Oto dhimbulukwa?

Owa lesha ngaa nawa iifo yOshungolangelo mbyoka opo ya zi ko? Tala nduno ngele oto vulu okuyamukula omapulo taga landula:

• Omolwashike Job a li e na uushili kutya ota ka manguluka muusi?

Omolwaashoka okwa li e shi nkene Omushiti gwetu omunahole ha kala u uvite shi na ko nasha naalongeli ya aadhiginini mboka ya sa. Job okwa li a tseya kutya okwa shitwa kuKalunga. Okwa li wo e shi kutya Omugandji gwomwenyo ota vulu oku mu yumudha konima yokusa.—4/1, epandja 12.

• Otu shi shi ngiini kutya okulongela Kalunga neitulomo inaku hala okutya katu na okukala ihaatu inyanyudha nenge ihaatu thuwa po?

Otatu vulu okutala koshiholelwa shaJesus. Okwa li a nyanyukilwa okulya pamwe nayalwe. Otu shi shi kutya Jesus ka li ha kala i itula mo sha pitilila nenge keeshi omunambili. Yalwe, nokuli naanona oya li ya nanenwa kuye noya li haya kala ye mu mangulukila.—4/1, epandja 14.

• Omalalakano geni to vulu okwiitulila po opo wu nyanyukilwe okulesha nokukonakona Ombiimbeli?

Galikana tango manga inoo tameka okulesha Ombiimbeli nokukala wu na omadhiladhilo ge li pehala. Longitha ethimbo lya gwana mokukonakona Omanyolo omadhigu nomokukonakona omafatululo gago opo wu ga uve ko nawa.—5/15, epandja 3, 4.

• Omuti gwolumono ngoka gwa popiwa mAaroma ontopolwa 11 otagu thaneke shike?

Omuti gwolumono otagu thaneke oshitopolwa oshitiyali sholuvalo lwaAbraham shoka shi li Israeli yopambepo. Omidhi dhomuti nguka gwopathaneko otadhi ulike kuJehova, na Jesus oku li ekota lyomuti nguka. Sho Aajuda oyendji yopanyama ya li ye ekelehi Jesus, mboka kaaye shi Aajuda ya li ya ningi ooitaali oya li ya tsikwa kolumono, nokungawo oya ningi oshitopolwa oshitiyali sholuvalo lwaAbraham.—5/15, epandja 22-25.

• Omolwashike aantu oyendji inaaya itaala kutya aantu ayehe aalunde?

Nokuli nonando ohaya yi kongeleka omalupita, oya tala ko ehokololo lyomOmbiimbeli kombinga yaAdam naEva li li ongano. Yalwe oya kokela momidhingoloko moka aantu inaayi itaala muKalunga.—6/15, epandja 9.

• Mbela aagundjuka oye na okuninginithwa?

Pehala lyokupopya kutya omuntu oku na okukala e na oomvula ngapi opo a ninginithwe, Oohapu dhaKalunga odha popi owala kutya omuntu oku na okukala e na uupambepo wu li ngiini opo a katuke onkatu ndjoka. Jesus okwa li a lombwele aalongwa ye ya ‘ninge aantu ayehe aalongwa ye noku ya ninginitha.’ (Mat. 28:19, yelekanitha NW.) Onkee ano, mboka ye li nale aalongwa yaKristus oyo ye na okuninginithwa.—6/15, epandja 3.

• Mbela oluvalo lwomulumentu a gwanenena Jesus olwa li ngaa talu vulu okuninga oshitopolwa shekulilo?

Aawe. Nonando Jesus okwa li ta vulu okukala he yaantu omabiliyona ya gwanenena, oluvalo ndoka kalwa li talu vulu okukala oshitopolwa shekulilo. Onkalamwenyo yaJesus ya gwanenena oyo owala ya li yi thike pwaandjoka yaAdam. (1 Tim. 2:6)—6/15, epandja 13.

• Ongiini Aakriste taya vulu okuulika kutya ohaya tula miilonga elondodho shi na ko nasha naalongi aafundja mboka ya popiwa mIilonga 20:29, 30?

Kaye na okutaamba aalongi aafundja momagumbo gawo nenge ye ya popithe. (Rom. 16:17; 2 Joh. 9-11) Aakriste oye na wo okuhenuka okulesha omambo gaashunimonima, okutala oopolohalama dhawo ko-TV nokulesha omalongo gawo ngoka ya tula ko-Internet.—7/15, epandja 15-16.

• Mbela Gehenna ehala moka aantu taya hepekwa momulilo sigo aluhe?

Oshitya shoka shOshigreka Gehenna oshi na eityo lya faathana noshitya shOshihebeli geh Hin nom, shoka tashi ti “olusilu lwaHinnom” nenge geh veneh-Hin nom, shoka tashi ti ‘esilu lyoyana yaHinnom.’ (Jos. 15:8; 2 Aak. 23:10, KB) Jesus okwa li a longitha oshitya ‘Gehenna’ tu ulike kehanagulo lyaaluhe ndyoka Kalunga a tokolela aakolokoshi. Onkee ano, oshitya ‘Gehenna’ oshi na eityo lya faathana ‘nefuta lyomulilo’ ndyoka lya popiwa mEhololo. Iitya mbyoka ayihe otayi ulike kehanagulo lyaaluhe lyaantu mboka kaaye na etegameno lyoku ka yumuka.—7/1, epandja 15.