Natu landuleni Kristus, Omuwiliki a gwanenena
MBOKA haya landula aapangeli yopantu olundji ohaya yematekwa. Ihe mboka haya vulika kewiliko lyaKristus ihaya yematekwa. Jesus okwa ti: “Ileni kungame amuhe mwa vulwa nomwa humbatekwa uudhigu, ongame notandi mú pe evululuko. Itsikeni ondjoko yandje, ne mu tseye ndje, oshoka ongame omunambili nomomutima ondi ishonopeka; notamu imonene evululuko.” (Mat. 11:28, 29) Ewiliko lyaKristus otali talaleke. Okwa hokwa oohepele naadhinwa noteya hiya yi itsike omutengi gwe omupu. Ihe mbela oshike sha kwatelwa mo mokulandula ewiliko lyaKristus?
Omuyapostoli Petrus okwa nyola a ti, “Kristus wo okwa hepekwa omolweni nokwe mú thigile oshiholelwa, opo mu landule ondjila ndjoka a li e yi ende.” (1 Pet. 2:21) Osha simana shi thike peni okulandula oshinkoti shaJesus? Dhiladhila ando owu li mongundu ndjoka yi na okutaakana mehala mu na oomboma, ihe gumwe owala gwomune e shi kutya ota piti mo ngiini inaa ehamekwa. Mbela ito ka landula omuntu ngoka lela, tashi vulika nokuli wu ende moompadhi dhe? Sha faathana, egameno lyetu lyomonakuyiwa olyi ikolelela kokuholela oshiholelwa shaKristus. Okuninga ngaaka okwa kwatela mo okupulakena nokuvulika kuye nosho wo okulongela kumwe naakalelipo ye.
Pulakena e to vulika
Lwopehulilo lyeuvitho lye lyokOndundu, Jesus okwa li a popi a ti: “Kehe tuu ngoka tu uvu oohapu ndhika dhandje nota vulika kudho, oye ota yelekwa nomulumentu omunandunge a tungile ongulu ye kemanya. Omvula oya loko, efundja lye ya, noombepo odha pepe dhi itsu mongulu ndjoka, ihe inayi kumuka po, oshoka ekankameno lyayo olya li kemanya.”—Mat. 7:24, 25.
Kungawo, Jesus okwa li a popi omulumentu ngoka ha pulakene kuye nokuvulika kuye e li “omunandunge.” Mbela ohatu ulike ngaa tashi zi komutima kutya otwa simaneka notwa lenga oshiholelwa shaJesus Kristus, nenge otu na egamo lyokuhogolola miipango ye mbyoka tu wete iipu nenge yi li nawa okuvulika kuyo? Jesus okwa ti: ‘Ngame otandi longo aluhe shoka sho opalela Kalunga.’ (Joh. 8:29.) Natu kambadhaleni tu holele oshiholelwa shoka.
Methelemumvo lyotango, aayapostoli oya li ya tula po oshiholelwa oshiwanawa shokuvulika kewiliko lyaKristus. Pompito yimwe, Petrus okwa li a lombwele Jesus a ti: “Tala, otse otwa thigi po ayihe e tatu ku landula.” (Mark. 10:28) Dhoshili, aayapostoli oya li ya tala ko ewiliko lyaJesus lyi li lya simana lela nomolwaashoka ya li ya thigi po iinima yilwe nehalo ewanawa ye mu landule.—Mat. 4:18-22.
Longela kumwe naakalelipo yaKristus
Okathimbo okafupi manga inaa sa, Jesus okwa li a tumbula omukalo gulwe moka tatu vulu okulandula ewiliko lye. Okwa popi a ti: “Ngoka ta taamba kehe gumwe ngoka tandi mu tumu, oye ota taamba ndje.” (Joh. 13:20) Dhoshili, Jesus okwa li a popi kombinga yaakalelipo ye aagwayekwa ye li ‘aamwahe’. (Mat. 25:40) Konima sho Jesus a yumudhilwa okuya megulu, ‘aamwahe’ oya li ya langekwa po ya longe peha lye, ye li ‘aatumwa peha lyaKristus’ taya hiya yalwe ya hangane naJehova Kalunga. (2 Kor. 5:18-20) Okutaamba ko ewiliko lyaKristus okwa kwatela mo okuvulika ‘kaamwahe.’
Oshi li nawa ngele tatu konakona nkene hatu taamba ko omayele gopamanyolo ngoka ga gandjwa miileshomwa yetu yopaMbiimbeli. Mokukonakona Omanyolo nomokuya kokugongala, ohatu dhimbulukithwa shoka Jesus a popya. (2 Pet. 3:1, 2) Ohatu ulike olupandu lwetu talu zi komutima omolwiikulya yopambepo moku yi lya esiku kehe. Mbela otu na okwiinyenga ngiini ngele omayele gontumba ohaga endululwa lwiikando? Pashiholelwa, Oohapu dhaKalunga otadhi gandja omayele kAakriste ya hokane “owala mOmuwa.” (1 Kor. 7:39, NW) Oshikundathanwa shika osha kala nokukundathanwa ethimbo nethimbo mOshungolangelo muule woomvula dhi vulithe pethele limwe. Aamwahe yaKristus ohaya ulike pahole kutya oye na ko nasha nuupambepo wetu mokunyanyangidha iitopolwa kombinga yoshinima shika nomayele gamwe ga nwetha mo. Okupulakena komadhimbulikitho ngaka oshi li omukalo gumwe gwokuulika kutya otatu landula Omuwiliki gwetu a gwanenena, Jesus Kristus.
Omayeletumbulo 4:18 otaga ti: “Ondjila yaayuuki oya fa uuyelele weluwa tali tende, mboka tau yele sigo kwa shi.” Eeno, ewiliko lyaJesus otali tsikile aluhe. Omukalo gulwe ishewe moka tatu vulu okulongela kumwe ‘naamwahe’ yaKristus ogwo okukala tu na iikala iiwanawa uuna tashi ya puuyelele mboka wa pupalekwa wu na ko nasha neuveko lyoshili lyopamanyolo mboka hawu nyanyangidhwa ‘komupiya omudhidhiginini nomunandunge.’—Mat. 24:45, KB.
Ohatu ulike wo kutya ohatu vulika ‘kaamwahe’ yaKristus mokulongela kumwe naakuluntugongalo ya langekwa po megongalo lyopaKriste. Omuyapostoli Paulus okwa ti: “Vulikeni kaawiliki yeni, [ne] mu landule omalombwelo gawo. Oyo ohaa tonatele oomwenyo dheni.” (Heb. 13:17) Pashiholelwa, omukuluntugongalo otashi vulika e tu ladhipike kombinga ya nkene sha simana okukala nEkonakono lyUukwanegumbo lyokongulohi ihaali faula nenge tashi vulika a gandje omaetopo kombinga yoshinima shontumba shoka sha pamba uukalele wetu. Omutonateli omweendi otashi vulika e tu pe omayele taga kwatha gopamanyolo ge na ko nasha noshinima shokondandalunde shoka sha pamba okukalamwenyo kwOmukriste. Okutula kwetu miilonga omayele ngoka nehalo ewanawa, otatu ulike kutya ohatu landula Jesus e li Omuwiliki gwetu.
Uuyuni owa pumbwa noonkondo ewiliko ndyoka ta li vulu okupondola. Ihe okulandula ewiliko lyaKristus lyopahole itaku eta tuu epepelelo! Natu ningeni ngaashi tatu vulu tu vulike kOmuwiliki gwetu nokulongela kumwe naamboka ta longitha kunena.
[Omathano pepandja 27]
Mbela oho taamba ko ngaa omayele ge na ko nasha nokwaaha humbata ondjoko naakaaneitaalo?