Omikalo dheni nadhi kale ngaashi dhaalelwa yUukwaniilwa

“Omikalo dheni nadhi kale dho opalathana nevaangeli.”—FIL. 1:27.

OTO YAMUKULA NGIINI?

Oolye taya vulu okukala aalelwa yUukwaniilwa?

Otwa pumbwa okuninga shike kombinga yelaka lyUukwaniilwa, ondjokonona nosho wo oompango dhawo?

Aalelwa yUukwaniilwa ohayu ulike ngiini kutya oye hole omithikampango dhaKalunga?

1, 2. Omolwashike omayele gaPaulus kegongalo lyomuFilippi ga li ge na eityo lyi ikalekelwa?

OMUYAPOSTOLI Paulus okwa li a ladhipike egongalo lyokuFilippi li kale li na ‘omikalo dho opalathana nevaangeli.’ (Lesha Aafilippi 1:27.) Oshitya shOshigreka shoka sha tolokwa “omikalo” shoka Paulus a longitha otashi vulu wo okutolokwa ‘aalelwa nenge aakwashigwana.’ Uutumbulilo mboka owa li wu na eityo lyi ikalekelwa kaantu megongalo lyokuFilippi. Omolwashike? Omolwaashoka Filippi osha li shimwe shomiilando mbyoka ya hogololwa moka aakalimo yamo ya li ya pewa uukwashigwana waRoma. Mboka ya li ye na uukwashigwana waRoma muFilippi naamboka ya li mUukwaniilwa waRoma mo mwene, oya li yu uvite uuntsa sho ye na uukwashigwana mboka. Oya li wo ya gamenwa kompango yaRoma momukalo gwi ikalekelwa.

² Iilyo yomegongalo lyaFilippi oya li yi na omatompelo ogendji okukala yu uvite uuntsa. Paulus okwa li e ya dhimbulukitha kutya uukwashilongo wawo ye li aagwayekwa owu li “megulu.” (Fil. 3:20) Aagwayekwa kaya li aakwashigwana yepangelo lyopantu, ihe oyUukwaniilwa waKalunga. Onkee ano, oya li ya gamenwa noye na uuwanawa kaawu shi okuyelekwa nasha.—Ef. 2:19-22.

3. (a) Oolye ye na uuthembahenda wokukala aalelwa yUukwaniilwa? (b) Otatu ka taleni shike moshitopolwa shika?

³ Omayele gaPaulus ngoka taga ti kutya “omikalo dheni nadhi kale dho opalathana nevaangeli” oga nuninwa unene mboka taya ka pangela pamwe naKristus megulu. (Fil. 3:20) Ihe otaga longo wo nokwaamboka taya ka kala kombanda yevi ye li aalelwa yUukwaniilwa waKalunga. Omolwashike tatu tile ngawo? Omolwaashoka Aakriste ayehe mboka ya ninginithwa ohaya longele Omukwaniilwa gumwe, Jehova, yo ayehe oye na okuvulika komithikampango dha faathana. (Ef. 4:4-6) Kunena, aantu yamwe ohaya ningi ngaashi taya vulu ya mone uukwashigwana miilongo mbyoka iiyamba. Tse otu na okukala twa lenga lela uuthembahenda wetu wokukala aalelwa yUukwaniilwa. Opo tu kale tu na olupandu lwomuule moshinima shika, natu taleni kefaathano ndyoka li li pokati kiitegelelwa yokuninga omukwashigwana gwoshilongo shontumba nokuninga omulelwa gwUukwaniilwa waKalunga. Otatu ka taleni iinima itatu mbyoka tu na okuninga ngele otwa hala okukala twa lenga esimano lyokukala aalelwa yUukwaniilwa.

IITEGELELWA YOKUNINGA OMUKWASHIGWANA GWOSHILONGO SHONTUMBA

4. Elaka lya yogoka oshike, nohatu li ‘popi’ ngiini?

⁴ Oshitegelelwa shimwe osho okwiilonga elaka. Omapangelo gamwe ohaga pula omuntu ngoka a hala okuninga omukwashigwana gwalyo i ilonge elaka ndyoka hali popiwa unene moshilongo moka. Aantu yamwe mboka ya pewa uukwashigwana ohaya kambadhala ya mana mo uule womimvo ya kale haya popi nawa elaka ndyoka tayi ilongo. Ohashi vulika yi ilonge nziya oompango dhelaka, ihe otashi vulika shi ya pule ethimbo ele ya kale taya tumbula iitya nawa. Osha faathana naalelwa yUukwaniilwa, oye na okwiilonga elaka epe. Sefanja 3:9 (NW) ota ti: “Nena otandi ka lundulula aantu yomiigwana ya popye elaka lya yogoka, opo yi ithane edhina lyaJehova noye mu longele ye li epepe nepepe.” Elaka lya yogoka oshike? Olyo oshili kombinga yaKalunga nosho wo yomalalakano ge ngoka ge li mOmbiimbeli. Ngele tatu ihumbata metsokumwe noompango dhaKalunga nosho wo nomakotampango ge, nena otatu ‘popi’ elaka ndyoka. Aalelwa yUukwaniilwa waKalunga otaya vulu okwiilonga nziya omalongo gopetameko gOmbiimbeli e taya ninginithwa. Ihe konima yokuninginithwa oye na okuninga oonkambadhala ya ‘popye’ elaka lya yogoka nawa. Ngiini mbela? Omokukala haya ningi shoka shi li metsokumwe nomakotampango gOmbiimbeli.

5. Omolwashike sha pumbiwa twi ilonge ondjokonona yehangano lyaJehova?

⁵ Oshitegelwa oshikwawo, okwiilonga ondjokonona yoshilongo. Omuntu ngoka a hala uukwashigwana woshilongo shontumba ohashi vulika a pumbwa okwiilonga ondjokonona yepangelo lyasho. Osha faathana wo naamboka ya hala okukala aalelwa yUukwaniilwa waKalunga, oshi li nawa yi ilonge oshindji kombinga yawo. Oyanamati yaKorak mboka ya li haya yakula muIsraeli shonale, oye tu tulila po oshiholelwa oshiwanawa. Oya li ye hole noonkondo okukala muJerusalem, mehala lyelongelokalunga, nokuhokolola ondjokonona yasho. Oya li haya kala ya fuuka kwaashoka shi lilwe po koshilando shoka nokehala ndyoka lyelongelokalunga, ihe hakoondhopi nomamanya ngoka sha tungithwa. Jerusalem osha li “oshilando shomukwaniilwa omunene,” Jehova, molwaashoka osho sha li ondingandinga yelongelokalunga lya yogoka. Omo mwa li hamu longelwa aantu Ompango yaJehova. Jehova okwa li hu ulukile aantu mboka taya lelwa kaakwaniilwa yomuJerusalem esilohenda lye. (Lesha Episalomi 48:1, 2, 9, 12, 13.) Mbela owu na ehalo lyokukonakona nokuhokolola ondjokonona yoshitopolwa shehangano lyaJehova shokombanda yevi we ya fa? Shi thike ngaa mpoka to ilongo kombinga yehangano lyaJehova nosho wo nkene ha ambidhidha aapiya ye, opo ngaa pu thike Uukwaniilwa we tawu ningi wolela kungoye. Ehalo lyoye lyokuuvitha elaka etoye lyUukwaniilwa otali ka hwama noonkondo.—Jer. 9:24; Luk. 4:43, yelekanitha NW.

6. Omolwashike shi li pandjele sho Jehova a tegelela tu ilonge, tu vulike koompango dhUukwaniilwa we nokomakotampango ge?

⁶ Oshitegelelwa shilwe ishewe, okutseya oompango dhoshilongo shoka. Omapangelo ohaga kala ga hala aantu yi ilonge oompango dhoshilongo nokuvulika kudho. Oshi li pandjele sho Jehova a tegelela twi ilonge, tu vulike koompango nokomakotampango ge ngoka a tulila po aalelwa ye ayehe yUukwaniilwa. (Jes. 2:3; Joh. 15:10; 1 Joh. 5:3) Olundji moompango ndhoka dha totwa kaantu ohamu kala omapuko nokwaanuuyuuki. Ihe mepingathano naashoka, “ompango yOMUWA [oya gwanenena, NW].” (Eps. 19:7) Mbela ohatu yi nyanyukilwa tuu noku yi ilonga esiku kehe? (Eps. 1:1, 2) Otatu vulu owala oku yi ilonga uuna tatu yi konakona paumwene, ihe kapu na gumwe e na oku shi ninga peha lyetu.

AALELWA YUUKWANIILWA OYE HOLE OMITHIKAMPANGO DHAKALUNGA

7. Aalelwa yUukwaniilwa ohaya vulika komakotampango ga dhenga mbanda galye?

⁷ Opo tu kale aalelwa yUukwaniilwa, otwa pumbwa okutseya omithikampango dhaKalunga nokukala tu dhi hole. Aantu oyendji ohaya ti kutya oye hole oompango nomakotampango giilongo moka haya kala. Ihe ngele itaya tsu kumwe niitegelelwa yadho nenge ye wete kutya kapu na ngoka e ya wete, ohaye dhi taaguluka. Aantu mboka olundji ohaya kala owala ya hala ‘okuhokiwa’ kaantu. (Kol. 3:22) Aalelwa yUukwaniilwa ohaya vulika komakotampango ga dhenga mbanda. Ohaya vulika nehalo ewanawa koompango dhaKalunga, nonando kapu na aantu ye ya tala. Omolwashike haye shi ningile? Omolwaashoka oye hole Omutoti gwayo.—Jes. 33:22; lesha Lukas 10:27.

8, 9. Oshike tashi ku kwathele wu mone ngele owu hole shili oompango dhaKalunga?

⁸ Oshike tashi ku kwathele wu mone ngele owu hole shili oompango dhaKalunga? Okukonakona nkene ho inyenge uuna to pewa omayele miinima mbyoka wu wete kutya owu na okuninga ehogololo paumwene, ngaashi ngele tashi ya pomizalo nokwiiyopaleka. Omanga inoo ninga omulelwa gwUukwaniilwa, otashi vulika wa li ho zala nayi nenge ho zala omizalo tadhi hilile momilalo. Sho ohole yoye yokuhola Kalunga ye ende tayi koko, owa tameke okuzala momukalo ngoka tagu mu simanekitha. (1 Tim. 2:9, 10; 1 Pet. 3:3, 4) Otashi vulika ngashingeyi ho zala omizalo dhi shi okutalwa. Oto ka ninga po shike ngele omukuluntugongalo gumwe okwe ku lombwele kutya okuzala kwoye otaku pundukitha aauvithi oyendji megongalo? Mbela oto ki inyenga ngiini? Oto ki ipopila mbela nokukala wu mu nine nenge wu kukutike omutse gwoye? Ayehe mboka ye li aalelwa yUukwaniilwa ohaya holele Kristus. (1 Pet. 2:21) Omuyapostoli Paulus okwa nyola ta popi Jesus a ti: ‘Kehe gumwe gwomutse no opalele mukwawo omolwuuwanawa wamukwawo ngoka noku mu hokitha meitaalo. Oshoka Kristus ini iyopalela ye mwene.’ (Rom. 15:2, 3) Omukriste ngoka a pyokoka pambepo oha longele komayele ngoka ta pewa, nopwaana okukwatela onkone, opo a kaleke po ombili yegongalo.—Rom. 14:19-21.

⁹ Mbela ohatu tala ko ngiini ondjokana nosho wo omilalo dha nyata? Mboka kaaye shi aalelwa yUukwaniilwa waKalunga ohaya ti kutya uushenge, okutala omathano giipala, okuyona ondjokana nokuhengana iinima yopaumwene. Aalelwa yUukwaniilwa oye ekelahi thiluthilu omadhiladhilo gaa ukile gokwiihola mwene. Aakriste yamwe mboka ya li ye na eihumbato lya nyata, ngashingeyi oye shi kutya omilalo pokati kaaihokani nosho wo ondjokana oyi li omagano ga za kuKalunga. Oya simaneka omithikampango dhaJehova dha tumbala noye na uushili kutya kehe gumwe ngoka ta tsikile okukutha ombinga momilalo dha nyata ina gwana okukala omulelwa gwUukwaniilwa. (1 Kor. 6:9-11) Oye shi wo kutya omitima dhetu odhi na omakoto. (Jer. 17:9) Ohaya pandula uuna taya pewa omalondodho ngoka tage ya kwathele ya kale ye na omithikampango dhopamikalo dha dhenga mbanda.

AALELWA YUUKWANIILWA OHAYA PANDULA OMALONDODHO

10, 11. Epangelo lyaKalunga ohali tu londodha kiinima yini, noho kala wu uvite ngiini?

¹⁰ Epangelo ohashi vulika li londodhe oshigwana uuna pu na iikulya nomiti dha nika oshiponga. Otu shi shi kutya haikulya ayihe nomiti adhihe dha nika oshiponga. Ihe ngele opu na oshinima shontumba tashi vulu okweetela aakwashigwana oshiponga, epangelo ohashi vulika li gamene oshigwana moku shi londodha. Ngele epangelo inali shi ninga, otali ka kala li na ondjo. Epangelo lyaKalunga nalyo ohali tu londodha kiinima yontumba mbyoka tayi vulu oku tu etela oshiponga palutu nopambepo. Oshiponga shimwe shoka hatu londodhwa kusho, ointaneta ndjoka hayi longithwa momainyanyudho, melongo nosho wo mokukwatathana nayalwe. Ehangano lyaJehova ohali yi longitha wo. Olya pondola oshindji omolwayo. Kakele kaashono, kointaneta oku na omahala ogendji taga vulu okuyona po omikalo dhetu nuupambepo wetu. Kuyo ohaku ulikwa omathano giipala ngoka ga nika oshiponga kuupambepo waalelwa yUukwaniilwa. Ongundu yomupiya omudhiginini nomunandunge oya kala noku tu londodha uule womimvo odhindji kombinga yoshiponga shoka. Inatu pandula tuu komalondodho ngoka hage tu kwathele tu kale twa tonata pambepo!

¹¹ Oomvula opo dha zi ko opwa totwa omahala galwe kointaneta ngoka ge holike noonkondo kaantu notashi vulika ge ku etele uuwanawa ngele oto ga longitha nuukeka. Omahala ngoka gokuninga omakwatathano kointaneta oga nika wo oshiponga lela. Otaga vulu oku tu nwetha mo tu kale hatu endathana nookuume aawinayi. (1 Kor. 15:33, OB-1954) Onkee ano, ehangano lyaJehova ohali tu londodha kombinga yokulongitha omahala ngoka. Mbela owa lesha ngaa omalondodho agehe ngoka ga nyanyangidhwa komupiya omudhiginini omasiku ngano ge na ko nasha nomahala ngoka? Osha nika uusama oku ga longitha manga inoo lesha uuyelele mboka.a Otashi ka kala sha faathana nokunwa omiti dhi na oonkondo inoo lesha kutya owu na oku dhi longitha ngiini.

12. Omolwashike sha nika uusama okwiipwililika omalondodho?

¹² Mboka tayi ipwililike omalondodho ngoka haga gandjwa komupiya omudhiginini otayi iyetele nosho wo aaholike yawo. Aauvithi yamwe oya pikwa kokutala omathano giipala nenge haya hondele. Ohaya dhiladhila kutya Jehova ke wete shoka taya ningi. Osha nika uusama okudhiladhila kutya otatu vulu okuholeka Jehova iinima mbyoka hatu ningi. (Omayel. 15:3; lesha Aahebeli 4:13.) Kalunga okwa hala okukwathela aantu mboka nohe shi ningi okupitila maakalelipo ye kombanda yevi. (Gal. 6:1) Ngele owa pewa uukwashigwana woshilongo shontumba e to pogola oompango dhoshilongo shoka, epangelo otali vulu oku ku kutha uukwashigwana mboka. Jehova naye ita ka pitika mboka haya yonene owina omithikampango dhe nopwaana okwiiyela ombedhi ya ye mUukwaniilwa we.b (1 Kor. 5:11-13) Ihe nonando ongaaka, ye omunahenda. Mboka tayi iyele ombedhi e taya lundulula iikala yawo, otaya vulu okukala ishewe ye na ekwatathano ewanawa naye e taya tsikile okukala aalelwa yUukwaniilwa we. (2 Kor. 2:5-8) Kashi li tuu uuthembahenda okulongela Omukwaniilwa ngoka omunahole!

AALELWA YUUKWANIILWA OYA LENGA ELONGO LYOPAKALUNGA

13. Aalelwa yUukwaniilwa ohayu ulike ngiini kutya oya lenga elongo lyopakalunga?

¹³ Omapangelo ogendji ohaga longo nuudhiginini okulonga aakwashigwana yago. Oga tota po oosikola dhokulonga aantu okulesha nokunyola noku ya longa iilonga yilwe. Aalelwa yUukwaniilwa nayo ohaya yi wo koosikola ndhoka ya mone ontseyo yiilonga yontumba. Ihe oya lenga noonkondo elongo lyopakalunga. Jehova okwa ninga po elongekidho aantu ya longwe okulesha nokunyola okupitila momagongalo gopaKriste. Aavali otaya ladhipikwa ya kale haya leshele oyana mboka aashona. Omwedhi kehe omupiya omudhiginini oha nyanyangidha iifo yOshungolangelo iyali nashimwe sho-Awake! Iifo mbyoka oya kankamena kOmbiimbeli noyi na omapandja ogendji. Ngele owa kala ho lesha omapandja gwontumba mesiku, ayihe oto ka mana oku yi lesha momwedhi gumwe. Kungawo, oto ke endela pamwe nelongo lya simanenena ndyoka Jehova a tula po.

14. (a) Ohatu mono edheulo lya tya ngiini? (b) Omaetopo geni wa longitha mEsiku lyElongelokalunga lyUukwanegumbo?

¹⁴ Aalelwa yUukwaniilwa ohaya mono edheulo oshiwike kehe pokugongala. Pashiholelwa, Osikola yOkudheula Aauvithi oya kala nokukwathela aanasikola ya kale aalongi yOohapu dhaKalunga ya pyokoka. Mbela owi inyolitha ngaa mosikola ndjoka? Oomvula owala opo dha zi ko, omupiya omudhiginini okwa kala nokutsa omuthindo Esiku lyElongelokalunga lyUukwanegumbo. Elongekidho ndika otali koleke ekwatathano momagumbo. Mbela oho longitha ngaa omaetopo ngoka haga kala miileshomwa yetu?c

15. Uuthembahenda uunenenene wuni tu na?

¹⁵ Aakwashigwana oyendji ohaya ambidhidha oongundu dhawo dhopapolotika miilongo yawo, tashi vulika mokweenda egumbo negumbo taya kongo iilyo. Aalelwa yUukwaniilwa waKalunga nayo ohaya ambidhidha Uukwaniilwa we nuulaadhi mokuuvitha momapandaanda nosho wo egumbo negumbo. Ngaashi sha popiwa moshitopolwa sha tetekele, Oshungolangelo tayi tseyitha Uukwaniilwa waJehova oyo oshifo shoka hashi taandelithwa noonkondo kombanda yevi alihe. Uuthembahenda uunenenene mboka tu na, owo okutseyitha Uukwaniilwa waKalunga. Mbela oho kutha ombinga nuulaadhi miilonga yokuuvitha?—Mat. 28:19, 20.

16. Ongiini to vulu okuulika kutya owu li omulelwa gwUukwaniilwa waKalunga ha vulika?

¹⁶ Masiku Uukwaniilwa waKalunga owo owala tawu ka pangela kombanda yevi alihe. Owo tawu ke tu wilika monkalamwenyo yetu ayihe nomiinima yopambepo. Mbela oto ka vulika ngaaka kelelo lyawo? Ndika olyo ethimbo lyoku shi ulika. Kala ho simanekitha Jehova mukehe shimwe to ningi momatokolo goye agehe ngoka to ningi esiku kehe, nokungawo, oto ulike kutya owu li omulelwa gwUukwaniilwa waKalunga ha vulika.—1 Kor. 10:31.

[Omanyolo gopevi]

[Oohapu dha simana pepandja 14]

Mbela oho vulika ngaa komalondodho ngoka haga zi komupiya omudhiginini ge na ko nasha nokulongitha ointaneta?

[Ethano pepandja 12]

Mbela owu hole ngaa elongelokalunga lya yogoka nosho wo ondjokonona yalyo ngaashi oyanamati yaKorak?

[Ethano pepandja 15]

Esiku lyElongelokalunga lyUukwanegumbo otali vulu oku mu kwathela lela naaholike yoye mu kale aalelwa yUukwaniilwa haya vulika