Kandeka nokukukuma oomwigo dhaSatana

‘Kandeka omakotokelo omawinayi gomuhindadhi.’—EF. 6:11.

OTO YAMUKULA NGIINI?

Oshike tashi ka kwathela aapiya yaJehova kaaya ye momwigo gwokuhola omaliko?

Oshike tashi ka kwathela aaihokani Aakriste kaaya gwile mekelo lyokuyona ondjokana?

Omolwashike shi li nawa okukandeka ohole yokuhola omaliko noluhondelo?

1, 2. (a) Omolwashike Satana kee na ohenda naagwayekwa nosho wo ‘noonzi dhilwe’? (b) Oomwigo dhaSatana dhini tatu ka kundathana moshitopolwa shika?

SATANA ONDIABOLI ke na ohenda naantu, unene tuu naalongeli yaJehova. Satana ota kondjitha a mana mo oshihupe shaagwayekwa. (Eh. 12:17) Aakriste aagwayekwa oyo taya kwatele komeho iilonga yokuuvitha Uukwaniilwa kunena. Oye shi ulika puuyelele kutya Satana oye omupangeli gwuuyuni mbuka. Ondiaboli oyi tonde wo ‘oonzi dhilwe’ ndhoka tadhi ambidhidha aagwayekwa nodhi na etegameno lyokukala nomwenyo sigo aluhe ndyoka Satana kee na. (Joh. 10:16) Itashi kumitha sho e na ondjahi. Kutya nduno otu na etegameno lyomegulu nenge olyokombanda yevi, Satana ke na ko nasha natse. Okwa hala owala tu ninge iihakanwa ye.—1 Pet. 5:8.

² Oha longitha oomwigo dhi ili nodhi ili, opo a gwanithe po elalakano lye ndyoka. Satana okwa ‘pukitha omadhiladhilo’ gaantu mboka inaa itaala. Onkee ano, ihaya taamba ko elaka etoye noihaya mono oomwigo dhe. Ondiaboli ohayi yulu wo yamwe mboka ya taamba ko etumwalaka lyUukwaniilwa. (2 Kor. 4:3, 4) Oshitopolwa sha tetekele oshe tu ulukila nkene tu na okuyanda oomwigo ndatu dhaSatana, ngaashi: (1) okwaapangela elaka lyetu, (2) uumbanda nomathiminiko nosho wo (3) okwiipa uusama sha pitilila. Ngashingeyi natu tale nkene tatu vulu okukandeka oomwigo mbali dhaSatana. Omwigo gumwe ogwo ohole yokuhola omaliko nomukwawo emakelo lyokuyona ondjokana.

OHOLE YOKUHOLA OMALIKO OYO OMWIGO HAGU THININIKE

3, 4. Ongiini iimpwiyu yuuyuni mbuka tayi vulu okukokela omuntu momwigo gwokuhola omaliko?

³ Jesus meyele lye limwe okwa popi kombinga yoombuto dha kunwa moongwena. Okwa ti kutya omuntu otashi vulika u uve oohapu, “ihe oshimpwiyu shuuyuni mbuka nefundjaleko lyuuyamba otayi thininike oohapu, noita imike iiyimati.” (Mat. 13:22) Eeno shili, omutondi gwetu Satana oha longitha omwigo gwokuhola omaliko e tu kwate.

⁴ Opu na iinima iyali mbyoka tayi vulu okuthininika oohapu. Oshinima shimwe osho ‘oshimpwiyu shuuyuni mbuka.’ Opu na iinima oyindji mbyoka hayi tu etele iimpwiyu ‘momathimbo ngaka omadhigu’ tu li mugo. (2 Tim. 3:1) Otashi vulika shi kale oshidhigu kungoye okugwanitha po iipumbiwa yoye omolwiinima mbyoka ya ninga ondilo nomolwokwaa na iilonga hoka kwi indjipala. Otashi vulika wu kale to ipula kombinga yonakuyiwa notashi vulika wi ipule to ti: ‘Mbela otandi ka kala ngaa ndi na iiyemo ya gwana konima ngele nda penzelwa?’ Omolwoshimpwiyu sha tya ngaaka, yamwe oya kokelwa momwigo gwokulalakanena omaliko, taya dhiladhila kutya iimaliwa otayi vulu oku ya gamena aluhe.

5. Omomukalo guni ‘uuyamba’ tawu vulu oku tu fundjaleka?

⁵ Oshinima shilwe shoka Jesus a popi nasho tashi vulu okuthininika oohapu, osho iimpwiyu nosho wo ‘efundjaleko lyuuyamba.’ Ombiimbeli otayi ti kutya “iimaliwa oyo egameno.” (Omuuv. 7:12) Ihe kashi li pandunge oku yi lalakanena. Aantu oyendji oye shi mona kutya ohaya gwile moomwigo dhilwe dhokuhola omaliko, uuna ya hala okuninga aayamba. Yamwe oya ninga nokuli aapika yokukonga omamona.—Mat. 6:24.

6, 7. (a) Omuhona gwoye ota vulu oku ku kokela ngiini mohole yokuhola omaliko? (b) Omukriste oku na okudhiladhila kombinga yashike, uuna e etelwa edhiladhilo lyokulonga olutaima?

⁶ Otashi vulika tu ye momwigo gwokuhola omaliko nopwaa na oku shi nongela. Pashiholelwa, omuhona gwoye otashi vulika e ku lombwele ta ti: “Ondi ku na onkundana ombwanawa! Ehangano olya pewa okondalaka onenenene yiilonga. Shika otashi ti kutya otu na okulonga olutaima olundji moomwedhi ndhoka tu uka. Ihe otandi ku shilipaleke kutya ondjambi yoye otayi ka kala yo ondoka.” Oto ki inyenga ngiini? Oshoshili kutya owu na oshinakugwanithwa sha simana shokusila oshimpwiyu painiwe aanezimo yoye, sha hala okutya, aanegumbo lyoye. Ihe shoka hasho owala oshinakugwanithwa wu na. (1 Tim. 5:8) Opu na wo iinima yontumba mbyoka wu na okukaleka momadhiladhilo. Ethimbo li thike peni tamu ka longa olutaima? Mbela otashi ka ya moshipala omaipyakidhilo goye gopambepo, mwa kwatela okugongala nosho wo Esiku lyElongelokalunga lyUukwanegumbo?

⁷ Dhiladhila kutya oshike sha simanenena kungoye, mbela olutaima ndoka talu ke ku petha ondjambi yo ondoka nenge ekwatathano lyoye naJehova? Mbela oto ke etha okupititha komeho iinima yUukwaniilwa, molwaashoka wa hala okwiilikolela iimaliwa oyindji? Owu shi ngaa kutya uupambepo woye nowaanegumbo lyoye otawu ka ya moshiponga ngele owa kala to lalakanene iinima yopamaliko? Ngele oshe ku ningilwa, ongiini to ka kandeka nokwiiyageka kuu thiminikwe kiinima yopamaliko?—Lesha 1 Timoteus 6:9, 10.

8. Iiholelwa yini yopaMbiimbeli tayi ku kwathele wu konakone onkalamwenyo yoye?

⁸ Kala nokukonakona onkalamwenyo yoye, opo kuu kwatwe ko omboko kohole yokuhola omaliko. Ino kala nando wa fa Esau ngoka a li a dhina iinima yopambepo. (Gen. 25:34; Heb. 12:16) Nenge wu kale wa fa omulumentu omuyamba ngoka a li a lombwelwa a landithe po iinima ye ayihe, iimaliwa e te yi pe oohepele e ta landula Jesus. Pehala lyoku shi ninga, omulumentu okwa “zi po a sa oluhodhi, oshoka okwa li e na eliko olindji.” (Mat. 19:21, 22) Omolwohole yeliko, omulumentu ngoka okwa li a kanitha uuthembahenda uunene wokulandula omuntu omunenenene ngoka a li ko nale. Otu na wo okukala twa kotoka kaatu kanithe uuthembahenda wokuninga aalongwa yaJesus Kristus.

9, 10. Ombiimbeli otayi tu kumagidha ngiini shi na ko nasha niinima yopamaliko?

⁹ Opo kaatu kale tatu ipula unene niinima yopamaliko, otu na okupulakena kekumagidho lyaJesus ndyoka tali ti: “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe.”—Mat. 6:31, 32; Luk. 21:34, 35.

¹⁰ Opo kaatu ye momwigo gwefundjaleko lyuuyamba, otu na okukala netaloko lya fa lyomunyoli gwOmbiimbeli Agur ngoka a ti: “Uuyamba nenge oluhepo ino lu pa ndje; palutha ndje noshikwiila shoka sha yeleka ndje.” (Omayel. 30:8) Agur okwa li e shi kutya okwa pumbwa iimaliwa omolwuuhupilo, ihe okwa li wo a kotokela efundjaleko lyuuyamba. Okwa li e shi kutya oshimpwiyu shuuyuni mbuka nefundjaleko lyuuyamba otayi vulu okuyona po ekwatathano lye naJehova. Okukala to ipula unene niinima yopamaliko otashi vulu okumana po ethimbo lyoye, oonkondo dhoye notashi ku ningitha wu kale kuu na ehalo lyokupititha komeho iinima yUukwaniilwa. Onkee ano, kala wa kotoka, opo kuu kwatwe komwigo gwaSatana gwokuhola omaliko.—Lesha Aahebeli 13:5.

OLUHONDELO OLWA FA EKELO LYA SIIKILWA

11, 12. Ongiini Omukriste tashi vulika a makelwe a yone ondjokana uuna e li kiilonga?

¹¹ Uuna aakongo ya hala okukwata oshinamwenyo oshinene, ohaya fulu ekelo ele mondjila moka shi hole okweenda. Kekelo ohaku yalwa uuti e taku filwa nomavi. Satana naye oha longitha omwigo gumwe gwa fa ekelo hagu pondola. Omwigo ngoka ogwo eyonondjokana. (Omayel. 22:14; 23:27) Aakriste oyendji oya yulwa komwigo ngoka, molwaashoka ohayi iyethele moonkalo moka taya vulu okuya nuupu moluhondelo. Aaihokani yamwe Aakriste oya yona ondjokana sho ya tameke okukala ye na iihole nayalwe.

¹² Iihole mbyoka otayi vulu okutamekela kiilonga. Ekonakono limwe otali ulike kutya maaihokani yane mboka ya yona ondjokana, kutya nduno aasamane nenge aakulukadhi, yatatu yomuyo oye shi ninga pamwe naamboka haya longo nayo. Mbela oho longo pamwe naantu yuukashikekookantu wa yooloka ko kuwoye? Ngele osho, ekwatathano lyoye nayo oli li ngiini? Mbela oli na ngaa ongamba noiho pitike li shituke shimwe shi ili? Pashiholelwa, omumwameme otashi vulika a kale i inekela omuniilonga pamwe naye gwomulumentu ngele oya kala haya kundathana olundji naye. Omumwameme ngoka otashi vulika nokuli a tameke oku mu lombwela uupyakadhi womondjokana ye. Omumwatate otashi vulika a pange uukuume nomukiintu ngoka haya longo pamwe naye. Otashi vulika a tye: “Omukiintu nguka okwa simaneka ndje noha pulakene ngele tandi popi naye. Oha pandula ndje wo. Ando nokegumbo osho nee sha li ngeyi!” Mbela otu wete nee nkene Aakriste tashi vulika ya makelwe ya yone ondjokana?

13. Ongiini iihole tayi vulu okutameka pokati kayamwe megongalo?

¹³ Yamwe megongalo lyopaKriste otashi vulika wo ya kale ye na iihole pokati kawo. Natu tale koshiholelwa shimwe sha ningwa shili. Tate Daniel nomukadhi, Sara,a oya li aakokolindjila yondjigilile. Daniel okwa ti: “Ngame omukuluntugongalo ngoka ihaa tindi oshilonga.” Uuthembahenda kehe ta pewa ohe wu taamba owala. Okwa li a konakona Ombiimbeli naalumentu aagundjuka yatano. Lwanima, yatatu yomuyo oya ka ninginithwa. Aamwatate mbano opo ya ninginithwa oya li ya pumbwa natango ekwatho. Olundji omumwameme Sara oye a li ha kwathele aamwatate mboka manga Daniel i ipyakidhila niilonga yilwe yegongalo. Osho sha kala ngaaka. Aamwatate mboka ya konakona naDaniel oya li ya pumbwa okutsuwa omukumo, na Sara oye a li e ya tsu omukumo. Sara naye okwa li ha kala a sa uuza, naakonakoni yaDaniel oyo ya li haye mu kutha uuza. Onkalo ndjoka oya li ya nika oshiponga kuyo ayehe. Daniel okwa ti: “Oomwedhi adhihe ndhoka omukulukadhi gwandje a kala nokukwathela [aakonakonimbiimbeli yandje] oshe mu nkundipaleke pambepo nopamaiyuvo. Shika osha ningwa, molwaashoka ka nda li handi mu pe eitulomo, noshe etitha iizemo iiwinayi noonkondo. Okwa li a yono ondjokana nagumwe gwomaakonakoni yandje yonale. Omomeho gandje sho ta nkundipala pambepo, ihe inandi shi ndhindhilika, molwaashoka onda li owala nda pwila unene miinakugwanithwa yegongalo.” Oshike tashi ku kwathele wu yande oshiponga shika?

14, 15. Oshike tashi vulu okukwathela aaihokani Aakriste kaaya yone ondjokana?

¹⁴ Opo kuu yone ondjokana, dhimbulukwa kutya osha simana okukala omudhiginini kuyo. Jesus okwa ti: “Shono Kalunga e shi tula kumwe, inashi kuthwa kumwe komuntu.” (Mat. 19:6) Onkee ano, iilonga yegongalo hayo ya simana nando yi vulithe omukulukadhi gwoye. Ekwatathano lyeni otali ka nkundipala ngele oho kala ethimbo ele ongoye awike wi ipyakidhila niilonga inaayi simana. Shoka otashi vulu okufala meyonondjokana.

¹⁵ Ongiini ngele owu li omukuluntugongalo, mbela ku na okusila oshimpwiyu uusita? Omuyapostoli Petrus okwa nyola a ti: “Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo.” (1 Pet. 5:2) Omukuluntugongalo oku na okukala e na ko nasha niilyo yegongalo. Ihe ke na owala okukala ha longo nuudhiginini megongalo e ta dhimbwa omukadhi. Osha nika oshiponga okupalutha owala egongalo, omanga omukulukadhi gwoye ta “si ondjala” pambepo. Daniel okwa ti: “Omuntu ku na owala okukala to kondjo niilonga yegongalo, omanga egumbo lyoye tali teka po.”

16, 17. (a) Oshike tashi vulu okukwathela Aakriste aaihokani kaaya kale niihole nayalwe kiilonga? (b) Iitopolwa yini tayi vulu okukwathela aaihokani kaaya yone ondjokana?

¹⁶ Omayele omawanawa ngoka taga kwathele aaihokani kaaya yone ondjokana, otaga adhika mOoshungolangelo nomoo-Awake! Pashiholelwa, Oshungolangelo yo 15 Septemba 2006 otayi tu londodha tayi ti: “Yanda oonkalo ndhoka tadhi vulu okufala miihole kiilonga nenge poompito dhilwe dhi ili. Pashiholelwa, okukala ho longo ethimbo ele nomuntu gwuukashikekookantu wa yooloka ko kuwoye otaku vulu oku ku fala momamakelo. Wu li omulumentu a hokana nenge omukiintu a hokanwa, owu na okuulika momapopyo goye nomeihumbato lyoye kutya ino hala okukala nandonando wu na iihole nomuntu. Omolwetilokalunga lyoye, ito ka ningitha yamwe ya ye miihole nangoye mokukala niikala mbyoka tayi hilile momilalo nenge mokuzala nokwiiyopaleka momukalo ngoka tagu pendutha omahalo gomilalo. . . . Okutsilika omathano gakuume koye kopandjokana nosho wo gaamwoye mombelewa yoye otashi ke ku kwathela wu ya kaleke momadhiladhilo manga wu li kiilonga, notaga ka londodha aaniilonga ooyakweni ya kale ye shi kutya owa hokanwa nenge owa hokana. Kala wa tokola thiluthilu okuyanda iikala mbyoka tayi hilile yalwe miihole, noino etha nando wu hililwe miihole kuyalwe.”

¹⁷ Mo-Awake! yaApilili 2009, omu na oshitopolwa: “Marital Fidelity—What Does It Really Mean?” (Okwiinekelathana mondjokana otashi ti naanaa shike?) shoka tashi tu londodha twaa dhane nomaiyuvo gagumwe ngoka kee shi kuume ketu kopandjokana. Oshitopolwa shoka otashi popi kutya okudhana nomaiyuvo gagumwe, otashi vulu okufala nziya meyonondjokana. (Jak. 1:14, 15) Onawa aaihokani ya kale haya konakona pamwe uuyelele mboka omathimbo nomathimbo. Ondjokana oya dhikwa po kuJehova noyi li oshinima oshiyapuki. Ngele owi itulile po ethimbo lyokukala ho popi nakuume koye kopandjokana, otashi ku ulika kutya owa lenga iinima iiyapuki.—Gen. 2:21-24.

18, 19. (a) Okuyona ondjokana oku na iilanduliko yini? (b) Okwiinekelathana mondjokana oku na uuwanawa wuni?

¹⁸ Uuna wi iyadha to makelwa wu ye miihole nagumwe, dhiladhila kiilanduliko iiwinayi mbyoka hayi etwa koluhondelo nokeyonondjokana. (Omayel. 7:22, 23; Gal. 6:7) Mboka haya hondele ohaya yemateke Jehova. Ohayi iyemateke yo yene nosho wo ookuume kawo kopandjokana. (Lesha Maleaki 2:13, 14.) Mepingathano naashoka, tedhatedha omauwanawa ngoka haga monika kwaamboka ye na eihumbato ewanawa. Kaye na owala etegameno lyoku ka mona omwenyo gwaaluhe, ihe oye na wo onkalamwenyo tayi ti sha ngashingeyi nosho wo eiyuvo lya yela.—Lesha Omayeletumbulo 3:1, 2.

¹⁹ Omupisalomi okwi imbi a ti: “Mboka ye ku hole [Kalunga], oye na ombili, nokaku na shoka tashi ya pukitha.” (Eps. 119:165) Otu na okukala tu hole oshili. Onkee ano, natu ‘ikonakoneni ano nawa, nkene tu na okukala. Inatu kala ngashika omagoya, ihe ongaashi aanandunge’ muuyuni mbuka wa kolokosha. (Ef. 5:15, 16) Mondjila moka tatu ende Satana okwa napeka mo oomwigo, ndhoka a hala okuyula nadho aalongelikalunga yashili. Ihe otwa homatekwa nawa tu vule okwiipopila. Jehova okwe tu pa shoka twa pumbwa tu ‘kandeke’ Satana notu ‘dhime iikuti ye ayihe ya hwama omulilo.’—Ef. 6:11, 16.

[Enyolo lyopevi]

[Ethano pepandja 26]

Ohole yokuhola omaliko otayi vulu okuthininika uupambepo womuntu. Ino etha shi ku ningilwe

[Ethano pepandja 29]

Okudhana nomaiyuvo gagumwe otaku vulu okufala meyonondjokana