Natu yambeleni Jehova omayambo nomutima aguhe

“Shaa shoka tamu shi longo, shi longeni nomwenyo aguhe ongaamboka itaamu longele aantu, ihe Omuwa.”—KOL. 3:23.

1-3. (a) Mbela sho Jesus a gandja iikulila, otashi ti kutya inatu pumbwa we okupa Jehova omayambo gasha? Shi yelitha. (b) Epulo lini tatu vulu okwiipula kombinga yomayambo ngoka hatu ningi kunena?

OMIMVO 2000 nasha lwaampono dha pita Jehova okwa li a yelithile oshigwana she kutya Ompango yaMoses oya hulu po sho Jesus a gandja omwenyo gwe gu ninge iikulila. (Kol. 2:13, 14) Konima yaashoka omayambo agehe ngoka Aajuda ya li haya ningi oomvula omathele dha ka pita kaga li we ga pumbiwa nokaga li we ge na oshilonga shasha. Kungawo, oohapu ndhoka tadhi ti kutya Ompango oya kala “omuputudhi gwetu, sigo Kristus e ya,” odha gwanithwa.—Gal. 3:24.

² Shoka itashi ti kutya Aakriste itaya vulu we okugandja omayambo. Mepingathano naashoka, omuyapostoli Petrus okwa popi ompumbwe ‘yokuyamba omayambo gopambepo noga hokiwa kuKalunga molwaJesus Kristus.’ (1 Pet. 2:5) Omuyapostoli Paulus okwe shi popya sha yela kutya onkalamwenyo yOmukriste ngoka i igandjela Jehova oya fa “eyambo.”—Rom. 12:1.

³ Onkee ano, Aakriste ohaya ningile Jehova omayambo moku mu pa iinima yontumba nenge mokweetha po oshinima shontumba opo ye mu longele. Mbela iitegelelwa mbyoka ya li hayi pulwa Aaisraeli, otayi tu kwathele ngiini tu tseye kutya Jehova okwa hokwa omayambo agehe ngoka hatu mu pe?

OMAYAMBO NGOKA HATU NINGI ESIKU NESIKU

4. Otu na okudhimbulukwa shike kombinga yiilonga yetu yakehe siku?

⁴ Sho twi ipyakidhila niilonga yetu esiku nesiku, ohashi vulika tu tye iilonga yetu kayi na sha nokuningila Jehova omayambo. Ohashi vulika tu dhiladhile kutya iilonga yomegumbo, yosikola, yokomake nosho wo oku ka landa iinima kositola, itayi vulu okunkundipaleka ekwatathano lyetu naye. Ihe ngele owi igandjela Jehova nenge oto dhiladhila oku ke shi ninga, dhimbulukwa kutya iilonga mbyoka otayi vulu okunkundipaleka ekwatathano lyoye naye. Kutya nduno uusiku nenge omutenya ohatu tula miilonga omakotampango gopamanyolo mukehe shimwe tatu ningi. Paulus ote tu lombwele ta ti: “Shaa shoka tamu shi longo, shi longeni nomwenyo aguhe ongaamboka itaamu longele aantu, ihe Omuwa.”—Lesha Aakolossa 3:18-24.

5, 6. Oshike tashi vulu oku tu kwathela tu tale nkene tu na okwiihumbata nokuzala?

⁵ Olundji Omukriste oha kala i ipyakidhila niilonga mbyoka kaayi shi iiyapuki. Ihe oohapu dhaPaulus ndhoka tadhi ti kutya natu longele Jehova “nomwenyo aguhe,” otadhi tu kwathele tu tale nkene tu na okwiihumbata ethimbo kehe. Ongiini tatu vulu oku dhi tula miilonga? Mbela ohatu ihumbata ngaa nokuzala nawa ethimbo kehe? Nenge mbela ohatu kala twa sa ohoni okupopya kutya tse Oonzapo dhaJehova, omolweihumbato lyetu ewinayi nenge molwaashoka twa zala nayi? Inatu hala tu kale ngaaka. Katu na okuninga iinima mbyoka tayi shekitha edhina lyaKalunga.—Jes. 43:10; 2 Kor. 6:3, 4, 9.

⁶ Natu taleni nkene okulongela kwetu Jehova “nomwenyo aguhe” haku gumu okudhiladhila kwetu niilonga yetu moonkalo dhi ili nodhi ili. Sho tatu shi ningi, natu kale tu shi kutya Aaisraeli oya li ye na okupa Jehova oshipe, sha hala okutya, oshinima shoka oshiwanawa.—Eks. 23:19.

NKENE EIHUMBATO HALI GUMU ONKALAMWENYO YOYE

7. Oshike sha kwatelwa meigandjo lyopaKriste?

⁷ Owa ninga etokolo ewanawa sho wi igandjela Jehova. Owu uvaneka kutya oto ke mu longela mukehe shimwe to ningi monkalamwenyo yoye. (Lesha Aahebeli 10:7.) Owe shi mona kutya ngele oto longo ehalo lyaJehova nokukala to katuka metsokumwe nalyo, ohashi eta iizemo iiwanawelela. (Jes. 48:17, 18) Oshigwana shaKalunga oshiyapuki noshi na ombili, molwaashoka ohashi holele uukwatya we noye he shi longo.—Lev. 11:44; 1 Tim. 1:11.

8. Otu na okuninga shike, opo Jehova a tale ko omayambo getu omayapuki ngaashi gAaisraeli?

⁸ Jehova okwa li a tala ko omayambo ngoka Aaisraeli ya li haye mu ningile ge li omayapuki. (Lev. 6:25; 7:1) Oshitya shOshihebeli shoka sha tolokwa “uuyapuki” otashi gandja edhiladhilo lyoshinima shi ikalekelwa, sha yooloka ko nenge sha yapulilwa Kalunga. Opo Jehova a taambe omayambo ngoka hatu mu pe, kage na okukala ge na edhilo lyuuyuni mbuka. Otu na okutonda ashihe shoka sha nyata. (Lesha 1 Johannes 2:15-17.) Onkee ano, ngele otwa hala okukala twa yogoka koshipala shaKalunga, otu na okuhenuka eendathano ewinayi nosho wo ookuume aawinayi. (Jes. 2:4; Eh. 18:4) Shika osha kwatela mo wo okukala itaatu tala iinima ya nyata nenge ya nika iihulo nokatu na okukala hatu yi dhiladhila.—Kol. 3:5, 6.

9. Omolwashike okukala nawa nayalwe ku li oshinima sha simana?

⁹ Paulus ote tu kumagidha ta ti: ‘Inamu dhimbwa okulonga uuwanawa nokukwathathana, oshoka omayambo ga tya ngeyi oga hokiwa kuKalunga.’ (Heb. 13:16) Onkee ano, okukala nawa nayalwe noku ya longela uuwanawa oku li eyambo lyo opala momeho gaJehova. Shoka ohashi ndhindhilikitha mo Aakriste yashili okukala tu na ko nasha nayalwe.—Joh. 13:34, 35; Kol. 1:10.

OMAYAMBO NGOKA TAGA SIMANEKITHA KALUNGA

10, 11. Jehova oha tala ko ngiini iilonga yetu yokuuvitha noyoku mu longela, naashoka oshi na oku tu guma ngiini?

¹⁰ Omukalo gumwe moka Aakriste tatu vulu okuningila yalwe uuwanawa ogwo “okuhempulula montaneho etegameno lyetu.” Mbela oho longitha okathimbo kehe to mono okuuvithila yalwe? Paulus okwa ti otwa pumbwa okuninga “omahambelelondjambo, nokutya, oshiyimati shomilungu ndhoka tadhi hempulula montaneho edhina [lyaKalunga].” (Heb. 10:23, NW; 13:15, NW; Hos. 14:2) Onawa tu kale hatu dhiladhila kutya ohatu longitha ethimbo noonkondo dhi thike peni mokutaandelitha onkundana ombwanawa yUukwaniilwa. Iitopolwa oyindji pOkugongala kwoPailonga oya nuninwa oku tu kwathela moku shi ninga. Ano iilonga yetu yomomapya nokugandja uunzapo wontukuluka oyi li “omahambelelondjambo” noyi li oshitopolwa shelongelokalunga lyetu noyi na okukala eyambo lyoopala lela. Nonando onkalo yakehe gumwe oya yooloka, ethimbo ndyoka hatu longitha miilonga yetu yokuuvitha olyo hali ulike kutya otwa lenga ekwatathano lyetu naKalunga.

¹¹ Jehova okwa tegelela Aakriste ya kale taye mu longele pauhandimwe nenge ye li ongundu. Ihatu dhimbulukwa we esiku lyEsabati nenge tu ye tu ka dhane iituthi kuJerusalem ngaashi Aaisraeli ya li haya ningi. Ihe nonando ongaaka, miituthi moka otatu ilongo mo oshindji. Kalunga okwa tegelela tu kale hatu imangulula kiilonga yetu yesiku nesiku tu leshe Ombiimbeli, tu galikane nokuya kokugongalo kehe kwopaKriste. Omutse gwuukwanegumbo kehe ogu na okukwatela komeho mEsiku lyElongelokalunga lyUukwanegumbo. (1 Tes. 5:17; Heb. 10:24, 25) Ngele tashi ya piilonga yetu yokulongela Kalunga, oshi li nawa twi ipule tatu ti: ‘Openi ndi na okuhwepopala?’

12. (a) Omatsinino ngoka ga li haga ningwa nale kAaisraeli otaga vulu okufaathanithwa nashike kunena? (b) Omagalikano getu otaga vulu ngiini okukala ga fa omatsinino?

¹² Omukwaniilwa David okwi imbi a ti: “[Jehova] taamba omagalikano gandje ngaashi omatsinino.” (Eps. 141:2) Dhiladhila kutya oho galikana lungapi nonokutya omagalikano goye oge na ongushu yi thike peni. Embo lyEhololo otali faathanitha “omagalikano gaantu yaKalunga” nomatsinino, molwaashoka oga fa ezimba lya nika nawa tali gundumuka ndyoka Jehova ha taamba. (Eh. 5:8) Omatsinino ngoka ga li haga ningwa motempeli yaJehova pethimbo lyAaisraeli oga li ge na okukala ga longekidhwa nawa. Okwa li he ga taamba owala uuna ga ningwa ngaashi a popya. (Eks. 30:34-37; Lev. 10:1, 2) Jehova ota ka taamba wo omagalikano getu ngele otatu ga galikana momukalo ngoka ta hokwa.

OHATU GANDJA NOHATU PEWA

13, 14. (a) Egongalo lyomuFilippi naEpafroditus oya li ya ningile Paulus shike, na Paulus okwa li u uvite ngiini? (b) Ongiini tatu vulu okulandula oshiholelwa shaEpafroditus noshegongalo lyomuFilippi?

¹³ Omayambidhidho gIilonga yomUuyuni Auhe ngoka hatu gandja kutya nduno omashona nenge ogendji otaga vulu okufaathanithwa nomayambo. (Mark. 12:41-44) Omimvo 2000 lwaampono dha ka pita egongalo lyomuFilippi olya li lya tumu Epafroditus kuRoma, opo a ka sile Paulus oshimpwiyu palutu. Epafroditus okwa li a pewa iimaliwa kegongalo a faalele Paulus. Shika hasho oshikando shotango egongalo ndyoka tali pe Paulus omilongelo. Olya li lye mu kwathele opo a gandje eitulomo kuukalele we, pehala lyokukala ti ipula noompumbwe dhe. Omagano ngoka Paulus okwa li e gi ithana shike? Okwa li e gi ithana “eyambo lyezimba lya nika nawa, lyo opala nolya hokiwa kuKalunga.” (Lesha Aafilippi 4:15-19.) Paulus nosho wo Jehova oya li ya pandula shili egongalo ndyoka.

¹⁴ Jehova oha pandula lela Omayambidhidho gIilonga yomUuyuni Auhe ngoka hatu gandja kunena. Oku uvaneka kutya ngele otatu pititha komeho iinima yUukwaniilwa monkalamwenyo yetu ote ke tu sila oshimpwiyu pambepo nopalutu.—Mat. 6:33; Luk. 6:38.

ULIKA OLUPANDU LWOYE

15. Tumbula iinima yimwe mbyoka hayi ku ningitha wu pandule Jehova.

¹⁵ Ngele otwa popi kutya omolwashike tu na okupandula Jehova, ethimbo otali ke tu pwila po. Otu na oku mu pandula esiku kehe sho e tu pa omwenyo nopwaahe na oku tu pula sha. Opo tu kale nomwenyo, ohe tu pe iikulya, oonguwo, omahala gokukala nosho wo ombepo ndjoka hatu fudhile mo. Kakele kaashono, otu na eitaalo netegameno lya kankamena kontseyo yashili. Onkee ano, oshi li nawa okukala hatu mu longele noku mu pa omahambelelondjambo omolwuuwanawa mboka e tu ningila.—Lesha Ehololo 4:11.

16. Ekuliloyambo lyaKristus oli na oku tu inyengitha tu ninge shike?

¹⁶ Oshitopolwa sha zi ko oshe tu kwathela tu mone kutya ekuliloyambo lyaKristus oli li omagano dhingi ngoka Kalunga a pa aantu. Shika otashi ulike kutya Kalunga oku tu hole shili. (1 Joh. 4:10) Oshike nduno tu na okuninga po? Paulus okwa ti: “Ohole yaKristus otayi tu pangele, sho twa dhimbulula kutya omuntu gumwe okwa sile aantu ayehe. . . . Okwa sile aantu ayehe, opo mboka ye na omwenyo kaaya ikalele we yo yene, ihe ya kalele nguka a si molwawo nokwa yumudhwa molwawo.” (2 Kor. 5:14, 15) Paulus okwa ti kutya ngele otwa pandula shoka Kalunga e tu ningila, otu na oku mu simaneka nosho wo Omwana. Shika ohatu shi ulike mokuvulika kuyo nomokukala twa hala okuuvitha nokuninga aantu aalongwa.—1 Tim. 2:3, 4; 1 Joh. 5:3.

17, 18. Yamwe oya ninga po shike opo ya gwedhe ko komahambelelondjambo ngoka haya pe Jehova? Gandja oshiholelwa.

¹⁷ Mbela oto vulu okugwedha ko komahambelelondjambo ngoka ho pe Jehova? Oohandimwe oyendji oye shi ninga, konima sho ya tedhatedha omauwanawa ngoka Jehova e ya ningila. Oyu unganeka ethimbo lyawo niilonga yawo nawa opo ya ninge oshindji miilonga yokuuvitha Uukwaniilwa nenge miilonga yilwe yethimbo lyu udha. Yalwe ohaya kutha wo uukwathelikokolindjila omwedhi gumwe nenge dhi vulithe po omvula kehe. Yalwe oye li aakokolindjila yondjigilile. Yamwe oye li miilonga yokutunga omatungo gehangano. Ndhika odho omikalo dha dhengambanda dhokuulika olupandu lwetu. Ngele iilonga mbika iiyapuki otatu yi longo nomutima aguhe, nena Kalunga ota ka kala e tu hokwa.

¹⁸ Aakriste oyendji oyu uvite ye na ongunga yokupandula Jehova. Gumwe gwomuyo omeme Morena ngoka a kala nokukonga omayamukulo ge na ko nasha niinima yopambepo mongeleka yaKatoolika moka a li nosho wo kaafilosofi yomuAsia. Ihe akuhe hoka ina mona ko nando omayamukulo ngoka a li a hala. Okwe ke ga mona owala sho a tameke okukonakona Ombiimbeli nOonzapo dhaJehova. Meme Morena okwa pandula Jehova omolwomayamukulo ga yela nawa gopaMbiimbeli ngoka a li a pewa. Shoka osha li she mu inyengitha a longithe oonkondo dhe mokulongela Jehova. Konima yokuninginithwa kwe okwa tameke okukala ha kutha uukwathelikokolindjila pandjigilile. Nziya sho onkalo ye ye shi pitike, okwa ningi omukokolindjila gwondjigilile. Shoka osha ningwa pwa pita oomvula 30 ngashingeyi, ihe oku li natango miilonga yethimbo lyu udha.

19. Ongiini to vulu okugwedha ko komayambo ngoka ho pe Jehova?

¹⁹ Kunena opu na aapiya yaJehova oyendji aadhiginini mboka oonkalo dhawo itaadhi ya pitike ya kokole ondjila. Ihe atuheni otatu vulu okupa Jehova omayambo gopambepo ngoka a hokwa, kutya nduno ohatu longo shi thike peni. Eihumbato lyetu oli na okukala metsokumwe nomithikampango dhOmbiimbeli nokukala tu shi kutya otu li aapiya yaJehova ethimbo alihe. Molwaashoka otu na eitaalo, otwi inekela lelalela kutya elalakano lyaKalunga otali ka gwanithwa. Ohatu taandelitha onkundana ombwanawa okupitila miilonga yetu yuudhiginini. Molwaashoka otu na olupandu lwa sheywa okupandula Jehova molwiinima ayihe mbyoka e tu ningila, ano natu tsikileni oku mu pa omayambo tatu shi ningi nomutima aguhe.

[Oohapu dha simana pepandja 25]

Mbela uuwanawa waJehova ohawu ku inyengitha wu gwedhe ko komahambelelondjambo goye?

[Ethano pepandja 23]

Mbela oho longitha ngaa ompito kehe to mono wu gandje uunzapo?