Okulonga aantu tatu longitha okambo Onkundana Ombwanawa
1. Okambo Onkundana ombwanawa ya za kuKalunga oka nuninwa shike?
1 Ngaashi sha kundathanenwe mokafo kUukalele Wetu wUukwaniilwa kaJuli, oshilongitho shimwe sha simana mokulonga kwetu aantu osho okambo Onkundana ombwanawa ya za kuKalunga. Omu na omanyolo inaaga tothwa mo, opo aanegumbo ya vule okunyanyukilwa shoka tayi ilongo mOmbiimbeli yo yene. Nonando iileshomwa yetu oyindji yokukonakonwa oya nyolwa momukalo moka omuleshi ta vulu okwiilonga sha kuye mwene, oshileshomwa shika osha nuninwa okukonakonwa pu na gumwe te ku kwathele. Onkee ano, uuna tatu shi gandja, otu na okuulika nkene hashi konakonwa, opo omunegumbo a vule okumona kutya oshiwanawa noonkondo okwiilonga onkundana ombwanawa mOmbiimbeli. — Mat. 13:44.
2. Ongiini tatu vulu okulongitha okambo Onkundana Ombwanawa petalelopo lyotango?
2 Petalelopo lyotango: Oto vulu okutya: “Onde ya po, tu kundathaneni, molwaashoka aantu kunena ohayi ipula uunene kutya uuyuni mbuka owu uka peni. Oto dhiladhila kutya oonkalo muuyuni onadhi ka hwepopala ngaa? [Tegelela a yamukule.] Ombiimbeli oyi na onkundana ombwanawa ndjoka tayi tu pe etegameno. Mpaka opu na omapulo gamwe ngoka ga yamukulwa kOmbiimbeli.” Pa omunegumbo okambo, e to mu pula a hogolole epulo kepandja lyahugunina. Mu ulukila nkene ekonakono hali ningwa, to longitha okatendo kotango moshileshwa shoka. Shimwe ishewe, pula omunegumbo epulo tali pendutha ohokwe moshileshwa shoka wa hogolola. Mu ulukila nkene okambo taka vulu oku mu kwathela a mone eyamukulo okuza mOmbiimbeli. Ngele opu na okavidio taka popi kombinga yaashoka shi li moshileshwa shoka, omuuvithi ota vulu oku ka ulukila omunegumbo.
3. Yelitha nkene ekonakonombiimbeli hali ningwa to longitha okambo Onkundana Ombwanawa.
3 Nkene ekonakonombiimbeli hali ningwa: (1) Lesha epulo lya luudhikwa wu kwathele omunegumbo a vule okugandja eitulomo koshitsa sha simana. (2) Lesheni okatendo taka landula. (3) Lesheni omanyolo ngoka ga nyolwa ge endeka, e to longitha omapulo ga dhindwa nawa wu kwathele omunegumbo a mone nkene omanyolo taga yamukula epulo ndyoka. (4) Ngele epulo ndyoka oli na uutendo uyali, ningeni shoka sha popiwa monomola 2 no 3. Ngele opu na okavidio taka tsu kumwe nepulo, ihe ino adhika natango we ka ulukila omunegumbo, oto vulu oku ke mu ulukila. (5) Pehulilo pula omunegumbo epulo lyokatendo hoka mwa ningi, opo wu shilipaleke ngele oku uvite ko ngaa.
4. Oshike tashi ke tu kwathela tu longithe nuunkulungu oshilongitho shika sha dhenga mbanda?
4 Kala wu shi nawa okulongitha okambo haka. Ka longitha poompito adhihe tadhi opalele. Kaleka omukonakonimbiimbeli momadhiladhilo manga inoo ya kuye. Konga omukalo omwaanawa gwokutompathana naye, sho to longitha omanyolo ngoka ge etwa mo. (Omayel. 15:28; Iil. 17:2, 3) Sho ontseyo yoye yoku ka longitha tayi ende tayi koko, oto ke ka tala ko ke li oshilongitho oshiwanawa uuna to longo aantu oshili.