“Iilonga mbyoka yi na okugwanithwa, iinene noonkondo”

OLYA li ethimbo lyoshigongi sha simama noonkondo muJerusalem. Omukwaniilwa David okwa li i ithana omalenga ge guuwa, aakwiita aakuluntu naanamadhina. Oya li ya halelela okuuva etseyitho lyi ikalekelwa. Jehova okwa li a lombwele omwanamati gwaDavid, Salomo, a tunge otempeli ombwanawa moka ta longelelwa mo. Omukwaniilwa omukokele gwaIsraeli okwa pewa omusindatungilo gwokutunga e te gu gandja kuSalomo. Omukwaniilwa David okwa ti: “Iilonga mbyoka yi na okugwanithwa, iinene noonkondo, oshoka mbuka kau shi uuwa womuntu, ihe otempeli yOmuwa Kalunga.” — 1 Ondjal. 28:1, 2, 6, 11, 12; 29:1.

Omukwaniilwa David okwa pula ishewe epulo tali ti: “Ope na tuu mbela mboka ya hala okweetela Omuwa oombalagelo?” (1 Ondjal. 29:5) Ando opo wa li, ando owa yamukula ngiini? Mbela ando owa yambidhidha ngaa iilonga mbyoka iinene noonkondo? Aaisraeli oya tameke niilonga yawo. Osha yela kutya ‘aantu oya gandja nehalo kOmuwa noya li yu uvite elago unene.’ — 1 Ondjal. 29:9.

Konima yomathelemimvo, Jehova okwa dhike po oshinima sha simanenena shi vulithe otempeli. Okwa dhike po otempeli onene yopambepo, ndjoka yi li elongongekidho ndyoka a tulila po aantu ye mu longele pakankameno lyekuliloyambo lyaJesus. (Heb. 9:11, 12) Jehova ota kwathele ngiini oshigwana she shi hangane naye kunena? Ote shi ningi okupitila miilonga yetu yokuninga aantu aalongwa. (Mat. 28:19, 20) Omolwiilonga mbika, omumvo kehe ohapu ningwa omakonakonombiimbeli omamiliyona, ohapu ninginithwa aantu omayovi nohapu totwa omagongalo omathele.

Oshikwawo, omolwomiyalu ndhono tadhi indjipala, ohapu nyanyangidhwa iileshomwa yopaMbiimbeli oyindji. Ohapu tungwa Iinyanga yUukwaniilwa oyindji noku yi opaleka nohapu kongwa wo omahala gokuningila iigongi iishona niinene. Mbela ito shi zimine kutya iilonga yetu yokutaandelitha onkundana ombwanawa oya simana noyi na ondjambi? — Mat. 24:14.

Ohole yokuhola Kalunga nooyakwetu nokuhola iilonga yokuuvitha Uukwaniilwa mbyoka ye endelela oyi inyengitha aapiya yaKalunga ‘ye mu etele oombalagelo’ mokugandja sha nehalo ewanawa. Itashi nyanyudha tuu ‘okusimanekitha Omuwa niinima yetu’ nokumona nkene tayi longithwa nuudhiginini nonoondunge okulonga iilonga iinene mondjokonona yaantu! — Omayel. 3:9.

Omikalo moka yalwe yaya ambidhidha iilonga yomuuyuni awuhe

Oyendji kunena ohaya “pungula” oshimaliwa nenge ya tokole kutya otaya kala haya tula iimaliwa yi thike peni mokaketha kegongalo hoka ka nyolwa “Omayambidhidho gIilonga yomUuyuni Awuhe.” (1 Kor. 16:2) Omwedhi kehe, omagongalo ohaga tumine iimaliwa mbyoka koshitayimbelewa shOonzapo dhaJehova shoka hashi tonatele iilonga moshilongo shawo. Oto vulu wo okutumina omayambidhidho goye shu ukilila kehangano lyopaveta lyOonzapo dhaJehova moshilongo moka wu li. Ngele edhina lyehangano ndyoka ku li shi, ninga ekwatathano noshitayimbelewa shoka hashi tonatele iilonga moshilongo sheni. Oondjukithi dhiitayimbelewa otadhi adhika ko-www.jw.org/ng. Omayambidhidho ngoka to vulu okutuma shu ukilila ongaashi ngaka taga landula mpaka:

OMAYAMBIDHIDHO NGOKA TAGA VULU OKUTUMWA GO GENEGENE

Okutuma oshimaliwa okupitila mombaanga, nenge nokakalata kehe kombaanga. Miitayimbelewa yimwe shika otashi vulu okuningwa ko-jw.org nenge okupitila kehala lyontumba lyokointaneta.
Iimaliwa koomuma, iikwamalyenge nenge iinima yilwe yongushu. Yi tuma pamwe nontumwafo ndjoka tayi ulike kutya iimaliwa nenge iinima mbyoka omayambidhidho.

OKUGANDJA KWA LONGEKIDHWA

Kakele komagano gopashimaliwa niinima yilwe yongushu, opu na omikalo dhilwe omuntu ta vulu okugandja a ambidhidhe iilonga yUukwaniilwa muuyuni awuhe. Omikalo ndhika odha popiwa pevi. Kutya nduno owa hala okulongitha omukalo gumwe nenge omikalo dhontumba, kwatathana tango noshitayimbelewa shoka hashi tonatele iilonga moshilongo sheni, opo wu mone kutya omikalo dhini hadhi longo moshilongo sheni. Molwaashoka iitegelelwa yopaveta noompango dhiifendela odha yooloka miilongo niilongo, oshi li nawa wu pule omayele kwaamboka ye shi iinima mbyoka, omanga inoo tokola kutya oto longitha omukalo guni.

Omakwashilipaleko: Oto vulu okugandja edhina lyopaveta ndyoka hali longithwa kehangano lyOonzapo dhaJehova moshilongo sheni, opo ehangano li thigulule omakwashilipaleko goye nenge openzela yoye.

Uumbo wombaanga: Oto vulu okupula ombaanga, opo iimaliwa yoye mbyoka yi li kokambo koye nenge yopenzela nenge mbyoka wa pungulitha uule wethimbo lyontumba, yi thigululwe po kehangano lyOonzapo dhaJehova tayi tulwa kedhina lyopaveta ndyoka hali longitha, shi ikolelela komilandu dhoombaanga moshilongo sheni.

Iipambuliko nomikuli ndhoka omuntu i indilwa komahangano gontumba nenge kepangelo (stocks and bonds): Oto vulu wu yi gandje yi li omagano nenge wu nyole sha yela kutya ngele wa si iinima mbyoka nayi gandjwe kehangano lyOonzapo dhaJehova tayi tulwa kedhina lyopaveta ndyoka hali longitha moshilongo sheni.

Etungo nenge evi: Ngele owa hala okugandja etungo nenge evi omagano, kwatathana noshitayimbelewa tango. Oshitayimbelewa otashi ka tokola ngele etungo nenge evi otali vulu okulongithwa nenge otashi ka kala hwepo oku li landitha po, sho oshimaliwa tashi ningi shomayambidhidho giilonga yomuuyuni awuhe.

Omatestamendi noondokumende dhilwe dhopaveta dhi na ko nasha netopolo lyomaliko (Wills and Trusts): Oto vulu okunyola edhina ndyoka hali longithwa kehangano lyOonzapo dhaJehova moshilongo sheni, opo ehangano li thigulule po omaliko nenge iimaliwa yoye. Ngele to longitha omukalo nguka otashi vulika wu mone uuwanawa wontumba wu na ko nasha nokunanwa iifendela.

Ehangano lyopaveta ndyoka hali longithwa kOonzapo dhaJehova moshilongo sheni otali vulu okunyolwa metestamendi nenge moondokumende dhilwe dhopaveta dhi na ko nasha netopolo lyomaliko li ga thigulule po. Ihe kali na okunyolithwa li li omutopoli gwuuthiga woye nenge omukalelipo ngoka e na uuthemba wokuungaunga netopolo lyomaliko goye.

Opo wu mone uuyelele owundji, thinda polinka ndjika “Omayambidhidho gIilonga yomUuyuni Awuhe” pevi lyepandja lyetu jw.org nenge wu kwatathana noshitayimbelewa shoka hashi tonatele iilonga moshilongo sheni.