Omolwashike Kalunga e ethela aanankondo ya thindile kongudhi mboka kaaye na oonkondo?

Ombiimbeli oyi na omahokololo gaamboka ya li ya thindilwa kongudhi kaanankondo. Shika otashi tu dhimbulukitha ehokololo lyaNabot.a Ahab, omukwaniilwa gwaIsraeli ngoka a li ko methelemumvo lyotango K.E.N., okwa li e etha omukulukadhi gwe, Isebel, a dhipagithe Nabot noyanamati opo omukwaniilwa ngoka a kuthe po oshitsambe shomiviinu shomulumentu ngoka. (1 Aakwaniilwa 21:1-16; 2 Aakwaniilwa 9:26) Omolwashike Kalunga a li e etha oshinima shoka oshiwiwiwiwi shokulongitha nayi oonkondo shi ningwe?

Natu taleni ketompelo limwe lya simana kutya omolwashike: Kalunga iha fundju. (Titus 1:2) Shoka osha kwatathana ngiini nokulonga uuwinayi wokuthindila kongudhi? Eeno, okuza petamekweelela, Kalunga okwa li a londodha aantu kutya oku mu tukulila oshipotha okwa li taku ke ya etela oshilanduliko, ano eso. Omolwuushili woohapu dhaKalunga, eso olya kala oshitopolwa shiinima mbyoka hayi adha aantu okuza ngaa puunashipotha moshikunino shaEden. Nokuli, eso lyomuntu gwotango, olya li lya holoka sho gumwe a thindile gumwe kongudhi, ano sho Kain a dhipaga omumwayinamati Abel. — Genesis 2:16, 17; 4:8.

Shi na ko nasha nondjokonona yaantu okuza kesiku ndyoka, Oohapu dhaKalunga odhe yi ngonga tadhi ti: “Omuntu gumwe ta dhiladhilile mukwawo oshiponga.” (Omuuvithi 8:9) Mbela oohapu ndhoka odha gwanithwa ngaa shili? Jehova okwa li a londodha oshigwana shaIsraeli, oshigwana she, kutya osha li tashi ka thindilwa kongudhi kaakwaniilwa yasho, naashika osha li tashi ka ningitha aantu ya kugile Kalunga e ya pe ekwatho. (1 Samuel 8:11-18) Nokuli omukwaniilwa omunandunge Salomo okwa li a dhengele aantu konankondongolo mokufutitha iifendela. (1 Aakwaniilwa 11:43; 12:3, 4) Aakwaniilwa aawinayi, ngaashi Ahab, oya li ya thindile aantu kongudhi ye vule po. Natu tale kwaashika: Ngele ando Kalunga okwa li a keelele iinima ayihe mbyoka yokulongitha oonkondo, mbela andola ina fundja?

Dhimbulukwa wo kutya, Satana okwa li a popi kutya aantu otaya longele owala Kalunga molwaashoka yi ihole yoyene. (Job 1:9, 10; 2:4) Andola Kalunga okwa li a gamene aapiya ye ayehe kethindilo kongudhi kehe tali ningwa, mbela andola shoka kasha li tashi ka ulika kutya shoka Satana a popi oshoshili? Nongele ando Kalunga okwa keelelele aantu kaaya thindilwe nando kongudhi, andola shoka inashi etitha oye a kale omupopi gwiifundja yi vule po? Ye li megameno ndyoka, oyendji otashi vulika ya dhiladhile kutya aantu otaya vulu okwiipangela yo yene nawanawa nokaapu na ewiliko lyaKalunga. Ihe Oohapu dhaKalunga otadhi popi shimwe shi ili kutya aantu itaya vulu nandonando okwiipangela yo yene. (Jeremia 10:23) Otwa pumbwa Uukwaniilwa waKalunga wu ye, opo owala okwaanuuyuuki taku ka hula po.

Ihe mbela shoka osha hala okutya Kalunga iha ningi po sha kombinga yokuthindila kongudhi? Aawe. Natu tale kiinima iyali mbyoka ha ningi: Shotango, oha yaneke pomutenya okuthindilwa kongudhi kehe. Pashiholelwa, Oohapu dhe odha yaneka pomutenya okanima kehe kompangela yaIsebel sho a li e li ompinge naNabot. Ombiimbeli otayi holola kutya iilonga mbyoka yuukolokoshi otayi humithwa komeho komupangeli omunankondo ngoka inaa hala aantu ya tseye uukwatya we wolela. (Johannes 14:30; 2 Aakorinto 11:14) Ombiimbeli oye mu yaneka pomutenya kutya oSatana Ondiapoli. Mokuyaneka pomutenya uukolokoshi awuhe nosho wo ethindilo kongudhi naashoka hashi li etitha, Kalunga ohe tu kwathele tu yande uukolokoshi. Kungawo oha gamene onakuyiwa yetu yaaluhe.

Oshitiyali, Kalunga ote tu pe etegameno lya kola kutya ota ka hulitha po ethindilo kongudhi. Momukalo moka a li a yaneke pomutenya, a tokola nokugeela Ahab naIsebel nosho wo yalwe oyendji ngaashi yo, otagu tu ningitha tu kale twi inekela momauvaneko ge kutya mulimwe lyomomasiku ona ka geele aakolokoshi. (Episalomi 52:1-5) Kalunga ota gandja wo etegameno li shi okwiinekelwa kutya ota ka ningulula iinima mbyoka ye etithwa kuulokoshi mboka tawu ningilwa mboka ye mu hole.b Nabot ngoka a li omudhiginini pamwe noyanamati otaya ka kala nomwenyo moparadisa kombanda yevi sigo aluhe moka itaaya ka ningilwa okwaanuuyuuki. — Episalomi 37:34.