“Aantu oyendji oya li ye tonde ndje”

ONAKUZIWA YANDJE:

Onda putukila moSantiago, oshilandopangelo shaChile, momudhingoloko moka hamu longithwa iingangamithi, mu na oongundu dhaalongi yiikulumuna noyomiyonena. Sho nda li ndi na oomvula ntano, tate okwa li a dhipagwa. Konima yaashono, meme okwa li a mono po omusamane gulwe e na onyanya. Omusamane ngoka okwa li he tu dhenge aluhe nayi tse nameme. Sigo okunena onkalo ndjoka ohayi ehameke ndje pamaiyuvo.

Sho nde ende tandi koko, nangame onda nwethwa mo kiikala iiwinayi e tandi tameke okukala handi longo omuyonena. Onda li handi pulakene koongalo hadhi hikwa mokulekule, handi nu sha pitilila nomathimbo gamwe onda li handi longitha iingangamithi. Olundji onda li handi kondjo naalandithi yiingangamithi momapandaanda, mboka iikando oyindji ya li ya hala okudhipaga ndje. Oshikando shimwe, ongundu yimwe yaalongi yomuyonena oya li ya pula omulumentu gumwe a tseyikila okudhipaga aantu a dhipage ndje, ihe onda fadhuka po sho a tsu ndje nomwele. Pompito ishewe yilwe, ongundu yaalandithi yiingangamithi oya li yu ulike ndje ombistoli komutse noya li ya kambadhala okumangeleka ndje.

Momumvo 1996 onda li nde endele omukiintu gumwe gwedhina Carolina, nomo 1998 otwa hokana. Sho twa mono okanona ketu kosheeli kokamati, onda li nda tila kutya molwaashoka onda li ndi na ongeyo ombwinayi, otashi vulika ndi ka hepeke aanegumbo lyandje ngaashi omusamane ngoka a li a hokana meme. Onkee ano, onda li nda kongo ekwatho kendiki lyezulonkalo, ihe inashi kwathela ndje sha. Onda tsikile okukala handi geye nokuunima uushona; onda li nda nyengwa okwiipangela. Onda ningi oonkambadhala dha puka dhokwiidhipaga, opo ando kaandi kale we tandi ningi nayi aanegumbo yandje. Lagwenene, inandi shi pondola.

Onda kala oomvula odhindji inaandi itaala muKalunga, ihe onda li nda hala oku mwi itaala. Onkee ano, uule wokathimbo onda kala handi yi kongeleka yevaangeli. Pokati mpoka, omukulukadhi gwandje okwa tameke okukonakona Ombiimbeli nOonzapo dhaJehova. Onda li ndi dhi tonde, nolundji onda li handi dhi ula nayi. Ihe odha li aluhe hadhi yamukula ndje nombili, shoka haasho nda li nda tegelela.

Esiku limwe, Carolina okwa pula ndje ndi leshe Episalomi 83:18 mOmbiimbeli yandje. Ovelise ndjoka otayi popi sha yela kutya edhina lyaKalunga oJehova. Onda li nda kumwa sho nda tseya kutya elongelokalunga lyandje olya longa ndje kombinga yakalunga gwontumba, ihe inali longa ndje kombinga yaJehova. Petameko lyomumvo 2000 nangame onda tameke wo okukonakona Ombiimbeli nOonzapo.

NKENE OMBIIMBELI YA LUNDULULA ONKALAMWENYO YANDJE:

Sho tandi ende tandi ningi ehumokomeho, onda li nda hekelekwa kokutseya kutya Jehova oKalunga kohenda noha dhimine po. Pashiholelwa, muEksodus 34:6, 7, Ombiimbeli otayi popi kutya Jehova oye ‘Kalunga omunamutimahenda, omunalukeno nomutalanteni, iha geye mbala noku udha esilohenda nuudhiginini. Oha dhiginine ohole ye koluvalo lwomayuvi nota dhimi po uukolokoshi, omayono noondjo.’

Nonando ongaaka, kasha li oshipu okutula miilonga shoka nda li tandi ilongo. Onda li nda tompwa kutya kandi na nando esiku ndi vule okupangela ongeyo yandje. Oshikando kehe nda nyengwa oku shi ninga, Carolina okwa li ha ladhipike ndje nohole. Okwa li a dhimbulukitha ndje kutya Jehova oku wete oonkambadhala dhandje. Ekwatho lye olya li lya nkondopaleke ndje ndi tsikile okunyanyudha Jehova, nokuli nonando olundji onda li handi kala kaandi na etegameno.

Esiku limwe, Alejandro, ngoka a li ha konakona nangame Ombiimbeli, okwa pula ndi leshe Aagalati 5:22, 23. Oovelise ndhoka otadhi ti kutya iiyimati yombepo yaKalunga oyo “ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko neikwato nawa.” Alejandro okwa yelithile ndje kutya iiyimati mbyoka itandi vulu oku yi imika koonkondo dhandje mwene, ihe okekwatho lyombepo ondjapuki yaKalunga. Oshili ndjoka oya lundulula thiluthilu etaloko lyandje.

Konima yethimbo, onda li nda kala poshigongi oshinene shoshitopolwa shOonzapo dhaJehova. Elandulathano, uuyogoki neendathano mbyoka nda li nda mono po oya li ya tompo ndje kutya onda mona elongelokalunga lyashili. (Johannes 13:34, 35) MuFebuluali 2001, onda ninginithwa.

NKENE SHA KWATHELA NDJE:

Pehala lyokukala omulongi gwomuyonena, Jehova okwa ninga ndje omulumentu omunambili. Ondu uvite nda yuulwa mo menono moka nda li nda ningina. Aantu oyendji oya li ye tonde ndje noitandi ya pe uusama. Ihe ngashingeyi, otandi nyanyukilwa okulongela Jehova nombili pamwe nomukulukadhi gwandje naamwandjemati yaali.

Aapambele yandje nookuume kandje yonale ihaye shi itaale kutya ongame nda lunduluka ngeyi. Oshizemo, oyendji yomuyo oyu ulike ohokwe moshili yOmbiimbeli. Onda mona wo uuthembahenda wokukwathela yalwe ya tseye Jehova. Inandi nyanyukwa tuu okumona sho oshili yOmbiimbeli tayi lundulula wo onkalamwenyo yawo!