Longela Kalunga kemanguluko

“Ohole yokuhola Kalunga oyo okuvulika kiipango ye. Iipango ye kayi shi iidhigu kutse.”—1 JOH. 5:3.

OTO VULU OKUYAMUKULA?

Satana oha kambadhala ngiini okuninga oompango dhaKalunga dhi kale dha fa oondhigu?

Omolwashike tu na okukotokela mboka hatu endathana nayo?

Oshike tashi ke tu kwathela tu kale aadhiginini kuKalunga kemanguluko?

1. Jehova okwa tala ko emanguluko ngiini, nokwe shi ulike ngiini mokuungaunga naAdam naEva?

JEHOVA oye owala a manguluka lelalela. Ihe emanguluko lye ohe li longitha momukalo gu uka. Iha konenene okanima kehe hoka aapiya ye taya ningi. Pehala lyaashono, okwe ya pa emanguluko lyokuninga omatokolo, opo ya vule okugwanitha po omahalo gawo ngoka gu uka. Pashiholelwa, Kalunga okwa li owala a pe Adam naEva oshipango shimwe kaaya lye “komuti gwokutseya uuwanawa nuuwinayi.” (Gen. 2:17) Oya li ye na emanguluko lya gwana noya li taya vulu okugwanitha po ehalo lyOmushiti gwawo.

2. Omolwashike aakuluntu yetu yotango ya kanitha emanguluko ndyoka ya li ya pewa kuKalunga?

² Omolwashike Kalunga a li a pe aakuluntu yetu yotango emanguluko lya gwedhwa po? Oshinima shimwe, okwe ya shita oshifetha she ye na omaiyuvo nokwa li i inekela kutya ohole ndjoka ye mu hole nayo e li Omushiti gwawo otayi ke ya wilika ya vulike kuye momukalo gu uka. (Gen. 1:27; Rom. 2:15) Mupya munene, Adam naEva kaya li ye na olupandu okupandula Omushiti gwawo ngoka e ya pa omwenyo nemanguluko. Oya hogolola emanguluko lyaSatana ya tokole kuyo yene kutya oshike shi li mondjila noshike sha puka. Pehala lyokumona emanguluko, oyi ilanditha po muupika wuulunde nosho wo oluvalo lwawo, moka natse twa kwatelwa. Okwaavulika kwawo okwe eta iilanduliko iiwinayi.—Rom. 5:12.

3, 4. Satana oha kambadhala ngiini oku tu pukitha kaatu vulike komithikampango dhaJehova?

³ Satana ota vulu wo oku tu pukitha kunena. Okwa pukitha nale aakuluntu yetu yotango ya gwanenena kaaya vulike kuunamapangelo waKalunga. Okwa pukitha wo aayengeli oyendji. Iineya ye inayi lunduluka nokunena. Oha kambadhala oku tu pukitha tu dhiladhile kutya omithikampango dhaKalunga omidhigu, dho itadhi tu etele enyanyu nombili. (1 Joh. 5:3) Shika otashi vulu oku tu vulitha ngele ohatu kala aluhe naantu mboka ye na etaloko ndyoka. Omumwameme gwoomvula 24, ngoka a li a yi moluhondelo, okwa ti: “Onda li nda nwethwa mo nayi koomakula, molwaashoka onda li nda tila okukala nda yooloka ko kuyo.” Otashi vulika nangoye she ku ningilwa.

⁴ Shinikitha oluhodhi osho kutya nomegongalo lyopaKriste otamu vulu okukala yalwe mboka ye li enwethomo ewinayi. Omumwatate gumwe omugundjuka okwa ti: “Ondi shi aagundjuka yamwe megongalo mboka ya li ye na aamati naakadhona kaaye shi ooitaali. Konima yethimbo, oya nwetha ndje mo, molwaashoka otwa li hatu kala pamwe nayo olundji. Ekwatathano lyandje naKalunga olya tameke okunkundipala. Kanda li we handi nyanyukilwa okugongala, nomuukalele onda li handi ki ihela mo owala. Onda hulitha po eendathano nayo.” Owu shi wete nduno nkene mboka ho eendathana nayo taya vulu oku ku nwetha mo? Natu tale koshiholelwa shimwe shi li mOmbiimbeli shoka tashi tu kwathele.—Rom. 15:4.

ABSALOM OKWA YULU OOMWENYO DHAWO

5, 6. Absalom okwa li a pukitha yalwe ngiini, niineya ye oya li ngaa ya pondola?

⁵ MOmbiimbeli omu na iiholelwa yaantu oyendji mboka ya li ye na enwethomo ewinayi. Gumwe gwomuyo oAbsalom, omwanamati gwomukwaniilwa David. Absalom okwa li e na ondjelo ombwanawa. Ihe konima yethimbo okwa li a kwatwa kolwiiho lwa fa lwaSatana. Absalom okwa li a hala okuyuga ko uukwaniilwa kuhe, oshinima shoka a li inaa pewa.a Okwa li te shi ningi momukalo gwiineya sho iningi a fa e na ko nasha nAaisraeli nongo a hala oku ya kwathela, nokwa kunu muyo omadhiladhilo kutya he, omukwaniilwa David, ke na nayo. Absalom okwa li a lundile he, nokwi iningi a fa e hole oshigwana. Okwa ningi naanaa shoka sha li sha ningwa kOndiaboli moshikunino shaEden.—2 Sam. 15:1-5.

⁶ Mbela Absalom okwa li ngaa a pondola niineya ye? Eeno, okwa li a pondola kashona, molwaashoka Ombiimbeli otayi ti: ‘Osho ngeyi Absalom okwa yulu oomwenyo dhAaisraeli.’ (2 Sam. 15:6, OB-1954) Ihe lwahugunina okwa ka sindika. Shinikitha oluhodhi, oshinima shoka oshe mu fala meso nosho wo aantu omayuvi mboka a li a yulu.—2 Sam. 18:7, 14-17.

7. Mehokololo lyaAbsalom otatu ilongo mo shike? (Tala ethano pepandja 14.)

⁷ Omolwashike Absalom a li a pukitha Aaisraeli nuupu? Otashi vulika ya li ya hala iinima mbyoka Absalom e yu uvanekela. Nenge ya li ya hokwa ondjelo ye. Kutya nduno oshike sha li she ya pukitha, uushili owo kutya kaya li aadhiginini kuJehova, nokomukwaniilwa gwe ngoka a langeka po. Kunena, Satana onkee ngaa ta tsikile okulongitha “ooAbsalom” yopathaneko ya yule oomwenyo dhaapiya yaJehova. Otashi vulika ye tu lombwele taya ti: ‘Omithikampango dhaJehova odhe mu ngambeka unene. Kamu wete kutya aantu ayehe mboka ihaaya longele Jehova otaya tyapula nawa.’ Mbela iifundja ya tya ngawo oto ke yi kwata mo ngaa e to kala omudhiginini kuJehova? Mbela oto ke shi mona ngaa kutya ‘ompango ya gwanenena’ yaJehova, sha hala okutya, ompango yaKristus oyo owala tayi vulu oku ku etela emanguluko? (Jak. 1:25) Ngele osho, kala wu yi hole nokulongitha emanguluko lyoye momukalo ngoka tagu nyanyudha Jehova.—Lesha 1 Petrus 2:16.

8. Iiholelwa yini tayi ulike kutya okudhina omithikampango dhaJehova ihaku etele omuntu ombili?

⁸ Aagundjuka oyo unene ye li iihakanwa yaSatana. Omumwatate gumwe, ngoka e na omimvo 30 nasha, ota hokolola ethimbo a li e na omimvo omulongo nasha ta ti: “Onda li nda tala ko omithikampango dhaJehova dhopamikalo dhi li engambeko, nokadhi na egameno lyasha.” Okwa li a yi moluhondelo, ihe inashi mu etela ombili yasha. Okwa ti: “Onda kala nokwi ipa uusama nonda yemata uule woomvula odhindji.” Omumwameme gumwe ngoka a li a hondele sho e na oomvula omulongo nasha okwa nyola a ti: “Konima yethimbo onda kala nda yemata nondu uvite kaandi na oshilonga shasha. Nokuli nongashingeyi sho ndi na oomvula 19, ohandi shi dhimbulukwa.” Omumwameme gulwe okwa ti: “Sho nda mono kutya eihumbato lyandje olye ehameka nayi aantu mboka ndi hole, osha li sha gumu ndje nayi pamadhiladhilo, pambepo nopamaiyuvo. Oshinima oshiwinayi noonkondo okukala ino hokiwa kuJehova.” Satana iha kala a hala omuntu wu dhiladhile kiilanduliko yokuyona.

9. (a) Omapulo geni tage tu kwathele tu konakone etaloko lyetu li na ko nasha naJehova nosho wo oompango nomakotampango ge? (b) Omolwashike okutseya Kalunga nawa kwa simana?

⁹ Iizemo ohayi kala iiwinayi uuna gumwe itaa landula omithikampango dhaJehova. Aagundjuka oyendji naakuluntu yamwe moshili oye shi ningilwa. (Gal. 6:7, 8) Ipula to ti: ‘Ohandi dhimbulula ngaa omikalo dhiineya ndhoka Satana ha longitha a pukithe ndje? Mbela Jehova onde mu tala ko ngaa e li Kuume kandje kopothingo, nonokutya oha popi aluhe oshili nokwa halela ndje uuwanawa aluhe? Mbela ondi shi shi ngaa kutya ke na siku i indike ndje sha oshiwanawelela notashi etele ndje ombili yashili?’ (Lesha Jesaja 48:17, 18.) Ngele owu shi Jehova nawa, oto ka yamukula kutya eeno. Owa pumbwa oku mu tseya shili nokukala wu shi kutya oompango nomakotampango ngoka ge li mOmbiimbeli okwe ga tula mo, molwaashoka e ku hole, ihe haku ku ngambeka.—Eps. 25:14.

GALIKANA WU PEWE OWINO NOMUTIMA GU NA EVULIKO

10. Omolwashike tu na okuninga oonkambadhala tu holele omukwaniilwa Salomo sho a li omugundjuka?

¹⁰ Sho Salomo a li omugundjuka, okwa li a galikana neifupipiko a ti: “Ngame omunona, kandi shi kulela.” Onkee ano, okwa li i indile owino nomutima gu na evuliko. (1 Aak. 3:7-9, 12) Jehova okwa li a yamukula egalikano lyaSalomo. Ote ke ku yamukula wo uuna to mu pula kutya nduno owu li omugundjuka nenge omukokele. Jehova ite ke ku pa nando uunongo nomayele pashikumithalonga. Ihe ote ku pe owino ngele oho konakona Oohapu dhe, ho galikana wu pewe ombepo ye ondjapuki nongele oho iipalutha niikulya yopambepo mbyoka hayi gandjwa okupitila megongalo lyopaKriste. (Jak. 1:5) Eeno shili, Jehova oha pe aapiya ye omayele kutya nduno aagundjuka. Otaya vulu nokuli okukala ye na owino yi vule noyaakuluntu mboka ihaaya longele Jehova nosho wo mboka hayi ithanwa aniwa “aanongo naanamayele” yuuyuni mbuka.—Luk. 10:21; lesha Episalomi 119:98-100.

11-13. (a) Oshike sha simana tatu ilongo mEpisalomi 26:4, mOmayeletumbulo 13:20 nomAakorinto yotango 15:33? (b) Ongiini to vulu okutula miilonga omakotampango ngoka ge li momanyolo moka?

¹¹ Natu taleni omanyolo taga landula tu mone nkene okukonakona Ombiimbeli kwa simana nokutedhatedha kwaashoka tatu ilongo, taku tu kwathele tu tseye nawa Jehova. Enyolo kehe oli na ekotampango lya simana shi na ko na sha naamboka hatu endathana nayo. “Kandi na uukuume naantu yaa fele; kandi na ko nasha naainingithi.” (Eps. 26:4) “Enda pamwe naanawino u likole owino, ihe ngoka ta kala paagoya, ota likola uuwinayi.” (Omayel. 13:20) “We ende nombudhi, nangoye oto ningi ombudhi.”—1 Kor. 15:33.

¹² Momanyolo ngoka otatu ilongo mo shike sha simana? (1) Jehova okwa hala tu kale hatu hogolola nawa mboka tatu endathana nayo. Okwa hala oku tu gamena kiinima ayihe mbyoka tayi vulu oku tu ehameka nokuyona po ekwatathano lyetu naye. (2) Aantu mboka hatu endathana nayo ohaya vulu oku tu nwetha mo nawa nenge nayi. Oshinima shoka oshoshili. Oovelise ndhoka dha tumbulwa metetekelo otadhi ulike kutya Jehova oku na ko nasha noomwenyo dhetu. Ngiini mbela? Moovelise ndhoka kamu na nando omautumbulilo taga ti: “Ino shi ninga nando . . . ” Ihe omu na omalombwelo goshili ge li paunathangwa. Jehova ote tu lombwele moovelise ndhoka ta ti: ‘Oshili oyo ndjika. Oto ki inyenga ngiini kuyo? Oshike shi li momutima gwoye?’

¹³ Molwaashoka oovelise ndhoka ndatu odhi li paushili, ihadhi kwishi, otadhi longo notadhi vulu oku tu kwathela moonkalo odhindji. Ipula to ti: Ongiini tandi vulu okuhenuka eendathano noohandimwe mboka ‘hayi iningitha’? Oomonkalo dhini tandi vulu okweendathana naantu ya tya ngaaka? (Omayel. 3:32; 6:12) Oolye ‘aanawino’ mboka Jehova a hala ndi endathane nayo? Oolye ‘aagoya’ mboka a hala ndi yande? (Eps. 111:10; 112:1; Omayel. 1:7) Ngele oho “ende nombudhi” otayi vulu ngaa mbela oku ku nwetha mo? Mbela aantu yomuuyuni oyo owala haya vulu oku tu nwetha mo nayi? (2 Pet. 2:1-3) Oto yamukula ngiini omapulo ngaka?

14. Ongiini to vulu okuhwepopaleka Esiku lyElongelokalunga lyUukwanegumbo woye?

¹⁴ Sho wa lesha omanyolo ngoka gatatu, omolwashike itoo konakona omanyolo galwe wu mone omadhiladhilo gaJehova moshinima shoka she ku pamba nenge sha guma egumbo lyoye?b Aavali, kundathaneni iitopolwa mbyoka mEsiku lyElongelokalunga lyUukwanegumbo. Sho tamu shi ningi, elalakano lyeni nali kale okukwathela kehe gumwe megumbo a kale e na olupandu lwomuule lwohole yaKalunga ndjoka e tu hololela miipango ye nomomakotampango ge. (Eps. 119:72) Oshinima shoka otashi ka hedhitha aanegumbo popepi naJehova notaya ka kala ya hangana.

15. Ongiini to vulu okumona kutya owu na owino nomutima gu na evuliko?

¹⁵ Ongiini to vulu okumona kutya owu na owino nomutima gu na evuliko? Omukalo gumwe moka to vulu oku shi ninga omokuyelekanitha omadhiladhilo goye nogaapiya mboka ya li ko nale, ngaashi omukwaniilwa David ngoka a nyola a ti: ‘Kalunga kandje, ondi hole okugwanitha ehalo lyoye! Otandi dhiginine elongo lyoye nomutima gwandje.’ (Eps. 40:8) Omunyoli gwEpisalomi 119 okwa ti: ‘Ompango yoye ondi yi hole ngiini! Ohandi yi dhiladhila esiku alihe.’ (Eps. 119:97) Ohole ndjoka ihayi ya owala ngeya. Ohayi koko uuna ho konakona muule, ho galikana, ho tedhatedha nokumona nkene Jehova e ku laleka nuuyamba sho ho vulika komakotampango ge.—Eps. 34:8.

NATU KONDJELENI EMANGULUKO LYETU LYOPAKRISTE

16. Oshike tu na okukala tu shi ngele otwa hala okusindana mekondjo lyetu tu ye memanguluko lyashili?

¹⁶ Mondjokonona, iigwana oyindji oya kala nokutilahi ombinzi sho tayi kondjele omamanguluko gayo. Mbela natse katu na okukondjela emanguluko lyetu lyopaKriste twa mana mo? Otu na okukala tu shi kutya Satana, uuyuni nosho wo ombepo yawo ya nyata hayo ayeke aatondi yetu. Opu na wo onyama yetu ndjoka inaayi gwanenena mwa kwatelwa omutima gwetu omunamakoto. (Jer. 17:9; Ef. 2:3) Ihe kekwatho lyaJehova otatu vulu okusindana. Esindano kehe kutya nduno eshona nenge enene otali ke tu etela iizemo iyali iiwanawa. Tango, oto ka nyanyudha omutima gwaJehova. (Omayel. 27:11) Olutiyali, sho to vulika ‘kompango ya gwanenena yokumangulula’ yaKalunga, oto ka kala wa tokola toko wu kale nokweenda ‘mondjila ndjoka ya thinana’ tayi fala komwenyo gwaaluhe. Konahiya, oto ka ya memanguluko ndyoka Jehova ta ka pa aapiya ye aadhiginini monakuyiwa.—Jak. 1:25; Mat. 7:13, 14.

17. Omolwashike okwaagwanenena kaaku na oku tu teya omukumo, naJehova ohe tu pe ekwatho lini?

¹⁷ Atuheni ohatu ningi omapuko olundji. (Omuuv. 7:20) Ngele twa ningi epuko, inatu teka omukumo nenge tu sholole. Natu li opaleke owala nenge tu pule ekwatho kaakuluntugongalo. Jakob okwa nyola a ti: “Egalikano lyomwiitaali otali aludha omuvu. Omuwa ota galulile omuvu uundjolowele we, noondjo dhe otadhi dhimwa po.” (Jak. 5:15) Ino dhimbwa nando kutya Kalunga omunamutimahenda noye e ku eta megongalo lye, molwaashoka okwa mona uuwanawa wontumba mungoye. (Lesha Episalomi 103:8, 9.) Ngele owi inekela Jehova nomutima aguhe, ite ke ku iteka po nando.—1 Ondjal. 28:9.

18. Ongiini tatu vulu okukala metsokumwe negalikano lyaJesus ndyoka li li muJohannes 17:15?

¹⁸ Sho Jesus a li ta galikana uusiku we wahugunina pamwe naayapostoli ye 11 aadhiginini, okwa popi oohapu ndhoka kaadhi shi okudhimbiwa a ti: ‘Ya gamena kuMwiinayi.’ (Joh. 17:15) Jesus ka li owala ti ipula naayapostoli ye, ihe onaalanduli ye ayehe. Otatu vulu okukala nuushili kutya Jehova ota ka yamukula egalikano lyaJesus e tu gamene momathimbo ngaka omadhigu tu li mugo. “[Jehova] oye ehuuyanza lyaanashili. . . . Nomapola gaasilwahenda ye te ga gamene.” (Omayel. 2:7, 8) Okukala omunashili kashi shi oshipu, ihe oko owala ondjila ndjoka tayi fala komwenyo gwaaluhe nokemanguluko lyashili. (Rom. 8:21) Ino etha nando omuntu e ku kuthe mo mondjila ndjoka.

[Omanyolo gopevi]

[Omathano pepandja 14]

Ongiini tatu vulu okudhimbulula mo ooAbsalom yopathaneko kunena, nongiini tu na okukala twe ya kotokela?