Shoka tatu vulu okuninga pelongelokalunga lyuukwanegumbo nosho wo mekonakono lyopaumwene

PETAMEKO lyo 2009, omagongalo gOonzapo dhaJehova muuyuni auhe oga li ga ningi omalunduluko shi na ko nasha nokugongala. Okugongala hoka kwa li haku ningwa lwaali moshiwike okwa hengumukile mumwe, naayehe oya li ya ladhipikwa ya longithe esiku ndyoka ya ninge elongelokalunga lyuukwanegumbo nenge ya ninge ekonakono lyopaumwene. Mbela oho longitha ngaa elongekidho ndyoka epe? Mbela oho mono mo ngaa uuwanawa pakuudha?

Yamwe ka ye shi kutya oshike ye na okulongitha pethimbo lyelongelokalunga lyuukwanegumbo. Olutuwiliki italu ka tulila po omaukwanegumbo agehe elandulathano limwe. Molwaashoka oonkalo odha yoolokathana, oshi li nawa opo omutse guukwanegumbo kehe nenge oohandimwe ya tale nkene taya vulu okulongitha nawa oshiwike kehe ya mone uuwanawa melongekidho ndyoka.

Yamwe ohayi ilongekidhile okugongala mesiku ndyoka, ihe hasho owala ye na okukala haya ningi. Yamwe ohaya lesha Ombiimbeli, nokukundathana kombinga yayo nokudhana nokuli iinyandwa ya kankamena kuyo, oshinima shoka hashi kala oshiwanawa unene tuu kaanona. Elongelokalunga lyuukwanegumbo inali pumbwa okuningwa momukalo gwomapulo nomayamukulo ngaashi hashi kala pokugongala. Kali na okuningwa momukalo gwa kwata miiti, opo iilyo yuukwanegumbo yi kundathane nokulombwelathana omadhiladhilo ya manguluka. Oku li ninga momukalo inaagu kwata miiti ohaku kwathele kehe gumwe a kale ta dhiladhila nawa notashi ka ningitha esiku li kale tali dhimbulukiwa notali nyanyudha kwaayehe.

Omusamane gumwe ngoka e na aanona yatatu okwa ti: “Kehe shoka twa kala hatu ningi olundji osha kankamena kelesho lyOmbiimbeli. Atuhe ohatu lesha tango oontopolwa komeho yethimbo, aanona ohaya hogolola kutya iinima yini taya ka ninga omapekapeko e taye ya ya popye shoka ya mona. Michael [gwoomvula heyali] olundji oha thaneke ethano nenge a nyole okatendo. David naKaitlyn [ye na oomvula 13 nosho wo 15] omathimbo gamwe ohashi vulika ya nyole ehokololo kombinga yOmbiimbeli shi na ko nasha nankene omuntu ngoka a li po sho oshiningwanima tashi ningwa u uvite. Pashiholelwa, sho twa li tatu lesha kombinga yaasho Josef ta fatulula ondjodhi yomuteleki gwiikwiila gwaFarao nomupindi gwomaviinu gwe, Kaitlyn okwa li a nyola etotwahokololo kombinga yankene omunandholongo ngoka a li u uvite sho a mono sho tashi ningwa.”—Gen., ontopolwa 40.

Olundji oonkalo ihadhi kala dha faathana. Shoka tashi longo komuntu gumwe nenge kuukwanegumbo wulwe otashi vulika shi kale itaashi longo kuyalwe. Okampungu hoka ka pamba oshitopolwa shika oke na omaetopo gontumba ngoka taga vulu okulongithwa pelongelokalunga lyuukwanegumbo nenge pekonakono lyopaumwene. Otashi vulika nokuli wu na omaetopo galwe ogendji ngoka to vulu okulongitha.

[Oshimpungu/Ethano pepandja 7]

Komaukwanegumbo ngoka mu na aanona yoomvula omulongo nasha:

• Lesheni e tamu kundathana embo Questions Young People Ask—Answers That Work.

• Idheuleni iitopolwa yi na ko nasha noonkalo ndhoka hadhi vulu okuholoka po. (Tala Oshungonangelo ye 1 Juni 1996, epandja 13-14, okatendo 17-18.)

• Popyeni kombinga yomalalakano ngoka taya vulu okugwanitha po muule wethimbo ele nosho wo wethimbo efupi.

• Omathimbo nomathimbo kaleni hamu tala uuvidio wehangano noku wu kundathana.

• Kundathaneni oshitopolwa “Sha nuninwa aagundjuka” (“For Young People”) shoka hashi kala mOshungolangelo yOshiingilisa.

Kaaihokani mboka kaaye na aanona:

• Kundathaneni ontopolwa 1, 3, 11-16 membo Shoka tashi vulu okweeta ombili muukwanegumbo.

• Kundathaneni uuyelele mboka mwa mona melesho lyOmbiimbeli.

• Ilongekidhileni Ekonakonombiimbeli lyEgongalo nenge Ekonakono lyOshungolangelo.

• Kundathaneni nkene tamu vulu okutamununa mo uukalele weni mu li aaihokani.

Kaamwatate naamwameme mboka inaaya ya mondjokana nenge mboka ye li muukwanegumbo wa topoka palongelokalunga:

• Konakona iileshomwa iipe mbyoka ya li ya piti poshigongi shoshitopolwa.

• Lesha embo Yearbook lyonuumvo nosho wo ngoka gomimvo dha pita.

• Ninga omapekapeko komapulo ngoka haga pulwa olundji moshitopolwa sheni.

• Ilongekidha omafolomo ngoka to ka longitha muukalele.

Komaukwanegumbo ngoka mu na aanona aashona:

• Dhaneni iinyandwa ya kankamena kOmbiimbeli.

• Dhaneni uudhano wokutala ngele omuntu ota dhimbulukwa, ngaashi mboka wu li pepandja 30 no 31 mo-Awake!

• Omathimbo gamwe, ningeni iinima mbyoka tayi mu kwathele mu thaneke iinima yontumba momadhiladhilo. (Tala “Studying the Bible—In the Zoo!” mo-Awake! yo 8 Maalitsa 1996, epandja 16-19.)

• Kundathaneni oshitopolwa “Longa aanona yoye,” shoka hashi kala mOshungolangelo.