“Omunamutimahenda ota yambekwa”

OMAYAMBO oga kala aluhe oshinima sha simana melongelokalunga lyashili. Aaisraeli oya kala haya gandja omayambo giinamwenyo, omanga Aakriste ya kala ya tseyika nawa haya gandja “omahambelelondjambo,” (OB-1954). Ihe opu na omayambo galwe ngoka Jehova ha hokwa. (Heb. 13:15, 16) Omayambo ngoka ohage etele omuntu enyanyu nomayambeko, ngaashi iiholelwa tayi landula tayi shi ulike.

Hanna, omupiya omudhiginini gwonale, okwa li a halelela okanona kokamati, ihe ka li ha mono aanona. Megalikano lye, okwa li u uvanekele Jehova kutya ngele okwa mono okanona kokamati, ote ke ‘ka yapulila Jehova, ka kale ke okukalamwenyo kwako akuhe.’ (1 Sam. 1:10, 11) Mokweendela ko kwethimbo, Hanna okwa ningi omusimba nokwa mono okamati. Okwe ka luku Samuel. Sho Samuel a toyo, okwe mu fala ketsalihangano ngaashi a li u uvaneka. Jehova okwa li a yambeke Hanna, omolwombepo ye yeiyambo. Okwa li a mono uuthembahenda wokumona aanona yatano ya gwedhwa po. Omwanamati Samuel okwa li wo a ningi omuhunganeki nomunyoli gwOmbiimbeli. — 1 Sam. 2:21.

Ngaashi Hanna naSamuel, Aakriste kunena nayo oye na uuthembahenda wokulongitha oonkalamwenyo dhawo miilonga mbyoka ya yapulilwa Omushiti gwawo. Jesus oku uvaneka kutya kehe eyambo tatu ningi tu longele Jehova, otali ke tu etela omayambeko. — Mark. 10:28-30.

Omimvo 2 000 nasha dha ka pita, omukiintu Omukriste gwedhina Dorkas, okwa li a tseyika nawa ‘ha longo uuwanawa noha kwatha oohepele.’ Okwa li he shi ningi, opo a kwathele yalwe. Shiyemateka, “okwa kwatwa kuuvu e ta si,” shoka sha li sha nikitha egongalo oluhodhi. Sho aalongwa yu uvu kutya Petrus oku li moshitopolwa, oye mu indile e ye kuyo. Dhiladhila kenyanyu ndyoka ya li yu uvite, sho Petrus e ya e ta yumudha Dorkas. Ndyoka olyo eyumuko lyotango lya popiwa mOmbiimbeli lya ningwa komuyapostoli. (Iil. 9:36-41) Kalunga ka li a dhimbwa omaiyambo ngoka Dorkas a ningi. (Heb. 6:10) Ehokololo lye kombinga yokugandja olya nyolwa mOmbiimbeli, li li oshiholelwa oshiwanawa kutse okulandula.

Omuyapostoli Paulus naye okwe tu tulila po oshiholelwa oshiwanawa, sho a li a longitha ethimbo lye nokugandja eitulomo kuyalwe. Paulus okwa li a nyolele aamwahe Aakriste yomuKorinto a ti: “Ngame otandi ka gandja nenyanyu ashihe shoka ndi na notandi ki igandja wo omolwoomwenyo dheni, opo ndi mu kwathe.” (2 Kor. 12:15) Paulus okwa li e shi mono mo kutya okwiiyambela yalwe, ihaku etele owala omuntu paumwene enyanyu, ihe ohaku mu etele wo omayambeko nokukala a hokiwa kuJehova, shoka shi li oshinima sha simanenena. — Iil. 20:24, 35.

Osha yela kutya Jehova oha kala a nyanyukwa, uuna tatu longitha ethimbo lyetu noonkondo dhetu, tu humithe komeho Uukwaniilwa nokukwathela ooitaali ooyakwetu. Mbela opu na ngaa omikalo dhilwe moka tatu vulu okuyambidhidha iilonga yokuuvitha kombinga yUukwaniilwa? Eeno, opu na! Shimwe ishewe kombinga yiilonga yetu yopahole, otatu vulu okusimanekitha Kalunga mokugandja omayambidhidho gehalo ewanawa. Omayambidhidho ngoka ohaga longithwa mokuhumitha komeho iilonga yokuuvitha muuyuni awuhe, mbyoka ya kwatela mo okuyambidhidha aatumwa naalongi yethimbo lyu udha. Oshikwawo, okulongekidha nokutoloka iileshomwa nuuvidio, okugandja omakwatho uuna pwa holoka iiponga iinene nosho wo okutunga Iinyanga yUukwaniilwa, ayihe ohayi ambidhidhwa nomayambidhidho getu gehalo ewanawa. Otatu vulu okukala nuushili kutya omuntu ngoka ha gandja nenge tu tye “omunamutimahenda ota yambekwa.” Shimwe ishewe, uuna tatu gandja iinima yetu yongushu kuJehova, kungawo otatu mu simanekitha. — Omayel. 3:9; 22:9.

Omikalo moka yamwe haya ambidhidha iilonga yomuuyuni awuhe

Ngaashi owala pethimbo lyomuyapostoli Paulus, oyendji kunena ohaya “pungula” oshimaliwa nenge ya tokole kutya otaya kala haya tula iimaliwa yi thike peni mokaketha kegongalo hoka ka nyolwa “Omayambidhidho gIilonga yomUuyuni Awuhe.” (1 Kor. 16:2) Omwedhi kehe, omagongalo ohaga tumine iimaliwa mbyoka koshitayimbelewa shOonzapo dhaJehova shoka hashi tonatele iilonga moshilongo shawo. Oto vulu wo okutumina omayambidhidho goye shu ukilila kedhina lyopaveta lyehangano lyOonzapo dhaJehova ndyoka hali longithwa moshilongo moka wu li. Ngele edhina ndyoka ku li shi, ninga ekwatathano noshitayimbelewa shoka hashi tonatele iilonga moshilongo sheni. Oondjukithi dhiitayimbelewa otadhi adhika ko-www.jw.org. Omayambidhidho ngoka to vulu okutuma shu ukilila ongaashi ngaka taga landula mpaka:

OMAYAMBIDHIDHO NGOKA TAGA VULU OKUTUMWA GO GENEGENE

Okutuma oshimaliwa okupitila mombaanga, nenge nokakalata kehe kombaanga. Miitayimbelewa yimwe shika otashi vulu okuningwa ko-jw.org nenge okupitila kehala lyontumba lyokointaneta.
Iimaliwa koomuma, iikwamalyenge nenge iinima yilwe yongushu. Yi tuma pamwe nontumwafo ndjoka tayi ulike kutya iimaliwa nenge iinima mbyoka oyi li omayambidhidho.

OKUGANDJA KWA LONGEKIDHWA

Kakele komagano gopashimaliwa niinima yilwe yongushu, opu na omikalo dhilwe omuntu ta vulu okugandja a ambidhidhe iilonga yUukwaniilwa muuyuni awuhe Omikalo ndhika odha popiwa pevi. Kutya nduno owa hala okulongitha omukalo gumwe nenge omikalo dhontumba, kwatathana tango noshitayimbelewa shoka hashi tonatele iilonga moshilongo sheni, opo wu mone kutya omikalo dhini hadhi longo moshilongo sheni. Molwaashoka iitegelelwa yopaveta noompango dhiifendela odha yooloka miilongo niilongo, oshi li nawa wu pule omayele kwaamboka ye shi iinima mbyoka, omanga inoo tokola kutya oto longitha omukalo guni.

Omakwashilipaleko nopenzela: Oto vulu okugandja edhina lyopaveta ndyoka hali longithwa kehangano lyOonzapo dhaJehova moshilongo sheni, opo ehangano li thigulule omakwashilipaleko goye nenge openzela yoye.

Uumbo wombaanga: Oto vulu okupula ombaanga, opo iimaliwa yoye mbyoka yi li kokambo koye, yi thigululwe po kehangano lyOonzapo dhaJehova tayi tulwa kedhina lyopaveta ndyoka hali longitha, shi ikolelela komilandu dhoombaanga moshilongo sheni.

Iipambuliko nomikuli ndhoka omuntu i indilwa komahangano gontumba nenge kepangelo (stocks and bonds): Oto vulu wu yi gandje yi li omagano nenge wu nyole sha yela kutya ngele wa si iinima mbyoka nayi gandjwe kehangano lyOonzapo dhaJehova tayi tulwa kedhina lyopaveta ndyoka hali longitha moshilongo sheni.

Etungo nenge evi: Ngele owa hala okugandja etungo nenge evi omagano, kwatathana noshitayimbelewa tango. Oshitayimbelewa otashi ka tokola ngele etungo nenge evi otali vulu okulongithwa nenge otashi ka kala hwepo oku li landitha po, sho oshimaliwa tashi ningi shomayambidhidho giilonga yomuuyuni awuhe.

Omatestamendi noondokumende dhilwe dhopaveta dhi na ko nasha netopolo lyomaliko (Wills and Trusts): Oto vulu okunyola edhina ndyoka hali longithwa kehangano lyOonzapo dhaJehova moshilongo sheni, opo ehangano li thigulule po omaliko nenge iimaliwa yoye. Ngele to longitha omukalo nguka otashi vulika wu mone uuwanawa wontumba wu na ko nasha nokunanwa iifendela.

Ehangano lyopaveta ndyoka hali longithwa kOonzapo dhaJehova moshilongo sheni otali vulu okunyolwa metestamendi nenge moondokumende dhilwe dhopaveta dhi na ko nasha netopolo lyomaliko li ga thigulule po. Ihe kali na okunyolithwa li li omutopoli gwuuthiga woye nenge omukalelipo ngoka e na uuthemba wokuungaunga netopolo lyomaliko goye.

Opo wu mone uuyelele owundji, thinda polinka ndjika “Omayambidhidho gIilonga yomUuyuni Awuhe” pevi lyepandja lyetu jw.org, nenge wu kwatathane noshitayimbelewa shoka hashi tonatele iilonga moshilongo sheni.