“Kalunga okwa li peni?”
“OHANDI PULA OLUNDJI TANDI TI: KALUNGA OKWA LI PENI?” — Omupapa Benedict XVI oye a popi oohapu ndhokamanga a li ta talele po okamba yoonkwatwa yaAuschwitz yi li moPoland.
UUNA PWA HOLOKA UUDHIGU, MBELA OHO IPULA KUTYA, ‘KALUNGA OKWA LI PENI?’ NENGE OWA LI WA ADHIKA KUUPYAKADHI MBOKA WE KU NINGITHA WU IPULE NGELE KALUNGA OKU NA KO NGAA NASHA NANGOYE PAUMWENE?
Otashi vulika wu uvite ngaashi Sheila gwokoAmerika a li u uvite. Okwa putudhilwa muukwanegumbo wu hole lela elongelokalunga nokwa popi a ti: “Okuza kuunona onda kala ndi hole Kalunga, molwaashoka oye Omushiti gwetu. Ihe nando ongawo kanda li ndu uvite ndi na ekwatathano naye. Onda li ndi shi oha kala e wete ndje, ihe ota tala ndje nee e li kokule. Kanda li ndi uvite e tonde ndje, ngame kanda li wo ndi wete e na ko nasha nangame.” Omolwashike Sheila a li e na omalimbililo? Okwa yelitha a ti: “Uukwanegumbo waandjetu owa li wa adhika komaudhigu ga landulathana, na Kalunga okwa fa owala a li itee tu kwathele nando osha.”
Ngaashi Sheila, nangoye otashi vulika wu na uushili kutya Kalunga Omunankondoawike oko e li. Ihe otashi vulika ho kala wa limbililwa ngele oku na ko ngaa nasha nangoye shili. Omulumentu omuyuuki Job, ngoka a li i itaala kutya Omushiti omunandunge noku na oonkondo, naye okwa li e na omalimbililo ga faathana. (Job 2:3; 9:4) Konima sho Job a adhika komaudhigu ga landulathana, noinaa fudha po, okwa pula Kalunga a ti: “Omolwashike to holeke ndje oshipala shoye noto tala ndje omutondi gwoye?” — Job 13:24.
Ombiimbeli otayi ti ngiini? Mbela Kalunga oye e na okupewa ombedhi uuna pwa holoka uudhigu? Mbela opu na ngaa uushili tawu ulike kutya Kalunga oku na ko nasha naantu ayehe nosho wo pauhandimwe? Mbela kehe gumwe paumwene ota vulu ngaa okutseya kutya oha kala e tu wete, u uvite ko oonkalo dhetu, he tu kenukile nenge kutya ohe tu kwathele uuna tu na omaupyakadhi?
Miitopolwa tayi landula otatu ka tala kwaashoka tatu ilongo meshito kombinga yankene Kalunga e na ko nasha natse. (Aaroma 1:20) Opo nduno, otatu ka ndjandjukununa shoka Ombiimbeli tayi ti kombinga yankene Kalunga e na ko nasha natse. Mpoka ngaa pu thike ‘oku mu tseya’ okupitila meshito nomOohapu dhe, opo ngaa tapu ka kala pu thike okukala wu shi kutya nani ‘oye omusilishimpwiyu gwoye.’ — 1 Johannes 2:3; 1 Petrus 5:7.