Ewiliko lyOmbiimbeli oli na oshilonga kunena?

YAMWE OHAYA TI KALI NA. Ndohotola gumwe okwa ti kutya okulongitha Ombiimbeli yi ku wilike okwa fa owala to longitha embo lyuudhindoli lyomo 1920 nasha, wu longe oshilongwa shuudhindoli. Omuntu ngoka inaa simaneka Ombiimbeli otashi vulika e ku pule ngele oto ka longitha ngaa embo lyuuyelele wokompiuta onkulu itaayi longo we, li ku kwathele wu ilonge okulongitha okompiuta ompe. Niitya yimwe, aantu yamwe oya tala ko Ombiimbeli ya kulupa noonkondo.

Opu na ngaa omuntu a hala okulongitha embo ekulu li mu wilike muuyuni mbuka wa huma komeho pauteknolohi? Omapandja gokointaneta ogendji mwa kwatelwa ngoka ge na uuyelele mboka hawu vulu okumonika kukehe gumwe, ohaga gandja omayele ogendji newiliko li li pethimbo. Kootiivii ohaku kala aahungimwenyo ya pyokoka, aatseyinawa yonkalamwenyo nosho wo aanyoli yomambo. Oositola dhomambo ohadhi landitha omambo ogendji ngoka aantu taya vulu okulesha ya ninge oshinima shontumba kuyo yene, shoka she dhi ningitha dhi kale tadhi mono iimaliwa oyindji.

Ngele opu na uuyelele awuhe mboka wu li pethimbo, omolwashike wu na okulongitha Ombiimbeli ndjoka ya nyolwa pwa pita omimvo 2 000 nasha lwaampono? Mboka inaaya simaneka Ombiimbeli oye li ngaa mondjila sho ya ti kutya oku yi longitha yi ku wilike okwa fa owala to longitha embo ekulu lyuudhindoli nenge lyokompiuta? Osha yela kutya omapopyo ngoka oga puka. Uunongononi nuuteknolohi ohawu lunduluka nziya, ihe mbela oompumbwe dhaantu odha lunduluka? Aawe, aantu oya hala natango onkalamwenyo tayi ti sha, ombili negameno, ekwatathano ewanawa noyaandjawo nookuume aawanawa.

Nonando Ombiimbeli oya za nale, otayi gwanitha po oompumbwe ndhoka. Oya popya wo kutya oya nwethwa mo kOmushiti gwetu. Otayi tu wilike mukehe shimwe monkalamwenyo notayi tu kwathele tu ungaunge nuupyakadhi kehe. (2 Timoteus 3:16, 17) Niishewe, omayele gayo kage na nando esiku ga kulupe noihaga ngushuluka. Otayi ti: “Oohapu dhaKalunga odhi na omwenyo.” — Aahebeli 4:12.

Mbela shoka tayi popi oshoshili? Mbela onkulu nenge otayi tu pe omayele omawanawa noge na oshilonga ? Elalakano lyOshungolangelo ndjika oku ku kwathela wu mone omayamukulo komapulo ngaashi ngoka. Oyo yotango yomOshungolangelo dhi ikalekelwa ndhoka dha nyolwa momukalo nguka.