Uuna tu na uvu wa kwata miiti

Linda gwomimvo 71 okwa ti: “Sho ndohotola a lombwele ndje kutya ondi na okankela yokomapunga nokendjandja mundingo, onda li tandi dhiladhila kutya otandi si owala. Ihe konima sho nda shuna kegumbo onda ti, ‘Eewa ano, hasho nda li nda tegelela, ihe ondi na owala oku shi idhidhimikila.’”

Elise gwomimvo 49 okwa ti: “Otandi hepekwa komukithi gu ehama noonkondo ngoka gwa guma oonelive dhandje dhokolumoho lwoshipala shandje. Poompito dhimwe, uuwehame mboka owa li hawu etele ndje epolimano. Iikando oyindji, onda li handi kala ndu uvite nda sa ezaza nohandi kala nokuli tandi dhiladhila okwiidhipaga.”

Omulumentu te ehama e li kokatemba, a kundukidhwa kuyaandjawo

NGELE ngoye nenge ngoka wu hole owa monikile omukithi ngoka gwa li tagu vulu oku ku fala meso, owu shi nkene hashi kala shiyemateka noonkondo. Kakele komukithi gwo gwene, owa li wu na okuungaunga nomaiyuvo ga dhengwa pevi. Uumbanda nomaipulo otayi vulu oku ku tilitha noku ku polimaneka. Otashi vulika shi kale oshidhigu okumona epango tali opalele nenge tashi vulika omiti dhi kale tadhi ku etele uupyakadhi nenge dhi na ondilo. Uuwehame wopamadhiladhilo mboka hawu endele pamwe nuuwehame wa kwata miiti otayi vulu okukala ye ku gwilila po.

Openi tatu vulu okwaadha ekwatho? Oyendji oya mona kutya ehekeleko lyawo enene ohali zi mokugalikana Kalunga nomokulesha oohapu tadhi hekeleke mOmbiimbeli. Oshinima shimwe shoka tashi vulu oku tu kwathela ohole neambidhidho ndyoka hatu pewa kuyaandjetu nokookuume.

SHOKA SHA KWATHELA YAMWE YI IDHIDHIMIKE

Robert gwomimvo 58 okwa ti: “Kala wi itaala muKalunga note ke ku kwathela wi idhidhimikile uuvu woye. Galikana Jehova. Mu lombwela nkene wu uvite. Mu pula e ku pe ombepo ye ondjapuki. Mu pula e ku kwathele wu kale wu na omukumo nowu kale eladhipiko ewanawa kuyaandjeni nowu kale wa ngungumana sho to idhidhimikile uuvu woye.”

“Omuntu oho kala wa pepelelwa uuna yaandjeni taye ku ambidhidha pamaiyuvo. Esiku kehe omuntu gumwe nenge yaali ohaya dhengele ndje taya pula ndje taya ti: ‘Owu li po ngiini?’ Ookuume kandje yokomahala ga yoolokathana ohaya tsu ndje omukumo. Ohaya ningitha ndje lela ndi kale ndi uvite hwepo nohaya kwathele ndje kaandi sholole.”

Ngele oto ka talela po kuume koye ngoka ta ehama, ndhindhilika shoka Linda ta ti: “Omuvu naye oha kala a hala okukala nonkalamwenyo yi li nawa noiha kala aluhe a hala okupopya kombinga yomukithi gwe. Onkee ano, onawa ngele tamu popi kombinga yiinima mbyoka hamu popi shito kaayi na ko nasha nomukithi.”

Kalunga ohe tu kwathele nohe tu hekeleke okupitila mOmanyolo. Yaandjetu nookuuume ketu ohaye tu kwathele wo pahole. Otatu vulu okukala nuushili kutya onkalamwenyo otayi ti sha, nokuli nuuna tatu idhidhimikile uuvu wa kwata miiti.

Omanyolo gOmbiimbeli ngoka tage ku kwathele

Inekela muKalunga.

“Onda galikana Omuwa, oye nokwa yamukula ndje; okwa kutha ndje uumbanda auhe. Omapongo otage mu ithana, oye note ga yamukula.”— Episalomi 34:4, 6.

Linda ngoka a popiwa metetekelo ota ti: “Inandi galikana nando onale tandi ti: ‘Kwathela ndje ndi kale nawa.’ Ohandi galikana owala aluhe tandi ti: ‘Kwathela ndje ndi kale nda kola e to kwathele ndje ndi vule okwiidhidhimikila uuvu mbuka.’”

Nkondopalekwa kOohapu dhaKalunga.

“Kape na nando ogumwe muSion ta ka tya: ‘Otandi ehama.’”— Jesaja 33:24.

Tedhatedha komauvaneko gaKalunga gomonakuyiwa. Ngele oto shi ningi oto ka kala wu na etegameno ndyoka tali ke ku nkondopaleka wu kale to idhidhimike.

Pula yandjeni nookume koye ye ku kwathele

“Kuume oku na ohole aluhe, nomumwayina okwa valwa, opo a kwathe moluhepo.”— Omayeletumbulo 17:17.

Elise ngoka a popiwa metetekelo okwa ti: “Ino kala ho ikalele. Etha ookuume koye ye ku kwathele. Otashi vulika omathimbo gamwe ho kala wa hala okukala ongoye awike to dhiladhila nokuli kutya Kalunga iha pulakene omagalikano goye, ihe nonando ongaaka, ino ikalela.”