKalunga nopwaahe na okukakadhala?

²² Esiku lyaKalunga lyepangulo otali akele “aantu ayehe kombanda yevi alihe.” (Luk. 21:34, 35) Omuntu ke na nkene ta vulu oku li henuka. Uuyamba nenge omaliko itaga vulu okuyelekanithwa nokuuva Omupanguli ngoka a langekwa po kuKalunga ta ti: “Ne aalalekwa nuuyamba kuTate, ileni, mu ka thigulule oshilongo mwe shi longekidhilwa okuza keshito lyuuyuni.” (Mat. 25:34) ‘OMUWA, oha yambeke mboka haa vulika kuye; ohole ye oyo oshikandekitho tashi ya gamene.’ (Eps. 5:12) Mbela katu na okukala twa hala okukala twa hokiwa kuKalunga?

[Enyolo lyopevi]

Oto dhimbulukwa?

• Omolwashike Jehova a gwana okulongelwa kutse nomutima aguhe?

• Kunena Jehova oha taamba ko omayambo geni?

• Uutumbulilo “eyambo lyomilungu pehala lyoongombe” otawu popi shike, nomolwashike tu na oku li yambela Jehova?

• Omolwashike tu na okukala twa hala okukala twa hokiwa kuKalunga?

[Ethano pepandja 19]

Omupolofeti gwaKalunga okwa li a ningitha omukulukadhi a ninge etokolo lini lya simana?

[Ethano pepandja 21]

Ohatu mono uuwanawa wuni uuna tatu yamba eyambo lyokutanga Jehova?

[Ethano pepandja 23]

Ngele owa kala wi inekela muJehova thiluthilu ite ke ku etha