Mbela oho tala ko ngaa uuyuuki ngaashi Jehova he wu tala ko?

1, 2. (a) Nabot noyanamati oya li ya ningilwa okwaanuuyuuki kuni? (b) Omaukwatya gaali geni tatu ka kundathana moshitopolwa shika?

DHILADHILA koshinima shika. Omusamane gumwe okwa li a lundilwa kutya okwa longa omuyonena gwa kwata miiti. Osha li sha halutha yaandjawo nookuume kawo sho yu uvu kutya omusamane okwa monika ondjo sho a lundilwa kaalumentu yaamakaha. Mboka ye hole uuyuuki oya li yu uvite nayi noonkondo sho ya mono omusamane noyanamati mboka kaaye na ondjo ya pangulilwa edhipago. Ndika kali shi ehokololo lyowala, ihe oshinima sha ningilwa shili omupiya gwaJehova omudhiginini Nabot, ngoka a li ko pethimbo lyelelo lyomukwaniilwa gwaIsraeli, Ahab. —  1 Aak. 21:11-13; 2 Aak. 9:26.

² Moshitopolwa shika, otatu ka konakona oshinima shoka sha ningilwa Nabot, naashoka sha li sha ningilwa omukuluntugongalo omudhiginini, ngoka a li a ninga epuko mokupangula kwe, methelemimvo lyotango megongalo lyopaKriste. Uuna tatu konakona iiholelwa mbika yomOmbiimbeli, otatu ka mona kutya eifupipiko oli li uukwatya wa simanenena ngele otu ulike kutya ohatu tala ko uuyuuki ngaashi Jehova he wu tala ko. Otatu ki ilonga wo nkene okudhimina po nehalo ewanawa uuna twa mona okwaanuuyuuki taku ningwa megongalo, taku vulu okuulika kutya ohatu tala ko uuyuuki ngaashi Jehova he wu tala ko.

OKWAANUUYUUKI KWA KWATA MIITI

3, 4. Nabot okwa li omulumentu a tya ngiini, nomolwashike a tindi okulanditha po oshitsambe shomiviinu komukwaniilwa Ahab?

³ Nabot okwa li omudhiginini kuJehova pethimbo Aaisraeli oyendji ya li ya landula oshiholelwa oshiwinayi shomukwaniilwa Ahab nomukadhi, omunyekadhi omukolokoshi Isebel. Aalongeli yoshikalunga Baal kaya li ya simaneka Jehova nenge ya pandule omithikampango dhe. Mepingathano naashoka, Nabot okwa li a lenga ekwatathano lye naJehova nokuli shi vulithe ponkalamweyo ye.

⁴ Lesha 1 Aakwaniilwa 21:1-3. Sho Ahab a pula Nabot a lande po oshitsambe she shomiviinu, nenge e mu pe ngaa oshitsambe oshiwanawa shi vule shoka e na, Nabot okwa tindi. Omolwashike mbela? Nabot okwa yelithile Ahab nesimaneko a ti: “Oshitsambe shika onde shi thigulula kootatekulu. Omuwa ne shi keelele, ndi shi ku pe!” Nabot okwa tindi, molwaashoka ompango yaJehova oya li yi indika oshigwana shaIsraeli shi landithe po uuthiga wezimo lyasho. (Lev. 25:23; Num. 36:7) Osha yela kutya Nabot okwa li ha tala ko iinima ngaashi Jehova he yi tala ko.

5. Isebel okwa li a dhana onkandangala yini mokudhipagitha Nabot?

⁵ Mupyamunene, okutinda kwaNabot okwa ningitha omukwaniilwa Ahab nomukadhi ye mu longele iilonga iiwinayi noonkondo. Opo Isebel a monene omusamane gwe oshitsambe shomiviinu okwa pula aantu yontumba ya lundile Nabot, shoka sha li she mu dhipagitha noyanamati. Mbela Jehova okwa li te ku ungaunga ngiini nokwaanuuyuuki huka kunyanyalitha?

KALUNGA OHA PANGULA PAUYUUKI

6, 7. Jehova okwa li u ulike ngiini kutya oku hole uuyuuki, nomolwashike shoka sha li ehekeleko kuyaandjawo yaNabot nokookuume ke?

⁶ Jehova okwa li e endelele a tume Elia a ka tsakaneke Ahab. Elia okwa li a pangula Ahab shi li pauyuuki kutya ye omudhipagi nomufuthi. Mbela Jehova okwa li a tokola oku ya ningila shike? Ahab nomukadhi nosho wo oyanamati oya li taya ka ningilwa ngaashi sha ningilwa Nabot. —  1 Aak. 21:17-25.

⁷ Nonando aanegumbo yaNabot nookuume ke oya li ya nika oluhodhi omolweso ndyoka lye etithwa kuAhab sho a dhipagitha Nabot, kapu na omalimbilo kutya oya li ya mono ehekeleko sho ya tseya kutya okwaanuuyuuki hoka Jehova okwa li e ku wete nokwa li te ke ku katukila mbala onkatu. Ihe eifupipiko lyawo nokwiinekela kwawo muJehova otashi vulika ya li tayi ka makelwa okupitila miiningwanima inaayi tegelelwa.

8. Ahab okwa li i inyenge ngiini ketumwalaka lyaJehova ndyoka tali mu pangula, noshizemo osha li shini?

⁸ Sho Ahab a mono kutya Jehova okwe mu pangula, “okwa tuula oonguwo dhe, e dhi ihula e ta zala ehahi. Okwa tindi okulya, a lala mehahi nokwe endaenda a lulilwa.” Sho i ifupipike, oshizemo osha li shini? Jehova okwa li a tumu ishewe Elia a fale etumwalaka lyaKalunga lyepangulo. Oshikando shino, molwaashoka Ahab okwa li i ifupipika koshipala shaJehova Kalunga, Jehova ka li te ke mu undulila we omupya, manga e na omwenyo. (1 Aak. 21:27-29) Jehova ngoka ha “konakona oomwenyo,” okwa li a sile ohenda Ahab. —  Omayel. 17:3.

EIFUPIPIKO OLI LI EGAMENO

9. Omolwashike eifupipiko tashi vulika lya li egameno kuyaandjawo yaNabot nokookuume ke?

⁹ Mbela etokolo lyaJehova olya li lya gumu ngiini mboka ya li ye shi iilonga iinyanyalithi yaAhab? Otashi vulika sho Jehova a lundulula etokolo lye sha li emakelo keitaalo lyoyaandjawo yaNabot nokookuume ke. Ngele osho sha li ngawo, eifupipiko oli na okukala lya li lye ya gamene ya tsikile okukala taya longele Jehova nuudhiginini nokukala ye na einekelo kutya Kalunga kawo ita vulu nando okulonga shoka kaashi li pauyuuki. (Lesha Deuteronomium 32:3, 4.) Nabot, oyanamati nosho wo yaandjawo otaya ka mona uuyuuki waJehova wa gwanenena sho ta ka yumudha aayuuki. (Job 14:14, 15; Joh. 5:28, 29) Shimwe iishewe, omuntu omwiifupipiki oha dhimbulukwa kutya “Kalunga ote eta iilonga ayihe mepangulo, ndyoka tali adha iinima ayihe ya holekwa, iiwanawa nenge iiwinayi.” (Omuuv. 12:14) Sho Jehova te ke eta epangulo, ota ka holola iinima mbyoka inaatu tseya natango. Onkee ano, eifupipiko ohali gamene mboka yaa na ondjo, opo uupambepo wawo waa ye moshiponga.

10, 11. (a) Omoonkalo dhini tashi vulika uuyuuki wetu wu makelwe? (b) Omomikalo dhini eifupipiko tali tu gamene?

¹⁰ Mbela oto ki inyenga ngiini ngele aakuluntugongalo oya ningi etokolo ndyoka waa uvite ko nenge tashi vulika itoo tsu kumwe nalyo? Pashiholelwa, oto ka ninga po shike ngele ngoye nenge gulwe ngoka wu hole okwa kanitha oshinakugwanithwa she shoka e hole miilonga yaJehova? Ongiini ngele kuume koye kopandjokana, omumwoyemati nenge omumwoyekadhona nenge kuume koye kopothingo okwa kondwa, ihe ito tsu kumwe netokolo ndyoka lya ningwa? Ongiini ngele owu wete kutya omuntu ngoka a ninga epuko okwa silwa ohenda kaashi li pauyuuki? Oonkalo dha tya ngaaka otadhi vulu okumakela uudhiginini wetu muJehova nomukalo moka hu uganeke egongalo. Mbela ongiini eifupipiko tali vulu oku ku gamena uuna wa taalela emakelo lya tya ngaaka? Natu taleni omikalo mbali.

¹¹ Gwotango, eifupipiko otali vulu oku tu inyengitha tu zimine kutya katu na uushili awuhe. Nonando otu kale tu shi oshindji kombinga yonkalo yontumba, Jehova oye awike ha vulu okumona shoka shi li momitima dhaantu. (1 Sam. 16:7) Uuna tu shi oshili kutya Jehova oye awike ha vulu okumona momitima, otashi ke tu kwathela tu iifupipike, tu mone kutya otwa ngambekwa notu lundulule etaloko lyetu. Omukalo omutiyali, eifupipiko otali tu kwathele tu kale aavuliki notu na eidhidhimiko manga twa tegelela Jehova u ukithe iinima. Ombiimbeli otayi ti: ‘Mboka haa tila Kalunga oye li nawa, ihe omulunde ita kala nawa noita lelepaleke omasiku.’ (Omuuv. 8:12, 13) Ngele otwa kala twi ifupipika, otashi ke tu kwathela notashi ke etela wo yalwe uuwanawa. —  Lesha 1 Petrus 5:5.

UUFUDHIME MEGONGALO

12. Ehokololo lini tatu ka kundathaneni ngashingeyi, nomolwashike?

¹² Aakriste yomethelemimvo lyotango yomuAntiokia shomuSiria oya li ya taalelwa konkalo ndjoka ya li ya makele uudhiginini wawo nosho wo ehalo lyawo lyokudhimina po yalwe. Natu ka kundathaneni ehokololo ndyoka tse tu mone nkene tali tu kwathele tu konakone iikala yetu yi na ko nasha nokudhimina po notu koleke euvoko lyetu lyankene okudhimina po kwa pambathana netaloko lyaJehova lyuuyuuki.

13, 14. Omauthembahenda geni omuyapostoli Petrus a li e na, nongiini a li u ulike uulaadhi?

¹³ Omuyapostoli Petrus okwa li omukuluntugongalo a tseyika nawa megongalo lyopaKriste. Okwa li he ende pamwe naJesus nokwa li i inekelelwa iinakugwanithwa ya simana. (Mat. 16:19) Pashiholelwa, mo 36 E.N., Petrus okwa li e na uuthembahenda wokuuvithila Kornelius naanegumbo lye onkundana ombwanawa. Ompito ndjoka oya li ondhindhilikwedhi, molwaashoka Kornelius ka li Omujuda a pita etanda. Sho Kornelius noyaandjawo ya tililwa ombepo ondjapuki, Petrus okwe shi zimine a ti: ‘Aantu mbaka oya pewa ombepo ondjapuki naanaa ngashika tse. Ope na tuu ngoka ta vulu oku ya keelela, kaaya ninginithwe momeya?’ —  Iil. 10:47, Yelekanitha NW.

¹⁴ Momumvo 49 E.N., aayapostoli nosho wo aakuluntugongalo yomuJerusalem oya li ya gongala ya kundathane ngele mboka kaaye shi Aajuda oya pumbwa okupitithwa etanda. Petrus okwa li a popi nuulaadhi pokugongala hoka ta dhimbulukitha aamwahe kutya omimvo dha piti, Aajuda mboka inaaya pita etanda oya li ya pewa omagano gombepo ondjapuki. Shoka Petrus a li a mono osha kwathele olutuwiliki lwomethelemimvo lyotango lu ninge omatokolo. (Iil. 15:6-11, 13, 14, 28, 29) Otashi vulika Aajuda naamboka kaaye shi Aajuda ya li ya pandula sho Petrus a gandja uuyelele kee na uumbanda. Kasha li tuu oshipu okukala yi inekela omulumentu ngoka a koka pambepo! —  Heb. 13:7.

15. Epuko lini Petrus a li a ningi manga a li muAntiokia shomuSiria? (Tala kethano lyopetameko.)

¹⁵ Konima yokugongala hoka kwa li kwa ningwa mo 49 E.N., Petrus okwa li a talele po Antiokia shomuSiria. Manga a li hoka okwa li e endathana a manguluka naamwahe mboka kaaye shi Aajuda. Kapu na omalimbililo kutya aamwahe oya li ya mono uuwanawa montseyo yaPetrus nomiimoniwa ye. Ihe nonando ongawo, dhiladhila nkene ya li ya kumwa noya yemata sho Petrus e etha po ombaadhilila okulya pamwe nayo. Aajuda yalwe yomegongalo naBarnabas, oya li ya nwethwa mo nayi kuPetrus ya ninge sha faathana. Oshike mbela sha li shi inyengitha omukuluntugongalo ngoka a koka pambepo a ninge epuko lya tya ngawo, ndyoka lya li tali vulu okutopola egongalo? Oshike sha simana noonkondo tatu vulu okwiilonga mepuko ndyoka lya li lya ningwa kuPetrus, shoka tashi ke tu kwathela uuna tu uvithwa nayi koohapu nenge kiilonga yomukuluntugongalo?

16. Petrus okwa li a pukululwa ngiini, nomapulo geni ga holoka po?

¹⁶ Lesha Aagalati 2:11-14. Petrus okwa li a kwatwa kuumbanda wokutila aantu. (Omayel. 29:25) Nonando okwa li a tseya kutya Jehova oku uvitile ngiini oshinima shoka, Petrus okwa li a tila kutya aantu otaye ke mu tila ngiini sho te endathana naantu inaaya pita etanda yomegongalo lyomuJerusalem. Omuyapostoli Paulus ngoka naye a li pokugongala hoka kwa ningilwa muJerusalem mo 49 E.N. muAntiokia, oku ula Petrus omufudhime. (Iil. 15:12; Gal. 2:13) Mbela mboka kaaye shi Aajuda oya li yu uvitile ngiini epuko ndyoka lya ningwa kuPetrus kaali li pauyuuki? Mbela oya li ya geya? Mbela Petrus okwa li a kanitha iinakugwanithwa ya simana molwaashoka a ningi epuko?

KALA HO DHIMINE PO

17. Petrus okwa li a mono ngiini uuwanawa mokudhiminwa po kuJehova?

¹⁷ Oshi iwetikile kutya Petrus okwa li a taamba ko neifupipiko omayele gaPaulus. Omanyolo itagu ulike kutya okwa li a kanitha iinakugwanithwa ye. Konima yethimbo Petrus okwa nwethwa mo a nyole oontumwafo mbali mOmbiimbeli. Montumwafo ye ontiyali okwa li a popi kutya Paulus ‘omwiitaali omukwawo omuholike.’ (2 Pet. 3:15) Nonando mboka kaaye shi Aajuda megongalo oya li ye ehamekwa kepuko lyaPetrus, Jesus ngoka e li omutse gwegongala okwa li a tsikile oku mu longitha. (Ef. 1:22) Kungawo, aakwanegongalo oya li ya mono ompito yokuholela Jesus naHe, mokukala haya dhimine po. Kapwa li nando ogumwe gwomuyo e etha a pundukithwe kokwaagwanenena kwaPetrus.

18. Mbela omoonkalo dhini twa pumbwa okukala hatu tala ko iinima pauyuuki ngaashi Jehova he yi tala ko?

¹⁸ Ngaashi naanaa sha li methelemimvo lyotango, aakuluntugongalo yomegongalo lyopaKriste kunena nayo inaya gwanenena, molwaashoka “atuheni ohatu puka olwindji.” (Jak. 3:2) Otashi vulika shika tu shi shi nawa, ihe uupyakadhi ohawu kala po unene tuu ngele twa gumwa kokwaagwanenena kwaamwatate. Mbela monkalo ya tya ngawo otatu ku ulika ngaa etaloko li li pauyuuki ngaashi Jehova? Pashiholewa, oto ki inyenga ngiini ngele omukuluntugongalo okwa popi sha shoka tashi ulike a fa a gama ombinga? Mbela oto ke etha wu pundukithwe ngele omukuluntugongalo okwa popi sha inaa dhiladhila nawa shoka tashi ku ehameke nenge tashi ku uvitha nayi? Pehala lyokuthika nziya pehulithodhiladhilo kutya omumwatate ina gwana we okukala omukuluntugongalo, mbela oto ka tegelela neidhidhimiko Jesus, omutse gwegongalo oye u ungaunge nasho? Mbela oto ka ninga ngaa oonkambadhala wu dhiladhile kutya omumwatate okwa kala ta longele Jehova uule womimvo odhindji, pehala lyokudhiladhila komapuko ge? Ngele omumwatate ngoka e ku ninga nayi ota tsikile okukala omukuluntugongalo nenge a gwedhelwa po iinakugwanithwa yilwe, mbela oto ka kala ngaa wa nyanyukwa pamwe naye? Ngele owu na ehalo lyokudhimina po, otashi vulika wu kale ho tala ko iinima pauyuuki ngaashi Jehova he yi tala ko. —  Lesha Mateus 6:14, 15.

19. Otu na okukala twa tokola toko okuninga shike?

¹⁹ Mboka ye hole uuyuuki oya tegelela nenyanyu esiku ndyoka Jehova ta ka kutha po thiluthilu okwaanuuyuuki akuhe hoka haku ningilwa aantu kuSatana nokuuyuni we. (Jes. 65:17) Atuheni natu kale twa tokola toko okutala ko iinima pauyuuki ngaashi Jehova he yi tala ko mokukala tu shi kutya otwa ngambekwa nomokukala hatu dhimine po nehalo ewanawa mboka ya yona kutse.