“Onda lemana, ihe hasho tandi kala ngeyi sigo aluhe!”

Nakuhokolola Sara van der Monde

Olundji aantu ohaya pula ndje taya ti: “Sara, omolwashike ho kala aluhe to imemeha nowa nyanyukwa?” Ohandi ya yamukula kutya ondi na etegameno lyi ikalekelwa. Ohandi li popi paufupi noohapu ndhika tadhi ti: “Onda lemana, ihe hasho tandi kala ngeyi sigo aluhe!”

ONDA valelwa muParis shaFulaanisa mo 1974. Meme okwa li a mono ndje nuudhigu nomolwaashono uuluyi wandje owa li we ehamekwa. Kanda li handi vulu okwiinyengitha omagulu nomaako gandje nuupu nonda li handi popi nuudhigu. Konima onda kwatwa koshintona nonda kala wo handi kwatwa komikithi dhilwe nuupu.

Uukwanegumbo wetu owa li wa tembukile kuMelbourne shaAustralia manga ndi na oomvula mbali. Sho twa ningi ko oomvula mbali, tate okwe tu ekelehi noina kala we he tu sile oshimpwiyu. Shoka osho oshikando shandje shotango te dhimbulukwa nda li ndi uvite nda hedha lela popepi naJehova. Meme ngoka e li Onzapo yaJehova okwa li ha fala ndje aluhe kokugongala kwopaKriste hoka nda li ndi ilongo kutya Jehova okuhole ndje noku na ko nasha nangame. Ontseyo ndjoka nosho wo ohole ndjoka meme a li u ulukile ndje oya li ya ningitha ndje ndi kale ndi uvite nda gamenwa nonando onkalo yetu oya li ya lunduluka.

Meme okwa li a longo ndje okugalikana kuJehova. Okugalikana okupu nokuli kungame shi vulithe okupopya. Uuna tandi galikana, ihashi kala oshidhigu kungame molwaashoka ohandi galikana owala momutima. Molwaashoka ohandi popi nuudhigu ohashi mbilipaleke ndje sho ndi shi shi kutya Jehova ohu uvu ndje nuuna tandi galikana momutima nenge te kokoma.—Eps. 65:2.

Nkene handi ungaunga nuupyakadhi

Sho nda ningi oomvula ntano, onda li nda pumbwa okutulwa iitenda momagulu opo ndi kale te vulu okweenda molwaashoka onkalo yandje oya li ya nayipala. Onda li handi ende tandi tengenya noonkondo. Sho nda gwanitha oomvula 11 kanda li he vulu we nokweenda. Konima onda ka kala ihaandi vulu okuza ko kombete kungame mwene nondali ndi na okuyelululwa ko kokashina e ta ka tula ndje mokatemba ha ka ende ku ko kene ngele ndi inyengitha okangela.

Eeno, odhoshili kutya ethimbo limwe uulema wandje ohawu yemateke ndje. Ihe ohandi dhimbulukwa oohapu ndhoka hatu popi muukwanegumbo okwiitsa omukumo tadhi ti: “Ino kala nokwiipula niinima mbyoka itoo vulu okuninga. Ihe ninga owala shoka to vulu.” Shika osha kwathela ndje ndi kale handi vulu okuninga iinima ngaashi, okukayila oonkambe, okuhinga okambautu, okudhuga okawato, okuya kefudho komahala hoka haku dhikwa ootenda, nokuhinga nokuli uuhauto wokwiinyanyudha mehala lyi ikalekelwa. Ondi hole okupainda, okuhondja nokuhonga iiyuma.

Omolwuulema wandje wa kwata miiti, yamwe oya kala ya limbililwa ngele ote vulu ngaa okulongela Kalunga. Sho nda li ndi na oomvula 18, omulongisikola gumwe okwa li a ladhipike ndje ndi tembuke mo megumbo opo anuwa ndi fadhuke po elongelokalunga lyameme. Okwa li nokuli a ti kutya ota kongele ndje ehala lyokukala. Onda li nde mu lombwele kutya kandi na esiku ndi thige po eitaalo lyandje nonokutya megumbo ote zi mo owala uuna ndi ilongekidha okukala ongame awike.

Nziya konima yaashono, onda li nda ninginithwa nonda ningi gumwe gwomOonzapo dhaJehova. Konima yoomvula mbali, onda tembukile kegumbo limwe eshona hoka handi mono ekwatho ndyoka nda pumbwa nondi li kungame mwene.

Oshinima shoka nda li inaandi tegelela

Momukokomoko gwoomvula onda kala handi mono omashongo galwe. Esiku limwe onda li nda haluka noonkondo sho omulongwa omukwetu ngoka naye a lemana a li a pula a hokane ndje. Petameko osha li sha nyanyudha ndje. Ngaashi aakadhona ooyakwetu nangame ohandi kala nda hala okumona kuume kopandjokana. Ihe molwaashoka atuhe otwa lemana itashi ti kutya ondjokana yetu otayi ka kala yi na elago. Ye ishewe omumati ngoka ke shi gweitaalo lyandje. Eitaalo lyandje, omaipyakidhilo nomalalakano gandje itaga tsu kumwe noge. Onkee ano, katwa li tatu vulu okuhokana. Onda li wo nda tokola toko ndi vulike koohapu dhaKalunga ndhoka tadhi ti kutya otu na owala okuya mondjokana nomwiitaali omukwetu. (1 Kor. 7:39) Onkee ano, omumati nguka onde mu lombwele nombili kutya itatu vulu okuhokana.

Sigo onena ondi shi shi kutya onda ninga etokolo lyopandunge. Ondi na uushili kutya otandi ka kala nda nyanyukwa muuyuni uupe waKalunga mboka e tu uvanekela. (Eps. 145:16; 2 Pet. 3:13) Ihe manga tu li muuyuni mbuka onda tokola toko okukala omudhiginini kuJehova nokukala nda gwanenwa nonkalo ndjoka ndi li muyo.

Onda yuulukwa esiku ndyoka tandi ka za mo mokatemba nokumatuka shokapundja. Otandi ka igidha te ti: “Onda li nda lemana, ihe ngashingeyi ondi na uukolele sigo aluhe!”