Jehova ‘okwe mú dhimine po’

“Omuntu ngoka ihaa dhimine po yalwe, oti ike koshitayi a londa ko.” Oohapu ndhoka dha popiwa kuEdward Herbert, omunandjokonona Omwiingilisa ngoka a li ko oomvula 200 lwaampono dha pita, otadhi tsu omuthindo etompelo limwe kutya omolwashike tu na okukala hatu dhimine po yalwe, molwaashoka natse otatu ka pumbwa okudhiminwa po. (Mateus 7:12) Ihe opu na etompelo lya simana lyokudhimina po yalwe. Tala koohapu dhomuyapostoli Paulus ndhoka dhi li mAakolossa 3:13.—Lesha.

Molwaashoka inatu gwanenena, omathimbo gamwe otashi vulika tu ningile yakwetu nayi nenge tu yu uvithe nayi, nenge oyo ye tu ningile nayi. (Aaroma 3:23) Ongiini tatu vulu okukaleka po ombili naantu ooyakwetu inaaya gwanenena? Paulus ngoka a li a nwethwa mo kuKalunga, ote tu pe omayele tu kale hatu idhidhimikilathana nohatu dhiminathana po. Omayele ngoka oga simanenena kunena ngaashi naanaa ga li sho ga nyolwa pwa pita oomvula omayovi gaali lwaampo. Natu konakoneni nawa oohapu dhaPaulus ndhoka.

‘Kwathathaneni.’ Uutumbulilo mboka wa tolokwa “kwathathaneni,” mOshigreka otawu ti idhidhimikilathaneni. Embo limwe otali ti kutya Aakriste oye na okuulika uukwatya mbuka “mokukala nehalo okwiidhidhimikila mboka ye na omaukwatya omawinayi hage ya ningile nayi.” Oshitya ‘kwathathaneni’ otashi ulike wo kutya oshinima tashi ningilathanwa. Uuna tatu dhimbulukwa kutya otu na omaukwatya ngoka tashi vulika ga ningile nayi yalwe, itatu ka pitika nando iinima mbyoka tashi vulika tu tonde muyalwe yi yone po ombili yetu nayo. Ihe ongiini ngele yalwe ya yono kutse?

‘Dhiminathanii po oondjo.’ Omulongwantu gumwe okwa ti kutya uutumbulilo wOshigreka mboka wa tolokwa “dhiminathanii po” “itawu popi owala kedhiminopo lyakwalukehe, ihe otawu ulike wo kohenda onene ndjoka ya kwatelwa mo medhiminopo.” Embo lilwe otali ti kutya oshitya shika otashi vulu okutya “okuningila omuntu oshinima oshiwanawa.” Ohatu ulike ohenda mokudhimina po nehalo ewanawa nokuli ‘nuuna pe na ngoka twa ningathana naye.’ Ihe mbela omolwashike tu na okukala tu na ehalo okudhimina po? Omolwaashoka otashi vulika natse tu ka kale twa hala ngoka e tu ninga nayi e tu dhimine po.

‘Dhiminathanii po oondjo naanaa ngashika Omuwa e mú dhimine po.’ Etompelo lya simana kutya omolwashike tu na okudhimina po yalwe olyo molwaashoka Jehova Kalunga naye ohe tu dhimine po. (Mika 7:18) Dhiladhila kashona kombinga yohenda onene ndjoka Jehova u ulukile aalunde mboka yi itedhulula. Jehova iha yono ngaashi tse hatu yono. Ihe nonando ongaaka, oku na ehalo okudhimina po thiluthilu aalunde mboka yi itedhulula nonando oku shi kutya ita ka pumbwa nando ye mu dhimine po. Osha yela kutya Jehova oha dhimine po lelalela aalunde mboka yi itedhulula.

Ohenda yaJehova ohayi tu hilile kuye nohayi tu inyengitha tu kale twa hala oku mu holela. (Aaefeso 4:32–5:1) Oshi li nawa tu ipule ngeyi: ‘Molwaashoka Jehova oha dhimine ndje po nehalo ewanawa, ongiini tandi vulu okukala itaandi dhimine po omuntu omukwetu ngoka i itedhulula lelalela sho a yono kungame?’—Lukas 17:3, 4.