SHI IKOLELELA KOSHIPALANYOLO SHOKOMBANDA: SHOKA TATU ILONGO KUMOSES
Moses okwa li lye?
Oshike hashi ya momadhiladhilo goye uuna wu uvu edhina Moses tali tumbulwa? Mbela oho dhiladhila . . .
kokahanona hoka ka li ka holekwa kuyina moshimbamba pOmulonga gwaNil?
kokamati hoka ka li ka putudhilwa muuzeko muEgipiti komwanakadhona gwaFarao, ihe kaka li ka dhimbwa kutya Okaisraeli?
komulumentu ngoka a kala omusita gwoonzi uule woomvula 40 moshilongo shaMidian?
komulumentu ngoka a li ta kundathana naJehovaa poshihwa sha hwama?
komulumentu ngoka a li a popile Aaisraeli nuulaadhi komukwaniilwa gwaEgipiti e ya mangulule?
komulumentu ngoka a li a lombwelwa kuKalunga a gandje Omageelo Omulongo kAaegipiti sho omukwaniilwa gwawo a li inaa vulika kuKalunga?
komulumentu ngoka a li a kwatele komeho metembu enene lyAaisraeli okuza muEgipiti?
komulumentu ngoka a li a longithwa okutopola Efuta Etiligane?
komulumentu ngoka a li a pe Aaisraeli Iipango Omulongo yaKalunga?
MOSES okwa li a ningi iinima ayihe mbika nosho wo yilwe. Itashi kumitha sho omulumentu nguka omudhiginini a simanekwa noonkondo kAakriste, kAajuda nokAamoslema.
Kapu na omalimbililo kutya Moses okwa li omupolofeti ngoka a ningi “iinima iinene niitilithi.” (Deuteronomium 34:10-12) Okwa li e etha Jehova e mu longithe momukalo gwa dhenga mbanda. Ihe nonando ongaaka, Moses okwa li omuntu ngaashi aantu ooyakwawo. Ngaashi owala omupolofeti Elia, ngoka a li a holoka pamwe naMoses memoniko pethimbo lyuukalele waJesus kombanda yevi, Moses okwa li “omuntu e tu fa.” (Jakob 5:17; Mateus 17:1-9) Moses okwa li e na omaupyakadhi ogendji ga fa getu nokwa li e ga sindi nomupondo.
Mbela owa hala okutseya kutya okwa li a pondola ngiini? Natu tale komaukwatya gatatu omawanawa ngoka Moses a li e na nokutala kutya otatu ilongo mo shike moshiholelwa she.
a Jehova edhina lyaKalunga ngaashi lya popiwa mOmbiimbeli.