Endeni ngaashi Jesus Kristus a li he ende

“Oongoka ta ti, oye a kala [muKalunga], noye mwene e na okweenda ngaashi oye [Jesus] kwa li he ende.”—1 JOHANNES 2:6, OB-1954.

1, 2. Oshike sha kwatelwa mokutala kuJesus?

OMUYAPOSTOLI Paulus okwa nyola a ti: “Natu matukeni twa mana mo methigathano ndyoka li li komeho getu. Tu taleni kuJesus [omutameki nomugwanithi gweitaalo, OB-1954].” (Aahebeli 12:1, 2) Okulandula ondjila yuudhiginini otashi pula tu taleni kuJesus Kristus.

² Oshitya shelaka lyopetameko ‘okutala’ ngaashi sha longithwa mOmanyolo gopaKriste gOshigreka, otashi ti “okuukitha eitulomo lyoye kusha nopwaahe na okupiyaganekwa,” “okweetha okutala koshinima shontumba ngoye u tale kushilwe,” “okutala sha to shi tongolola.” Embo limwe lyomauyelele olya ti: “Shampa owala omumatuki Omugreka mokapale e etha okugandja eitulomo kethigathanopo nosho wo kelalakano lye kutya omolwashike ta matuka, e ta punguluka a tale kongundu yaatali, ondapo ye ohayi shuna pevi. Osha faathana owala nOmukriste.” Omapiyaganeko otaga vulu okuya moshipala ehumokomeho lyetu lyopambepo. Otu na okutala kuJesus Kristus. Nomolwashike tatu tala kOmutameki gweitaalo? Oshitya shOshigreka shoka sha tolokwa “omutameki” otashi ti “omuwiliki omunene ngoka ta wilike moshinima kehe nokungawo ota gandja oshiholelwa.” Okutala kuJesus otashi pula okulandula oshiholelwa she.

3, 4. (a) Okweenda ngaashi Jesus Kristus a li he ende otashi tu pula shike? (b) Omapulo geni tu na okwiipula?

³ Ombiimbeli otayi ti: “Oongoka ta ti, oye a kala [muKalunga], noye mwene e na okweenda ngaashi oye [Jesus] kwa li he ende.” (1 Johannes 2:6, OB-1954) Otu na okukala twa hangana naKalunga moku dhiginina iipango yaJesus ngaashi ye a li a dhiginine mbyoka yaHe.—Johannes 15:10.

⁴ Onkee ano, okweenda ngaashi Jesus a li he ende otashi pula tu tale kuye e li Omuwiliki Omunene mokulandula oonkatu dhe thiluthilu. Omapulo ga simana ngoka tu na okwiipula moshinima shika ogo ngaka kutya: Ongiini Kristus te tu wilike kunena? Okuholela omukalo ngoka a li he ende oshi na oku tu guma ngiini? Uuwanawa washike tau zi mokudhiginina oshiholelwa shoka sha tulwa po kuJesus Kristus?

Nkene Kristus ha wilike aalanduli ye

5. Manga Jesus inaa londa megulu, okwa li u uvanekele aalanduli ye shike?

⁵ Manga inaa londa megulu, omuyumudhwa Jesus Kristus okwa li a holokele aalongwa ye nokwe ya pe oshilonga sha simana. Okwa ti: “Indeni ano, ka ningeni aantu [yomiigwana ayihe, NW] aalongwa yandje.” Pompito oyo tuu ndjoka Omuwiliki Omunene oku uvaneke wo okukala pamwe nayo sho taya gwanitha po oshinakugwanithwa shika, ta ti: “Ihe ngame otandi kala pamwe nane omasiku agehe sigo ehulilo lyuuyuni.” (Mateus 28:19, 20) Ongiini Jesus Kristus e li pamwe naalanduli ye pethimbo ndika lyehulilo lyonkalelo yiinima?

6, 7. Ongiini Jesus he tu wilike okupitila mombepo ondjapuki?

⁶ Jesus okwa ti: “Ihe Omupopili Ombepo Ondjapuki, ngoka Tate te ke mu tuma medhina lyandje, oye ote ke mú longa iinima ayihe, note ke mú dhimbulutha iinima ayihe mbyoka nde yi mú lombwela.” (Johannes 14:26) Ombepo ondjapuki ya tumwa medhina lyaJesus, ohayi tu ukitha noku tu koleka kunena. Ohayi tu pe uuyelele wopambepo noku tu kwathela okuuva ko iinima ‘yomuule womadhiladhilo gaKalunga.’ (1 Aakorinto 2:10) Kakele kaashono, omaukwatya gopakalunga ngaashi “ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko neikwato nawa” ogo “iiyimati yOmbepo.” (Aagalati 5:22, 23) Kekwatho lyombepo ondjapuki, otatu vulu okukokeka omaukwatya ngoka.

⁷ Ngele tatu konakona Omanyolo nokukambadhala okutula miilonga shoka tatu ilongo, ombepo yaJehova otayi ke tu kwathela opo tu koke muunongo, moondunge dhokuyoolola, meuvoko, montseyo, mokuninga omatokolo nomokudhiladhila kwetu. (Omayeletumbulo 2:1-11) Ombepo ondjapuki otayi tu kwathele wo opo tu idhidhimikile omamakelo nomahepeko. (1 Aakorinto 10:13; 2 Aakorinto 4:7; Aafilippi 4:13, OB-1954) Aakriste otaya kumagidhwa yi ‘iyoge shaa shoka tashi nyateke olutu nenge omwenyo, nokulalakanena wo okukala aayapuki.’ (2 Aakorinto 7:1) Mbela otatu vulu ngaa shili okukala metsokumwe noshitegelelwa shaKalunga shi na ko nasha nuuyapuki nenge uuyogoki nopwaahe na ekwatho lyombepo ondjapuki? Omukalo gumwe ngoka Jesus ha longitha oku tu wilika kunena, ogwo okupitila mombepo ondjapuki ndjoka Jehova Kalunga a pe Omwana uuthemba oku yi longitha.—Mateus 28:18.

8, 9. Ongiini Kristus ha longitha “omupiya omudhiginini nomunandunge” opo a gandje ewiliko?

⁸ Tala komukalo gulwe ngoka natango Kristus ha wilike nago egongalo lye lyopaKriste kunena. Metyokosha lyokukala po kwe nolyehulilo lyonkalelo yiinima, Jesus okwa ti: “Olye ano omumati omwiinekelwa nomunandunge [“omupiya omudhiginini nomunandunge,” KB]? Oye ngoka, omuwa gwe sho e mu pe, a tonatele aamati ooyakwawo, e ya pe iikulya pethimbo lyayo. Omumati omunelago oye ngoka, omuwa gwe ngele te ya, te mu adha ta ningi ngaaka. Ongame tandi mú lombwele: Omuwa gwe ote mu pe etonatelo lyiinima ye ayihe.”—Mateus 24:3, 45-47.

⁹ “Omuwa” oJesus Kristus. “Omupiya” ongundu yAakriste aagwayekwa kombanda yevi. Ongundu yomupiya oyi inekelelwa okutonatela iinima yaJesus yokombanda yevi nokugandja iikulya yopambepo pethimbo lyayo. Ongundu onshona yaatonateli ya pyokoka ya za mongundu ‘yomupiya omudhiginini nomunandunge’ oya ninga po Olutuwiliki lu li ngaashi omukalelipo gwongundu yomupiya. Ohaya kwatele komeho iilonga yokuuvitha Uukwaniilwa muuyuni auhe nokugandja oondja dhopambepo pethimbo lyo opala. Onkee ano Kristus oha wilike egongalo lye lyopaKriste okupitila ‘momupiya omudhiginini nomunandunge’ a gwayekwa nombepo nOlutuwiliki lwe.

10. Iikala yetu oyi na okukala ngiini shi na ko nasha naakuluntugongalo, nomolwashike?

¹⁰ Natango euliko limwe lyewiliko lyaKristus olyo “omagano ge li aantu”—aakuluntugongalo nenge aatonateli Aakriste. Oya gandjwa nelalakano ya “longekidhile aantu yaKalunga ayehe oshilonga sheyakulo lyopakriste, okutunga olutu lwaKristus.” (Aaefeso 4:8, 11, 12, yelekanitha NW.) Shi na ko nasha nayo, Aahebeli 13:7 otaya ti: “Dhimbulukweni aawiliki yeni mboka ye mú uvithile oohapu dhaKalunga. Dhiladhileni, nkene ya li ya kala nonkene ya hulitha oondjenda dhawo, ne mu holele eitaalo lyawo.” Aakuluntugongalo oyo haya wilike megongalo. Molwaashoka otaya holele Kristus Jesus, eitaalo lyawo olya gwana okuholelwa. (1 Aakorinto 11:1) Otatu vulu okuulika olupandu lwetu sho pu na elongekidho lyaakuluntugongalo ngele tatu ningi shoka taye tu lombwele nokuvulika kaalumentu mboka ye li “omagano ge li aantu.”—Aahebeli 13:17.

11. Okupitila mushike Kristus ha wilike aalanduli ye kunena, noshike sha kwatelwa mokweenda ngaashi ye a li he ende?

¹¹ Jesus Kristus oha wilike aalanduli ye kunena okupitila mombepo ondjapuki, ‘momupiya omudhiginini nomunandunge’ nomaakuluntugongalo. Okweenda kwetu ngaashi Kristus a li he ende osha kwatela mo okuuva ko omukalo gwe gwokuwilika nokuvulika kugwo. Otashi pula wo natse tu holele omukalo gwokweenda kwe. Omuyapostoli Petrus okwa nyola a ti: “Oshoka oshinima sha [tya] ngeyi osho Kalunga e mú ithanene. Oshoka Kristus wo okwa hepekwa omolweni nokwe mú thigile oshiholelwa, opo mu landule ondjila ndjoka a li e yi ende.” (1 Petrus 2:21) Okomukalo guni mbela okulandula oshiholelwa sha gwanenena shaJesus shi na oku tu guma?

Kala nondjele uuna to longitha oonkondopangelo

12. Uukwatya uni waKristus aakuluntugongalo ye na okugandja unene tuu eitulomo kuwo?

¹² Nonando Jesus okwa pewa oonkondopangelo dhi vule dhakehe gumwe kuHe, okwa li e na ondjele momukalo moka a li e dhi longitha. Ayehe megongalo, unene tuu aakuluntugongalo, ‘ondjele yawo oyi na okukala ya tseyika kaantu ayehe.’ (Aafilippi 4:5, NW; 1 Timoteus 3:2, 3, NW) Molwaashoka aakuluntugongalo oye na oonkondopangelo megongalo, oshi li sha pumbiwa opo ya landule oshiholelwa shaKristus moku dhi longitha.

13, 14. Okomukalo guni aakuluntugongalo taya vulu okuholela Kristus ngele taya ladhipike yalwe ya longele Kalunga?

¹³ Jesus okwa li ha dhimbulukwa kutya aalongwa ye oye na omangambeko. Ka li ha pula kuyo shi vulithe pwaashoka ya li taya vulu okugandja. (Johannes 16:12) Nokwaahe ya thiminika, Jesus okwa ladhipike aalanduli ye ‘ya kondje ya mana mo’ mokulonga ehalo lyaKalunga. (Lukas 13:24, NW) Okwe shi ningi mokukala omuwiliki nomokwiinyengitha omitima dhawo. Sha faathana, kunena aakuluntugongalo Aakriste ihaya tilitha yalwe ya longele Kalunga moku ya sitha ohoni nenge oku ya pa uusama. Pehala lyaashono, ohaye ya ladhipike ya longele Jehova molwaashoka oye mu hole noye hole Jesus nosho wo aantu ooyakwawo.—Mateus 22:37-39.

¹⁴ Jesus ina longitha papuko oonkondopangelo ndhoka i inekelelwa mokupangela onkalamwenyo yaantu. Ye ina tula po nando omithikampango ihaadhi vulu okugwanithwa po nenge oompango odhindji noonkondo. Okwi inyengitha aantu mokuguma omitima dhawo ta longitha omakotampango ngoka ge li moompango ga gandjwa okupitila muMoses. (Mateus 5:27, 28) Mokuholela Jesus Kristus, aakuluntugongalo ohaya henuka okutula po oompango dhi ikolelela kwaashoka yo ya hala nenge ya thininikile yalwe omataloko gawo yene. Ngele tashi ya piinima yokuzala nokwiiyopaleka nenge okuthuwa po nomainyanyudho, aakuluntugongalo ohaya kambadhala okwaadha omitima mokulongitha omithikampango dhopakalunga, ngaashi ndhoka tadhi adhika muMika 6:8; 1 Aakorinto 10:31-33; nosho wo 1 Timoteus 2:9, 10.

Kala nohenda noho dhimine po

15. Jesus okwa li i inyenge ngiini ngele aalongwa ye inaaye shi pondola?

¹⁵ Kristus okwe tu thigile oshiholelwa tu landule omukalo gwe nkene a li ha kala naalongwa ye ngele inaaye shi pondola nenge ya ninga omapuko. Tala iiningwanima iyali ya ningwa muusiku we wahugunina manga a li kombanda yevi e li omuntu. Konima sho ya thiki puGetsemane Jesus “okwa kutha Petrus, Jakob naJohannes” nokwe ya lombwele a ti: “Kaleni mpaka, mu tonate.” Opo ihe “a humu ko kashona, okwi ihata pevi nokwa galikana.” Sho a galuka ‘okwa adha ya kotha.’ Mbela Jesus okwa li i inyenge ngiini? Okwa ti: “Ombepo yomuntu oya hala, ihe onyama onkundi.” (Markus 14:32-38) Pehala lyokuganda Petrus, Jakob naJohannes, okwa li e yu ulikile ohenda. Muusiku owo tuu mboka Petrus okwa li i idhimbike Jesus iikando itatu. (Markus 14:66-72) Konima yaashono Jesus okwa li a kala naPetrus ngiini? “Omuwa okwa yumudhwa! Okwa monika kuSimon [Petrus]!” (Lukas 24:34) Ombiimbeli otayi ti: “Okwi ihololele Petrus, nokonima aayapostoli ayehe omulongo nayaali.” (1 Aakorinto 15:5) Pehala lyoku mu kwatela onkone, Jesus okwa dhimine po omuyapostoli ngoka i iyele ombedhi noku mu nkondopaleka. Konima yaashono Jesus okwa li i inekelele Petrus iinakugwanithwa iinene.—Iilonga 2:14; 8:14-17; 10:44, 45.

16. Ongiini tatu vulu okweenda ngaashi Jesus a li he ende ngele ooitaali ooyakwetu ye tu yemateke nenge ya yono kutse momukalo gwontumba?

¹⁶ Uuna ooitaali ooyakwetu ye tu yemateka nenge ya yono kutse momukalo gwontumba omolwokwaahagwanenena kwopantu, mbela natse katu na okukala nohenda nohatu dhimine po ngaashi Jesus? Petrus ota ladhipike ooitaali ooyakwawo ta ti: “Ne omu na okukala mu na edhiladhilo limwe neuvitopamwe. Kaleni mu holathane ongaamwayinathana. Silathaneni ohenda ne mu ifupipikilathane. Ngoka te mú ningile uuwinayi nenge ngoka te mú thingi, inamu mu thinga. Ihe ya shunithileni elaleko nuuyamba.” (1 Petrus 3:8, 9) Ihe ongiini ngele gumwe ite tu ningile ngaashi ando Jesus a li ta ka ninga, ta tindi okukala e na ohenda natse nenge oku tu dhimina po? Nando oshi li ngawo tse otu na oshinakugwanithwa shokukambadhala okuholela Jesus nokwiinyenga ngaashi ando ye a li te ki inyenga.—1 Johannes 3:16.

Pititha komeho iinima yUukwaniilwa

17. Oshike tashi ulike kutya Jesus okwa li ha pititha komeho ehalo lyaKalunga monkalamwenyo ye?

¹⁷ Opu na natango omukalo gumwe moka tu na okweenda ngaashi Jesus Kristus a li he ende. Okuuvitha onkundana ombwanawa yUukwaniilwa waKalunga okwa li oshinima sha simanenena monkalamwenyo yaJesus. Konima sho a li u uvithile omukiintu Omusamaria popepi noshilando Sikar muSamaria, Jesus okwa li a lombwele aalongwa ye ta ti: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.” (Johannes 4:34) Okulonga ehalo lyaHe okwa li kwa koleke Jesus; okwa li ngaashi iikulya mbyoka ye mu palutha noye mu kutitha. Okuholela Jesus nokukala tatu ukitha eitulomo lyetu kokulonga ehalo lyaKalunga mbela otashi tu fala monkalamwenyo itaayi ti sha naanaa nokaayi na enyanyu lyasha?

18. Omayambeko geni haga zi mokuladhipika aanona ya kuthe iilonga yethimbo lyu udha?

¹⁸ Uuna aavali taya ladhipikile oyana opo ya ye miilongo yethimbo lyu udha, yo naanona yawo otaya ka mona omayambeko ogendji. He yaakwanambwiyu okwa li a ladhipike oyanamati yi itulile po elalakano lyiilonga yuukokolindjila manga ye li aashona. Konima sho ya mana nelongo lyawo, aakwanambwiyu oya ningi aakokolindjila. Mokuulika kenyanyu ndyoka e na, he okwa nyola a ti: “Aamati yetu inaye tu yemateka nando. Nolupandu otatu vulu okutya: ‘Aanona oyo omagano ga za kOMUWA.’” (Episalomi 127:3) Ongiini aanona haya mono uuwanawa mokulalakanena iilonga yethimbo lyu udha? Meme gwaanona yatano okwa ti: “Uukokolindjila owa kwathela aanona yandje ayehe ya kokeke ekwatathano lyawo naJehova, owa hwepopaleka omikalondjigilile dhokukonakona kwawo kwopaumwene, owe ya longa nkene ye na okulongitha nawa ethimbo lyawo noondunge, nowe ya kwathela yi ilonge okupititha komeho iinima yopambepo monkalamwenyo yawo. Nonando ayehe oya li ye na okuninga omalunduluko ogendji, kapu na nando ogumwe gwomuyo i ipe uusama molwaashoka e li omukokolindjila.”

19. Omalalakano gomonakuyiwa geni aagundjuka ye na okudhiladhila kugo noondunge?

¹⁹ Aagundjuka omalalakano geni ogashike monakuyiwa? Oto lalakanene okukala wa dhenga mbanda meithano lyontumba muuyuni? Nenge oto lalakanene eithano lyiilonga yethimbo lyu udha? Paulus ota kumagidha ta ti: “Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge. Longitheni nawa ethimbo kehe mu li na, oshoka omasiku ngaka omawinayi.” Okwa gwedha ko ta ti: “Inamu kala ano omagoya, ihe kambadhaleni okukonakona kutya Omuwa okwa hala, mu ninge shike.”—Aaefeso 5:15-17.

Kala omudhiginini

20, 21. Omomukalo guni Jesus a li omudhiginini, nongiini tatu vulu okuholela uudhiginini we?

²⁰ Okweenda ngaashi Jesus a li he ende otashi pula tu holele uudhiginini we. Shi na ko nasha nuudhiginini waJesus, Ombiimbeli otayi ti: “Oye okwa li e na uukwatya waKalunga, ye ina dhiladhila nando olumwe, a kambadhale nokuhakana okukala a fa Kalunga. Ihe okwi ihula [nokwa] zala olupe lwomupika. Oye okwa ningi a fa omuntu nokwa holoka molupe lwomuntu. Oye okwi ifupipike nokwe ende ondjila yevuliko sigo omeso lye [komuti gwomahepeko].” Jesus okwa kala a dhiginina uunamapangelo waJehova mokuvulika kehalo lye. Okwa kala omudhiginini nokuli sigo omeso sho a li ta hepekwa komuti gomahepeko. Otu na okukala ‘nomadhiladhilo ga fa ngoka’ nokuvulika nuudhiginini mokulonga ehalo lyaKalunga.—Aafilippi 2:5-8, yelekanitha NW.

²¹ Jesus okwa li u ulike wo uudhiginini kaayapostoli ye aadhiginini. Nonando oya li ye na omaunkundi nokwaahagwanenena, Jesus okwa li e ya hole “sigo opehulilo.” (Johannes 13:1) Sha faathana natse inatu etha okwaahagwanenena kwaamwatate ku tu ninge tu kale niikala yoku ya pa uusama.

Natu landule oshiholelwa sha tulwa po kuJesus

22, 23. Uuwanawa washike tau zi mokulandula oshiholelwa sha tulwa po kuJesus?

²² Tu li aantu inaaya gwanenena, osha yela kutya itatu vulu okulandula naanaa thiluthilu oonkatu dhOmuholelwa gwetu a gwanenena. Ihe otatu vulu okukambadhala ngaashi tatu vulu okulandula oonkatu dhe. Opo tu ninge ngawo otashi pula tu kale tu uvite ko nokuvulika komukalo gwaKristus gwokuwilika nokudhiginina oshiholelwa shoka a tula po.

²³ Okukala aaholeli yaKristus otashi eta omayambeko ogendji. Onkalamwenyo yetu otayi kala yi na oshilonga notayi nyanyudha molwaashoka ohatu ukitha eitulomo kokulonga ehalo lyaKalunga pehala lyokulonga lyetu yene. (Johannes 5:30; 6:38) Otatu kala tu na eiyuvo lya yela. Onkalamwenyo yetu otayi ka kala yi shi okuholelwa. Jesus oti ithana ayehe mboka taya longo noya lolokithwa opo ye ye kuye noyi imonene oomwenyo dhawo evululuko. (Mateus 11:28-30) Ngele tatu landula oshiholelwa shaJesus natse otatu ka vululukitha yalwe ngele tatu endathana nayo. Natu tsikileni ihe okweenda ngaashi Jesus a li he ende.

Oto dhimbulukwa?

• Ongiini Kristus ha wilike aalanduli ye kunena?

• Ongiini aakuluntugongalo taya vulu okulandula ewiliko lyaKristus mokulongitha oonkondopangelo dhawo ndhoka ya pewa kuKalunga?

• Ongiini tatu vulu okulandula oshiholelwa shaJesus ngele tatu ungaunga nomapuko gayalwe?

• Ongiini aagundjuka taya vulu okupititha iinima yUukwaniilwa komeho?

[Ethano pepandja 15]

Aakuluntugongalo Aakriste ohaye tu kwathele tu landule ewiliko lyaKristus

[Omathano pepandja 16, 17]

Aagundjuka, omalalakano geni tamu itulile po opo mu kale mu na onkalamwenyo yopaKriste ya lalekwa nuuyamba?