Oto vulu okukondjitha omamakelo!

“O HANDI vulu okukondjitha oshinima kehe ihe hamamakelo.” Oohapu ndhika dhi shiwike nawa otadhi holola nkene aantu haya tala ko omamakelo, shoka tashi ulike okutya aantu ohaye ga nyanyukilwa. Ihe yamwe oya tala ko emakelo li li omutondi ngoka ha kala po aluhe ngoka haya kala ya halelela okukondjitha. Ngoye oto dhiladhila ngiini? Uuna wa adhika kemakelo, mbela oto ki iyethela mulyo nenge oto ke li kondjitha?

Oshoshili kutya, hamamakelo agehe hage e ta uupyakadhi uunene. Pashiholelwa, ngaashi okuyaka okakuki, itaku vulu naanaa okuyona onkalamwenyo yoye. Ihe okwiiyethela momamakelo galwe unene tuu ngoka tage ku fala moluhondelo, otaku vulu oku ku etela iilanduliko yiyemateka. Ombiimbeli otayi londodha tayi ti: “Shaa ngoka ta yi . . . moluhondelo, oye omulayi oye tuu ngoka a hala a yone po omwenyo gwe.” — Omayeletumbulo 6:32, 33.

Ngele owa adhika kemakelo li na ko nasha nomilalo, oto ki inyenga ngiini? Ombiimbeli otayi yamukula kutya: “Kalunga okwa hala, mu kale aayapuki ne mu yande oluhondelo. Omulumentu kehe gwomokati keni na kale a tseya, nkene e na okukala nomukiintu, a kale naye pamukalo gu uka nogwesimaneko.” (1 Aatessalonika 4:3, 4) Ongiini to vulu okukokeka iikala yokukala wu na etokolotoko? Natu tale koonkatu ndatu ndhoka tadhi vulu oku ku kwathela.

Onkatu yo-1: Gamena omeho goye

Okutala omathano giipala otaku vulu okweeta momuntu omahalo ga puka. Sho Jesus a yelekanitha okutala nokukala wa hala, okwa ladhipike a ti: “Okehe tuu ngoka ta tala omukiintu e mu haluka, oye okwe mu hondele momwenyo gwe.” Okwa longitha ethaneko lya tsa, a ladhipike a ti: “Eho lyoye lyokolulyo ngele tali ku hongolola, li tsipula mo, ngu u li ekelehi.” (Mateus 5:28, 29) Mbela Jesus ote tu longo shike moshinima shika? Opo tu yande emakelo, otu na okukatuka twa tokola toko nokatu na okunyanyukilwa okutala omathano ngoka tage tu kokele momilalo.

Opo tu shi thaneke: Dhiladhila andola wa tala oohandje ndhoka hadhi holoka po uuna omuntu ta fikile. Mbela oto ka kala owala we dhi tala? Osha yela kutya ahawe! Oto ka pilamena ko nenge wu gamene omeho goye. Sha faathana, omathano ngoka tage ku kokele momilalo tashi vulika ge li momambo, nenge ko-TV, kokompiuta, nenge kaantu taya ningi ngaaka, tala pamwe pwi ili nziya. Gamena omadhiladhilo goye kaaga nyatekwe. Juan ngoka a li a pikwa komathano giipala ota ti: “Uuna nda mono omukiintu omwaanawa, olundji ohandi kala nda hala oku mu tala olutiyali nolutitatu. Onkee ohandi kambadhala ndi tale pamwe pwi ili, nohandi ilombwele tandi ti: ‘Galikana kuJehova! Owa pumbwa okugalikana lela ngashingeyi!’ Konima ngele nda galikana, omahalo ohaga zi po nziya.” — Mateus 6:9, 13; 1 Aakorinto 10:13.

Natu tale wo koshiholelwa shomulumentu omudhiginini Job, ngoka a ti: “Onda ningi etokolo lya kola, ndaa tale omukadhona nde mu haluka.” (Job 31:1) Omolwashike itoo ningi etokolotoko lya faathana?

Kambadhala okuninga ngeyi: Ngele owa mono omathano taga pendutha omahalo lyokuya momilalo, tala pamwe pwi ili nziya. Holela omunyoli gwOmbiimbeli ngoka a galikana ta ti: “Keelela ndje, ndaa hokwe iinima yaa na oshilonga.” — Episalomi 119:37.

Onkatu onti-2: Gamena omadhiladhilo goye

Molwaashoka atuheni inatu gwanenena, omathimbo gamwe otashi vulika tu kale tatu kondjo nomahalo ga puka. Ombiimbeli otayi ti: “Omuntu oha makelwa kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba, otau vala uulunde; nuulunde ngele wa koko, otau vala eso.” (Jakob 1:14, 15) Ongiini tatu vulu okuhenuka omwigo ngoka tagu ende tagu nayipala nokagu shi omupu okuza mo mugo?

Uuna wu na omahalo ga puka, dhimbulukwa kutya oto vulu okutala kutya oto ungaunga nago ngiini. Kondjitha omahalo ngoka. Ga kutha mo momadhiladhilo goye. Yanda omadhiladhilo ga nyata. Omulumentu gwedhina Troy, ngoka a li a pikwa komathano giipala gokOintaneta, ota ti: “Onda li nda kondjitha okukala tandi dhiladhila kiinima ya puka mokukaleka omadhiladhilo gandje kiinima mbyoka tayi tungu. Kasha li oshipu. Olundji onda kala handi dhiladhila kugo ishewe. Ihe hugunina onde ki ilonga okupangela omadhiladhilo gandje.” Omukiintu gwedhina Elsa, ngoka a kala ta kondjo nemakelo lyokuya momilalo manga a li e na oomvula omulongo nasha, ota ti: “Okukala ndi ipyakidhila nosho wo okugalikana kuJehova, okwa li kwa kwathele ndje kaandi kale nomadhiladhilo ga puka.”

Kambadhala okuninga ngeyi: Uuna wa adhika komadhiladhilo gokuya momilalo, galikana nziya. Kondjitha omadhiladhilo ga puka nokudhiladhila “iinima mbyoka iiwanawa noya gwana okusimanekwa: iinima mbyoka yoshili yo opala, yu uka, ya yogoka noyi na epopilo ewanawa.” — Aafilippi 4:8.

Onkatu onti-3: Kotokela oonkatu dhoye

Uuna omahalo, emakelo, nompito ya holoka po, uupyakadhi otawu vulu okuholoka po nuupu. (Omayeletumbulo 7:6-23) Ongiini to vulu okuyanda okuninga oshihakanwa?

Ombiimbeli otayi tu pe omayele gopandunge tayi ti: “Omuntu onkotoki ota tala oshiponga e ta holama, ihe mboka yanathangwa omo taa yi e taa yemata.” (Omayeletumbulo 22:3) Onkee kotokela oonkatu dhoye. Kala wu shi oonkalo ndhoka tadhi vulu okweetitha uupyakadhi, e to dhi yanda. (Omayeletumbulo 7:25) Omulumentu gwedhina Filipe, ngoka a manguluka ko kokukala a pikwa kokutala omathano giipala ota ti: “Ohandi tula okompiuta yomegumbo pehala mpoka kehe gumwe ta vulu oku yi mona nonde yi tula oshidhinditho shOintaneta. Nohandi yi owala kOintaneta ngele yalwe opo ye li.” Sha faathana, Troy, ngoka a tumbulwa petameko, ota ti: “Ohandi yanda okutala oomuvi ndhoka hadhi pendutha omahalo momuntu gokuya momilalo nohandi yanda okukala naantu mboka haya popi kaaye na ko nasha kombinga yomilalo. Inandi hala okwiitula monkalo ya nika oshiponga.”

Kambadhala okuninga ngeyi: Konakona paushili uunkundi woye, e to dhiladhila komeho yethimbo wu yande oonkalo ndhoka tashi vulika dhi ku fale memakelo. — Mateus 6:13.

INO SA UUNYE!

Ongiini nduno ngele oho ningi oonkambadhala ngaashi to vulu, ihe oho iyadha owala wa nkundipala e to gwile memakelo? Ino teka omukumo ngoye ino etha okukambadhala. Ombiimbeli otayi ti: “Oshoka omuyuuki nando ota gwile po luheyali, ota yambuka po, ihe omukeenakalunga ota ka tengukila momupya.” (Omayeletumbulo 24:16) Eeno, Tate yetu gwomegulu ohe tu tsu omukumo tu ‘yambuke po.’ Mbela oto ka taamba ko ngaa ekwatho lye lyopahole? Ano ino vulwa nando okuya kuye okupitila megalikano. Koleka eitaalo lyoye mokukonakona Oohapu dhe. Nkondopaleka etokolokoto lyoye mokukala pokugongala kwopaKriste. Oto vulu okutsuwa omukumo keuvaneko lyaKalunga ndika tali ti: “Otandi ku kankameke e tandi ku kwatha.” — Jesaja 41:10.

Cody, ngoka a tumbulwa petameko, ota ti: “Osha pula lela oonkambadhala dha mana mo opo ndi ethe po omukalondjigilile gwokutala omathano giipala. Iikando oyindji ondi iyadha tandi shi ningi, ihe kekwatho lyaKalunga, onde ke shi pondola.” Dylan, ngoka naye wo a tumbulwa petameko ota ti: “Onda li tandi vulu okuya momilalo nuupu nomuniilonga pamwe nangame. Ihe onde mu ikanyuna e tandi mu lombwele kutya ‘Aawe!’ Ohandi kala ndu uvite nawa sho ndi na eiyuvo lya yela. Sha simanenena, ondi shi shi kutya onda nyanyudha Jehova.”

Uuna wa kakatele uudhiginini woye nokukondjitha emakelo, oto vulu okukala wu na uushili kutya Kalunga ota ka kala wo e ku nyanyukilwa! — Omayeletumbulo 27:11.