Shoka Kalunga e ku ningila

Ndyoka olyo limwe lyomomanyolo gomOmbiimbeli lya tseyika nawa nohali tothwa olundji. Ohaku tiwa kutya kapu na ovelise yilwe kaayi shi ndjoka, “ya ngonga paufupi ekwatathano ndyoka Kalunga e na naantu nosho wo shoka tashi eta ehupitho.” Omolwetompelo ndyoka, miilongo yimwe enyolo ndika, nenge oohapu ndhoka dha tothwa “muJohannes 3:16” ohadhi kala olundji dha longithwa piiningwanima, dha nyolwa kuumbapila mboka hawu natekwa koohauto, komanyolo gontumba nosho wo kiinima yilwe.

Otashi vulika shi li ngeyi kutya, mboka haya kala ya nyola oohapu ndhoka kiinima yawo ohaya kala yu uvite kutya ohole yaKalunga otayi ya monithitha ehupitho lyaaluhe. Ongiini kombinga yoye? Ohole yaKalunga otayi ti shike kungoye? Sho to tala Kalunga okwa ninga shike shoka tashi ulike kutya oku ku hole?

‘KALUNGA OKWA KALA E HOLE UUYUNI’

Aantu oyendji oye shi shi kutya Kalunga oye a shita ewangandjo, eshito, nosho wo aantu yo yene. Iinima yi na omwenyo oya kitakana noonkondo noya shitwa nawa shoka tashi ningitha omuntu a kale e wete kutya opu na okukala shili pu na ngoka omunandungeelela e yi eta po. Aantu oyendji ohaya pandula Kalunga esiku kehe omolwomagano gomwenyo. Ohaya kala wo ye wete kutya oye na okukala yi inekela thiluthilu muKalunga omolwoompumbwe dhawo dhakehe esiku, ngaashi ombepo, omeya, iikulya nosho wo edhingoloko ndyoka hali ningwa paunshitwe kopulanete yevi, opo ya vule okukala ye na omwenyo noya nyanyukilwe iilonga yawo.

Oshi li nawa tu pandule Kalunga omolwiinima ayihe mbika, molwaashoka oye Omushiti gwetu noye he tu kaleke po. (Episalomi 104:10-28; 145:15, 16; Iilonga 4:24) Otatu vulu okukala tu na olupandu lwohole yaKalunga yoku tu hola uuna tatu dhiladhila kwaashihe shoka ha ningi opo a kaleke po onkalamwenyo. Omuyapostoli Paulus okwe shi popi ngeyi: “[Kalunga oha] pe aantu ayehe omwenyo nomufudho niinima ayihe. . . . ’Muye tse otu na omwenyo, tatu inyenge notu li po.’” — Iilonga 17:25, 28.

Ihe ohole yaKalunga inayi ulikwa owala moku tu sila oshimpwiyu palutu, ihe oyu ulikwa wo momikalo odhindji. Okwe tu tula wo pondondo yopombanda nokwe tu simaneka sho e tu shita tu na ompumbwe yopambepo nohe tu kwathele tu yi gwanithe po. (Mateus 5:3) Kungawo, aantu aavuliki oye na etegameno lyoku ka ninga iilyo yuukwanegumbo waKalunga, ano ‘oyana.’ — Aaroma 8:19-21.

Ngaashi Johannes 3:16 a tsikile nokupopya, Kalunga okwa li e tu ulukile ohole ye sho a tumu Omwana, Jesus, kombanda yevi e tu longe kombinga yaKalunga ke nosho wo He noku tu sile. Ihe oyendji otaya ka zimina kutya kayu uvite ko shili kutya omolwashike sha li sha pumbiwa Jesus a sile aantu nonkene eso lyaJesus li li euliko lyohole yaKalunga yoku tu hola. Natu ka tale nkene Ombiimbeli ya gandja etompelo kutya Jesus okwa sile shike nosho wo ongushu yeso lye.

‘OKWA GANDJA OMWANA AWIKE’

Aantu ayehe ohaya si, haya adhika kuuwehame, kuukulupe, nosho wo keso. Ihe shoka hasho Jehova Kalunga a li a lalakanena. Okwa li a pe aantu yotango etegameno lyokukala nomwenyo sigo aluhe moparadisa kombanda yevi. Ihe osha li owala tashi wapa uuna ya ningi oshinima shimwe: Oya li ye na okuvulika kuye. Kalunga okwa li e ya lombwele kutya oya li taya ka sa ngele oya hogolola okwaavulika. (Genesis 2:17) Omuntu gumwe okwa li a tukulile oshipotha oonkondopangelo dhaKalunga nokwi iyetele eso nosho wo oluvalo lwe. Omuyapostoli Paulus okwa yelitha a ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” — Aaroma 5:12.

Ihe Kalunga “oku hole shoka shu uka.” (Episalomi 37:28) Ihe nonando ka li ta vulu okwiipwililikila okuyonena owina kwomuntu gwotango, Kalunga ina tokolela aantu ayehe ya kale taya mono iihuna sigo aluhe yo ya se omolwokwaavulika kwomuntu gumwe. Mepingathano naashono, mokutula miilonga ekotampango ndyoka kutya ‘omwenyo nagu futwe nomwenyo,’ okwa li a thikitha pamwe oshiyelekitho shuuyuuki nokwa ningitha omwenyo gwaaluhe tagu wapa ishewe kaantu aavuliki. (Eksodus 21:23) Epulo olyo nduno kutya, Ongiini omwenyo gwa gwanenena ngoka gwa li gwa kanithwa kuAdam gwa li tagu vulu okumonika ishewe? Eyamukulo: Omuntu gumwe okwa li e na okwiigandja, nenge okuyamba po omwenyo gwe ngoka gu thike pugwaAdam, ano tu tye, omwenyo gwopantu gwa gwanenena.

Osha yela kutya, kapu na gumwe inaa gwanenena gwomoluvalo lwaAdam a li ta vulu okufuta ofuto ndjoka, ihe Jesus okwa li te shi vulu. (Episalomi 49:6-9) A valwa kee na nando okapethili kasha kuuthigululwalunde, Jesus okwa li a gwanenena, ngaashi owala Adam a li. Kungawo, sho a yamba po omwenyo gwe, Jesus okwa li a kulile aantu muupika wuulunde. Sho a ningi ngawo, okwa li a pe oluvalo lwaaihokani yotango ompito yoku ka kala nonkalamwenyo ya gwanenena ndjoka Adam naEva ya li ye na. (Aaroma 3:23, 24; 6:23) Mbela opu na sha shoka tu na okuninga opo tu mone uuwanawa moshilonga shoka shohole shehalo ewanawa?

“SHAA NGOKA TE MU ITAALE”

Ngele tatu shuna kuJohannes 3:16, otu wete oohapu ndhoka tadhi ti kutya ‘shaa ngoka ti itaale muJesus, ita kana, ihe ota kala e na omwenyo gwaaluhe.’ Shika osha hala okutya omuntu oku na okuninga sha opo a mone omwenyo gwaaluhe. Opo tu mone “omwenyo gwaaluhe,” otwa pumbwa okwiitaala muJesus nosho wo okuvulika kuye.

Otashi vulika wu ipule to ti: Okuvulika okwa kwatela mo shike? Mbela Jesus ina tya kutya, ‘shaa ngoka te mu itaale, ota ka kala e na omwenyo gwaaluhe?’ Eeno, okwiitaala, nenge eitaalo, olya simanenena. Onkee ano, osha simana okudhimbulukwa kutya Ombiimbeli otayi ulike kutya okwiitaala owala kutya Jesus oko e li inaku gwana. O-Vine’s Expository Dictionary of Old and New Testament Words oyu ulike kutya oshitya shoka sha longithwa kuJohannes melaka lyopetameko otashi gandja edhiladhilo ‘lyokwiikolelela moshinima, ihe hakeitaalo lyowala.’ Opo omuntu a kale a hokiwa kuKalunga, okwa pumbwa okuninga oshindji kaashi shi owala okwiitaala momutima kutya Jesus oye Omuhupithi. Omwiitaali oku na wo okukambadhala okutula miilonga lela shoka Jesus a li a longo aantu. Ngele omuntu ita ningi sha, okupopya owala kutya oku na eitaalo kaku shi sha. Ombiimbeli otayi ti kutya ‘eitaalo lyaa na iilonga, olya sa.’ (Jakob 2:26) Oku shi popya momukalo gulwe, omwiitaali okwa tegelelwa a kale e na eitaalo muJesus, sha hala okutya, oku na okukala metsokumwe naashoka i itaala.

Paulus okwe shi yelitha ngeyi: ‘Ohole yaKristus otayi tu pangele, sho twa dhimbulula kutya omuntu gumwe [Jesus] okwa sile aantu ayehe. Nokwa sile aantu ayehe, opo mboka ye na omwenyo kaaya ikalele we yo yene, ihe ya kalele nguka a si molwawo nokwa yumudhwa molwawo.’ (2 Aakorinto 5:14, 15) Olupandu talu zi komutima omolwekuliloyambo lyaJesus olu na oku tu inyengitha tu ninge omalunduluko monkalamwenyo yetu, kaatu ikalele we tse yene, ihe tu kalele Jesus, ngoka e tu sile. Sha hala okutya, otwa pumbwa okupititha komeho shoka Jesus a li a longo aantu. Elunduluko ndyoka osha yela kutya otali ka guma omikalo dhetu, omahogololo getu, naashihe shoka hatu ningi. Mboka ye na eitaalo muJesus otaya ka pewa ondjambi yashike?

“KAA KANE, IHE A KALE E NA OMWENYO GWAALUHE”

Oshitopolwa shahugunina shaJohannes 3:16 otashi ulike euvaneko lyaKalunga kwaamboka ye na eitaalo mekuliloyambo nohaya kala metsokumwe nomithikampango dhopaKalunga. Kalunga okwa lalakanena aantu mboka aavuliki ‘kaaya kane, ihe ya kale ye na omwenyo gwaaluhe.’ Opu na omategameno ga yoolokathana, ngoka ga tegelela mboka ye holike kuKalunga.

Jesus okwa li uvanekele ongundu yimwe omwenyo gwaaluhe megulu. Okwa li a lombwele sha yela aalongwa ye aadhiginini kutya okwa li e li pokuya e ke ya longekidhile omahala opo ya vule oku ka pangela pamwe naye meadhimo. (Johannes 14:2, 3; Aafilippi 3:20, 21) Mboka taya yumudhilwa omwenyo megulu “otaa ka ninga aayambi yaKalunga noyaKristus notaa ka pangela pamwe naKristus uule woomvula eyuvi limwe.” — Ehololo 20:6.

Omwaalu owala gwa ngambekwa gwaalanduli yaKristus ogo tagu ka mona uuthembahenda mboka. Nokuli Jesus okwa ti: ‘Inamu tila, ne oshigunda oshishona! Oshoka Ho okwa hala oku mú pa Uukwaniilwa.’ (Lukas 12:32, yelekanitha NW.) ‘Oshigunda shoka oshishona’ osha li tashi ka kala shi na aantu yangapi? Ehololo 14:1, 4 otali ti: “Onda mono ko Onzigona [Jesus Kristus omuyumudhwa] a thikama kondundu yaSioni [yomegulu]. Pamwe nOnzigona okwa li aantu 144 000 mboka ya ndhindhilikwa edhina lye nolyaHe miipala yawo. . . . Oyo oya kulilwa mo maantu ooyakwawo noyo aatango okuyambelwa Kalunga nOnzigona.” Mokuyelekanitha naantu omabiliyona mboka ya li ko nale, aantu 144 000 oya ninga po owala “oshigunda oshishona.” Mbaka otaya popiwa ye li aakwaniilwa, ihe otaya ka pangela oolye?

Jesus okwa li a popi ongundu ontiyali yaantu aavuliki mboka taye ke etelwa uuwanawa kUukwaniilwa womegulu. Ngaashi tu shi wete muJohannes 10:16, Jesus okwa ti: ‘Oku na oonzi dhandje dhilwe ndhoka kaadhi mo moshigunda shika. Nadho wo ondi na oku dhi eta mo, odho notadhi ka uva ewi lyandje e tadhi ka ninga oshigunda shimwe nodhi na omusita gumwe.’ “Oonzi” ndhoka odha tegelela nondjuulukwe omwenyo gwaaluhe kombanda yevi, etegameno ndyoka Adam naEva ya li wo ye na petameko. Otu shi shi ngiini kutya otadhi ka kala kombanda yevi?

Ombiimbeli oya popya lwiikando yontumba kombinga yoonkalo ndhoka tadhi ka kala kombanda yevi sho tali ka ninga Oparadisa. Opo wu imonene ko, oto vulu okupandja Ombiimbeli yoye e to lesha omanyolo ngaka: Episalomi 37:9-11; 46:8, 9; 72:7, 8, 16; Jesaja 35:5, 6; 65:21-23; Mateus 5:5; Johannes 5:28, 29; Ehololo 21:4. Oovelise ndhoka otadhi hunganeke kutya iita, oondjala, uuwehame, nosho wo eso otayi ka hula po. Otadhi popi kombinga yethimbo ndyoka uuna aantu mboka ye na omitima omiwanawa taya ka nyanyukilwa okutunga omagumbo gawo yene, taya ka longa omapya gawo yene nokuputudhila oyana momudhingoloko gu na ombili.a Mbela etegameno ndyoka kali shi ehokithi kungoye? Otu na omatompelo omawanawa gokwiitaala kutya omauvaneko ngoka otaga ka gwanithwa masiku.

KALUNGA OKWA NINGA OSHINDJI

Ngele owa mwena po wu dhiladhile kwaashihe shoka Kalunga e ku ningila nosho wo aantu ayehe, osha yela kutya okwa ninga nale iinima oyindji. Otu na omwenyo, oondunge, uukolele woshiyeleke, nosho wo iiniwe yakehe esiku yonkalamwenyo. Kakele kaashoka, omagano gaKalunga gekuliloyambo okupitila muJesus, ngoka e tu sile, otaga vulu oku tu etela omalaleko nuuyamba ogendji, ngaashi twe shi ilongo muJohannes 3:16.

Omwenyo gwaaluhe monkalo ombwanawa, kaamu na uuwehame, iita, oondjala, nosho wo eso, osha yela kutya otagu ke tu etela enyanyu nosho wo omalaleko nuuyamba kaage na ehulilo. Okumona omalaleko nuuyamba ngoka otaku ki ikolelela thiluthilu kungoye mwene. Epulo olyo nduno kutya, Kalunga oto mu ningile shike?