Nkene to vulu okuninga ekonakonombiimbeli lyopaumwene tali ti sha notali nyanyudha

Josua ta lesha Ompango; omakuma gaJeriko taga gu po, ihe egumbo lyaRahab inali gwa po; Josua ta galikana a yelutha iikaha ye mombanda

JOSUA okwa li a taalela eshongo enene. Okwa li e na okunana nondatu, opo a fale oshigwana shaIsraeli mEvi lyEuvaneko. Jehova okwa li e mu shilipaleke kutya ota ka pondola nokwe mu tsu omukumo a ti: ‘Ikolelela, e to kala nomukumo; dhiginina Ompango yandje. Yi ilonga omutenya nuusiku, u vulike kwaayihe ya nyolelwa mo. Nena oto kala omusindani nomunelago.’ — Jos. 1:7, 8.

Sho tu li ‘momathimbo ngaka omadhigu okukaliwa mugo,’ natse otu na okunana nondatu. (2 Tim. 3:1) Ngele otatu landula omayele gaJehova, natse otatu ka pondola twa fa Josua. Otu na okukala hatu lesha Ombiimbeli pandjigilile nokutula miilonga omakotampango gayo, sho twa taalela omashongo.

Oyendji yomutse, otashi vulika kaaye shi okukonakona Ombiimbeli nenge kaashi shi oshipu oku shi ninga. Shaashi okukonakona Ombiimbeli okwa simana, tala oshimpungu: “Kambadhala omaetopo ngaka.” Omu na iitsa iiwanawa mbyoka tayi vulu oku ku kwathela wu ninge ekonakonombiimbeli tali ti sha notali nyanyudha.

Omupisalomi okwi imbi ta ti: “Iipango yoye nayi wilike ndje; oshoka onde yi hokwa.” (Eps. 119:35) Nangoye ngele owa kala ho konakona Oohapu dhaKalunga, oto ka kala we dhi hokwa lela. Oto ka mona mo omaliko gopambepo ogendji, ngele to yi konakona.

Nonando ngoye ino pumbwa okuwilika oshigwana shontumba, wa fa Josua, owu na omaupyakadhi gopaumwene ngoka to kondjo nago. Ngaashi Josua, kala ho konakona Ombiimbeli nokuvulika kwaashoka sha nyolelwa mo. Uuna to shi ningi, oto ka kala omusindani nomunelago.

KAMBADHALA OMAETOPO NGAKA

Galikana manga inoo tameka okukonakona. MOmbiimbeli omu na omadhiladhilo gaKalunga omunankondoadhihe, ngoka a nyolitha, omolwuuwanawa woye. Sho to yi lesha, mu pula e ku kwathele wu yi uve ko, wu dhiginine shoka shi li mo nowu shi tule miilonga. — Esra 7:10.
Ipula omapulo sho to lesha Ombiimbeli nosho wo iileshomwa mbyoka ya kankamena kuyo: ‘Oshitopolwa shino, otashi longo ndje shike kombinga yaJehova? Osha kwatathana ngiini netumwalaka lyOmbiimbeli? Ongiini tandi vulu okulongitha omadhiladhilo ngaka ndi kwathele yalwe?’
Tedhatedha kwaashoka to ilongo. Mwena po, e to dhiladhila: ‘Uuyelele mbuno otawu kwathele ndje ngiini? Omolwashike ndi wete tawu kwathele ndje momukalo nguka? Owa pambathana ngiini nonakuziwa yandje, onkalo moka ndi li nosho wo nonakuyiwa yandje? Ongiini tandi vulu okutula miilonga omakotampango nomayele ngaka?’ (Job 23:5; Eps. 49:3) Tala ngele oto vulu okuyelitha kutya omolwashike Jehova ta kumagidha oshigwana she shi yande iinima yontumba. Dhiladhila wo kutya ando omuntu ngoka to lesha kombinga ye okwa ningile iinima momukalo gwi ili, ando oshe eta iizemo yini. — Deut. 32:28, 29.
Thaneka momadhiladhilo uuna to lesha oshinima shontumba. Pashiholelwa, mbela ito vulu okuthaneka momadhiladhilo sho aamwahe yaJosef ye mu landitha po kAaismaeli? (Gen. 37:18-28) Mbela owu wete shike, owu uvite shike nowu uvite ezimba lyashike? Dhiladhila ando wu li monkalo yawo. Mbela oya li taya dhiladhila shike noyu uvite ngiini? Okudhiladhila kwa tya ngawo, otaku ka mwenyopaleka ekonakonombiimbeli lyoye noku li ningitha li kale tali ti sha.
Longitha iikwathithi yopaMbiimbeli mbyoka twa pewa omo tu konge uuyelele. Tseya iikwathithi mbyoka yi li melaka lyoye kointaneta nosho wo mbyoka ya pilintwa. Ino kakadhala okupula yalwe ye ku kwathele wu ilonge nkene to vulu oku yi longitha momukalo tagu pondola. Iilongitho yimwe ngaashi Watch Tower Publications Index nenge Embo lyokukonga uuyelele lyOonzapo dhaJehova, otayi vulu oku ku kwathela wu mone uuyelele mboka wu li miitopolwa oyindji nosho wo omafatululo goovelise odhindji dhOmbiimbeli. Longitha wo okambo Ekwatho kungoye wu ilonge Oohapu dhaKalunga, moka mu na uuyelele tawu ti sha kombinga yontseyovi, eyalulo lyethimbo, ondjundo, okuyeleka nosho tuu.
Ngonga iitsa ya simana moshitopolwa yi ku kwathele wu dhimbulukwe shoka wi ilonga. Lombwela wo yalwe shoka wi ilonga. Mbela omu na oshinima shontumba shoka to vulu okulongitha muukalele? Moku shi ninga, ito ka dhimbulukwa owala shoka wi ilonga, ihe oto ka kwathela wo yalwe ya mone mo uuwanawa mwaashoka wi ilonga.