Natu longeleni Jehova neitulomo
“Kaleni nokudhiladhila iinima mbyoka. . .ya gwana okusimanekwa.”—FIL. 4:8.
1, 2. Oshike sha ningitha aantu oyendji muuyuni mbuka ya kale ye na etaloko lya nika uusama li na ko nasha nonkalamwenyo, naashika osha pendutha omapulo geni?
OTU LI muuyuni mbuka wu li methimbo edhigu noonkondo noliyemateka mondjokonona yaantu. Aantu mboka kaaye na ekwatathano ewanawa naJehova, itaya ka vula okuungaunga ‘nomathimbo ngaka omadhigu.’ (2 Tim. 3:1-5) Aantu mboka kaaye na ekwatathano ndyoka, kaye na ngoka he ya kwathele okukandula po omaupyakadhi gawo noihaya vulu oku ga kandula po kuyo yene. Oyendji ohaya kambadhala okukonga omainyanyudho galwe omape muuyuni opo kaaya kale tayi ipula unene noonkalo moka ye li.
2 Opo yu ungaunge nomaupyakadhi gonkalamwenyo, olundji ohaya pititha komeho omainyanyudho. Ngele Aakriste inaya kotoka, otaya vulu okutameka nuupu okuninga sha faathana. Ongiini tatu vulu okuyanda onkalo ndjoka? Mbela otashi ke tu pula tu yande omainyanyudho agehe? Ongiini tatu vulu okukala nondjele momainyanyudho nosho wo miinakugwanithwa? Omakotampango gopamanyolo geni ge na oku tu wilika, opo nonando otu hole unene iinima mbyoka ya simana monkalamwenyo, tu kale tu yi hole shi li pandjele?
Gandja eitulomo kiinima mbyoka ya simana muuyuni moka mu na aantu ye hole omainyanyudho
3, 4. Omanyolo ohage tu kwathele ngiini tu gandje eitulomo kiinima mbyoka ya simana?
3 Oshi iwetikile kutya uuyuni mbuka owu hole unene “olundundu.” (2 Tim. 3:4) Okukala kwawo wu hole owala omainyanyudho otaku vulu okutula uupambepo wetu moshiponga, ngele natse otwa kala owala tatu ga lalakanene. (Omayel. 21:17) Onkee ano, omuyapostoli Paulus okwa li e na etompelo ewanawa sho a gandja omayele ge na ko nasha nokugandja eitulomo kiinima mbyoka ya simana moontumwafo ndhoka a nyolele Timoteus naTitus. Okutula miilonga omayele ngoka otaku ke tu kwathela kaatu nwethwe mo ketaloko lya nika uusama lyuuyuni li na ko nasha nonkalamwenyo.—Lesha 1 Timoteus 2:1, 2; Titus 2:2-8.
4 Omathelemimvo ga tetekele, Salomo okwa li a nyola shi na ko nasha nuuwanawa mboka hawu zi mokukala inoo pititha komeho omainyanyudho. (Omuuv. 3:4; 7:2-4) Molwaashoka onkalamwenyo ofupi shili, otwa pumbwa ‘okukondja’ opo tu ka hupithwe. (Luk. 13:24) Opo shoka shi ningwe, otwa pumbwa okukala hatu konakona iinima ayihe mbyoka ya “gwana okusimanekwa.” (Fil. 4:8, 9) Shoka otashi ti kutya otu na okugandja eitulomo kukehe shimwe sha kwatelwa mokukala Omukriste.
5. Ombinga yimwe yini tu na okukala twa tala ko ya simana monkalamwenyo yetu?
5 Pashiholelwa, mokuholela Jehova naJesus, Aakriste ohaya gwanitha po oshinakugwanithwa shawo neitulomo nonuudhiginini. (Joh. 5:17) Oshizemo, olundji aantu ohaye ya pandula molwaashoka ye li aalongi aadhiginini mboka ye shi okwiinekelwa. Omitse dhomaukwanegumbo odho unene hadhi longo nuudhigini opo dhi ambidhidhe omaukwanegumbo gadho. Dhoshili, okwaahasila oshimpwiyu oompumbwe dhopalutu dhuukwanegumbo woye okwa faathana ‘nokwiidhimbika eitaalo.’—1 Tim.5:8.
Okulongela Kalunga kwetu oshinima sha kwata miiti, ihe ohashi nyanyudha
6. Otu shi shi ngiini kutya otu na okulongela Jehova neitulomo?
6 Jehova okwe shi tala ko aluhe sha simana tu mu longele momukalo gu uka. Pashiholelwa, pampango yaMoses, Aaisraeli oya li ya mono iilanduliko ya kwata miiti sho ye etha po okulongela Jehova. (Jos. 23:12, 13) Methelemumvo lyotango, aalanduli yaKristus oya li ya pumbwa okukondja ya mana mo opo ya kaleke elongelokalunga lyashili kaali na omalongo ga yonuka nokaali na iikala iiwinayi. (2 Joh. 7-11; Eh. 2:14-16) Kunena, Aakriste yashili otaya tsikile okulongela Kalunga neitulomo.—1 Tim. 6:20.
7. Paulus okwa li i ilongekidhile ngiini uukalele we?
7 Uukalele wetu ohawu tu etele enyanyu. Ihe opo tu wu nyanyukilwe, otwa pumbwa okukala hatu dhiladhila twa mana mo shi na ko nasha nawo nokwiilongekidha manga inaatu ya muwo. Paulus okwa li a yelitha nkene a li a kaleke momadhiladhilo aantu mboka a li a longo. Okwa li a nyola a ti: “Onda ningi ashihe shoka tandi shi vulu omolwaayehe, opo ndi hupithe yamwe yomuyo komukalo kehe tagu vulika. Ayihe mbika otandi yi ningi omolwevaangeli, opo nangame wo ndi mone omayambeko ngoka taga zi mulyo.” (1 Kor. 9:22, 23) Paulus okwa li ha nyanyukilwa okukwathela yalwe pambepo nokwa li ha gandja eitulomo kunkene ta vulu okugwanitha po oompumbwe dhokondandalunde dhaapulakeni ye. Kungawo, okwa li a vulu oku ya ladhipika ya longele Jehova.
8. (a) Otu na okukala tu na iikala ya tya ngiini shi na ko nasha naantu mboka hatu longo muukalele? (b) Ongiini okuninga ekonakonombiimbeli taku vulu oku tu etela enyanyu muukalele?
8 Paulus okwa li a lenga shi thike peni uukalele we? Okwa li e na ehalo okukala “omupika” gwaJehova nogwaamboka ya li taya ka pulakena etumwalaka lyoshili. (Rom. 12:11; 1 Kor. 9:19) Ngele tatu longo aantu Oohapu dhaKalunga, kutya nduno opekonakonombiimbeli, opokugongala kwopaKriste nenge opEkonakono lyUukwanegumbo, mbela ohatu shi tala ko ngaa shi li oshinakugwanithwa sha kwata miiti? Otashi vulika tu kale tu uvite kutya okuninga ekonakonombiimbeli pandjigilile oku li unene omutengi kutse. Dhoshili, olundji ohashi tu pula tu longithe po ethimbo lyiinima yetu yopaumwene mokukwathela yalwe. Ihe mbela shika kashi li metsokumwe noohapu dhaJesus kutya “okugandja oku na elago ku vule okutaamba”? (Iil. 20:35) Okulonga yalwe paumwene ondjila ndjoka tayi fala kehupitho otaku ke tu etela enyanyu ndyoka itaali vulu okweetwa kiilonga yilwe.
9, 10. (a) Mbela okukala twi itula mo otaku ti kutya katu na okukala hatu thuwa po nohatu nyanyukilwa pamwe naantu? Shi yelitha. (b) Oshike tashi ka kwathela omukuluntugongalo a kale eladhipiko kuyalwe noku shi okupopiwa naye nuupu?
9 Okukala twi itula mo itashi ti kutya itatu vulu okuthuwa po nokukala hatu nyanyukilwa pamwe naantu. Jesus okwe tu tulila po oshiholelwa sha gwanenena shokwaaha longitha owala ethimbo lyetu mokuuvitha, ihe omokuthuwa po wo nokukala tu na ekwatathano ewanawa nayalwe. (Luk. 5:27-29; Joh. 12:1, 2) Okukala twi itula mo itashi ti wo kutya otu na aluhe okukala tu na iipala ya lula. Ando Jesus ka li omunambili, ando aantu inaya nanenwa kuye. Nokuli naanona oya li haya kala ya manguluka okukala puye. (Mark. 10:13-16) Ongiini tatu vulu okuholela omukalo gwaJesus gu li pandjele?
10 Omumwatate gumwe okwa popi shi na ko nasha nomukuluntugongalo a ti: “Oha kala a hala a ninge oshindji, ihe iha kala nando a tegelela yalwe ya ninge iinima momukalo gwa gwanenena.” Mbela nangoye osho wu li ngawo? Oshu uka okukala wa tegelela yalwe ya longe shi li pandjele. Pashiholelwa, aanona ohayi inyenge nawa uuna aavali yawo taye ya tulile po omalalakano ge li pandjele noku ya kwathela ye ga adhe. Sha faathana, aakuluntugongalo otaya vulu okuladhipika oohandimwe megongalo ya hume komeho pambepo noku ya pa omaetopo gokondandalunde nkene ye na oku shi ninga. Kakele kaashono, uuna omukuluntugongalo e na etaloko ewanawa shi na ko nasha naye mwene, ota ka kala eladhipiko ewanawa notashi ka kala oshipu kuyalwe ya popye naye. (Rom. 12:3) Omumwameme gumwe okwa ti: “Kandi hole omukuluntugongalo ha tala ko kehe shimwe sha fa omashendjo. Ihe ngele oha kala aluhe a lulika oshipala, otashi ka kala oshidhigu okupopya naye.” Gulwe okwa ti kutya aakuluntugongalo yamwe “ihashi kala oshipu okupopya nayo molwaashoka ohaya kala unene ya lulika iipala.” Aakuluntugongalo itaya ka kala nando ya hala okuningitha yalwe kaaya kale ye na etaloko ewanawa ndyoka ooitaali ayehe ye na okukala ye na mokulongela kwawo Jehova ngoka e li “Kalunga omunelago.”—1 Tim.1:11, OB-1954.
Okukala noshinakugwanithwa megongalo
11. ‘Okulalakanena iinakugwanithwa’ megongalo osha hala okutya shike?
11 Sho Paulus a li a ladhipike aalumentu megongalo ya lalakanene iinakugwanithwa iinene, elalakano lye kalya li oku ya ladhipika ya gwanithe po omahalo gawo gokwiihola mwene. Pehala lyaashono, okwa nyola a ti: ‘Omulumentu ngoka a hala okulalakanena uukuluntugongalo megongalo lyaKalunga, oye okwa hala oshilonga oshiwanawa lela.’ (1 Tim. 3:1, 4, yelekanitha NW.) Uutumbulilo ‘okulalakanena iinakugwanithwa’ megongalo otawu ti kutya omulumentu Omukriste oku na okukala a halelela okulonga nuudhiginini opo a kale e na omaukwatya gopambepo ngoka ga pumbiwa mokuyakula aamwahe. Ngele omumwatate okwa ninginithwa uule womvula yimwe lwaampono nokwa gwanitha po iitegelelwa yopamanyolo yi na ko nasha nokuninga omuyakuligongalo mbyoka ya popiwa muTimoteus gwotango 3:8-13, ota vulu okulangekwa po e li omuyakuligongalo. Ndhindhilika kutya ovelise 8 otayi popi kondandalunde tayi ti: ‘Aayakuli yegongalo oye na okukala haya [tala ko iinima sha kwata miiti].’—Yelekanitha NW.
12, 13. Hokolola omikalo moka aamwatate aagundjuka taya vulu okulalakanena iinakugwanithwa.
12 Mbela owu li omumwatate omugundjuka a ninginithwa u li pokugwanitha oomvula 20 ngoka a tala ko okulongela Jehova oshinima sha simana? Oto vulu okulalakanena okukala wa gwana okupewa iinakugwanithwa momikalo dhi ili nodhi ili. Omukalo gumwe ogwo okuhwepopaleka okukutha ombinga kwoye muukalele. Mbela oho nyanyukilwa okulonga pamwe naamwatate yomapipi agehe muukalele? Mbela oto kambadhala okumona omuntu ngoka to vulu okukala ho konakona naye Ombiimbeli. Uuna to ningi ekonakonombiimbeli wi ikolelela komaetopo ngoka haga gandjwa pokungola kwopaKriste, oto ka hwepopaleka uunkulungu woye wokulonga. Kakele kaashono, oto ki ilonga okukala wu na olukeno naangoka ti ilongo kombinga yaJehova. Sho ngoka ho konakona naye ta tameke okumona kutya osha pumbiwa okuninga omalunduluko monkalamwenyo ye, oto ki ilonga neidhidhimiko nonuukeka oku mu kwathela a tule miilonga omakotampango gOmbiimbeli.
13 Ne aamwatate aagundjuka otamu vulu okukala mu na ehalo okukwathela aakokele megongalo momukalo kehe tamu vulu. Otamu vulu okuulika wo kutya omu na ohokwe mokukwathela okwoopaleka Oshinyanga shUukwaniilwa shi kale tashi monika nawa. Uuna tamu kwathele momukalo kehe tamu vulu, ehalo lyeni lyokukwathela otali ku ulika kutya omwa halelela okugwanitha po uukalele weni. Otamu vulu okwiilonga okutonatela oompumbwe dhegongalo tashi zi komutima ngaashi Timoteus.—Lesha Aafilippi 2:19-22.
14. Ongiini aamwatate aagundjuka taya vulu “okukonakonwa” ngele otaya vulu okuyakula megongalo?
14 Aakuluntugongalo, kaleni hamu longo naamwatate aagundjuka mboka taya lalakanene ‘okuyanda uuhalu womuugundjuka’ notaya lalakanene “uuyuuki, eitaalo, ohole nombili” noye na omaukwatya galwe omawanawa. (2 Tim. 2:22) Ngele taya pewa iilonga megongalo, otaya vulu “okukonakonwa” ngele otaya vulu okuhumbata iinakugwanithwa opo ‘okuhuma komeho kwawo ku monike kwaayehe.’—1 Tim. 3:10; 4:15.
Ulika kutya oto longele Jehova neitulomo megongalo nomuukwanegumbo
15. PaTimoteus gwotango 5:1, 2, ongiini tatu vulu okuulika kutya ohatu tala ko yalwe twi itula mo?
15 Okulongela Jehova twi itula mo okwa kwatela mo okukala twa simaneka aamwameme naamwatate. Paulus momayele ge ngoka a pa Timoteus okwa popi kutya osha pumbiwa okutala ko yalwe nesimaneko. (Lesha 1 Timoteus 5:1, 2.) Shoka osha simana unene tuu ngele tatu ungaunga naamboka yuukashike kookantu wi ili. Oshiholelwa shaJob shokusimaneka aakiintu, unene tuu kuume ke kopandjokana, osha gwana okuholelwa. Okwa li a ningi oonkambadhala dha mana mo kaa tale omukiintu gulwe nokahalu. (Job 31:1) Okukala twa simaneka aamwameme naamwatate otaku ke tu ningitha kaatu dhane nomaiyuvo gawo nenge kaatu ninge oshinima shoka tashi vulu oku ya ningitha kaaya kale ya manguluka ngele ye li natse. Okusimaneka yalwe okwa simanenena unene tuu ngele aantu yaali taye endelathana nelalakano lyondjokana. Omukriste i itula mo miinima yopambepo ita ka dhana nando nomaiyuvo gagumwe gwuukashike ko okantu wi ili.—Omayel. 12:22.
16. Popya eyooloko nkene yamwe muuyuni ya tala ko onkandangala ndjoka omusamane e na aanona ta dhana nonkene Ombiimbeli tayi hokolola oshinakugwanithwa she.
16 Otwa pumbwa wo okukala hatu gwanitha po nuudhiginini iinakugwanithwa mbyoka twa pewa kuKalunga muukwanegumbo. Uuyuni waSatana ohawu sheke oshinakugwanithwa shomusamane e na aanona. Omainyanyudho otaga ningitha omitse dhomaukwanegumbo dhi monike dha fa ihaadhi gwanitha po iinakugwanithwa yadho. Ihe nonando ongaaka, Omanyolo otaga tsu unene omuthindo oshinakugwanithwa shomusamane, moku mu popya kutya oye “omutse gwomukulukadhi.”—Ef. 5:23; 1 Kor. 11:3.
17. Yelitha nkene okukutha ombinga kwetu mekonakono lyuukwanegumbo taku vulu okuulika kutya otwa halelela okugwanitha po iinakugwanitha yetu.
17 Omusamane otashi vulika a kale ha sile oshimpwiyu uukwanegumbo we palutu. Ihe ngele ihe wu sile oshimpwiyu pambepo, ote ku ulika kutya ke na ko nasha nawo noke na uunongo. (Deut. 6:6, 7) Kungawo, Timoteus gwotango 3:4, okwa ti kutya ngele owu li omutse gwuukwanegumbo noto lalakanene iinakugwanithwa ya gwedhwa po megongalo, owu na okukala omulumentu ngoka ‘e shi okukala nawa naanegumbo lye, noku shi okuputudha oyana, ya kale ye na esimaneko.’ Ipula shi na ko nasha naashika: ‘Mbela ohandi tula po ethimbo lyekonakono lyuukwanegumbo wandje?’ Aakulukadhi yalwe oye na okulilila nesimaneko aasamane yawo ya kwatele uukwanegumbo komeho pambepo. Omusamane kehe oku na okutala ko oshinakugwanithwa she a mana mo. Dhoshili, omukulukadhi Omukriste oku na okukala ha ambidhidha elongekidho lyEkonakono lyUukwanegumbo nokulongela kumwe nomusamane gwe moku li ninga tali pondola.
18. Ongiini aanona taya vulu okuukitha eitulomo kiinima mbyoka ya simanenena monakuyiwa?
18 Aanona ohaya ladhipikwa wo yu ukithe eitulomo kiinima mbyoka ya simanenena monkalamwenyo. (Omuuv. 12:1) Itashi ke etela aanona uupyakadhi ngele to ya longo okulonga nuudhiginini, mokukala yi ipyakidhila niilonga yomegumbo mbyoka ye eleka oomvula dhawo nokuvula kwawo. (Oontak. 3:27) Sho omukwaniilwa David a li natango omumati omugundjuka, okwa li i ilongo okukala omusita gwiimuna omwaanawa. Okwa li wo i ilongo okukala omwiimbi gwoomusika nomutoti gwadho, sha hala okutya, e na uunkulungu mboka we mu ningitha a kale ha longele omupangeli gwaIsraeli. (1 Sam. 16:11, 12, 18-21) Kapu na omalimbililo kutya David sho a li okamatyona okwa li e shi okuhika okaharpa, ihe okwa li wo i ilongo uunkulungu wiinima yilwe ya simana mbyoka a ka longitha konima yethimbo okusimaneka Jehova. Uunkulungu we e li omusita gwiimuna owa li we mu kwathele okuwilika neidhidhimiko oshigwana shaIsraeli. Ne aagundjuka, omu na uunkulungu wuni mboka tawu ke mu kwathela okulongela Omushiti gweni noku mu kwathela mu ilongekidhile iinakugwanithwa yomonakuyiwa?
Natu kale tu na etaloko li li pandjele
19, 20. Owa tokola toko okukala wu na etaloko li li pandjele lini li na ko nasha nangoye mwene nosho wo nokulongela Kalunga kwoye?
19 Otatu vulu wo okulalakanena okukala tu na etaloko li li pandjele li na ko nasha natse yene, sha hala okutya, ihaatu kala tu na iipala ya lula. Inatu hala tu kale ‘aayuuki unene.’ (Omuuv. 7:16) Okukala wu na oshipala sha lula unene otaku vulu okuningitha yalwe ya kale ye ku tila, kutya nduno okiilonga nenge omokuungaunga naamwatate naamwameme. Iilyo yuukwanegumb otayi ka kala ya kotokela okugandja uusama sha pitilila opo kaayi yone po ombili megumbo. Megongalo, ayehe otaya vulu okwiilonga okuyola pamwe nokunyanyukwa pamwe, mokukaleka omukalo gwetu gwoonkundathana nogwokulonga yalwe tagu tungu nomwaanawa.—2 Kor. 13:10; Ef. 4:29.
20 Otu li muuyuni mboka ihaawu simaneke iipango yaJehova. Mepingathano naashoka, aapiya yaJehova oye na ko nasha unene nokuvulika kuJehova nokukala aadhiginini kuye. Ihashi nyanyudha tuu okukala hatu endathana naantu mboka taya longele Jehova ‘neitulomo’! Natu kale twa tokola toko okukala hatu gandja eitulomo kiinima mbyoka ya simanenena monkalamwenyo yetu melongelokalunga lyetu.
Oto yamukula ngiini?
• Omolwashike tu na okukondjitha etaloko lyuuyuni lya nika uusama lyokutala ko onkalamwenyo?
• Ongiini to vulu okukala wa nyanyukwa muukalele, ihe haku kala wu na oshipala sha lula?
• Ongiini etaloko lyetu li na ko nasha nokugwanitha po iinakugwanithwa yetu tali ulike kutya otwi itula mo nenge hasho?
• Yelitha kutya omolwashike okusimaneka aamwatate niilyo yuukwanegumbo shi li oshinima sha kwata miiti.
[Omathano pepandja 16]
Omusamane oku na okukala ha sile oshimpwiyu uukwanegumbo we palutu nopambepo