‘Ino igameka koondunge dhoye mwene’

“Inekela OMUWA nomutima gwoye aguhe noino igameka koondunge dhoye mwene.”—OMAYEL. 3:5.

1, 2. (a) Omoonkalo dhini tatu vulu okwiiyadha? (b) Olye tu na okwiinekela uuna tu li muudhigu, tatu ningi omatokolo nenge tatu kondjitha omamakelo, nomolwashike?

OMUGANDJI gwiilonga gwaCynthiaa okwa li a kutha mo aaniilonga yamwe miilonga noongeshefa dhe dhilwe okwe dhi pata. Cynthia okwa li e wete kutya naye oku li pokukuthwa mo. Ngele osha ningwa ota ka ninga nduno ngiini? Openi ta ka adha iimaliwa yokufuta iipumbiwa ye? Omumwameme Pamela okwa hala okutembukila kehala hoka ku na ompumbwe onene yaauvithi yUukwaniilwa, ihe mbela na ye ngaa? Omugundjuka Samuel, ngoka ngashingeyi e na oomvula 20 nasha ohi ipula nomathano giipala ngoka a li ha tala sho a li omushona. Oha kwatwa natango kegamo lyoku ga tala. Oshike e na okuninga po?

² Oho kala wi inekela lye ngele wu li muudhigu, uuna to ningi omatokolo ga simana nenge to kondjitha omamakelo? Mbela oho igameke koondunge dhoye mwene nenge oho ‘fala uudhigu woye kOMUWA’? (Eps. 55:22) Ombiimbeli otayi ti: “OMUWA oha tonatele aayuuki noha pulakene okulila kwawo.” (Eps. 34:15) Onkee ano, osha simana tu kale twi inekela muJehova nomutima gwetu aguhe nokukala ihaatu igameke koondunge dhetu yene.—Omayel. 3:5.

3. (a) Okwiinekela muJehova okwa kwatela mo shike? (b) Oshike hashi vulu okuningitha yamwe yi igameke koondunge dhawo yene?

³ Okwiinekela Jehova nomutima aguhe okwa kwatela mo okulonga ehalo lye. Opo tu shi ninge otu na okugalikana kuye aluhe noku mu indila nomutima aguhe e tu wilike. Kakele kaashono, oku mu inekela thiluthilu oku li oshinima oshidhigu koyendji. Pashiholelwa, omumwameme Lynn okwa ti: “Osha li oshidhigu kungame okukala ndi inekela thiluthilu muJehova.” Omolwashike mbela? Okwa ti: “Tate ka li e na nangame, meme naye ka li ha sile ndje oshimpwiyu pamaiyuvo nopalutu. Onkee ano, onda tameke okwiisila oshimpwiyu manga nda li omushona.” Onkalo ndjoka oya li ye shi ningi oshidhigu kuLynn okukala i inekela thiluthilu gumwe. Okuvula nokupondola kwomuntu ohaku vulu wo oku mu ningitha a kale e wete a gwanenwa. Omukuluntugongalo otashi vulika a ninge iinima ya kwatela mo egongalo noinaa galikana kuKalunga, molwaashoka okwiinekela montseyo ndjoka e na.

4. Oshike tatu ka kundathana moshitopolwa shika?

⁴ Jehova okwa tegelela tu katuke metsokumwe nomagalikano getu nokulonga ehalo lye. Ihe ongiini tatu vulu oku mu tsika iimpwiyu yetu opo e tu kwathele mokukandula po omaupyakadhi getu? Uuna tatu ningi omatokolo, oshike tu na okukala twa kotokela? Omolwashike egalikano lya simana uuna tatu kondjitha omamakelo? Otatu ka kundathana omapulo ngaka nokutala kiiholelwa yopamanyolo.

Uuna tu li muudhigu

5, 6. Hiskija okwa li i inyenge ngiini sho a li ta mbandamekwa komukwaniilwa gwaAssur?

⁵ Ombiimbeli otayi popi omukwaniilwa gwaJuda, Hiskija tayi ti: “Okwa li omwiinekelwa gwOMUWA ye ina etha okuvulika kuye, ihe okwa dhiginine iipango mbyoka OMUWA e yi pele Moses.” Eeno, okwa li ‘i inekela OMUWA, Kalunga kaIsraeli.’ (2 Aak. 18:5, 6) Hiskija okwa li i inyenge ngiini sho omukwaniilwa Sanherib gwaAssur a tumu omukalelipo gwe nosho wo elenga lye ekuluntu Rabsake kuJerusalem pamwe netangakwiita lya homata nokomayego? Etanga enankondo lyaAssur olya li lya kwata ko nale iilando oyindji yaJuda, na Sanherib okwa li a hala okukwata ko Jerusalem. Hiskija okwa yi kotempeli yOMUWA e ta galikana ta ti: “OMUWA, Kalunga ketu, tu hupitha miikaha yAayassur, opo iigwana ayihe yomuuyuni yi tseye kutya ongoye awike OMUWA Kalunga.”—2 Aak. 19:14-19.

⁶ Hiskija okwa li a katuka metsokumwe negalikano lye. Omanga inaa ya kotempeli a ka galikane, okwa li a lombwele aantu kaayu uve nayi sho Rabsake te ya sheke. Hiskija okwa li wo a tumu omutumwa komupolofeti Jesaja a ka pule omayele. (2 Aak. 18:36; 19:1, 2) Hiskija okwa li a ningi shoka e shi kutya otashi nyanyudha Jehova. Kali a kambadhala okukonga ekwatho kuEgipiti nenge kiishiindalongo, oshinima shoka shi li ompinge nehalo lyaJehova. Pehala lyokwiigameka koondunge dhe mwene, okwa li i inekela muJehova. Sanherib “okwa zi po” e ta shuna kuNinive, konima sho omuyengeli gwaJehova a dhipaga aakwiita yaAssur 185 000.—2 Aak. 19:35, 36.

7. Egalikano lyaHanna nolyaJona otali tu hekeleke ngiini?

⁷ Omukulukadhi gwomulumentu Omulevi Elkana, Hanna, okwa li wo i inekela muJehova, nonando okwa li a nika oluhodhi sho ihaa mono aanona. (1 Sam. 1:9-11, 18) Omupolofeti Jona okwa li a hupithwa mela lyohi onene, konima sho a galikana a ti: “Muudhigu wandje onde ku ithana, OMUWA, nangoye owa yamukula ndje. Omuule, muuyuni wokuusi onda kugile ekwatho, nangoye owu uvu ndje.” (Jona 2:1, 2, 10) Itashi hekeleke tuu okutseya kutya otatu vulu ‘okwiindila’ Jehova e tu kwathe kutya nduno otu li moonkalo oondhigu dha tya ngiini!—Lesha Episalomi 55:1, 16.

8, 9. Hiskija, Hanna naJona oya li tayi ipula unene nashike momagalikano gawo, notatu ilongo shike miiholelwa yawo?

⁸ Oshiholelwa shaHiskija, shaHanna noshaJona otashi tu longo wo oshinima sha simanenena kombinga yaashoka kaatu na okudhimbwa uuna tatu galikana ngele tu li moothina. Ayehe yatatu oya li ya lulilwa koonkalo moka ya li. Ihe nonando ongaaka, omagalikano gawo otaga holola kutya kaya li owala tayi ipula nomaupyakadhi gawo unene. Pehala lyaashoka oya li ya lenga edhina lyaKalunga, oku mu longela nokulonga ehalo lye. Hiskija okwa li u uvite nayi sho edhina lyaJehova tali shekwa. Hanna okwa li a halelela okanona, ihe nonando ongaaka okwa li u uvaneka kutya ote ke ka gandja ka ka longe metsalihangano muShilo. Jona naye okwa ti: ‘Otandi gwanitha shoka ndu uvaneka.’—Jona 2:9.

⁹ Uuna tatu galikana tu kwathelwe muudhigu, otwa pumbwa okukala tu na omatompelo kutya omolwashike tatu shi ningi. Mbela ohatu kala owala twa hala Jehova e tu kwathele tu ze muudhigu nenge ohatu mu kaleke ngaa momadhiladhilo nosho wo elalakano lye? Okumona iihuna otaku vulu oku tu ningitha tu kale tatu ipula nonkalo yetu e tatu kala kaatu na ko nasha niinima yopambepo. Uuna tatu galikana Jehova Kalunga e tu kwathele, natu yapulithe edhina lye nokuyukipalitha uunamapangelo we. Ngele tatu shi ningi, otashi ke tu kwathela tu kale netaloko lyu uka, nokuli nonando uupyakadhi inawu kanduka po. Kalunga ohe tu kwathele okupitila megalikano tu vule okwiidhidhimikila omaupyakadhi.—Lesha Jesaja 40:29; Aafilippi 4:6, 7.

Uuna tatu ningi omatokolo

10, 11. Josafat okwa li a ningi po shike sho a li monkalo ndjoka kee shi kutya na ninge ngiini?

¹⁰ Uuna to ningi omatokolo ga simana, okulye ho pula? Mbela oho ningi tango etokolo nopo nduno to galikana kuJehova e ku kwathele? Tala shoka omukwaniilwa gwaJuda, Josafat a li a ningi sho aakwiita Aamoab nAayamoni ya li ye mu hingile iita. Aajuda kaya li taya vulu oku ya kondjitha. Josafat okwa li a ningi po shike?

¹¹ Ombiimbeli otayi ti: “Josafat okwa li a haluka e ta galikana OMUWA, e mu wilike.” Okwa li a gandja elaka Aajuda ayehe yi idhilike iikulya nokwe ya gongaleke ya “konge ekwatho” kuJehova. Okwa li a thikama komeho gAajuda nAajerusalem e ta galikana ta ti: “Ongoye Kalunga ketu! Ya geela, oshoka tse itatu vulu okukondjitha etangakwiita li thike mpoka tali tu matukile. Katu shi nokuli shoka tu na okuninga, ihe otatu kongo ekwatho kungoye.” Kalunga kashili okwa li u uvu egalikano lyaJosafat nokwe mu hupitha pashikumithalonga. (2 Ondjal. 20:3-12, 17) Uuna tatu ningi omatokolo, unene tuu ngoka tashi vulika ga guma ekwatathano lyetu naJehova, mbela katu na okukala twe mu inekela pehala lyokwiigameka koondunge dhetu yene?

12, 13. Omukwaniilwa David okwe tu tulila po oshiholelwa shini shokuninga omatokolo?

¹² Otu na okuninga shike uuna tu li muupyakadhi mboka tatu vulu okuungaunga nawo, tashi vulika tu wu kandule po nziya molwaashoka otwa li nale muwo? Ehokololo lyomukwaniilwa David otali tu pe omayele mwaashika. Sho Aayamaleki ya li ya yugu ko oshilando Ziklag, oya li ya kwata po aakiintu yaDavid noyana. Oya kwata po wo aakiintu noyana yaantu ye. David okwa pula Jehova a ti: “Nandi landule aayugi mbano?” Jehova okwa yamukula a ti: “Ya landula; oto ke ya kwata po e to mangulula oonkwatwa.” David okwa zimine nokwa “yululula ko ayehe naayihe ya li ya kwatwa po kAayamaleki.”—1 Sam. 30:7-9, 18-20.

¹³ Konima sho Aayamaleki ya yugu oshilando, Aafilisti oya li ya ponokele Aaisraeli. David okwa li a pula ishewe omayele kuJehova nokwa li a pewa eyamukulo lya yela tali ti: “Eeno, ya matukila! Otandi ku pe esindano!” (2 Sam. 5:18, 19) Konima yokathimbo, Aafilisti oya li ya galuka ishewe okukondjitha David. Oshikando shino okwa li a ningi po shike? Okwa li ta vulu okwiitompa ta ti: ‘Onda li nale iikando iyali monkalo ya fa ndjika. Nandi ye owala ndi ka kondjithe aatondi yaKalunga, ngaashi nda ningile nale.’ David okwa ningi ngiini? Kali i igameke koondunge dhe mwene. Okwa li a pula ishewe omayele kuJehova megalikano. Kali tuu a nyanyukilwa shoka a ningi! Omayele ngoka a li a pewa oshikando shoka oga li gi ili. (2 Sam. 5:22, 23) Uuna twa taalela onkalo nenge uupyakadhi wa fa mboka, natu kale twa kotoka opo kaatu igameke koondunge dhetu omolwiimoniwa mbyoka twa pita muyo.—Lesha Jeremia 10:23.

14. Oshike tatu ilongo momukalo moka Josua naalumentu aakuluntu yomuIsraeli ya li yu ungaunga nAagibeon?

¹⁴ Molwaashoka atuheni inatu gwanenena, otwa pumbwa okupula aluhe ewiliko lyaJehova uuna tatu ningi omatokolo, nonando otu li aakuluntugongalo aanawino. Tala shoka Josua ngoka a li a landula Moses mokuwilika oshigwana shaIsraeli a li a ningi. Josua nosho wo aalumentu aakuluntu yomuIsraeli oya li ya kotokelwa kAagibeon mboka ya li yi iningitha ya fa ya za koshilongo shokokule. Josua nosho wo aakuluntu yomuIsraeli inaya pula Jehova, ihe oya ningi euvathano lyombili nAagibeon. Nonando Jehova okwa li a ambidhidha euvathano ndyoka, okwa li a si oshimpwiyu opo epuko ndyoka Josua a ningi li nyolwe mOmbiimbeli omolwuuwanawa wetu.—Jos. 9:3-6, 14, 15.

Uuna shi li oshidhigu kutse okukondjitha omamakelo

15. Yelitha kutya omolwashike egalikano lya simana uuna tatu kondjitha omamakelo.

¹⁵ Molwaashoka otu na ‘ompango yuulunde’ meni lyetu, otwa pumbwa okukondjitha iikala mbyoka twa mana mo. (Rom. 7:21-25) Otatu vulu okusindana. Ngiini mbela? Jesus okwa lombwele aalanduli ye kutya egalikano oshinima sha simanenena mokukondjitha omamakelo. (Lesha Lukas 22:40.) Ngele omahalo nenge omadhiladhilo ga puka otaga tsikile okukala mutse nokuli nokonima sho twa galikana kuKalunga, otwa pumbwa okutsikila ‘okwiindila’ uunongo kuye, opo tu vule oku ga kondjitha. Jakob okwe tu shilipaleka kutya Kalunga “oha pe ayehe nopwaa na omanyenyeto.” (Jak. 1:5) Jakob okwa pula wo a ti: “Oku na gumwe ta alukwa [pambepo]? Ni ithane aakuluntu yegongalo, ye mu galikanene noye mu gwayeke omagadhi medhina lyOmuwa. Egalikano lyomwiitaali otali aludha omuvu.”—Jak. 5:14, 15.

16, 17. Uuna tatu kongo ekwatho tu kondjithe omamakelo, uunake tu na okugalikana?

¹⁶ Opo tu kondjithe omamakelo, osha simanenena tu galikane tatu shi ningi pethimbo lyu uka. Tala shoka sha ningilwa omulumentu omugundjuka ngoka a popiwa mOmayeletumbulo 7:6-23. Okwa li te ende kwa wiwila mepandaanda moka hamu kala ohonda. Ohonda oye mu hongolola noohapu noye mu pukitha nomuthenu gwomilungu dhayo, omulumentu okwe yi landula a fa ondumetana tayi ka tselwa. Omolwashike omulumentu ngoka a li e ende mepandaanda ndyoka? Ombiimbeli otayi ti kutya okwa li ‘egoya’ notashi vulika a li e na omahalo ga puka. (Omayel. 7:7) Ethimbo lini a li e na okugalikana? Okwa li e na okugalikana sho omukiintu ta popi naye, opo a kondjithe emakelo ndyoka. Ihe osha li shi li nawa kuye a galikane tango sho a kwatwa kedhiladhilo e ke ende mepandaanda moka.

¹⁷ Kunena otashi vulika omulumentu gwontumba a kale a hala okuhulitha po okutala omathano giipala. Ihe otashi vulika ha tala omathano ngoka taga pendutha omahalo gomilalo kointaneta nenge muuvidio. Mbela ita ningi a fa omulumentu omugundjuka ngoka ta popiwa mOmayeletumbulo ontopolwa 7? Okuninga ngaaka, okwa fa owala omuntu te ende mondjila ya nika oshiponga. Opo omuntu a kale ihaa tala omathano giipala, oku na okukonga tango ekwatho kuJehova okupitila megalikano, omanga inaa tameka okulongitha ointaneta.

18, 19. (a) Omolwashike shi li oshidhigu okukondjitha omamakelo, ihe ongiini tatu vulu oku ga sinda? (b) Owa tokola toko okuninga shike?

¹⁸ Kashi shi oshipu okukondjitha omamakelo nosho wo omikalondjigilile dha puka. Omuyapostoli Paulus okwa nyola a ti: “Uuhalu wetu wopantu itau tsu kumwe naashoka [ombepo] e shi hala. Naashoka sha halika [kombepo], itashi tsu kumwe nuuhalu wopantu.” Onkee ano, ‘itatu vulu okulonga pahalo lyetu yene.’ (Gal. 5:17) Opo tu pondole, otu na okugalikana twa mana mo uuna pu na sha tashi tu makele e tatu katuka metsokumwe nomagalikano getu. ‘Emakelo ndyoka hali tu adha, olyo tuu ndyoka hali adha aantu ayehe,’ nokekwatho lyaJehova otatu vulu okukala aadhiginini kuye.—1 Kor. 10:13.

¹⁹ Jehova okwe tu pa omagano dhingi ngoka ge li egalikano ndyoka hali tu kwathele tu pondole uuna tu li moonkalo oondhigu, tatu ningi omatokolo ga kwata miiti nenge tatu kondjitha omamakelo. Ohatu ulike kutya otwe mu inekela ngele tatu galikana kuye. Otu na wo okukala hatu pula ombepo ye ondjapuki yi tu wilike noyi tu koleke. (Luk. 11:9-13) Onkee ano, natu kaleni twi inekela muJehova thiluthilu e tatu yanda iikala yokwiigameka koondunge dhetu yene.

[Enyolo lyopevi]

Oto dhimbulukwa?

• Moshiholelwa shaHiskija, Hanna noshaJona owi ilongo mo shike shi na ko nasha nokwiinekela Jehova?

• Oshiholelwa shaDavid naJosua otashi tu kwathele ngiini tu mone kutya otu na okukala twa kotoka uuna tatu ningi omatokolo?

• Ethimbo lini tali opalele okugalikana kombinga yemakelo lyontumba?

[Ethano pepandja 9]

Ngele tashi ya pokukondjitha omamakelo, uunake egalikano hali kwathele?