Okutameka Omakonakono mOkabroshure Ota Pula
1 Omahokololoningomwa okuza muuyuni auhe otagu ulike kutya okabroshure Kalunga Ota Pula Shike kuTse? oko oshilongitho shi na oonkondo shokulonga aantu oshili. Omakonakonombimbeli omayuvi ohaga tamekwa oshiwike kehe mokabroshure haka. Mbela ngoye owe shi pondola mokutameka nokuninga Ekonakonombimbeli mokabroshure Ota Pula?
2 Nonando oyendji oye wete oshipu noonkondo okugandja okabroshure, yamwe oye wete oshidhigu okutseya shoka ye na okutya opo ya tameke ekonakono. Mbela omikalo dhini yalwe ya mono hadhi shi pondola mokutameka Omakonakonombimbeli taya longitha okabroshure Ota Pula? Omaetopo taga landula otaga vulu okukwatha.
3 Pula U Ulike Nkene Ekonakono Hali Ningwa: Uuna tatu ningi etalelopo lyotango nenge eishunoko, pehala owala lyokuninga Ekonakonombimbeli nomukwanegumbo, otatu vulu okuulika nkene okersesa yEkonakonombimbeli tayi ka ningwa. Shika otashi ka kutha mo oshiholekwa nopo nduno uumbanda mboka hau kwata aanegumbo oyendji uuna tayu uvu oshitya “konakona.” Uuna tatu ilongo oku li ulika, otatu ka mona kutya nefalomo epu, otatu ka vula okutameka nziya ekonakono.
4 Oshinima Sha Simana Osho Okwiilongekidha: Uulaadhi wetu wokutameka Omakonakonombimbeli ou na ekwatathano shu ukilila nankene twi ilongekidha nawa. Okwiilongekidha manga kuyele otashi ke tu kwatha okusinda okukakadhala kehe hoka tashi vulika tu na mokukala nombinga miilonga yEkonakonombimbeli. Mokwiidheula shoka tatu ka popya iikando oyindji, otatu ka vula unene okukundathana, okupopya omadhiladhilo getu nuupu nonoohapu dhetu yene. Shika itashi ke tu kwatha owala tu kale twa manguluka mokupopya kwetu ihe otashi ka kwathela wo omunegumbo a kale a manguluka.
5 Uuna to idheula, oshi li nawa okutala kutya ethimbo li thike peni wa popya opo u vule okutseyithila omunegumbo kutya otashi ka pula ethimbo li thike peni okuulika nkene ekonakono hali ningwa. Konima yokwiitseyitha, omumwatate gumwe oha ti: “Onde ku talele po opo ndi ku ulukile oprograma yetu yEkonakonombimbeli lyoshali. Otashi kutha ominute ntano lwaampono oku shi ulika. Ou na mbela ominute ntano?” Oshileshwa 1 shokabroshure Ota Pula otashi vulu okuulikwa mominute ntano lwaampono. Dhoshili, omanyolo gamwe owala ngoka wa hogolola taga vulu okuleshwa muule wethimbo ndyoka, ihe okumana ko oshileshwa shotango mominute omishona, omunegumbo ota vulu okumona ekonakono lye lyotango. Opo nduno mu tseyithila kutya uuna to galuka mu konakone Oshileshwa 2, oto ka kutha owala ominute 15.
6 Epopyo tali landula olye shi pondola:
◼ “Onda hala oku ku ulukila okersesa yEkonakonombimbeli epu noonkondo noihayi kwata ethimbo ele mokulongitha okabroshure haka Kalunga Ota Pula Shike kuTse? Oyendji oya mona kutya miiwike 16 moka taya longitha tashi vulika nokuli ominute owala 15 moshiwike, otaya vulu okumona omayamukulo gopamanyolo tage ya mbilipalele komapulo ngaka gOmbimbeli ga simana.” Ulika paufupi oshikalimo. Yanuna kOshileshwa 1, e to ti: “Ngele oto vulu oku tu pa ominute ntano lwaampono, otwa hala oku ku ulukila nkene shika hashi longo. Oshileshwa 1 oshi na oshipalanyolo ‘Nkene To Vulu Okutseya Shoka Kalunga Ta Pula.’ ” Nopo nduno lesha omapulo gatatu, e to yelitha oonomola dhi li miikondekitho. Lesha okatendo 1, e tu ulukile omunegumbo nkene ta vulu okumona eyamukulo. Omunegumbo ota vulu okupulwa a leshe okatendo 2. Opo nduno tya: “Shi ikwatelela kuuyelele mbuka, oto yamukula ngiini epulo ndika? [Lesha epulo ishewe, e to etha omunegumbo a tye sha.] Oto ka ndhindhilika kutya opu na omishangwa mokatendo kehe. Ndhika otadhi ukitha eitulomo lyetu keyamukulo lyOmbimbeli komapulo ngaka. Pashiholelwa, natu leshe 2 Timoteus 3:16, 17 e to tala ngele ota yambidhidha eyamukulo ndyoka wa gandja shi na ko nasha nomunyoli gwOmbimbeli.” Konima sho wa lesha okatendo 3, wa tala epulo nowa lesha Johannes 17:3, ukitha eitulomo lyomunegumbo kontseyo ndyoka a mono mokweendulula Oshileshwa 1. Poshitsa shika oto vulu okuyanuna Oshileshwa 2 e to lesha epulo lyahugunina: “Omikalo mbali dhini moka tatu vulu okwiilonga kombinga yaKalunga?” Opo nduno pula: “Uunake to ka kala u na ominute 15 lwaampono opo tu vule okuninga Oshileshwa 2 nokumona eyamukulo?”
7 Osha simana okukaleka oonkundathana oompu nokupandula omunegumbo mpoka tashi wapa. Uuna elongekidho lyetalelopo ekwawo tali ningwa, pehala lyokupula ngele okwa hala okutsikila, mu ladhipika owala a landule omukalo ogwo tuu ngoka shi na ko nasha noshileshwa tashi landula. Na tseye kutya oto ke shi nyanyukilwa okugaluka. Aauvithi yamwe ohaya pula ya ninge oshileshwa mongodhi ngele oshi li oshidhigu okumona ethimbo oku shi ninga. Oto vulu wo okuladhipika ngoka to konakona naye opo okabroshure a kale he ka tula pehala lya gamenwa noli li nawa opo a vule oku ka mona nuupu petalelopo lyoye tali landula.
8 Kala Wa Tokola Toko: Nonando okwiilongekidha oko kwa simana opo tu shi pondole, otu na okukala twa tokola toko okwaaheetha oku ya talela po aluhe. Okulonga oshileshwa mominute omishona otashi vulu okukala eshongo, ano kala wa tokola toko okwiidheula iikando oyindji ngaashi sha pumbiwa shoka to ka popya opo u kale to popi othaathaa uuna tu ulike nkene ekonakono hali ningwa. Kambadhala okuulika nkene ekonakono hali ningwa nakehe ngoka to adha keyelo, nomokugandja uunzapo pomathimbo inaaga longekidhwa nomongodhi. Ngele oshidhigu kungoye okutameka Ekonakonombimbeli, ino teka omukumo. Oku shi pondola okutameka Omakonakonombimbeli otashi pula etokolotoko nehalo lyashili okulombwela yalwe oshili.—Gal. 6:9.
9 Mokulongitha omaetopo ngaka, ngoye wo oto vulu okumona uuthembahenda wokukwathela gumwe e ende mondjila tayi fala komwenyo, mokutameka nomokuninga Ekonakonombimbeli mokabroshure Ota Pula.—Mat. 7:14.