Jehovah oha futu ayehe mboka taye mu kongo ya mana mo

1, 2. (a) Ohole neitaalo oyi na ekwatathano lini? (b) Omapulo geni tatu ka kundathana?

OTU hole Jehova, ‘oshoka oye a kala e tu hole tango.’ (1 Joh. 4:19) Omolwohole ye, Jehova oha yambeke aapiya ye aadhiginini. Sho ohole yetu yokuhola Jehova tayi koko, eitaalo lyetu otali kolo notatu ka kala twa tompwa kutya Jehova ota ka yambeka mboka e hole. —  Lesha Aahebeli 11:6.

² Uukwatya waJehova wokuyambeka ohawu ulike kutya oye lye naanaa noha ningi shike. Eitaalo lyetu itali kala lya kola ngele inatu tompwa shili kutya Kalunga ota ka yambeka mboka taye mu kongo ya mana mo, molwaashoka “eitaalo otashi ti okukala tu na einekelo lya kola miinima mbyoka twa tegamena.” (Heb. 11:1) Okukala tu na eitaalo osha kwatela mo okukala tu na etegameno momauvaneko gaKalunga. Ihe ongiini tatu vulu okumona uuwanawa mondjambi ndjoka twa tegamena? Ongiini Jehova a li a yambeke aapiya ye yonale noyopethimbo lyetu? Natu shi taleni.

JEHOVA OKU UVANEKA KUTYA OTA YAMBEKE AAPIYA YE

3. Euvaneko lini tali adhika muMaleaki 3:10?

³ Jehova oku uvaneka kutya ota yambeke aapiya ye aadhiginini, onkene ote tu hiya tu longe shoka shu uka, opo e tu yambeke. Ombiimbeli otayi ti: “Yelekii ndje, notamu ka mona, sho tandi egulula oombende dhokegulu, ndi mu lokithile eloolo lyomaliko guuyamba owindji.” (Mal. 3:10) Ohatu ulike olupandu lwetu olunene uuna twa taamba ko ehiyo ndyoka.

4. Omolwashike tatu vulu okukala twi inekela meuvaneko lyaJesus ndyoka lya popiwa muMateus 6:33?

⁴ Jesus okwa shilipaleke aalongwa ye kutya ngele oya pititha Uukwaniilwa komeho, Kalunga ote ke ya yambidhidha. (Lesha Mateus 6:33.) Shoka Jesus okwe shi popi, molwaashoka oku shi kutya omauvaneko gaKalunga ohaga gwanithwa aluhe. (Jes. 55:11) Natse otatu vulu okukala nuushili kutya ngele otwa kala tu na eitaalo lya kola muJehova, Jehova ota ka gwanitha euvaneko lye ndyoka tali ti: “Itandi ku etha nando; itandi ku thigi po.” (Heb. 13:5) Otatu vulu okuyelekanitha oohapu ndhika dha nwethwa mo naashoka Jesus a popi kombinga yokukonga tango Uukwaniilwa nuuyuuki waKalunga.

5. Omolwashike omukalo ngoka Jesus a yamukula Petrus tagu koleke eitaalo?

⁵ Omuyapostoli Petrus okwa pulile Jesus a ti: “Tala, otse twa thigi ko iinima ayihe e tatu ku landula. Otatu ka pewa shike?” (Mat. 19:27) Jesus pehala lyokuganda Petrus sho e mu pula epulo ndyono, okwa lombwele owala aalongwa ye kutya otaya ka yambekwa, omolwomaiyambo gawo. Aayapostoli aadhiginini nayalwe otaya ka pangela pamwe naye megulu, ihe nongashingeyi otaya yambekwa. Jesus okwa ti: ‘Kehe tuu ngoka a thigile ko egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje, ote ke yi mona lwethele yi vule mbika, nomwenyo gwaaluhe ote gu pewa.’ (Mat. 19:29) Aalongwa yaJesus otaya ka mona omayambeko ogendji ge vule omaiyambo ngoka taya ningi. Mbela ootate, oomeme, aamwatate, aamwameme naamwetu yopambepo kaye vule iinima mbyoka twe etha po omolwUukwaniilwa?

ETEGAMENO NDIKA LYETU “OLYA KWATA LYA DHIGININA OOMWENYO DHETU”

6. Omolwashike Jehova u uvanekele aalanduli ye kutya ote ke ya pa ondjambi?

⁶ Jehova oku uvaneka kutya ota ka pa aalongeli ye aadhiginini ondjambi, noku shi kutya shoka otashi ke ya kwathela ya kale ye na eitaalo lya kola sho taya makelwa. Kakele kokunyanyukilwa omalaleko nuuyamba gopambepo ngashingeyi, aapiya yaJehova aadhiginini oya tegelela nenyanyu omalaleko nuuyamba ogendji monakuyiwa. (1 Tim. 4:8) Osha yela kutya uuna twi itaala lela kutya Jehova ota “futu ayehe mboka taye mu kongo” ya mana mo, otashi ke tu kwathela tu kale tu na eitaalo lya kola. —  Heb. 11:6.

7. Etegameno ohali longo ngiini lya fa ekwatitho lyosikepa?

⁷ Jesus meuvitho lye lyokondundu okwa ti: “Nyanyukweni, ligoleni pombanda, oshoka ondjambi yeni onene yi li megulu. Oshoka osho ngeyi wo ya tidhaganene aahunganeki ye mu tetekela.” (Mat. 5:12) Aapiya yaKalunga mboka ye na etegameno lyokuya megulu naamboka ye na etegameno lyokukala nomwenyo sigo aluhe meviparadisa, otaya ka ‘nyanyukwa nokuligola pombanda.’ (Eps. 37:11; Luk. 18:30) Kutya nduno otatu yi megulu nenge otatu ka kala kombanda yevi, etegameno lyetu “olya kwata lya dhiginina oomwenyo dhetu.” (Heb. 6:17-20) Ngaashi naanaa ekwatitho hali kaleke osikepa ya thikama ya mwena moshikungulu, etegameno lyashili otali vulu oku tu kwathela tu kale twa kola pamaiyuvo, pamadhiladhilo nopambepo. Otali vulu oku tu kwathela tu kale tu na oonkondo dhokwiidhidhimikila omaupyakadhi.

8. Etegameno ohali shonopeke ngiini iimpwiyu yetu?

⁸ Etegameno lyetu lya kankamena kOmbiimbeli oli na oonkondo okushonopeka iimpwiyu mbyoka tu na ngashingeyi. Omauvaneko gaKalunga ohaga pupaleke omitima dhetu ndhoka dhi na iimpwiyu, ngaashi omugwayo hagu pupaleke oshipa. Itashi tu hekeleke tuu uuna ‘uudhigu wetu tatu wu fala kOmuwa’ neinekelo kutya ‘ote tu popile’! (Eps. 55:22) Otatu vulu okukala neinekelo lya kola kutya Kalunga ota vulu “okulonga oshindji shi vulithe pushoka tatu shi indile nenge tatu shi dhiladhila.” (Ef. 3:20) Jehova ite ke tu pa owala oshindji, ihe ote ke tu pa “oshindji shi vulithe pushoka” tatu mu indile.

9. Ongiini tatu vulu okukala nuushili kutya Jehova ote ke tu yambeka?

⁹ Otwa pumbwa okukala tu na eitaalo muJehova tali longo nokukala hatu vulika kewiliko lye, opo tu vule okupewa ondjambi kuye. Moses okwa lombwelele oshigwana shaIsraeli a ti: “Omuwa Kalunga koye ote ke ku yambeka mevi ndyoka te li ku pe. Moshigwana shoye itamu kala ohepele, ngele oto vulika kOmuwa Kalunga koye e to gwanitha shili ayihe mbyoka tandi ku lombwele nena. Omuwa ote ke ku yambeka, ngaashi u uvaneka.” (Deut. 15:4-6) Mbela owi inekela ngaa thiluthilu kutya Jehova ote ke ku yambeka ngele owa tsikile oku mu longela nuudhiginini? Osha yela kutya owu na etompelo ewanawa okukala wu na einekelo lya tya ngaaka.

JEHOVA OKWA LI E YA YAMBEKE

10, 11. Jehova okwa li a pe Josef ondjambi yini?

¹⁰ Ombiimbeli oya nyolwa omolwuuwanawa wetu. Oyi na omahokololo ogendji gankene Kalunga a li a yambeke aapiya ye aadhiginini. (Rom. 15:4) Josef oku li oshiholelwa sha dhenga mbanda kutse. Aamwahe oya li ye mu landitha po omupika, nokonima yethimbo omukulukadhi gwamwene gwe okwa li e mu lundile kutya okwe mu kwata koonkondo, naashika osha li she mu falitha mondholongo muEgipiti. Mbela ka li we pamwe naKalunga ke? Hasho nando. ‘Omuwa okwa li naJosef e te mu yambeke nOmuwa okwe mu pe elago ewanawa mwaayihe e yi longo.’ (Gen. 39:21-23) Josef okwa li i idhidhimike neifupipiko nonando okwa li e li momamakelo ngoka.

¹¹ Konima yoomimvo, Farao okwa mangulula mo Josef mondholongo nokwe mu langeke po omupangeli gwaEgipiti alihe, molwaashoka Josef okwa li omwiifupipiki. (Gen. 41:1, 37-43) Sho omukulukadhi gwaJosef a mono aanona yaali yamati, Josef “okwa luku osheeli she Manasse. Okwa ti: ‘Kalunga okwa dhimbitha ndje okuhepekwa kwandje negumbo lyatate.’” Omunona omutiyali okwe mu luku Efraim e ta ti ishewe: “Kalunga okwa pe ndje aanona mevi lyuudhigu wandje.” (Gen. 41:51, 52) Molwaashoka Josef okwa kala omudhiginini kuKalunga, Kalunga okwe mu laleke nuuyaamba, noshizemo, okwa li a hupitha Aaisraeli nosho wo Aaegipiti kondjala. Osha yela kutya Josef okwa li e shi dhimbulula mo kutya Jehova oye e mu yambeke. —  Gen. 45:5-9.

12. Jesus okwa kala ngiini omudhiginini sho ta makelwa?

¹² Jesus Kristus naye okwa kala omudhiginini kuJehova sho eitaalo lye lya kala tali makelwa momikalo odhindji, nokwa li a pewa ondjambi ye. Oshike sha li she mu kwathele a pondole? Oohapu dhaKalunga otadhi ti: “Omolwenyanyu ndyoka lya li lye mu tegelela okwi idhidhimikile esheko nokwa si eso [lyokomuti gwomahepeko, NW].” (Heb. 12:2) Osha yela kutya Jesus okwa li a mono enyanyu mokusimanekitha edhina lyaKalunga. Oshikwawo, okwa li a hokiwa kuHe nokwa li e na uuthembahenda owundji. Ombiimbeli oya ti kutya “okwa kuutumba kolulyo lwoshipangelapundi shaKalunga.” Oya ti ishewe: “Kalunga okwe mu yele pombandambanda nokwe mu luku edhina enene li vule omadhina agehe.” —  Fil. 2:9.

JEHOVA IHA DHIMBWA IILONGA YETU

13, 14. Jehova oha kala u uvitile ngiini shoka tatu mu longele?

¹³ Otatu vulu okukala nuushili kutya Jehova oha pandula oonkambadhala kehe tatu ningi dhoku mu longela. Oku uvite ko iinima ayihe mbyoka hatu kala twa limbililwa nenge tatu ipula nayo. Ohe tu uvile ohenda uuna twa gwililwa po komikundu dhopashimaliwa nodhuukolele ndhoka hadhi tu imbi tu longe iilonga yetu iiyapuki. Otatu vulu okukala neinekelo lya kola kutya Jehova oha sile ohenda aapiya ye aadhiginini, nonando ohaya mono omaupyakadhi. —  Lesha Aahebeli 6:10, 11.

¹⁴ Natu dhimbulukweni wo kutya Jehova ‘ohu uvu omagalikano’ getu e tatu kala tu na einekelo kutya ote ke ga yamukula. (Eps. 65:2) “Tate omunahenda, Kalunga, ngoka kuye haku zi ekwatho alihe,” ote ke tu pa ekwatho ndyoka twa pumbwa, tashi vulika te shi ningi okupitila mooitaali ooyakwetu. (2 Kor. 1:3) Ohashi gumu Jehova uuna tatu ulukile yalwe ohenda. Ombiimbeli otayi ti: “Ngoka ta sile ohepele ohenda, ota pungula kOmuwa, Omuwa ote ke mu futila iilonga ye iiwanawa.” (Omayel. 19:17; Mat. 6:3, 4) Onkee ano, uuna tatu kwatha mboka ye li muudhigu nopwaa he na okwiihola mwene, Jehova ote ke tu futila iilonga yetu iiwanawa, oshoka oku uvaneka kutya ota ka futa mboka taya kwatha yakwawo.

ONDJAMBI NDJOKA TATU MONO NGASHINGEYI NAANDJOKA TATU KA MONA MONAKUYIWA

15. Ondjambi yini wa tegelela oku ka mona? (Tala kethano lyopetameko.)

¹⁵ Aakriste aagwayekwa oye na etegameno lyoku ka pewa ‘ondjambi yesindano sho Kalunga, omupanguli omuyuuki, te ke ya ninga aayuuki mesiku ndyoka.’ (2 Tim. 4:7, 8) Onkee ano, ino kala twi ipula uuna Kalunga e ku pe ondjambi yi ili. ‘Oonzi dhelwe’ dhaJesus omamiliyona odha halelela oku ka pewa ondjambi yomwenyo gwaaluhe moparadisa kombanda yevi. Moparadisa moka,‘otaa ka mona uulinawa nombili.’ —  Joh. 10:16; Eps. 37:11.

16. Ehekeleko lini tatu a dha muJohannes gwotango 3:19, 20?

¹⁶ Omathimbo gamwe otashi vulika tu kale tu uvite kaatu na sho twa tompola po nenge tu kale twa limbililwa ngele Jehova okwa hokwa ngaa oonkambadhala dhetu. Otashi vulika nokuli tu kale tatu ipula ngele Jehova ote ke tu pa ngaa ondjambi yasha. Inatu dhimbwa kutya “Kalunga oye omunene e vule eiyuvo lyetu nokwa tseya iinima ayihe.” (Lesha 1 Johannes 3:19, 20.) Ote ke tu pa ondjambi shi ikolelela kiilonga yetu mbyoka tatu longo tatu inyengithwa keitaalo nokohole, kashi na nduno mbudhi kutya oyi thike peni. — Mark. 12:41-44.

17. Omayambeko gamwe po geni tatu nyanyukilwa ngashingeyi?

¹⁷ Nonando otu li momilema dhomasiku gahugunina gonkalelo ya kolokosha yaSatana, Jehova ote tu yambeke. Ota ka shilipaleka ngele aalongeli ye yashili oye na ngaa oondya dhopambepo dha gwana noyu uvite ombili moparadisa yopambepo. (Jes. 54:13) Ngaashi Jesus u uvaneka, Jehova ote tu yambeke ngashingeyi moku tu etha tu kale oshitopolwa shuukwanegumbo wu na ohole waamwatate naamwameme yopambepo muuyuni awuhe. (Mark. 10:29, 30) Onkee ano, mboka taya kongo Kalunga ya mana mo, otaya pewa ondjambi ndjoka itaayi vulu okuyelekwa nasha yombili yopamadhiladhilo, egwaneno nenyanyu. — Fil. 4:4-7.

18, 19. Aapiya yaJehova ohaya kala yu uvitile ngiini omayambeko ngoka haya pewa kuye?

¹⁸ Aapiya yaJehova muuyuni awuhe oya mona kutya Jehova oha gandja ondjambi kaaku na we. Pashiholelwa, Bianca, a za koNdowishi ota ti: “Otandi pandula lela Jehova sho a kwathele ndje shi na ko nasha nomaipulo gandje naasho a kala pamwe nangame esiku kehe. Muuyuni omwa vundakana nokamu niwe ohenda. Ihe sho tandi longo pamwe naJehova, ondi uvite ndi li megameno lyomaako ge. Uuna tandi ningi omaiyambo, opo ndi mu longele, oha yambeke ndje lwiikando oyindji.”

¹⁹ Natu taleni shi na ko nasha naPaula gwomimvo 70 gwomoKanada ngoka a li ta hepekwa nayi komukithi hagu ithanwa spina bifida, uuvu wesipa lyombunda. Ota ti: “Okukala ihoo vulu okwiinyenga naanaa itashi ti ito vulu okukutha ombinga muukalele. Ohandi uvitha momikalo dhi ili nodhi ili, ngaashi okugandja uunzapo mongodhi nokugandja uunzapo wontukuluka. Opo ndi itse omukumo, onda nyola omanyolo mokambo kandje nosho wo omadhiladhilo okuza miileshomwa yetu moka handi vulu okutala omathimbo nomathimbo. Okambo hoka onde ki ithana: ‘Okambo kandje kehupitho.’ Itatu ka kala aluhe twa teka omukumo ngele otwa kala tatu gandja eitulomo komauvaneko gaJehova. Jehova ota ka kala aluhe te tu kwathele, kutya nduno onkalo yetu oyi kale ya fa peni.” Otashi vulika onkalo yoye ya yooloka ko lela kuyaBianca nenge kuyaPaula. Ihe nonando ongaaka, oto vulu okudhiladhila omikalo moka Jehova e ku yambeka nosho wo nkene a yambeka yalwe. Kashi shi tuu oshiwanawa okudhiladhila kunkene Jehova te ku yambeke ngashingeyi nonkene te ke ku yambeka monakuyiwa!

20. Oshike tatu ka nyanyukilwa ngele otwa tsikile okulongela Jehova nonomwenyo aguhe?

²⁰ Ino dhimbwa nando kutya omagalikano goye taga zi komutima nosho wo okupopya wa manguluka naKalunga oku “na ondjambi onene.” Oto vulu okukala nuushili kutya ngele owa ‘gwanitha ehalo lyaKalunga, oto ka pewa shoka e shi uvaneka.’ (Heb. 10:35, 36) Onkee ano, natu tsikileni okukoleka eitaalo lyetu ngashingeyi nokulongela Jehova nomwenyo aguhe. Shika otatu vulu oku shi ninga, tu shi kutya Jehova ote ke tu yambeka. — Lesha Aakolossa 3:23, 24.