Jehova oha yambeke mboka haya gandja nomutima aguhe

OMUSHITI gwetu okwe tu pa omagano ge na ondilo gokutokola tse yene shoka twa hala okuninga. Oha yambeke wo mboka haya ambidhidha elongelokalunga lyashili nomutima aguhe naamboka haya yapulitha edhina lye nohaya kwathele okugwanitha po elalakano lye. Jehova okwa hala tu vulike nomwenyo aguhe, ihe hakethiminiko. Okwa lenga mboka haye mu longele, molwaashoka ye mu pandula noye mu hole shili.

Pashiholelwa, sho Aaisraeli ya li mombuga yaSinai, Jehova okwe ya lombwele ya tunge ehala lyoku mu longelela mo. Okwa ti: “Momaliko geni kuthii mo omayambo gokuyambela Omuwa. Shaa ngoka a hala oku shi ninga, ne ete omayambo.” (Eks. 35:5) Omuisraeli kehe okwa li ta vulu okugandja kehe shoka ta vulu. Omagano ngoka, kutya nduno omashona nenge ogendji, oga li ga longithwa okugwanitha po elalakano lyaKalunga. Aaisraeli oya li yi inyenge ngiini?

‘Shaa ngoka a li a hala oku shi ninga’ okwa gandja omagano. Aalumentu naakiintu, ayehe oye eta sha shi longithwe miilonga yaJehova, ngaashi: oompate, omagola, uulinga, uugondo wuulenga nuulenga woshingoli, oshisiliveli, oshikushu oongodhi oombulau, oombwilili noontiliganembwilili, oliina ya tungika, omafufu giikombo, iipa yoonzi oondumentu ya tethwa iitiligane, iipa yoongombefuta, iipilangi yomuthiya, omamanya gondilo, iizimba, omagadhi nomugwayo. Pehulilo, iinima “mbyoka ya gongelwa oya li ya gwanenena noya pitilila metungo alihe.” — Eks. 35:21-24, 27-29; 36:7.

Jehova, omagano hago unene a li a nyanyukilwa, ihe ombepo yokugandja yaamboka ya ambidhidhile elongelokalunga lyashili. Oya li wo ya longitha ethimbo lyawo noonkondo dhawo. Ombiimbeli otayi ti: “Aakiintu ayehe oonkulungu oya yogoha oongodhi.” Eeno, aakiintu ayehe ‘oya yogoha oongodhi dhomafufu giikombo.’ Jehova okwa pe wo Bezalel “uunongo, oondunge, ontseyo nuunkulungu okuthaneka iinima yuungomba.” Kalunga okwa pe Bezalel naOholiab uunkulungu wiilonga yi ili noyi ili mbyoka ya li yi na okulongwa. — Eks. 35:25, 26, 30-35.

Sho Jehova a pula Aaisraeli ya gandje omagano, okwa li i inekela kutya “shaa ngoka a hala oku shi ninga” ota ka ambidhidha elongelokalunga lyashili. NaJehova okwa li a wilike mboka ya gandja nomutima aguhe nokwe ya pe enyanyu olindji. Kungeyi Jehova oku ulike kutya opo a gwanithe po ehalo lye, oha yambeke aapiya ye mboka taya gandja nomutima aguhe, noitaya ka pumbwa sha. (Eps. 34:9) Osha yela kutya sho to longele Jehova nomutima aguhe ote ke ku yambeka.

OMIKALO MOKA YALWE HAYA AMBIDHIDHA IILONGA YOMUUYUNI AWUHE

Ngaashi owala pethimbo lyomuyapostoli Paulus, oyendji kunena ohaya “pungula” oshimaliwa nenge ya tokole kutya otaya kala haya tula iimaliwa yi thike peni mokaketha kegongalo hoka ka nyolwa “Omayambidhidho gIilonga yomUuyuni Awuhe.” (1 Kor. 16:2) Omwedhi kehe, omagongalo ohaga tumine iimaliwa mbyoka koshitayimbelewa shOonzapo dhaJehova shoka hashi tonatele iilonga moshilongo shawo. Oto vulu wo okutumina omayambidhidho goye shu ukilila kehangano lyopaveta lyOonzapo dhaJehova moshilongo moka wu li. Ngele edhina lyehangano ndyoka ku li shi, ninga ekwatathano noshitayimbelewa shoka hashi tonatele iilonga moshilongo sheni. Oondjukithi dhiitayimbelewa otadhi adhika ko-www.jw.org/ng. Omayambidhidho ngoka to vulu okutuma shu ukilila ongaashi ngaka taga landula mpaka:

OMAYAMBIDHIDHO NGOKA TAGA VULU OKUTUMWA GO GENEGENE

Okutuma oshimaliwa okupitila mombaanga, nenge nokakalata kehe kombaanga. Miitayimbelewa yimwe shika otashi vulu okuningwa ko-jw.org nenge okupitila kehala lyontumba lyokointaneta.
Iimaliwa koomuma, iikwamalyenge nenge iinima yilwe yongushu. Yi tuma pamwe nontumwafo ndjoka tayi ulike kutya iimaliwa nenge iinima mbyoka oyi li omayambidhidho.

OKUGANDJA KWA LONGEKIDHWA

Kakele komagano gopashimaliwa niinima yilwe yongushu, opu na omagano galwe omuntu ta vulu okugandja a ambidhidhe iilonga yUukwaniilwa muuyuni awuhe. Omagano ngoka oga kwatela mo iinima mbyoka ya popiwa pevi. Kutya nduno owa hala okulongitha omukalo gumwe nenge omikalo dhontumba, kwatathana tango noshitayimbelewa shoka hashi tonatele iilonga moshilongo sheni, opo wu mone kutya omikalo dhini hadhi longo moshilongo sheni. Molwaashoka iitegelelwa yopaveta nosho wo oompango dhiifendela odha yooloka miilongo niilongo, oshi li nawa wu pule omayele kwaamboka ye shi iinima mbyoka, omanga inoo tokola kutya oto longitha omukalo guni.

Omakwashilipaleko: Oto vulu okugandja edhina lyopaveta ndyoka hali longithwa kehangano lyOonzapo dhaJehova moshilongo sheni, opo ehangano li thigulule omakwashilipaleko goye nenge openzela yoye.

Uumbo wombaanga: Oto vulu okupula ombaanga, opo iimaliwa yoye mbyoka yi li kokambo koye nenge yopenzela nenge mbyoka wa pungulitha uule wethimbo lyontumba, yi thigululwe po kehangano lyOonzapo dhaJehova tayi tulwa kedhina lyopaveta ndyoka hali longitha, shi ikolelela komilandu dhoombaanga moshilongo sheni.

Iipambuliko nomikuli ndhoka omuntu i indilwa komahangano gontumba nenge kepangelo (stocks and bonds): Oto vulu wu yi gandje yi li omagano nenge wu nyole sha yela kutya ngele wa si iinima mbyoka nayi gandjwe kehangano lyOonzapo dhaJehova tayi tulwa kedhina lyopaveta ndyoka hali longitha moshilongo sheni.

Etungo nenge evi: Ngele owa hala okugandja etungo nenge evi omagano, kwatathana noshitayimbelewa tango. Oshitayimbelewa otashi ka tokola ngele etungo nenge evi otali vulu okulongithwa nenge otashi ka kala hwepo oku li landitha po, sho oshimaliwa tashi ningi shomayambidhidho giilonga yomuuyuni awuhe.

Omatestamendi noondokumende dhilwe dhopaveta dhi na ko nasha netopolo lyomaliko (Wills and Trusts): Oto vulu okunyola edhina ndyoka hali longithwa kehangano lyOonzapo dhaJehova moshilongo sheni, opo ehangano li thigulule po omaliko nenge iimaliwa yoye. Ngele to longitha omukalo nguka otashi vulika wu mone uuwanawa wontumba wu na ko nasha nokunanwa iifendela.

Ehangano lyopaveta ndyoka hali longithwa kOonzapo dhaJehova moshilongo sheni otali vulu okunyolwa metestamendi nenge moondokumende dhilwe dhopaveta dhi na ko nasha netopolo lyomaliko li ga thigulule po. Ihe kali na okunyolithwa li li omutopoli gwuuthiga woye nenge omukalelipo ngoka e na uuthemba wokuungaunga netopolo lyomaliko goye.

Opo wu mone uuyelele owundji, oto vulu okukwatathana nOmbelewa yi na ko nasha nIimaliwa (Accounting Office) to nyolele nenge wu dhengele koshitayimbelewa shoka hashi tonatele iilonga moshilongo sheni.