Mbela okulonga niinima ya nika uumpulile okwa puka?

Manga Barbaraa a li omugundjuka okwa kala ha mono omamoniko, hu uvu omawi, nokwa li i itaala kutya oha popi naakwanezimo ye mboka ya sa nale. Ye nomusamane gwe Joachim, oya li haya lesha omambo ge na ko nasha nuulodhi noya li ya ningi ookapyoko mokufatulula uukalata mboka hawu lombwele aantu kutya onkalamwenyo yawo otayi ka kala ngiini. Uukalata owa li we ya ulukile kutya oya li taya ka kala ye na oshimaliwa, noya li ye shi mono tuu shili okupitila mongeshefa yawo. Esiku limwe uukalata owe ya londodha kutya megumbo lyawo otamu ke ya aantu ya nika oshiponga nowa li we ya lombwele nkene ye na okwiigamena kaantu mboka.

NONANDO okwiitaala muulodhi otaku vulu okukala taku monika kwa fa oshinima shonkuluyonale, aantu oyendji oya hala okukala ye na oonkondo kaadhi shi owala ndhoka dhopaunshitwe. Aantu oyendji ohaya zala iiketi, haya tala muukola nenge moonkinda, nokuya koonganga opo dhi ya lombwele kutya onakuyiwa yawo otayi ka kala ngiini nenge yi igamene kuuwinayi. Oshitopolwa shimwe shoka shi na oshipalanyolo “Oleptopa naLusifa” sha li moshifokundaneki shaNdowishi shedhina Focus, osha ti: “Ointaneta otayi ningitha uulodhi wu kale wa hokiwa unene.”

Owu shi shi ngaa kutya Ombiimbeli oya popya kombinga yuumpulile? Shoka tayi ti kombinga yoshinima shoka otashi vulika shi ku kumithe.

Shoka Ombiimbeli tayi ti kombinga yuumpulile

Ompango ndjoka Kalunga a li a pe oshigwana she, Israeli shonale, oya ti: “Ino pitika aantu yoye ya nonome nenge ya anekele, ya kale nuumpule nenge ya lye omayuku, ya tikile nenge ya pule iihehelela, oombepo dhuumpulile nenge aathithi. OMUWA Kalunga koye oha tondo aantu mboka haa ningi iinima mbika iinyanyalithi.” (Deuteronomium 18:10-12) Omolwashike ompango yaJehova yi li ompinge thiluthilu nuumpulile?

Ngaashi oshimoniwa shoka shi li petameko tashi shi ulike, aantu oyendji oyi itaala kutya aanamwenyo otaya vulu okupopya noonakusa nosho wo kutya uuyelele mboka haya mono okupitila muumpulile ohawu zi koonakusa. Omaitaalo ga tya ngaaka oga kankamena kwaashoka hashi longwa komalongelokalunga kutya omuntu ngele a si oha ka kala ishewe e na omwenyo megulu nenge moheli. Ihe mepingathano nelongo ndyoka, Ombiimbeli oya popi sha yela ya ti: “Aasi itaa tseya sha nando.” (Omuuvithi 9:5) Oya popi kutya oonakusa oya fa ye li mokati koomposi oondhigu, kaaye shi kutya oshike tashi ningwa momudhingoloko.b (Mateus 9:18, 24; Johannes 11:11-14) Ngele osho shi li ngawo, otashi vulika wu pule to ti, ongiini kombinga yaantu mboka haya ti ohaya popi noonakusa? Ohaya kala taya popi noolye nani?

Okuninga omakwatathano niishitwa yopambepo

Omahokololo gomavaangeli otagu ulike kutya sho Jesus a li kombanda yevi okwa li a popi naantu yopambepo. Markus 1:23, 24 okwa popi kombinga yaasho “ombepo ya nyata” ya lombwele Jesus ya ti: “Ondi ku shi [kutya ongoye lye].” Nangoye oombepo odhi ku shi. Ihe mbela ngoye owu dhi shi?

Manga Kalunga inaa shita aantu yopanyama, okwa li a shiti aamati yopambepo oyendjiyendji, nenge tu tye aayengeli. (Job 38:4-7) Aayengeli oye na omalutu ge vule getu kokulekule. (Aahebeli 2:6, 7) Oye na oonkondo nosho wo oondunge dhi vule dhetu, noya shitwa opo ya longe ehalo lyaKalunga. Omupisalomi okwi imbi a ti: “Hambeleleni OMUWA, ne aayengeli oofule naanankondo, mbo hamu fala omalombwelo ge nohamu vulika koohapu dhe.”—Episalomi 103:20.

Ombiimbeli otayi popi kutya mokweendela ko kwethimbo aayengeli yamwe oya ka tameka okukwatathana naantu yokombanda yevi inaaya pewa epitikilo kuKalunga. Onelalakano lyashike mbela? Omuyengeli ngoka a li e shi ningi tango okwa li a longitha iifundja opo a gamune ko aantu yotango, Adam naEva, kuKalunga omushiti gwawo. Moku shi ninga, okwi iningi Satana Ondiaboli, omulundili nomupataneki gwaKalunga.—Genesis 3:1-6.

Konima, aayengeli yalwe oya li ya ‘thigi po omahala gawo yene’ megulu, e tayi ikuthile omalutu gopanyama, e taya kala naakadhona aawanawa kombanda yevi. (Judas 6; Genesis 6:1, 2) Aayengeli mbaka aashunimonima noyana aanankondo mboka ye ya vala naakiintu yokombanda yevi oya li haya hepeke aantu, naashika osha li sha ningitha ‘iikolokosha yi taandele shaampoka’ kombanda yevi. Otashi vulika wu shi ehokololo lyOmbiimbeli kombinga yankene Kalunga a li a hulitha po aantu mbeyaka aakolokoshi neyelu pethimbo lyaNoowa.—Genesis 6:3, 4, 11-13.

Omeya geyelu oga li ga ningitha iishitwa mbika yopambepo yi kuthe ishewe omalutu gawo gopambepo opo yi shune megulu. Ihe Omushiti ine yi etha yi shune ‘pomahala gawo’ mpoka ya li tango. Pehala lyaashono oya li ya tulwa monkalo ya shunduka ndjoka tayi yelekanithwa ‘nomilema dhomuule.’ (2 Petrus 2:4, 5) Ombiimbeli otayi popi aayengeli mboka aanashipotha kutya “oompwidhuli” nenge oondeemoni. (Jakob 2:19) Oompwidhuli ndhoka odho hadhi gandja oonkondo dhokulonga iinima yuumpulile.

Shoka oompwidhuli dha hala

Elalakano lyoombepo dha nyata ndhoka hadhi popi naantu olyo oku ya ningitha kaaya longele Jehova, Kalunga kashili. Omagano nenge oonkondo ndhoka oyendji mboka haya longo nuumpulile haya ti oye na ohadhi ningitha owala aantu kaaya mone ontseyo yashili kombinga yaKalunga nokaaya pange uukuume naye.

Elalakano lyadho etiyali otali vulu okwiimonikila sho Satana, omuwiliki gwadho, a li a kambadhala okumakela Jesus. Satana okwa li a hala a pe Jesus “omapangelo agehe gomuuyuni nomasimano gago.” Mbela Satana okwa li a hala a ningilwe shike? Okwa lombwele Jesus a ti: ‘Tsila ndje oongolo e to galikana ndje.’ Ano Satana noompwidhuli oya hala okukala taya galikanwa. Ihe Jesus ka li a taamba ko edhiladhilo ndyoka lyokweetha po Kalunga nosho wo elongelokalunga lyashili.—Mateus 4:8-10.

Kunena oombepo dha nyata ihadhi popi we naanaa naantu momukalo ngoka Satana a li a popi naJesus. Pehala lyaashono, ohadhi kambadhala okuyula mboka inaaya kotoka okupitila miinima mbyoka tayi monika ya fa inaayi nika oshiponga, ngaashi okutala momukonda, okulongitha iiketi, okutala mokakola nenge monkinda, okutongolola oondjila dhopeke nokulesha oonyothi dhoomwedhi dhomavalo (horoscopes). Ino etha wu pukithwe kiinima ya tya ngaaka. Itayi tu kwathele nando tu tseye iinima mbyoka kaayi shiwike. Oombepo dha nyata ohadhi longitha iinima yi na ko nasha nuulodhi mbyoka yi holike kaantu opo dhi ya kwate ko nelalakano lyoku ya gamuna ko kokulongela Jehova. Ngele odha mono kutya omwigo gwadho inagu pondola, oombepo dha nyata ohadhi monitha iihuna mboka ye na ekwatathano nadho. Ngele nangoye owu li monkalo ya tya ngaaka, oshike to vulu okuninga opo wu manguluke ko kenwethomo lyoombepo dha nyata?

Shoka tashi vulu okukwathela omuntu a manguluke ko kiinima yuumpulile

Oombepo ndhoka hadhi popi naantu odhi li aatondi yaKalunga nodha tegelela oku ka hanagulwa po. (Judas 6) Ohadhi fundju nohadhi iningitha dha fa aantu mboka ya sa. Oto ka kala wu uvite ngiini ngele owa dhimbulula kutya kuume koye oha kala ti iningitha a fa e na ko nasha nangoye, ihe nani okwa hala owala oku ku keelela kuu ninge shoka tashi ku etele uuwanawa? Oto ka ninga po shike ngele owi iyadha wu na ekwatathano mOintaneta naamboka hayi ihumbata ya fa iilikama ngele tashi ya pomilalo? Okukala nekwatathano noompwidhuli osha nika oshiponga shi vulithe nokuli okukala nekwatathano naantu ya tya ngaaka. Owa pumbwa okuninga ashihe shoka to vulu opo wu ethe po okukwatathana noompwidhuli. Oshike wa pumbwa okuninga po?

Aantu yamwe yomuEfeso shonale sho yi ilongo mOmanyolo kutya uumpulile owa puka oya mono kutya osha pumbiwa ya hanagule po omambo gawo ge na ko nasha nuumpulile, nonando oga li ge na ondilo. Oye ga “fike po montaneho yaantu ayehe.” (Iilonga 19:19, 20) Kunena iinima mbyoka yi na ekwatathano nuulodhi inayi kwatela mo owala omambo, okulongitha iiketi, okutala momukonda, nosho wo iikwawo yilwe, ihe oya kwatela mo wo iinima yilwe hayi adhika mookompiuta nomiikwangodhi. Henuka kehe shimwe shoka tashi monika sha fa shi na ekwatathano niinima yi na ko nasha nuumpulile.

Oto dhimbulukwa aaihokani mboka ya popiwa petameko lyoshitopolwa shika? Uukalata wawo mboka hawu lombwele aantu nkene onkalamwenyo yawo tayi ka kala owe ya ulukile kutya aantu ya nika oshiponga oya li taye ke ya kegumbo lyawo, ihe kaye na okupulakena kuyo nenge ya taambe shoka taye ke ya pa. Ihe sho Connie naGudrun, yaali yomOonzapo dhaJehova, ye ya pegumbo lyawo e ta ye ya lombwele kutya oye ya etela onkundana ombwanawa kombinga yaKalunga, Joachim naBarbara oya tokola ya pulakene. Sho taya kundathana nooConnie, oya li wo ya kundathana kombinga yuumpulile, e ta ye ya pe uuyelele womondjila okuza mOmanyolo kombinga yoshinima shoka. Oya tameke okukala haya kundathana kombinga yOmbiimbeli pandjigilile.

Nziya Joachim naBarbara oya li ya tokola ye ethe okukala ye na ekwatathano noompwidhuli. Oonzapo odha li dhe ya yelithile kutya oombepo dha nyata itadhi ka kala dhe ya nyanyukilwa ngele osho ya ningi. Joachim naBarbara oya li shili ya monithwa iihuna koompwidhuli sho dha kala hadhi ya ponokele noku ya ningila iinima iitilithi. Sho opo ya tameke okukonakona, ongulohi kehe kaya li haya kotha sigo oosho ya ka tembukila kegumbo lilwe. Momukokomoko aguhe gwiikumungu yawo oya kala ye na einekelo moohapu ndhoka dhi li mAafilippi 4:13 ndhoka tadhi ti: “Otandi vulu shaa shoka, oshoka [Kalunga] ota koleke ndje.” Jehova okwa li a laleke nuuyamba etokolotoko lyawo, noombepo dha nyata osho ngaa nduno dhe ke etha po oku ya monitha iihuna. Kunena Joachim naBarbara otaya longele Jehova Kalunga kashili ya nyanyukwa.

Omanyolo otaga kumagidha ayehe mboka ya hala okulalekwa nuuyamba kuJehova taga ti: “Vulikeni . . . kuKalunga. Kondjitheni Satana, oye note mú yi ontuku. Hedheni kuKalunga, oye nota hedha kune.” (Jakob 4:7, 8) Jehova Kalunga ota vulu oku ku kwathela wu manguluke ko kenwethomo lyoompwidhuli note ke shi ku ningila ngele owa hala shili okumanguluka ko kudho. Kokutala kunkene ya li ya vulu okumanguluka ko kuumpulile, Joachim naBarbara otaya vulu okukoleka uushili woohapu ndhoka dhi li Episalomi 121:2: “Ekwatho lyandje otali zi kOMUWA.”

[Omanyolo gopevi]

[Oohapu dha simana pepandja 11]

Okulonga niinima yi na ko nasha nuulodhi ohaku imbi aantu kaaya pange uukuume naKalunga

[Oohapu dha simana pepandja 12]

“Hedheni kuKalunga, oye nota hedha kune.”—JAKOB 4:8