NKENE TO VULU OKUYANDA UUTONDWE

4 | Oto vulu okusinda uutondwe kekwatho lyaKalunga

Shoka Ombiimbeli tayi ti:

“Iiyimati yOmbepo oyo mbika: ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko neikwatonawa.” — AAGALATI 5:22, 23.

Shoka tatu ilongo menyolo ndika:

Okweetha po uutondwe otashi wapa kekwatho lyaKalunga. Ombepo ondjapuki otayi vulu oku tu kwathela tu kale tu na omaukwatya ngoka kaatu na siku tu ga kokeke tse yene. Onkee ano, pehala lyokukambadhala okweetha po uutondwe kutse yene, oshiwanawa okwiinekela muKalunga oye e tu kwathele. Ngele otwe shi ningi, otatu vulu okupopya ngaashi Omuyapostoli Paulus ngoka a nyola a ti: “Oonkondo kadhi li mutse yene, ihe odhi li muKalunga.” (2 Aakorinto 4:7) Otatu vulu wo okutya “ekwatho lyandje otali zi kOmuwa.” — Episalomi 121:2.

Shoka to vulu okuninga:

WALDO ota ti: “Pehala lyokukala omulongi gwomuyonena, Jehova okwa ninga ndje omulumentu omunambili.”

Galikana kuJehova e ku pe ombepo ye ondjapuki. (Lukas 11:13) Mu pula e ku kwathele wu kale wu na omaukwatya omawanawa. Konakona shoka Ombiimbeli tayi ti kombinga yomaukwatya ngoka taga vulu oku ku kwathela kuu kale wu na uutondwe. Omaukwatya ngoka ongaashi ohole, ombili, eidhidhimiko neipangelo. Tala kutya ongiini to vulu okukokeka omaukwatya ngoka monkalamwenyo yoye, e to kala ho endathana naamboka taya kambadhala oku ga kokeka. Aantu ya tya ngaaka otaya vulu oku ku kwathela wu kale wu na ‘ohole nowu longe uuwanawa.’ — Aahebeli 10:24.

Iinima ya ningwa shili—WALDO

Okwe etha po uutondwe mboka wa li we mu ningitha a kale e hole omalugodhi

Waldo okwa li e na onkalamwenyo ondhigu sho ta putuka, ndjono ye mu ningitha a kale e na uutondwe. Ota ti: “Olundji onda li handi kondjo naalandithi yiingangamithi. . . . Oshikando shimwe, ongundu yimwe yaalongi yomuyonena oya li ya pula omulumentu gumwe ha dhipaga aantu a dhipage ndje, ihe onda fadhuka po sho a tsu ndje nomwele.”

Waldo ka li a nyanyukwa sho omukulukadhi gwe a tameke okukonakona Ombiimbeli nOonzapo dhaJehova. Ota ti: “Onda li ndi dhi tonde, nolundji onda li handi dhi ula nayi. Ihe odha li aluhe hadhi yamukula ndje nombili, shoka haasho nda li nda tegelela.”

Mokweendela ko kwethimbo, Waldo naye okwa tameke okukonakona Ombiimbeli. Ota ti: “Kasha li oshipu okutula miilonga shoka nda li tandi ilongo. Onda li nda tompwa kutya kandi na nando esiku ndi vule okupangela ongeyo yandje.” Ihe oshinima shimwe shoka i ilongo mOmbiimbeli, osha li she mu kwathele lela.

Waldo ota ti: “Esiku limwe, Alejandro, ngoka a li ha konakona nangame Ombiimbeli, okwa pula ndi leshe Aagalati 5:22, 23. . . . Alejandro okwa yelithile ndje kutya iiyimati mbyoka itandi vulu oku yi imika koonkondo dhandje mwene, ihe okekwatho lyombepo ondjapuki yaKalunga. Oshili ndjoka oya lundulula thiluthilu etaloko lyandje.”

Waldo okwa li a vulu okweetha po uutondwe, molwaashoka okwa pitike Kalunga e mu kwathele. Ota ti: “Aapambele yandje nookuume kandje yonale ihaye shi itaale kutya ongame nda lunduluka ngeyi.” Okwa gwedha ko a ti: “Pehala lyokukala omulongi gwomuyonena, Jehova okwa ninga ndje omulumentu omunambili.”