Shoka to vulu okuninga pekonakonombiimbeli lyopaumwene nosho wo pelongelokalunga lyuukwanegumbo

Ihatu longele owala Jehova uuna twa gongala pamwe nayalwe pokugongala, piigongi yoshikandjo noyoshitopolwa, ihe ohatu shi ningi wo nuuna tu li otse atuke nosho wo nomaukwanegumbo getu. Uuna to ningi ekonakonombiimbeli lyopaumwene nosho wo elongelokalunga lyuukwanegumbo, oto vulu okutala komaetopo ngaka taga landula mpaka:

• Ilongekidhila okugongala. Oto vulu okwiiyenditha po pomaimbilo nokukwathela ayehe muukwanegumbo ya ilongekidhe omatyokosha gontumba.

• Lesha ehokololo lyOmbiimbeli. Okuza mpono, thaneka ethano lyoshiningwanima shoka sha popiwa mehokololo ndyoka wa lesha, nenge wu nyole oshinima shontumba shoka wa ilonga mo.

• Konakona egalikano ndyoka tali adhika mOmbiimbeli, nokudhiladhila nkene tali vulu oku ku kwathela wu hwepopaleke omagalikano goye.

• Tala okavidio kepandja lyetu jw.org, opo nduno to ka kundathana nayalwe, nenge wu nyole okatendo kombinga yako.

• Ilongekidhila uukalele. Gumwe muukwanegumbo na kale a fa omuntu ngoka to uvithile.

• Konakoneni eshito nokutedhatedha kulyo, nenge mu kundathane kutya otali mu longo shike kombinga yaJehova.a